سؤال مهم والتدعيم مهم لو الحفر غزير وملامس لحدود الجار .. عندنا استووا وايد خيالين ويعقدون الموضوع للي بيسوي بيسمنت ملامس لحائط السور .. مع إن حائط السور يكون مدعم وخرساني من الأساس لو بنحفر عمق يصل ل 3 أمتار وهذا يسمحون به ويصير للأراضي التجارية وبأعماق أكثر ستة وأوقات 9 متر لكم دور بيسمنت للمواقف وهذا حاصل في شارع البنوك والبنوك ملاصقة لبعض
شرايكم في مقياس الأعمدة الدائرية هذي أوتاد مطروقة في الأرض وواصلة لعمق صعب فيه يتحرك جسم العمود الحديدي من الخارج ويحطون فيها حديد وخرسانة ويسوون قاعدة كاملة بعدين عليها .. الأعمدة تبين لي حول ال 40 سم قطرها وهذي لحمل عمارة كبيرة أو برج .. بيوتنا بعض الإستشاريين يزايدون في أحجام الأعمدة وعددها يستوي البيت غابة من الأعمدة ومال عمك لا يهمك يا باشا
يقصد هنا الحرف بي .. مثلاً عندنا جدار 10 سم أقل عرض جسر فوقه يكون 12 وبالبلاستر يجي أكثر من 12 للجدار ممكن 13 والجسر فوق أوقات يصبغونه مباشرة لو مكشوف وفي غالب الأحيان السقف المستعار يغطيه .. ولو عندنا مسافة 7 متر بين عمود وعمود 700 سم على 40 تعطينا 17.5 وغالب جدراننا 20 سم طابوقها والجسر فوقها 20 سم ماشي حتى لبعد 8 متر بين عمودين
وهذا قانون مبسط في الواقع الحسابات تختلف والحين بالكمبيوتر العملية سهلة بس المشكلة في الأحمال واستعمال الكمبيوتر عند البعض يحط فرضيات مستحيل تصير في الواقع ومبالغ فيها
ضحكتني سالفة Wide of beam كلش ما تركب ومب غلط ما يعرف انجليزي بس المفروض مهندس ولغة الهندسة الإنجليزي والمفروض يكتب Width of Beam or Beam's width
ما دمرتنا الا مثل هالحلول .. المفروض واجب المقاول يهيء الظروف المناسبة كلها لوضع الخرسانة وضمان سلامة المضخات والهزازات والعدد المناسب من العمال المختصين وسلامة السقالات والشترات .. البوكلين شكثر بينقل بتمر ساعات وما خلص خلاط ردي مكس واحد
معليش انا بارضى بمثل هالوضع لو عندي منهول بعيد ما يطاله هوز البمب ومحتاج أسويه بس مب لكل الصبية
متفق معاه في هذا بس بعد ممكن الحسابات الإنشائية تثبت العكس وألحين تطورت البرامج الحسابية وتعطي قراءات دقيقة وآمنة لتركيبات انشائية كانت صعبة في السابق
سؤال إجابته صعبة بالنسبة لي بس أتوقع قرب هذي الأبراج خطر لأن الإشارة قوية والأفضل عملها عن طريق الأقمار الصناعية من فوق وبعيد وتبث بث متساوي وآمن ولا فيه داعي لنشرها في الأرض
هذا سؤال تحفيزي مهم للي يفكرون في الهندسة ودراستها والإستثمار فيها كعلم وكمهنة .. كثيرين ما نجحوا الا بسبب الحب للمهنة ذي والممارسة الدائمة ووايد ما بينت بوادر النجاح عندهم الا بعد عمر فوق الستين والسبعين بس بدوا بعد النضج والقدرة العلمية وبعد إستجماع أكبر قدر من المعرفة والعلاقات ومعرفة السوق والشركات
