البنغال زينين في الخشب ووايد موجودين والخشب متوفر وأرخص بوايد من الحديد وسهل التعامل معاه .. بعض أنواعه غالية إنت خذ أرخص شيء اللي يستهلك للبناء .. شوف المجلس هذا من أوائل مجالس فريجنا له فوق 55 سنة في بدايات استخدامنا للاسمنت في البناء وبيوت مبنية في وقته بالحصى والطين والسقف لازم دنجل وخشب مربع كبار شوي للمجالس لأنها تجي أطول من الدنجل .. مع الدنجل ومع البلايوود اللي واضح هنا .. إنشق شوي وسووا له صيانة والمجلس تدخله ما تحس إنه قديم مصان داخلياً ومتغير بس سقفه في الغالب كما هو انعمل له سكريد وعزل بس الخشب باقي من ذاك الوقت .. انبنت مجالس جنبه غير على فترات بفرق عشرات السنين .. الله يغفر لشيبتنا الكبير وكبيرنا الوالد عبدالعزيز بن خالد كانوا الشياب وبعض من كانوا شباب وأطفال في ذاك الوقت مثلي يلتقون هناك
هذي صورة للسقف من داخل وشلون الخشب متعرج بعد هذي السنين الطويلة لكن عايش وهذا الليوان الخارجي داخل معمول جبس وجدران عليه قماش مشدود وتحته حشوة اسفنجية .. الأعمدة ذي وتيجانها كلها خرسانة أو حتى تشكيل اسمنت يدوي بدون حديد نهائياً لذلك معمولة متقاربة
وهذا جزء ثاني للسقف
الجسور الاسمنتية اللي متشلخة على اليسار هذي تقويتها بخشب مغطى بالإسمنت
كان مجلس جدي رحمة الله عليه مقارب في طريقة البناء وهذا اللي صورته مجلس عم جدي رحمهم الله ويعتبر أصغر أعمام جدي وهو أصغر منه سناً لكن كانوا متقاربين .. مجلس جدي تم هدمه من فترة بسيطة وكان فيه خشب مربع بقطاعات عريضة أعتقد تم نقلها لمزرعة الوالد رحمه الله وتم بناء مسجد صغير مكانه
أحد أعضاء المنتدى له فترة يصمم وكان متورط مع استشاري وايد ضعيف نصحته يغيره وهذا فرق عن السابق
توزيع الحوش عندي عليه شوية ملاحظات .. أولها المجلس مصمم مرتفعة أرضيته حتى تجي غرفة السايق تحته .. الفكرة حلوة بس الإشكالية في التخطيط يعطون ارتفاع محدود للمجلس ممكن على سبيل المثال يوصل 4 متر أو لنتفاءل نقول 5 متر .. أرضية المجلس على ارتفاع 1.05 متر الباقي من ال 5 متر 3.95 متر منها صبية السقف نقول 25 سم طارت تبقى 3.7 منها 60 سم لسور السقف تبقى 3.1 متر صافي ارتفاع ننقص منه أي جبس .. وهذا لو عطونا 5 متر وممكن 4 متر هنا تكون كارثة ولا يمشي التصميم
الحل سهل نخلي غرفة السايق بارتفاع اقتصادي 2.4 أو 2.6 متر مثلاً ونخلي أرضية المجلس على الإرتفاع العادي 30 سم مثلاً ونعمل للدريشة منور نازل جهة حوش البيت وفوقه شبك حديد قوي ممكن المشي عليه
هذا المقترح للمجلس ومنور غرفة السايق ممكن يكون بكامل العمق ودريشة كبيرة مثل الباب وممكن أي حد يمر فوق شبك الحديد اللي يغطيها وضحتها يمين .. وسعت مدخل السيارة ل 5 متر واستوى المكان كافي لسيارتين .. مكان تانكي الماي ما فيه الا جدام السيارة اليمنى
وباكمل مع الباقي قريب
سويت بعض التعديلات على المدخل .. بيكون أحلى لو في البداية باب قزاز وبعدين خشب أو لو حبينا النظام المفتوح قزاز يو بي في سي محكم الإغلاق بيوفر لنا جو مناسب وبيمنع الغبار والحرارة والصوت ونشيل الباب الخشب بالكامل
العتبات خليتها ثنتين والرامب يستوي على جنب .. الملحق حلاته أرضيته وحدة مع البيت وممكن نغطي الممر بقزاز والا بولي كاربونيت .. مكان الغسيل بينقله برا جنب غرفة الخادمة بس بعد اتمام البناء وبيكون هذا ستور وعندنا تحت الدرج وراء المصعد ستور ثاني
الدكتات مسويها كبيرة وايد وانا سويت مثال اللي جنب الملحق مع البيبات بالمقاس المعروف 10 سم
هذا تصميم الإستشاري للمجلس وغرفة السايق يمين تحته بتكون .. التصميم يبين مناسب وممكن يمشي هشكل كما هو لو وافق عليه المالك
مع إنه بيكون سهل تطويره للأفضل .. غرفة الدريول صغيرة بدون داعي وممكن تكفي ل 3 بالراحة ومعاها يكون مطبخ صغير خارجي .. ما ننسى المساحة كلها مغطاة بالمجلس الا مكان بداية الدرج وممكن المدخل وحتى المدخل ممكن نغطيه جزئياً أو كلياً حسب الرغبة وأقصد مدخل المجلس
هذي الغرفة بعد التعديل قللت ارتفاعها ل 18 عتبة لتحت = 18 * 0.15 = 2.7 متر نشيل منها سمك السقف ما يقارب 20 - 30 سم بتستوي صافي ارتفاع على الأقل 2.4 متر وهو مناسب ونكون قللنا الحفر وقللنا عتبات الدرج وحركنا الباب الكبير بدون داعي جهة الجنب وصغرناه شوي كما سيتضح للمجلس
سويت دريشة تطل على منور محفور بعرض 70 سم وطول 1.6 متر وهذي بتكون في أرضيتها حفرة المنهول والمضخة الغطاسة داخلة لتصريف حمام البيسمنت والمطبخ جنيه .. بعمل الحمام خارجي استوت عندنا مساحة جيدة للغرفة ودريشته ممكن تكون جنب الباب على المنور المفتوح
المجلس فوق متطابق مع الدور تحته
إمتداد السقف فوق الباب ممكن يكون نفس خط الحائط اللي ورا التلفزيون والتغطية بغرل الحديد لفتحة المنور الساقط سهلة أي حداد يسويها بتيوبات حديد
حمام المجلس بدال ما عرضه يكون 1.85 نصغره شوي حتى يكون جداره فوق حمام الغرفة تحت 5 سم ما بتأثر بالعكس بتوسع المجلس شوي
هذا توضيح للصالة والدرج والمصعد تم تكبيره 73.5 سم حتى يكون على خط واحد مع الدرج ولو كان صغير يثبتونه بحديد في الخلف ويبقى وراه مساحة مفتوحة للصيانة ومؤكد شكله بيكون أجمل .. الصالة ألغيت العتبة اللي لها أتوقع بتطلع مزعجة بس لو نبغيها نسويها سيدة بتطلع سهل بناءها وحلوة
حتى البروز الداخلي للجدار جهة الصالة اللي جنب الباب وجنب التلفزيون نقدر نخليه مع حايط الباب الداخلي وتكون فتحة الصالة أوسع
للمقارنة خليت الدكت اللي مسويها الاستشاري فوق وعمقها 50 سم واحنا بنمدد فيها بايبات أكبرها 10 سم وسويت دكت تحت 20 سم وصافي تطلع 18 لو غطيناها باسمنت بورد كافيه لبايبين 10 سم وحتى بايب مطر 10 سم وحتى بايبات تغذية بتكون بحدود 2 سم لكل بايب
الدور الأول كما صممه الإستشاري
مقترحي لبعض التعديلات عليه
عدلت على حمام الماستر صغرته شوي ل 2 متر بدال 2.5 في العرض بدون داعي وكبرت الصالة شوي وهشكل وضعية الأثاث وغرف الملابس أفضل .. حتى عندنا الغرفة اليسرى فوق نقدر نفتح باب مستقل لغرفة الملابس وجنبه باب لدورة المياه أفضل وتكون مثل الغرفة الرئيسية ونحصل مساحة تخزين محمية ومستقلة أفضل