مراجعة التصاميم المعمارية وابداء الملاحظات عليها (محدث)

[معماري قطري]

من الأشياء اللي انتبهت لها ألحين هو وجود مستوى الصفر في الحوش وهذا غلط المفروض نكتب مستوى الصفر هو الشارع المقابل أو أعلى نقطة في الشارع المقابل ثم نضع +0.30 مثلاً قرب البوابة وللزراعة +0.15 أو عتبة أنزل من رصيف المشاة ونقدر نستغل هذي العتبة في الإنارة الجانبية الموجهة على الزراعة سواء مخفية أو مكشوفة.. وراء في آخر البيت كاتب له 0.00 يعني المقاول يقدر يستغل هذي النقطة فيما بعد بحيث يسوي الأرض سيدة مع مستوى الشارع ولو طلب منه رفع الأرضية يطلب مقابل ومقابل اللي يناسبه

عدلت على مستويات الحوش والزراعة وباقي الإستشاري يضبط مستويات البيت حتى عنده زيادة 1.3 متر يقدر يزيدها في ارتفاع البيت وانا نزلت أرضية الدور الأرضي ل 0.45 من الحوش يعني من مستوى الشارع نزيدها 30 تستوي 0.75 متر والحوش من وراء عندنا 0.50 يعني تصريف الماي من وراء لجدام نقدر نقول لمنطقة الزراعة الأمامية اللي مستواها 0.15 بيكون سهل وهو نفسه مستوى الرصيف والبيت أرضيته فوق بعد عتبة 15 سم



في حال انملت منطقة الزراعة ماي نسوي فتحة فوق مستوى الرصيف تطلع الماي للخارج والفتحة تكون بشوي تحت مستوى 30 سم

بالنسبة للمنور النازل بين الملحق والبيت هذا لازم نحرك البيت للأمام 40 سم لأنهم يبون 1.5 متر بدون عوائق في الطريق والمنور مع مستوى الأرض ومغطى بشبك حديد ممكن يمشون عليه ولا بفاهمين والمفروض الإستشاري يوضحها لهم صح ويناقشهم

[معماري قطري]

مقترح غرفة السايق هذي زيادة مني ممكن يحاول فيها بس هو وصل الحد الأقصى لنسبة البنيان بالنسبة لمساحة الأرض الفار مال التخطيط Floor Area Ratio

[معماري قطري]

هذا مخطط الاستشاري ولا ادري شالحلول اللي سواها للتصريف ولصيانة المنهول لو فيه مشكلة والا المضخة خربانة .. كل اللي سواه رفع أرضية الدور الأول حتى يسوي درايش مرتفعة مثل درايش السجون ملامسة للسقف وارتفاع السقف عالي حول 3.4 متر .. انا أشوف المناور النازلة أفضل ويسوي منفذ لصيانة المنهول مال الصرف الصحي ولو يبغي يسوي منهول ثاني لتصريف المياه الجوفية لو طلعت مياه تحت أو حول جدران البيسمنت



هذا البيسمنت المقترح مني ولو حافظنا على المستوى اللي محدده الإستشاري سالب 2.6 وعندنا 0.75 حق مستوى أرضية الأرضي بيكون عندنا الفرق 3.35 نشيل منها سمك الأرضية اللي بتكون السقف للبيسمنت ممكن 25 سم بيبقى عندنا 3.1متر صافي ولو نحب نزيد نزيد عمق الحفر 3 متر عمق عادي حتى 4 متر ممكن بسهولة

ضروري نسوي تصريف لأي مياه جوفية حتى لو مب موجودة .. وميزة التصريف يمنع ضغط المياه يخرب أساسات البيسمنت ولا يوصلها لأنه يدور الطريق السهل طريق الفتحات اللي في البايبات اللي فيها سلوب تودي المياه للمنهول وهذي طريقتها تحت أرضية البيسمنت موضحة في السكتش هذا البايب يجي مايل جهة الصرف وفيه فتحات فوق ويمين ويسار وتحت يكون مجرى المياه اللي يودي للصرف أو للخزان المدفون واللي فيه مضخة غطاسة تطلع أي ماي فوق أول بأول

[معماري قطري]

هذا مقترحي للبيسمنت وتوزيعه تم تصغيره من الوسط 30 سم حتى نوصل للارتداد المطلوب ومن المقدمة 40 سم فوق ال 30 سم

[معماري قطري]