أختلف مع المؤلف في أول نقطة واللي يركز على شغلة هندسية خسران وخسران كثير والشغل بيكون ممل وانا يمكن أخطيت هذا الخطأ في بداية حياتي .. عندي بكالوريوسين واحد في العلوم هندسة مدنية وواحد في الفنون هندسة معمارية .. في البداية ركزت على الجانب المدني والإشراف وكنت شاب وقتها ومتابع مع واحد من كبار المهندسين الإنشائيين ( فوزي اسماعيل ) كان يطلبونه البلدية ايام عزها يثبت لهم بالحسابات سلامة المنشأة لأنه يصمم تصميم مدروس وخفيف واقتصادي وكانوا يشيكون وقتها .. وكان يشتغل هالشغلات خاص بعيد عن عمله الحكومي اللي في الغالب متابعة استشاريين وبعض التصاميم البسيطة اللي نسويها في المكتب
كنت انا اطلع معاه نفحص بعض المباني ونتابع الصب للخرسانة بس تعبت وجاتني دوخة وحذرني الطبيب بسبب السكر ما اروح مواقع ووقفت وبعدها راح المهندس فوزي .. خلاص طلع شغل خاص والحين مدير كبير لمكتب كبير وايد شغل أبراج ومباني حكومية كبيرة .. كان من ضمن شغله بعد ممارس لشغلة فنية تحتاج براعة في الرسم والتلوين والعرض .. اللي هي الزجاج المعشق وفتح مشروع كان في بيت أجار قبل وجاب أقرباءه يشتغلون فيه وأبدعوا وعمل قبب منها قبب في سوق الديرة اللي أعتقد هدموه وقبة قطرها 48 متر قد دوار محترم في مجلس قصر سمو الأمير الوالد .. وهذا فن وهواية بعيد عن الخرسانة والحديد والإنشاءات .. يعني هو مزج بين البزنس وفتح سبكترآم أو سبكترا .. والفن كان المصمم للوحات الفنية الزجاجية والهندسة الإنشائية .. وأخيراً إدارة مكتب هندسي كبير
لو بناقش نقاط المؤلف باختلف مع أغلبها .. بس نقطة مهمة هو يمكن نساها هي المهندس ذخيرته كتبه اللي درسها لازم تكون مراجع يراجعها دوم ويزيد عليها بالإطلاع على الجديد
أكيد منها تشكيلات كثيرة مثل كسر الرخام والزجاجية وغيرها وفن شغلها وتنفيذها
ما أعتقد هذي الأرقام صحيحة وتعتمد على أُمور كثيرة 4 و 5 مثلاً ضغط قوي ويخرب البايبات حتى لو كانت جيدة وضغط مياه الإطفاء معروفة مضغوطة دوم وسلاح ذو حدين لو صار خلل في النظام بتغرق مكاتب وشقق .. فيه أنظمة ذكية صحيح ومع هذي الأنظمة كذلك الخطأ كارثي على الأقل على وحدة وحدة لو كانت مفصولة وبنظام اطفاء جيد
عندي في البيت ركبت مضخة ضغطها 5 بار وولدي خلاها 3 ونص وكنت ابيها 2.5 بس وصار الماي قوي والمشكلة استهلاك زايد وراحة ينملي البانيو بسرعة .. شوي ويصير تسريب في وصلة بديه وكان سهل فكه واصلاح الوصلة لأنها عند المخرج لكن لو صار في وصلة مخفية في البايبات هنا المشكلة بتكون أكبر .. قلت له خله 2.5 وافتكيت من القوة الزايدة
اتفق معك بو عبدالله، البيبات ما تتحمل الضغط القوي وطريقة توصيل البيبات ما راح تكون بالمواصغات المطلوبة لتحمل مياه مضغوطة، عندنا نظام ضخ مباشر من الشركة الموزعة للبيت بدون خزان وتمديدات البيبات مختلفة وطلبية خاصة حتى ان قطرها صغير وورغم قدمها الا ان السر في التنفيذ.. كان ممتاز وغالباََ التسريب من التركيبات اللي يشتريها راعي البيت مب من الشبكة
اللهــــــم ارحم أخي فايز واسكنه فسيح جناتك وسائر أموات المسلمين
شغلكم زين اخوي بو زيد وأعتقد نظام اللؤلؤة عندنا ممكن مشابه .. في أمريكا ما فيه خزانات كلش فيه صخان في بعض الشقق ويكون داخلي الماء يجي مضغوط وللجميع بس بعد ضغط معقول ما يكون قوي زيادةالمشاركة الأصلية كتبت بواسطة سالم الزهران
ضوابط المشاركة
رد مع اقتباس
