-
تميم المجد
انا من محبي البورسلان للدرج وذلك لأنه أوفر بكثير من الرخام وكذلك درجة لمعانه تبقى ما تتغير وكذلك يقاوم الكيماويات والأحماض ولا يحتاج حماية ولا صيانة ولا تلميع
فيه أنواع مطفية وأنواع خشنة مثل الحجر ما تزحلق .. كما أن حف الزاوية سهل عند أي محل معالجة رخام وكذلك قص النعلات والعتبات .. الجزء القائم ممكن استخدام سيراميك بنقش معين وممكن نحصل قطع مناسبة لدرجنا بارتفاع معقول
هنا تم استخدام ستيل للزاوية وبزاوية حادة لو ضربتها رجل شخص ساقط لأنكسرت لذلك الزاوية اللافة أأمن بكثير حتى لو ستيل أو بلاستيك
-
تميم المجد
هذي الملاحظات أكيد ما يلتفت لها المالك أما الاستشاري أو المقاول الفاهم هو مسؤول عنها 100%
للبيوت ارتفاع باب يوصل 2.44 متر هو اللي في حدود الاقتصادي لأن اللوح يجي ارتفاعه 2.44 وعرضه 1.22 .. اللي يحبون الارتفاع والباب اللي بطول كامل الارتفاع يقدرون يخلون فوق تكميلة ثابتة
نقطة مهمة هي ملء الطابوق المجاور لفتحة الباب أو الدريشة بالخرسانة هذي لازم تنتبهون لها وتنبهون الاستشاري لو قليل خبرة وتحطونها شرط أساسي في عقودكم
-
تميم المجد
للي يحبون يمرون لاس فيغاس دوم يشترون هالبيت للسكن
بس فيه أفكار كثيرة يقدر يستغلها الواحد لبنيانه
لي مأخذ على التصميم وهو الحائط الحجري العريض والحجر مثبت بس بشبك حديد هذا بيكون ملاذ جيد للبريعصية والزهيوية وجو لاس فيغاس يساعد خصوصاً مع الماء المنتشر حول البيت
-
تميم المجد
في الفيديو الفائت يتكلم عن الغبار والتنظيف وهذي حقيقة بس انا استبعدتها والظاهر لاس فيغاس منطقة صحراوية واتوقع يجيهم غبار قوي مثل وضعنا تقريباً
أنصح تشوفونه وايد غريب حتى رشاشات رذاذ الماء لتلطيف الجو فيه
-
تميم المجد
أحد الإخوان يسأل من كم يوم عن تصميم مجلس مستطيل .. هذا يناقش فكرة وانا احب اضيف ان المساحة المتاحة أكيد تحكمك لمكونات المجلس .. هذا بنيان نقدر نقول رخيص .. عندنا ممكن نسويه خرسانة ومع سكايلايت بس حلاة الواجهة تكون كاملة قزاز والباب وسطي والجلسة على الثلاث جوانب مع ترك الواجهة القزاز مفتوحة بدون كراسي تغطي عليها وبدون تعتيم
-
تميم المجد
شنسوي لو استخدمنا قراوت نوع رخيص أو يعفن ويسود ؟
في الأصل لازم نستخدم نوع خاص وقوي ونخلطه حسب تعليمات المصنع لكن لو استخدمنا اسمنت أبيض مثلاً وكان متماسك ومقبول نقدر نحط عليه مادة عازلة sealant product for grout
أكيد هذي النوعية موجودة في قطر أو شبيهة لها
-
تميم المجد
أي مادة عازلة أو كيماوية لها سنوات خدمة ولازم تجدد بعد انتهاء وقتها أو ملاحظة عدم فاعليتها
-
تميم المجد
تفاصيل مهمة للتبليط وحلول لإلتقاء بلاط الحائط مع بلاط الأرضية وللزوايا .. موجودة عندنا بكثرة وفي كم مكان
-
تميم المجد
فوق بالنسبة لفاصل التمدد فيه نوعين .. حراري خاص بالبلاط فقط وفرق تمدده عن الخرسانة تحته وهذا نعمله مستقل عن الأرضية .. وفاصل التمدد الانشائي اللي لازم نقطع المبنى لقطعتين بالكامل توصل حتى للأساسات والمهندس خلط بين المفهومين فوق فانتبهوا لهذا الخلط وخلوا الخرسانة التحتية تحت البلاط كاملة وغير مفصولة .. مفصولة بتدخلون في مشاكل الأرضة واحتمال هبوط جزء وارتفاع جزء حتى لو قليل ويكون مشوه ومزعج
فاصل التمدد الانشائي في العادة نعمله في الحوائط الخارجية للبيوت ( الأسوار ) لأن الكتلة طويلة مقارنة بعرضها لذلك كل 6 الى 8 متر نحتاج لفاصل يوصل للأساسات .. لكن للمباني في الغالب نسويه كل 30 متر ولا اعتقد فيه بيت 30 متر في 10 متر مثلاً .. هذا ينصح بفصله من النص بفاصل تمدد انشائي
بعدين إحنا تماتيك نفصل خرسانة الأرضية من جميع أطرافها عن هيكل البيت الانشائي ببورد قابل للانضغاط وهنا يستحسن نغطيه بماستك تحت البلاط حتى ما يسمح للأرضة بالدخول من تحت الأرض وتكون المادة الفاصلة مرنة .. كذلك لازم عزلها بدواء خاص للأرضة لأن هذي النقطة تكون ممر سهل للارضة خصوصاً البورد القابل للانضغاط أساسه خشبي
-
تميم المجد
أنواع الصفايات أو فتحات الصرف الصحي للحمام .. النوع اللي داخله قطعة بلاستيكية الأخير أفضلهم يسد الطريق عن الروائح والحشرات .. بس فيه مشكلة بسيطة .. انا مركبه عندي ومرتاح منه سنين طويلة لكن فجأة بدت تطلع روائح كريهة .. بعد 12 سنة من السكن قررت اجيب البلدية يسلكون .. فتح الفني الفتحات وحدة وحدة وحصل فيهم شعر وايد يتجمع عند الغطاء الداخلي لأنه يمرر الماء ولا يمرر الشعر وبعض البقايا الصلبة .. نظفها بسهولة وسلك بسلك طويل بعد لداخل بسهولة ورجع سكرها وراحت الروائح .. الشعر بعد فترة يعفن ويتحلل .. لكن الحمد لله روائح راجعة أو حشرات صعب تدخل
أي حد يركب ينتبه ياخذ أفضل نوعية لأنها موجودة .. فيها ميزة ثانية مهمة .. اللي هي نزول الماي من المغسلة يطلع صوت وهذي تكسر صوت الماء النازل
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى