مراجعة التصاميم المعمارية وابداء الملاحظات عليها (محدث)

[معماري قطري]

البعض ما يفهم مبدأ التصميم الإقتصادي المظيف Minimalist Modern Design هذا مصطلح جديد ويركز على نظافة الأسطح واستقامتها بدون مبالغات إنشائية وبألوان مريحة ومواد تعمر بأقل صيانة ومساحات مناسبة للعيش بدون مبالغات

مثل هذا البيت المفتوح على حوض سباحة في الخلف هذي دعاية لفلل في دبي للبيع



المواد مختلفة بين الجدران من فوق خفيفة وتغطية أو تكسية وتحت خرسانة وطابوق مصبوغة بلون واحد محايد وناعم مثل الأبيض الناصع

[معماري قطري]

إخواني وأخواتي دوم الملاحظات والتطوير ما يعني إن الإتجاه السابق خاطيء 100% بس يعني معالجة بعض أوجه القصور اللي تخلي مبنانا أفضل وأريح لنا ومن وجهة نظر ممارس مختص سواء كنت انا أو غيري .. أذكر سالفة واحد من الإخوان عنده بيت مشتريه وفيه غرفة سايق جاية غلط سادة مدخل المجلس .. قال بيحطها عرض بيهدم جزء وبيبني قلت ممكن وممكن تهدم كاملة الغرفة صغيرة وتبنيها بالطريقة اللي تريحك وطلعنا انا معاه بفكرة حلوة بحيث مدخل السايق يكون مفصول عن البيت وعنده مدخل البيت وجنبه مدخل الزوار يدخل أما على الصالة والا على المدخل .. يعني واحد للسيارة وحده يشيل سيارة صغيرة طوله يمكن 4.8 متر لحد الجدار وهذا ما يناسب لسيارات كثيرة عندنا الجيبات من لكزس وجي وغيرهم 5.6 متر يبقى جزء طالع وسيارات الصالون غالبها طولها 5 متر وشوي تحت بس فيه بعد الأطول بعضها طولها يوصل 6.7 متر مثل بعض موديلات البنتلي والرولز وبعد نحتاج مسافة مرور جدام وورا السيارة .. المشكلة لو متابع التصميم المالك اللي باع البيت كان بسهولة يقدر يوفر متر ونص من الإرتداد الخلفي ومن تصغير الملحق شيء بسيط

[معماري قطري]

شغال اراجع مخططات الاستشاري حق بيتي ولدي حصلت مكبر درايش على كيفه ومعدل مستوياتها بعد على كيفه وخلص الموافقات بس مضطر حق الترتيب اللي انا ابيه .. قلت ما لي الا أسوي مخططات تنفيذيه للحوائط ومكوناتها ووين ابغي نقاط كهرباء ونقاط تلفزيون ومكان التمديدات ونوعها .. صراحة عملية مزعجة أحسه خرب كل شيء انا أبغيه قبل وأرجع أكرر نفس اللي مسويه قبل

المشكلة لازم خطة تدخل العقد حتى المقاول ينفذ صح والمشرف يشرف صح وإحنا بعد نقدر نتابع صح ولا ننسى شيء .. عذبوني بما وجدوا عليه آبائهم

عاد الله يعين صحيح أول حائط هو أصعب شيء والبقية غالبها نسخ من الموجود بس بعد لازم يعدل ويحدد صح

هذا جزء كبرته حتى يكون واضح الكلام المكتوب



أول شيء يسار دورة مياه .. وموقع البايبات في الطرف اليسار بعد عمود الزاوية في الغلاف الخارجي للحايط اللي من غلافين بينهم العازل الحراري وبتكون مغطية باسمنت بورد وفوم رش لعزل بايبات التغذية عن الحرارة

عندي كسرات تحدد أماكن تجويفات خاصة بإضاءة تجميلية .. عند المغسلة مثلاً التجويف 90 في 80 بعمق 10 سم ناوي اسوي فيه بوكس تغطيه المراية والباب لتخزين بعض حاجات المغسلة وداخله يكون فيه نقطة كهرب + نوعين من الإنارة إنارة جانبية للوجه وإنارة مخفية حول باب المراية بتكون تنعكس على الجدار خلف المراية البارزة 10 سم عن الجدار

بتكون ما يقارب هذا الشكل ولازم أصغرها شوي حتى تكون مناسبة وحولها مساحة للإنارة



بتكون هشكل حتى نبتعد عن الحائط ونرتفع شوي عن المغسلة نترك خلوص للخلاط ما تضرب فيه

