مراجعة التصاميم المعمارية وابداء الملاحظات عليها (محدث)

[معماري قطري]

الغرفة اليسرى تحت في البنتهاوس 3 متر و 5 سم عرضها والطول من يمين لليسار 7.8 متر .. مناسبة حق ولدين واللي فوق ممكن بنتين أو ولدين بأسرة مفردة

[معماري قطري]

تعديل بسيط على الدور الأول .. فكرت بفتح الصالة بالكامل بدون بارتشن للتلفزيون لأن الغرف بتكون بعيدة والأبواب باسويها كاتمة وبربلات فقلت التلفزيون يسوي جو للمكان ولا تكون الغرفة اليسرى شبه مفصولة عن حيز البيت .. والمناور السقفية خصوصاً اللي في الوسط عدلته وبيكون على ارتفاع البنتهاوس يعني ارتفاع مزدوج ومقاسه تغير حتى يناسب البنتهاوس بثلاث غرف بعد ما سويت الارتداد عن الواجهة واللي هو مطلوب



درايش الغرفتين اللي حول السرير بتكون لين ارضية الغرفة وتنفتح مثل الباب ولها جزء بسيط بارز للزراعة مع درابزين حديد بسيط بيكون منحني للخارج في الوسط

هذي صورة مكبرة للمكتب والغرفة الرئيسية أضفت منور للمكتب بعد ما سويت الارتداد في البنتهاوس وأشوف الوضع ترتب أكثر من أول بإذن الله



هذي صورة مقربة للصالة .. بيكون التلفزيون مقابل الجلسة المفتوحة ووراها طاولة الطعام العلوية واللي فوقها المنور المرتفع 4.4 في 2.4 متر .. ألحين استوى وايد إنفتاح حلو للبيت والدور العلوي .. سويت العمود دائري حتى ما يبين بشكل مزعج وبسهولة المرور حوله

[معماري قطري]

من أهم المناطق عندي مكتبي بيكون طويل شوي وبابه وواجهته قزاز حتى يكون عندي انفتاح على البيت كله .. ومكان المنور حلو وما فيه داعي أسوي طوب زجاجي في الحايط الفاصل بين البيت وامتداد المكتب .. وإضافة الغرفة الخلفية الزجاجية بتطلع حلوة وبتنفصل من وراء الأعمدة بستارة ممكن أغلقها وأفتحها وقت الحاجة والشمس تدخلها غالب النهار

[معماري قطري]

مكتوب مقاس المكتب 4.2 في 8.8 وانا دوم أبدأ بالبعد الأفقي وأتبعه بالبعد الرأسي .. لكن بعد زيادة الغرفة الأخيرة أو الجزء الأخير إستوى 4.2 في 11.8 وبيكون مطل على جهات البيت الجنوبية .. سقف الإمتداد بيكون مايل وقرميد الجزء الوحيد في البيت القرميد خاطري في اللون الأزرق السماوي وبيتناغم مع الكسرات اللي في سور السقف اللي بتكون زرقاء بنفس درجة اللون

[معماري قطري]

أحد الإخوان أرسل لي تصميمه آخر الاسبوع اللي راح واشتغلت على بعض التعديلات عليه .. أول شيء هذا التصميم كما هو من الإستشاري



توزيع الحوش مع الدور الأرضي

[معماري قطري]

الملاحظات كثيرة وقريبة من الملاحظات في كل تصميم مقارب .. الممر في مدخل الحوش 3.7 متر وايد عريض وبيطلع أحلى لو كبرنا الحديقة وصغرنا الممر في حدود الباب بس .. مكان تانكي الماي غلط وبدون مضخات والا بتكون مضيقة موقف السيارة .. وأمور كثيرة غير بنشوفها مع التصميم المعدل

[sara jsm]

ضاق صدري من مكان درام الماي تكفى رحله ورى صوب الملاحق ..
وسوله مطبخ تحضيري مع قعدة الدور الاول ..

بانتظر تعديلاتك عشان اعدل عليها

[معماري قطري]

ضاق صدري من مكان درام الماي تكفى رحله ورى صوب الملاحق ..
وسوله مطبخ تحضيري مع قعدة الدور الاول ..

بانتظر تعديلاتك عشان اعدل عليها

ذكرت هذي الملاحظة وحركته تحت .. حتى التانكي مب واقعي وحتى لو واقعي ضيق بيستوي

خلينا نروح للدور الأول والمالك يشتكي إنه تعب لين وصل لين هذي النتيجة والمهندس متضايق يبي يخلص وبس .. مستغرب ليش يحرمه من حقه



بعد وايد مساحات مب مرتبة وضائعة ومساحات ضيقة

دور البنتهاوس

[sara jsm]

هل هالتوزيع يناسبه ويناسب عياله هذا السؤال ..
وبعدين هو من حقه يغير ويبدل لين يكون مقتنع ومرتاح للتصميم ..

تدري انا اكتشفت ان أكبر غلط نسويه ان الماستر يكون حجمه كبير وايد ..
وفي النهايه هو غرفه نوم .. لا هو صاله ولا مطبخ عشان الواحد يقعد فيه ويستخدمه وهو بهالحجم ..
لو مصغر وموسع على الغرفه اللي حذاه ابرك ..

[معماري قطري]

هل هالتوزيع يناسبه ويناسب عياله هذا السؤال ..
وبعدين هو من حقه يغير ويبدل لين يكون مقتنع ومرتاح للتصميم ..

تدري انا اكتشفت ان أكبر غلط نسويه ان الماستر يكون حجمه كبير وايد ..
وفي النهايه هو غرفه نوم .. لا هو صاله ولا مطبخ عشان الواحد يقعد فيه ويستخدمه وهو بهالحجم ..
لو مصغر وموسع على الغرفه اللي حذاه ابرك ..

كلامج صحيح رتبتها وبنشوف إن شاء الله النتيجة قبل الساعة وحدة