الإكس يسار البانتري هنا بيكون منهول الصرف له باب صيانة من البانتري ممكن الدخول له ومستغرب إصرار التخطيط على عدم فتح منور في حيز ال 1.5 متر الإرتداد مع إن الإستشاري مسوي دكتات 40 سم ماكلة من الممر كثير والمتبقي 1.1 متر وليش ما أعترضوا عليها وهذا يوضح حججهم الواهية على كلام صاحب التصميم مستحيل حد يستثني هذا الإجراء وهو مستثنى بالدكتات وانا صغرتها ل 20 سم

[معماري قطري]

نسيت موضوع الاكسات تحت بسطة الدرج هذي ممكن نستخدم مساحة وحدة حق منهول الفرنش درينيج مال المياه الجوفية

[معماري قطري]

تغييرات وايد صارت على الدور الأرضي للإستفادة من المساحات المتوفرة خلونا نشوف أول آخر ما وصل له الإستشاري



تصميم تقليدي ما فيه اهتمام بالمساحات ولا فكرة عن توزيع الأثاث مع إن الأثاث آيكونات جاهزة يسحبها ويحطها في المكان اللي يبيه .. مسوي الدرج 6 عتبات يعني رافع الأرضية 90 سم ومستوى الحوش كله مخليه مستوى الصفر والمفروض الصفر الشارع والحوش يكون متدرج حسب .. مكان التانكي لازم يعطي عنه فكرة وأشياء كثيرة وهذا يعتبر سيقدم للموافقة المبدئية المسماة دي سي 1

انا عجبني موقف السيارة مبتكر

[معماري قطري]

هذا الملحق اللي مسويه الإستشاري والمسافة بينه وبين البيت 2 متر وممكن ينزل لمتر ونص حسب القوانين ومسوي مظلة خرسانة بامتداد 1.2 متر يعني 80 سم اللي نازل منها درج البيت 6 عتبات واللي بتكون مزعجة معرضة للمطر ولو سوى مثل ما انا مقترح عمل منور زجاجي أو بولي كاربونيت وفيه أنواع وألوان تغطي السقف مع فريم ألمنيوم وأبواب بيكون ممر شبه داخلي ومحصور ولا فيه غبار ولا مطر



وألحين مسموح بتغطيته كامل من التخطيط وبخرسانة وانا افضل الزجاج أو البلاستيك

باب المطبخ محرك يسار بعيد عن المدخل للصالة وبنشوف التعديل شلون

وهذا توضيح للواجهات يمين ويسار وكيف الإستشاري مسويها في الأولى وانا مقترح المناور النازلة المفتوحة على حفرة نازلة للبيسمنت تدخل النور وشوية هواء بس للأسف هذي الجهة يبونها 1.5 متر خالية من أي مناور زين الاستشاري مسوي دكتات 40 سم تقلل خلونا نسوي المناور بنفس مستوى الدكتات بس 40 سم 10 للطابوق الداير و30 فتحة التهوئة لأسفل قالوا ولا الوزير يقدر يستثنيك للمالك

[معماري قطري]

في الرسمة الفوقية مستوى أرضية البيت للحوس 90 سم واللي تحتها 45 سم على 4 عتبات كل عتبة ارتفاعها 11.25 سم مع ازالة البروزات الأمامية وتوسيع المنطقة قبل الدخول لمتر واحد حتى نقدر نسوي رامب لدخول أي كرسي متحرك

كما هو موضح في التوزيع الأرضي


هذا مقترح 1 بعد ما ضبطت المقاسات وصغرت شوي الممر الوسطي حتى أقدر أسوي درج للبيسمنت ومناور فقط جهة اليمين وفرت ارتداد 1.9 متر والمناور بارزة 40 سم منها يبقى المطلوب 1.5 متر حق يراكضون فيها الدفاع المدني



مقترح 2 فتحت المعيشة على الممر ودمجت البانتري معاها ووضحت مسارات الحركة بعرض 60 سم والفتحات وايد أكبر بس 60 سم الممر الكافي للشخص العادي وحتى العريض شوي غالبية الناس عرضهم 45 سم وحولها



انفتاح الرؤية من المدخل لين آخر البيت والملحق وبيكون الملحق عندنا ارتفاع أرضيته نفس البيت لسهولة المشي له والخروج منه والصالة الخلفية استوت مفتوحة عليه بواجهة زجاجية متصلة مع الباب جزء مرتفع فوق كاونتر البانتري الداخلي

حيز المجلس والصالة حطيت له باب سلايدنغ ممكن يغلق وقت الزيارات النسائية ويستوي دخول البيت من جهة الملحق لصاحب البيت والأولاد

[sara jsm]

عندي سؤال .. انت مطفي الليت ومسوي الخرايط الفسفورية ولا وشو !؟