-
26-07-2020 11:49 AM
#1911
تميم المجد
أكيد الدريشة بتكون مفصولة لجزء علوي متحرك وسفلي ثابت
-
26-07-2020 10:59 PM
#1912
تميم المجد
يمكن متابعتي للتصميم هنا تخليني أفكر بصوت عالي واركز شوي على النقاط الصغيرة وترابطها مع بعض .. عدلت شوي على طبيلة السيارات باضافة مخزن وبرغولا خشبية تزين مدخل الطبيلة المفتوح من فوق وتكون متصلة معاه .. وتكون فيها انارة نقطية سبوتات صغيرة موجهة لتحت ونفسها لسقف الطبيلة .. سقف الطبيلة بيكون حديدي عادي وفي آخره قناة ينزل فيها ماي المطر وينزل عن طريق بايبات للحديقة .. المخزن لعدة السيارات وعدة تنظيفها
وهذي الواجهة للطبيلة وتبين قطع تثبيت البرغولا .. الأطراف الخشبية بالبني بتكون مرتفعة شوي ما تخرب واجهة الطبيلة الخرسانية .. إستخدمت نفس الزوايا القمرية ونفس قطع زاوية الجدار ونفس الدخول تحت لعمق 2 سم وارتفاع 20 سم هذي بتكون فيها انارة شريطية مخفية
-
26-07-2020 11:14 PM
#1913
تميم المجد
وسط الطبيلة بصورة مقربة وتغيرت السيارة لمرسيدس اس قديم هذا اللي حصلته
-
27-07-2020 12:33 PM
#1914
تميم المجد
اللي يشوف السيارات والأشخاص وكثير أشياء تتكرر في الرسم وتفاصيلها وحدة .. هذي يسمونها Icons وهي تعتبر وحدات رسم معينة ويسمونها بلوكات نفس الطابوقة تعتبر قطعة رسم وحدة .. يسحبها الواحد ويحطها في أي تصميم يبي ويسوي لها سكيل حتى تكون قريبة للواقع .. مثلاً انا اخلي الرجال طوله متر و 80 سم والسيارة عرضها مترين والا اطلع عرضها بالضبط من النت وانقله بمقياس رسم لتكون بالضبط بمقياس واقعي
للي يحبون يتابعون ويتعلمون الاوتوكاد حتى حصلت مخططات جاهزة بس تنقصها تفاصيل وايد وبعضها مخططات غبية .. هذا رابط فيه كثير واستوت مواقع كثيرة بعضها تبيع وبعضها تعطي شوي مجاناً
https://dwgmodels.com/cad_library/
أي حد عنده سؤال والا يحب يتعلم انا حاضر .. العملية سهلة بس شوي مملة وتحتاج صبر وصراحة تعتبر تطوير ذاتي
استغربت من أحد الإخوان كان يتابع معاي تصميم بيته وبدأ يبنيه بنفسه .. ألحين ما شاء الله وصل لتصميم السور الخارجي وأرسل لي تصاميم مقترحة أقول رايي فيها .. طلع هو مشتغلها بطريقة احترافية وبتشكيل ثلاثي الأبعاد وبانارة
-
29-07-2020 01:02 PM
#1915
تميم المجد
ما اشوف نفسي بالغت في التصميم والمواد غالبها رخيصة وبسيطة لتقليل التكلفة ولإعطاء طابع مغاير للتصاميم المعتادة .. وتهمني آرائكم أكيد اشوف المتابعة ما شاء الله متواصلة بدون تعليق
عدلت جزئية مظلة باب الحوش وضحتها حتى تتناسب مع الواجهة والتوزيع الأرضي .. باقي الرصيف جهة المباني لازم أوضحه ومفكر أسويه حجر يمكن الجزء الوحيد في البيت الرصيف وأحواض الزراعة بتكون حجرية وإحتمال لو حصلت حجر بازلتي يكون أحسن اللي يكون داكن اللون .. وبتكون فيه انارة نقطية صغيرة تنور على الأرضية وتكون إنارة هادئة وخافتة
يهمني إني أمشي على خطة للبناء وتصميم قد ما اقدر ما اغير فيه شيء .. الدرايش الملونة فوق في مدخل البوابة احتمال شوي أرفعها بس وازنتها حتى تنشر نور متلون وتبين متوازنة مع اللي في قوس درايش المجلس .. وحطيت شوي منها فوق مدخل البيت
-
29-07-2020 01:04 PM
#1916
تميم المجد
إرتفاع البوابة 5.44 متر والله يعين على التخطيط والاستشاري
-
29-07-2020 11:28 PM
#1917
تميم المجد
الكسرة هذي مثل الطوق في أعلى البوابة 10 سم ارتفاعها وعمقها 5 سم بس مفكر ازيد الإرتفاع ل 15 سم .. بيكون فيها شريط انارة مخفي والنور بس يبين فيها .. نفس الطريقة للبيت ولما يشبه النعلة في الارض أو التقاء الحائط مع الأرض بس بتكون الانارة مخفية فوق وتنور على تحت
فكرة تصميم حديثة وغير مكلفة .. شريط الال اي دي 25 متر ب 180 ريال ويعمر وانارته بطاقة بسيطة جداً 3 وات .. أعتقد باكون وفقت بإذن الله بين المزج بين التصميم الحديث وبعض العناصر التراثية
-
30-07-2020 05:06 PM
#1918
تميم المجد
-
30-07-2020 05:12 PM
#1919
تميم المجد
زدت ارتفاع الطبيلة ل 2.3 صافي وفي الوسط بتكون حول 2.5
-
31-07-2020 01:26 PM
#1920
تميم المجد
من التفاصيل اللي اشتغلت عليها دورة المياه الرئيسية تبين هنا كما هي في السابق وناقشت وضعها وجنبها دورة مياه عادية لإحدى الغرف
الفكرة كانت قسم الحمام الكبير الى اثنين واحد صغير وواحد كبير شوي اليسار ممكن يكون 4 قطع واحتياطي لو اليمين مشغول أو متعطل أو بس للتغيير .. على طريقة بعض سويتات الفنادق وفكرة تعلمتها من صديق مطبقها في بيته
اللي على اليسار دريشته بتكون نازلة ومقابلة الباب بالضبط وتطل على الحديقة الداخلية وممكن تكون بستارة بلاستيكية أو خشبية أو محببة للخصوصية ( زجاج رملي ) .. اللي على اليمن استوعب جميع القطع ما عدا طاولة المكياج والطاولة قريبة وغرف الملابس قريبة .. طلع عندنا حيز بسيط لكبت وسط بين الحمامين لمواد التنظيف والفوط
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى