مراجعة التصاميم المعمارية وابداء الملاحظات عليها (محدث)

[معماري قطري]

تقريب وتركيز على البوابة

حبيت الكسرات المغربية وهي قريبة منها نقدر نقول محدثة وهي الزوايا فوق ومكررة في سور السطح .. إستعملتها مرة في مبنى صغير للشغل وعجبتني واشوف بقية المهندسين حبوا التصميم ومكرر في كم مبنى

القمرية القطرية ( الزوايا المنحنية ) هذي تراثية بعد محدثة بالتجويف وهذا دزاين أول مرة اسويه ولا شفت حد مسويه قبل واللي يبي يسبقني ويسويه حلاله .. بعض اللي سووها في سوق واقف كانت ارتجالية واشتغلها رسام عنده حس فني معماري تراثي مب مهندس حسب ما وصلني .. بعضها ما عجبتني من حيث التناسق وبعضها كانت جيدة .. اللي موجودة ذي هي الاساس واللي تعتبر تقاطع 5 دوائر كانت تعمل بالفرجار ويقص الجص على أساسها يدوياً وبعضه باقي للآن



الكسرة فوق بتكون فيها انارة خطية مخفية

[معماري قطري]

الزوايا المشطوفة في البوابة والمجلس 7 سم وداخل البيت 15 سم حتى تبين من بعيد وباشوف خطتي اركب اضاءة من أسفل تنور هذي الكسرة ويكون لونها أبيض وممكن البيت كله أبيض بس وقت الليل انعكاس النور وتركيزه على هذي الكسرات بيعطيها جمال وبيجذب النظر لها

[معماري قطري]

ننتقل للواجهة بعد ازالة المجلس وحوض السباحة .. وهم أصلاً بيكونون قريبين حول 2 متر بينهم وبين البيت .. حتى ممكن بعد الترخيص يكونون ملاصقين

سويت كسرة تحت 20 سم مرتفعة عن ارضية الحوش اللي بتكون مستوى واحد قرب البيت حيث بتنزل بايبات تصريف المطر للسقف تحتها وبتمتد تصب في ممر السيارات اللي بيكون بسلوب مناسب لتصريف المياه جهة البوابتين .. هذي الكسرة في البلاستر عمقها 2 سم يعني بيكون صبغ مباشر تحت على الطابوق والبلاستر مقطوع قبل ليوصل الارضية بعشرين سم .. الصبغ بيكون مثل البلاستر سميك يغطي أي عيب وتنعكس عليه انارة شريطية مخفية كذلك تخلي اسفل البيت منور كأنه طافي فوق الارض

[معماري قطري]

تقريب لمدخل البيت والمظلة اللي فوقها المكتب .. تبين الكسرات صغيرة الملامسة للأرضية حول البيت هذي تجي فيها معلقة قطعة ألمنيوم تخفي الانارة الشريطية

[معماري قطري]

الواجهة الرئيسية الداخلية ومدخل البيت والصالة .. يسار طرف الملحق ثم الممر المغلق بباب وكذلك سقف زجاجي بيكون باذن الله بعد اتمام البناء .. ثم البيت وزين سمحوا بدرايش على الطرف بشرط ما تطل على الجيران ولو طلت نركب لوفر حاجب للرؤية وبعدين يجي ممر بين حوض السباحة والبيت .. وبعده حوض السباحة وملحقاته وفصول عن المجلس لكن ملاصق له

[معماري قطري]

تقريب للبيت .. نشوف تصوير للرجال واحد في المكتب اللي سقفها صافي ارتفاعه 2.85 متر وبيكون بدون جبس ممكن كورنيش وممكن جبس نازل 15 سم ما يأثر .. سبب تنزيل السقف هنا لترك مساحة كافية لتركيب الطوب الزجاجي المنفذ للنور الطبيعي للصالة كما هو موضح بالخطوط الزرقاء المتقطعة .. الرجال الثاني واقف في الشاور وفوقه السقف الزجاج تصلخه شمس الظهر وشمس الصبح بس بخصوصية بسبب الجدار المرتفع

[معماري قطري]

المقاس الانساني ضروري .. في تصميم سابق من شوي استعرضناه للإخت أُم صالح الدرايش بس معمولة 2.85 وانا هنا الدرايش مرتفعة بعضها 0.8 للحافة السفلية الى 2.4 للعلوية يعني طول الدريشة 1.6 وهنا الرجال طوله 1.84 ضخمته شوي والدريشة تبين فوقه ومكفيته .. ممكن يحاجنني شخص بأن ذاك البيت مرتفع 5 متر باقول معليش إرتفاع باقي بيتي 4.7 متر وصافي 4.4 ونفس الدرايش اللي نصحت بها مركبها هنا

[معماري قطري]

الواجهتين الباقيتين اليسرى والخلفية ما لهم أهمية كبيرة والمهم انقل القطاع الطولي من رسمة ثانية واعدل عليه على أساس هذا التصميم واتوكل عليه باكمال باقي التخصصات عن طريق مكتب استشاري والرخصة للبدء في البناء بإذن الله

[معماري قطري]

عدلت على القطاع الطولي للبيت قليل وهو مقارب للرسمة القديمة بس ضفت تغطية الحديقة المفتوحة بالزجاج مثل ما هو موضح .. ممكن الشلال اليسار اللي على الدوار اخليه بمستوى نازل أو الغيه بالكامل واكتفي بالنافورة في وسط الدوار .. في الغالب لو سويته بارتفاع يقترب من المتر بيكون يعطي انفتاح أكبر للمكان خلفه والمكان خلفه يكون مزروع فتكون الصورة أحلى للامتداد البصري

[معماري قطري]

شوية تركيز على منطقة الحديقة الداخلية نلاحظ خط الارضية واحد بين ليوان الحديقة وداخل البيت .. بيكون مكان الزراعة نازل حول 10 سم بس أو حتى 5 سم ومفكر اسوي الجدران الداخلية للحديقة حجر أبيض .. الصالة فوق تغيرت وضعيتها واستوت مقابلة الحديقة بدل ما ظهرها للحديقة وباحط صورة فيها اشخاص بطول متر و77 سم حتى يوضح المقاس الانساني واتجاه زاوية النظر للجالس والواقف في عدة أماكن




هذي فيها توضيح لإتجاهات النظر وكيف نقدر نشوف تفاصيل الحديقة من أول دخولنا للبيت .. مع توضيح فصل الصالة بحاجز زجاجي وفكرة الجبس مستويين مستوى لتغطية التكييف والسبوتات العالية ومستوى كورنيش فوقه انارة مخفية