بالنسبة لمقاولنا بدأ البيسمنت يبين أكثر ويتضح .. وطلع تقليدي حفرة خرسانية فيها مناور علوية فوق كلش وانا من محبين البلكونة النازلة والحوش جدامها محفور
هنا حاب اوضح شيء غاية في الأهمية وهو هذي البايبات البيض يستعملونها لحديد تثبيت خشب القوالب للصب وبعدين يسدونهم ويقصونهم .. هو أكيد فيه مواد قوية تثبت على البلاستيك وتسد على طول منها الايبوكسي وممكن ازالة البايبات بحفر مكانها وتثبيت هذي المادة وهي مثل القراوت .. أحد المقاولين يقص الحديد ويخليه معبي فراغ البيب ويحط سيليكون حوله زيادة حرص .. كلها حلول مهمة وتنفع لكن تترك بدون شيء ونعتمد على الرول العازل تبقى المنطقة الفراغ في البايب ضعيفة وتنخرق من ضغط التربة ويتسرب الماء .. واحد يقول شاف الماء يصب كأنه فيه ضغط قوي وراه ويصب بقوة داخل البيسمنت
صح في اوساخ وحجر كبير وهذي مشاكلها كثيرة تسبب هبوط في الارضيات ويسبب تشلاخات في المباني
لكن في العقد عندي مكتوب جزئية الدفان وكيفية اختباره وابي استفسر منها كيف طريقة عمل الاختبارات للدفان لتجنب الهبوط في المستقبل مكتوب في العقد:
يتم الدفان على طبقات لا تتجاوز 50سم مع غمرها بالماء وان تدك جيدا حسب المواصفات القطرية ولا يقل معامل الدمك 95% حسب المواصفات اشتو الامريكية بعد عمل الاختبارات الازمة.
الحين كيف اعرف من المقاول انه سوى اختبار لازم او كيف نعرف معامل الدمك وصل 95% هل فيه اختبار تربة من معمل؟
ابي أكون في السليم هل اسال الاستشاري اذا وصله اختبار التربة او لا؟
او البند الي في العقد حق شي ثاني يختلف عن اختبار للتربة؟
المشكلة العقد مب موضح من عليه عمل الاختبارات ووشي هذي الإختبارات .. وتبي الصج إحنا في الغالب نهمل هذي النقطة ولا حتى نفكر فيها ومن رؤيتنا للتربة وطبقات الدفان كل شيء يبين واضح .. ال 50 سم اشوفها وايد قبل في بدايات عملي كانت القوانين 15 سم وتربة مختارة من الموقع وناتج الحفر بعد ازالة أي حجارة أكبر من 5 سم وبدون بودرة .. بعدين تغيرت ل 30 سم لكل طبقة بحيث تدك طبقة بعدين تحط طبقة وتدكها
الإختبارات أكيد مذكورة في الكود القطري وكان المفروض تنذكر صراحة في العقد إن على المقاول عمل الإختبارات رقم كذا وكذا حسب الكود القطري رقم كذا وبتاريخ كذا وكل طبقة إختبارها بروحها وباشراف ووجود الاستشاري يتم أخذ العينات وترقيمها .. وزين للي يسوون عقودهم بعد يشترطون تصوير عملية أخذ العينات أفضل
وهذا الشيء زين للمقاول والاستشاري والمالك ويحفظ الحقوق .. لو الشغل كله زين ولا صار شيء مثلاً وبعد كم سنة صار هبوط قوي لإحدى الغرف .. في هذي الحالة ما نقدر نلوم الاستشاري والمقاول العملية تمت حسب الاصول لكن فيه خلل أسفل أعماق التربة
حسب الصور يبين لي نوع الدفان عندك زين والدك زين وما فيه داعي للتخوف من هذي النقطة بس ممكن تطلب ضمان غير مشروط لفترة ضمان الإنشاءات كلها اللي في قطر تمتد لعشر سنين وهذا من واجب أي مقاول ومسؤوليته إنه يكون ضامن شغله .. يعني كتبه والا ما كتبه بس لو كتبه بيكون حجة مباشرة عليه
حتى تضمن شغل زين ولا ادري بتفاصيل عقدك ومخططاتك ممكن لو مب موجود هذا التفصيل تضيف صبيات خرسانة للأرضية وهي في الغالب مضافة وشغل متعارف عليه .. 15 سم أو 10 سم مقواة بشبك حديد بس هم يعتمدون الشبك الحديد في الأسفل وهو يقاوم الشد في الأوزان اللي جاية من فوق لتحت .. لكن أي انتفاخات في التربة ما يقاومها ولو رفعناه شوي جهة وسط الخرسانة بنضمن مقاومة في الاتجاهين .. حق بيتي حوش وارضيات داخلية اعتمدت الفيبر بدال الحديد والفيبر يضمن لك مقاومة للشد في كل الاتجاهات .. وطبعاً أرخص وتجربتي لها 15 أو 16 سنة وللحين الأرضية من أفضل ما يكون دوس سيارات في الحوش يومياً وأوقات تدخل سيارات تحميل كبيرة وبدون مشاكل أو مشاكل لس
لو بنفكر فيها لو عمق الحفر مترين 50 سم معقولة يعني بيكون الدفن على 4 مراحل وكل مرحلة المفروض لها اختبارات وموافقات .. وتبون الصج إحنا في قطر عندنا الدفان قليل ونستورده ونحتاجه في أماكن ثانية والمفروض نفكر خارج الصندوق ونخلي تحت الارضية فراغ .. نسوي خرسانة مدعمة بطابوق أعمدة من تحت ونسويه فراغ مشطب أي كلام ممكن أرضيات اسمنت ونمدد تحت أرضية الدور الأرضي وحتى ممكن نحط خزان المياه وتكون عندنا ستورات لو نحب .. في الغالب الحفر يزيد عن 2 متر .. حتى لو بقت الأساسات مرتفعة وتبين تكون محمية ونقدر نختبرها لو تأثرت ونصلحها ونفس الشيء التمديدات وبايبات الصرف تحت مكشوفة نقدر نصلحها ونوصل لها وقت ما نبغي
الله يفرحك يالمعماري خبر طيب ويجزاك خير.
استفسار كيف أخذ رخصة أحط دور ثاني للمجلس؟
هل فيه شروط معينة او ممنوع وخلاص؟
اغلب المجالس الحالية اشوفها دورين فما ادري كيف الطريقة.
اخوي سعود طيب اذا مخالف كيف في اكثر من منطقة حاليا وسابقا موجود فيها مجالس دورين؟
هل القانون هذا موجود سابقا او يمشي ع بعض الناس وبعضهم لا.
القبو نعم صحيح تو مطبق