مراجعة التصاميم المعمارية وابداء الملاحظات عليها (محدث)

[معماري قطري]

صباح الخير


الله يجزاك خير و يرفع قدرك بوعبدالله


التصميم على ما اعتقد عبارة عن تعديلات على قالب جاهز مثل ما صار معاي .. معاناة وخساير ما اتمناها لأحد

واضح ان المصمم عدل على رغبات المالك بدون ما يكون في كونسبت خاص للمكان او فكرة لترتيب احتياجات المالك

نصيحتي يشوف شركة ثانية للتصميم .. مساحة الأرض مب صغيرة عشان الاحتياجات الأساسية تنحشر حشر و يبي يخالف

معليه حتى لو مرت سنة كاملة وهو يعدل فالتعديلات كلها على ورق

مساء النور والسرور

والله يجزيج بما دعيتي وانتي وكثير من الإخوان ما يقصرون بنصايحهم الطيبة وكذلك تجاربهم

انا اتوقع إن المهندس خبرته بسيطة ويبي يخلص .. بالنسبة للتصميم أشوفه فيه مقومات جمالية وعملية لكن يحتاج تعديل والتكلفة صعب تنزل واحتمال تزيد وانا تقديري الأولي بحدود 3.5 مليون + + .. الدرج واللفت مكانهم حلو وزين انهم مفتوحين على الحديقة الوسطى .. الاستقبال بيكون هو الجلسة العائلية المطلة على الحديقة ولو عالج جهة السيارات عدل مثل ما ذكرت قبل بيترتب المكان أفضل .. الفتحة اللي فوق لو تتسكر وتكون جلسة أصغر مع تلفزيون مطلة على الحديقة كذلك مع درايش شوي أصغر وبستاير للخصوصية خصوصاً في الليل أو بشتر حديد بتكون أفضل

معاج الصالة اللي في الزاوية فوق ممكن يستفيد منها لأي شيء غير

حل ثاني يغير التصميم بالكامل بس انا عارف الغالبية وانا منهم لين ارتبطوا بفكرة تصميم معينة وعاشوها يبون يسوونها مهما كلفهم .. والفكرة تستوي وتتصلح للأفضل إن شاء الله

[معماري قطري]

بعدين اختي سويت وبقية الإخوان أي حد عنده تجربة حتى لو قديمة يمدنا بها مع صور للتصميم ونناقشه للكل يستفيد وهو يقدر يدير النقاش ويوضح المشاكل

[سعود.]

مساحة البناء 1400 وشوي ( مشاء الله )

بس التصميم كارثه ( بدون مجامله )

ياريت المالك له يحصل تصميم اخر وينسى هذا .

[سعود.]

واذا صامل على هذا التصميم يحتاج تعديل ‎%‎80

[ita(10)lia]

عليكم السلام ورحمة الله وبركاته

انا حاضر للكل والله يقدرني على عمل المطلوب

حاول تنزل المخططات صورة هنا وبنشوف شالأفضل لك بس بعد اعرض كل المعلومات حتى اتجاهات الأرض

الله يجزاك الخير

[معماري قطري]

ما يبين لي واضح بس مبدئياً تصميم زين ومناسب للأرض

يحتاج تطوير بتوزيع الأثاث والكبتات والقطع الصحية

ما شاء الله ثمان غرف بتستفيد منهم على الأقل شقة كاملة في البنتهاوس

الدرج وراء اللفت يستحسن تخلي القوس من طابوق مرتفع وفوقه مزهرية كبيرة بإضاءة جيدة .. والدريشة المقوسة بإمكانك عملها مقوسة بالكامل أو مجزأة قطع سيدة

لو خطتك لباب المجلس وباب الصالة يكون يو بي في سي بيكون البيت معزول عدل وماشي على الوضع ذيه .. يمكن تحتاج تصغر شوي الأبواب لو تخلي جزء كبير 90 سم وجزء صغير 40 سم أو حولها بيكون مناسب للمساحة ولو تكتفي بباب واحد 90 سم أو متر بعد مناسب وسهل للاستخدام خصوصاً المساحة صغيرة ما تستحق بابين