[معماري قطري]

الكسرة فوق حسب الخط الأخضر المربع الداخلي واللي خارجي حدود المراية والباب وبينهم الإنارة بتكون مخفية

[معماري قطري]

في رايي عمل واجهات الحوائط الداخلية وتوزيعها مع الأثاث المتوقع ومع الفجوات إن وجدت وانا شكلي كثرتها بس بتكون جميلة ومفيدة وبتتشطب بواجهات خشبية ممكن تكون مقوسة المهم تأسيسها طابوق وخرسانة وتمديد الكهرباء لإنارتها ونقطة كهرباء لأي جهاز رمزت لها انا ب +EOP اللي هي اضافة نقطة تغذية كهربية .. المهم مقاسها وموقعها بالضبط وعمقها في الجدار

هذي تسهل علينا نفكر في الصندوق وخارج الصندوق وفي حدود الصندوق ونعرف الترتيبات اللي بنسويها .. مثال رواشن المجلس أو الصالة بتكون ممكن للوحة معينة أو بعض الصور العائلية أو لورود أو زراعة مع إنارة مسلطة أو عامة عليها وممكن نوعين من الإنارة لإعطاء تغيير ديكوري وتوجه بصري مختلف .. المهم إحنا ألحين داخل الصندوق نوعاً ما وفي حدود الصندوق أكثر وأكثر اللي نشوفه يتعلق بالحدود اللي هي الحايط

هذي صورة عامة لجهة المجلس



صورة مقربة لداخل غرفة الملابس وشلون صف القواطع .. أول اليسار عند اينشتاين الواقف كبت بباب بعمق 70 سم للأشياء الكبيرة مثل المفارش والشناط .. وهنا نفكر في التكييف لهذي المنطقة وبما انها قليلة الإستخدام وتحتاج تكييف بسيط بيكون ممكن معلق سقفي أو سبلت وأستبعد الدكت سبلت والجبس طبقة بسيط بيكون والإنارة عامة سقفية بانلز ال اي دي أو دائرية المنتشرة وفي الكبتات بتكون مسلطة من فوق شريطية في الغالب

حطيت نقاط الكهرباء على الحائط للمكنسة الكهربية خصوصاً الأرضية هنا بتكون سجادة مريحة للمشي عليها بعد الخروج من دورة المياه القريبة



باقي أكيد أشياء ستضاف مثل تحديد موقع السقف

هنا جبت انشتاين بعد يوضح المساحة وموقع طاولة المكياج بعرض كامل 60 سم .. وألاحظ إمكانية عمل روشنة جنب طاولة المكياج بأرفف زجاجية للعطور وأدوات الزينة .. علاقة مترابطة بتكون في توزيع الغرفة بين غرفة الملابس وغرفة أو ممر المكياج وهو بيكون طويل وفيه عمق ممكن حتى عمل كبت في النص وطاولة في النص الثاني الكبت لتخزين الملابس اللي تجيبها الخادمة من الغسيل بعدين ترتبها راعية البيت داخل غرفة الملابس اللي المفروض تكون حصرية وخاصة للزوجين وممكن برقم سري أو بصمة



بعدين يجينا الحمام وبالغلط نسيت أمسح نقطة الكهرباء في الحمام نقاط الكهرباء بتكون مخفية داخل صندوق المراية

الطوب الزجاجي على ارتفاع مترين فوق مستوى الشخص والدرايش كلها قررت أوحدها ل 2.6 متر حدها الأعلى وبالنسبة لهذي الموضحة حتى في دورة المياه بتكون عليها ستارة لوفر المنيوم تنفتح نهاراً كاملة أو جزئي للنور وللرؤية الخارجية وتغلق ليلاً وفي النهار عاكسة وبتكون داخلة في عمق الحائط حول 25 سم وهي بسمك بين 7 وبين 6 حسب القطاع يعني بيصفي لنا كسرة حول 8 الى 10 سم هذي بيكون فيها نور محيطي تجميلي من الخارج ولكل النوافذ يعني انارة الجدران بس بتكون تجميلية خفيفة

[معماري قطري]

