مراجعة التصاميم المعمارية وابداء الملاحظات عليها (محدث)

[معماري قطري]

هذي صورة إن شاء الله أوضح وضحت فيها أماكن الانارة المخفية وكملت الكسرة السفلية لخلف البديه وكرسي الحمام حتى تكون مقابلة الباب وتعطي منظر متصل لجدارين وزاوية

[معماري قطري]

إشتغلت على سكشن يقطع في المطبخ وباقي البيت بحيث يكون النظر جهة خلف البيت ويوضح توزيع الغرف المطلة على الحديقة الداخلية والشلال والجدول .. مقطوع حسب الرسمة والا بيكون نازل بالتدريج لإرتفاع 40 سم وباوضح الواجهة من داخل الصالة التحتية بيبين فيها كامل أكيد

[معماري قطري]

صورة مقربة للغرفة اليسار في الدور الأول

نشوف وضعية جلوس الرجال على كرسي الحمام وداخل الشور يكون راجع شوي طبعاً ما يبين كامل فيه طابوق وفوق بس زجاج

اللي فوق السرير تجويف أو روشنة

[معماري قطري]

التجويف ممكن نحط فيه اي شيء هنا بس موضح مزهريات .. الإنارة حلو تكون مخفية ومن تحت لفوق ونقدر نسويها متعددة الالوان حسب اختيارنا

[معماري قطري]

ما وضحت الجزء اللي تحت الارض وباوضحه إن شاء الله بعدين .. ضروري حتى تكتمل الرسمة

وكل عام والجميع بخير

[معماري قطري]

هذا توضيح للجزء اللي تحت الارض وبالضبط تحت المطبخ .. يتكون من ممر ومخزن .. مثل ما هو موضح في السابق البيسمنت بيكون جزئي ولخدمات المياه وفيه شوية تخزين وبتمر تحته بايبات الصرف الصحي .. بايبات صرف المطر بتكون نازلة في الجزء الخارجي للحائط الخارجي المعزول وبتلتقي مع بايب رئيسي ينقل المياه لطرف الرصيف الى الشارع اللي فيه سلوب جهة الباب الخارجي .. بنفس الوقت بتلتقي معاها بايبات تصريف المياه الجوفية وفائض مياه سقي الزراعة بعد ما تتجمع في خزان تحت أرضية الستور ثم ترفع بمضخة رفع للبايب المتجه لطرف الرصيف .. يعني طول ما السيستم شغال بيبين .. في المخزن كذلك بيكون فيه درام لمياه تصريف التكييف وهذي بتتحول للزراعة .. نفس الجهة اليمنى والممر باوضحهم برسم مقطعي آخر وتفاصيل الصرف سواء الصحي أو المطر والجوفي وهو مشترك أو التكييف .. يعني عندي الحوش بيكون فيه منهول واحد أو اثنين فقط والبايبات فيه متصلة فقط احتياط والتمديدات كلها معلقة في سقف البيسمنت

[معماري قطري]

الدرج موضح ورا بخطوط متقطعة والباب بيكون حديد ومفكر اخليه تيوبات للتهوئة .. طريقة التصريف اللي حاب يشوفها للفرنش درينج في يوتيوبيات البناء حاطها كم مرة وأكيد البايبات بتكون مكشوفة في المخزن والممر وإحتمال الرجال ينزل راسه حتى يقدر يمر تحتها .. إرتفاع السقف صافي 2.2 متر يعني البيسمنت مب للمعيشة وبأقل تشطيب أو بدون .. إحتمال كبير ما تكون فيه مياه جوفية التصريف ما يشتغل بس بيكون احتياط لكن أقل شيء بيزيل بعض المياه النازلة من جهة الزراعة وبيبعدها عن الاساسات وهذا المهم

شيصير لو طلعت كمية مياه جوفية كبيرة؟ هنا لازم اغير التصميم والغي فكرة البيسمنت واسوي فرنش درينيج أقل شيء حول الاساسات للدور الارضي العادي .. والأساسات هنا عندي قريبة من اساسات أي بيت عادي بس الحفر شوي زيادة بيكون أقل من الحفر حق بيسمنت حقيقي

[معماري قطري]

اشتغلت على قطاع ثاني في المبنى يبدأ من البيسمنت للبنتهاوس مثل ما هو موضح بالخط القاطع الوسطي



من خلاله أكيد انتبهت لحاجات كثيرة ورتبت علاقتها ببعض .. واستوت عندي ميزة سهولة التمديدات بسبب دورات المياه فوق بعض والمطابخ قريبة منها أو تحتها كما في مطبخ الدور الأرضي الرئيسي

في الصورة السابقة كيف تم وضع جميع الأدوار جنب بعض حتى أقدر احدد لو حائط يختلف عن الآخر ويجي وسط صالة مثلاً وهذا موجود بس قليل ولازم له احتياطات انشائية

هذي النتيجة واحتمال كبير غلطت في شيء من ناحية الغرافيك .. هذي الرسمة خذت مني وقت وتفكير وايد



ابدأ بالأعلى يسار عندنا دورة المياه من محتوياتها المهمة الخطين الطوليين ورا الكرسي والبديه .. هذا بروز حول 12 سم بيكون في الأسفل طابوق ويسار ويمين والوسط عبارة عن بارتشن مفرغ أما مارين بلايوود أو جبسمبورد مقاوم للرطوبة .. خلفه بتكون التمديدات من صرف وتغذية وبتكون لكل الحمامات هذي مع جزء قابل للفتح للصيانة



وباكمل بكرة بإذن الله مع باقي الأجزاء بتركيز أكبر

[معماري قطري]

في الصورة الأخيرة اليمين هو الممر الموصل لغرفة النوم الرئيسية جهة المشاهد ويمين البانتري فوق وله دريشة مطلة شرق على السطح بعدين مقابلنا باب الغرفة الثاني قرب الدرج والمصعد يسار ومقابل الدرج الصالة اللي باوضح كيف بتكون مطلة على الحديقة الداخلية بسكشن خاص بها وبهذي الواجهة الداخلية

[معماري قطري]

اللي فوق التشطيبات المقترحة لدورة المياه كفكرة قابلة للتطبيق وهي تقسيم الارتفاع الكبير من فوق تحت الجبس نبدأ بصبغ بعده يجي فاصل ستانلس ستيل وهنا غيرت عن كورنيش الجبس تحت الفاصل يجي مباشرة بلاط جهة الشور بارتفاع 2.4 متر للارض وهو كافي ما يوصل الماي فوقه لو ترشش وحتى الشور ممكن يكون على ارتفاع 2 متر وهذا الشور المطري التلفوني يجي ارتفاع أقل .. باقي الحمام من 2.4 متر لحد متر اسفل منه أما ورق جدران وممكن واجهة وواجهة غير لو حبينا بلاط أو رخام مثلاً أو صبغ مختلف وبتخشين غير أو تنعيم بعدين يجينا البوردر اللي يمر تحت مراية المغسلة بارتفاع 15 سم وتحته تبليط بعدين تجينا الكسرة التحتية اللي فيها الانارة المخفية وهذي بس بتكون من جهتين تحت قاعدة المغسلة وخلف الكرسي والبديه فقط