ولو ناوي تسويهم خشب مد شوي الدرج لليوان وسو باب اضافي قزاز يو بي في سي حتى يعزل مدخل البيت والمجلس عن الحوش .. وبيعزل لك الحرارة كذلك والرطوبة ما تخرب الخشب والغبار والصوت

حاول ترسل لي المخططات بي دي اف حجم كبير على الخاص أو ايميل أو تحطها هنا

[معماري قطري]

الحوض غرفة الميكانيكل روم مخربة موقعه .. هذي ما فيها شيء غير الفلتر والصخان لو تحتاجه ومضخة ودي بي للكهرباء .. الدي بي تقدر تخليه مفصول ومثبت في الحائط والارضية للحوض تقدر تساويها بأرضية البيت وتحفر شوي للعمق المناسب للحوض والمفروض يكون 1.2 متر كفاية ومستوى واحد أفضل لك .. في هالحالة بتكون الزاوية اليسرى فوق مناسبة تكون فيها هذي المعدات وتكون في مستوى الحوض يعني الضغط على المضخة بيكون بسيط

حل ثاني إنك ترفع الحوض بحدود 60 سم عن أرضية البيت وتخلي المساحة حول الحوض نفس مستوى أرضية البيت لسهولة الخروج والذهاب للحوض ورؤية الماء والحوض من داخل .. تخلي الحوض بنظام اوفر فلو مفتوح من جدام جهة البيت بحيث وانت جالس تشوف الماي ينزل في قناة مفتوحة ويكون مثل الشلال الصغير .. تكون استفدت من الحوض منظر دائم وللسباحة

نصيحة أخيرة حاول تخلي منطقة الحوض مغطاة بسقف زجاجي ومكيفة .. حتى لو ما تحتاج تكييف بس ينعمل حسابه وللجلوس في هذي المنطقة

جدام عندك مساحة جيدة كافية لمواقف 4 في كل جهة يعني 8 سيارات أو بس 4 مواقف + مجلس خارجي

[معماري قطري]

لو افترضت أرضية البيت مرتفعة عن الحوش 30 سم عتبتين أو 45 سم .. أرضية الحوض نفسها والحوض مرتفع شوي 60 سم بيكون عندك 60 + 30 وبتحتاج تحفر حتى توصل ارتفاع 120 سم حول نص متر ويمكن أكثر شوي حسب سمك أرضية الحوض .. حلو تحدد كل شيء مبدئي من التصميم

تقدر تقرب الحوض من البيت في حال قررت تسويه اوفرفلو وبقناة مفتوحة يصب فيها الماء قرب الواجهة الزجاجية بس يكون مكان للخروج والجلسة تكون ورا آخر الحوض مرتفعة 60 سم عن أرضية البيت ويكون النزول للحوض منها مباشرة .. ما عرفت الغرفة اللي في الزاوية عند الحوض بس قدرت اقرا اللاندري والمطبخ والمطبخ عندك واحد .. لو تحب تخليه مطل على الحوض يمكن يطلع أحسن ويكون ينفتح على باب الغرفة العائلية

[معماري قطري]

مساحة البناء 1400 وشوي ( مشاء الله )

بس التصميم كارثه ( بدون مجامله )

ياريت المالك له يحصل تصميم اخر وينسى هذا .

حي الله اخوي ورفيق الموضوع الدائم سعود

ما انتبهت لمشاركتك قبل شكلي بديت اخرف

التصميم ما شاء الله فكرته حلوة ويقدر يصغر لو حب لمساحات واقعية أكثر .. الرجال قطع التواصل وشكلنا ضغطنا عليه والله يوفقه يمكن احتياجه وقادر على بنيانه

هرن حق العضو ديزل .. بريدك مليان

[سعود.]

الله يحيك اخوي ( ابا عبدالله )

المسأله مش في المساحة ماعنده مشكله .
التصميم هو المشكلة .