غرفة النوم الأخيرة هي هذي وهذا توزيعها بس أشوف ممكن الكرسي يجي في الزاوية حتى يكون قريب من الروشنة لقراءة كتاب أو متابعة التلفزيون المقابل .. والسرير حتى ممكن يكون شوي أصغر في الغالب بيسكنها شخص ومعاها غرفة ملابس ودورة مياه مستقلة .. العمدان مسويها لي ضخمة بس بتتصغر حتى تنعزل حرارياً من الخارج



الدريشة هنا 1.2 متر بس انا صغرتها ل 1 متر في الرسم السابق هذا الإستشاري ملخبط لي على كيفه .. وبتكون بمقاس فتحة الباب .. حتى الباب ممكن أسوي الفريم بدون برواز اللي جاي كأنه راكب داخل الفتحة وحوله تكحيلة بسيطة .. إحنا طبعاً نشوف الحائط اليسار

[معماري قطري]

صج شوي وضعية محيرة وأكيد للمستفيد رأي الكرسي قريب من الباب أفضل حتى للحركة ممكن قبل الخروج يحتاج يربط تكرمون الحذاء ويجلس وكله يعتمد على مقاس السرير وترتيب المكان بعد بطريقة أفضل المساحات الصغيرة دوم شوي صعبة .. بعد ممكن حتى الجلوس في الغرفة يكون نادر والتلفزيون حتى ما يتركب بس كلها كماليات

[معماري قطري]

البعض يفكر في الغرفة كمساحة مستطيلة أو مربعة وبس ما يفكر في مرافقها ومحتوياتها وفي إمكانية خدمتها لعدة أغراض مثل لسريرين مفردين ولشخصين أو لسرير بحجم مناسب .. هنا وضحت باقي الغرفة مع ثلاث نوعيات أسرة واحد بعرض متر وواحد 120 سم والكبير مترين

[معماري قطري]

هذا القطاع يوضح الغرفة ومكان السرير بالطول الطبيعي مترين وممكن نزيد شوي حق هيدبورد منفخ شوي أو بارز .. وعندنا التلفزيون مقابل السرير وطاولته وأدراجه وهذا ممكن تفصيله معلق مع إني أحب النازل للأرض ويكون راكب على السجاد أحلى يطلع المعلق للغرف اللي باركيه أو بورسلان

لغرفة الملابس صممت روشنة طويلة هذي ممكن تكون بأرفف للساعات والقطع الصغيرة من ذهب وغيره وحتى ممكن الجزء السفلي للأحذية وممكن نعملها بعمق 20 سم وبارزة 10 سم تكون بإجمالي 30 مناسبة للأحذية

[معماري قطري]

تذكير بتوزيع دورة المياه وموجودات الحائط اليسار اللي هو الغربي .. ولازم عندنا المخططات تكون متناسقة مع بعض حتى لو بنينا الحائط نعدل حسب خطتنا ولا ننفذ الموجود بالضبط مثل ما هو لهذا دراسة واجهات الحوائط الداخلية تعطينا فكرة أشمل وممكن إضافات ما كنا حاسبين حسابها في التوزيع الأرضي

مثل عندنا جنب كرسي الشور ممكن نسوي بعد كسرة للصابون والشامبو طولية والواحد واقف تحت الشور المطري يكون كل شيء قريب منه + طلع لازم اقلل أو أرفع صفوف الطوب الزجاجي فوق شوي



مثل هذي الواجهة .. الخطوط المتقطعة مسار البولي كاربونيت أو الزجاج المقوس لمنطقة الشور



ألاحظ ممكن نحرك راس الشور يمين شوي حتى يكون قريب روشنة الصابون أو نكبر الروشنة 30 سم .. الشور المتحرك اللي يسمونه البعض التلفون هذا ممكن يكون يمين الكرسي للغسيل والواحد جالس ممكن في عمر معين أو لأي سبب الواحد يحتاج يتسبح وهو جالس

يمكن هشكل أحسن رفعت الطوب الزجاجي أعلى .. مصادر الضوء الطبيعي هنا بتكون من أول الصبح عندنا منور سقفي لقريب المغرب عندنا الطوب الزجاجي والدريشة الطويلة .. الدريشة هذي بتكون عليها ستارة خشبية أو ألمنيوم سهلة الفتح والإغلاق وقت الليل والجزء العلوي الثابت بيكون مرتفع وبدون ستارة



بالنسبة للجبس خطتي له المروحة مالت الشفط مخفية وانارة مخفية من جهتين فوق المغاسل وفوق الشور الباقي فرزة بسيطة بس ( زاوية ظل )