مراجعة التصاميم المعمارية وابداء الملاحظات عليها (محدث)

[معماري قطري]

زيادة تفاصيل للجزء هذا لأنه مهم يوضح لنا عدة عناصر والربط بينها .. مثلاً الجدار الخارجي لازم في المواصفات يتحدد الربط بين الطابوق ال 20 سم المفرغ من جهة الداخل والطابوق أو ألواح السيبوريكس والبديل لها ممكن طابوق عادي 10 سم مفرغ بس أشوف السيبوريكس أفضل للعزل وأخف وهذا لو سعره مناسب .. الربط بيكون ميكانيكل بقطع حديد خاصة تركب أثناء تركيب الطابوق وبعده عازل الفوم وبعدين جزء الحايط الخارجي اللي يعتبر حماية للفوم .. ودي أخلي فراغ تهوية بين الفوم والسيبوريكس حتى يزيد العزل بحدود 3 سم الفراغ وبيكون السيبوريكس 7 سم سمكه بس متوقع يستصعبها المقاول مع إنها تصير وسهلة بنشوف إن شاء الله



تقريب لمنطقة العارضة الخاصة العلوية اللي تحمل الجدار فوقها واللي يلتقي به المنور المائل لسقف دورة المياه البارز عن محيط البيت ومتصل مع الدريشة .. هذا بيكون بعرض 2.6 متر بعرض كامل العرض لدورة المياه وبطول 1.1 متر يغطي منطقة الشور والبانيو بحيث يعطي شمس مباشرة من بدايات الصباح للظهر وباقي الوقت نور طبيعي مناسب لكل دورة المياه

طبعاً الجسر الحامل هذا بيكون مغطى بجبس من الداخل ومرتفع جهة اليمين مع الإضاءة الكهربية العلوية .. الفكرة كتصميم إنشائي يتبع متطلبات الوضع المعماري المراد تطبيقه .. هنا مضطر أسوي الجسر بكامل العرض أما في التقاء الأرضية مع الجدار بيكون حتى الجسر معزول ونفس الشيء ينطبق على النوافذ العادية .. حتى لو ما رضى الإستشاري ومتوقعه ما يرضى وايد مصعب الأُمور باتفق مع مقاول جيد يسوي كل هالتفاصيل وعلى بعض التعديلات الإنشائية .. لازم أغامر شوي بس بتكون مغامرات محسوبة ومحسوبة صح والغرض منها توفير عزل حراري جيد والقضاء على أي جسور حرارية



بعدين بكمل التفصيل مع صورة أكبر لتوزيع دورة المياه في هذي الجهة لأني ضروري أوضح صورة التوزيع الداخلي والسقف كيف بيكون وكيف التقاءه مع الجسر هذا وكيف الإنتقال من قسم المنور السقفي النازل بحدود ارتفاع 3.5 متر الى ارتفاع 4 أو 4.5 متر .. محتار أحافظ على كامل الإرتفاع والا انزل السقف المستعار

[معماري قطري]

من تفصيل الحايط الخارجي والمنور السقفي ننزل حق تصميم دورة المياه من داخل وعلاقتها بدورة المياه فوقها وتحتها .. الموضوع سهل بس الإستشاري الله يهداه مفكر دقة قديمة وين بتحط الدكت وشرحت له مرات يروح الرسام يمسح اللي سويته ويعطيني مخططات ثانية حسب اللي هو يشوفه صح .. إصطدمت بعقليات شغلها كله نسخ ومال أول هذا ما وجدنا عليه آبائنا

هذا تصوير للتوزيع الداخلي جهة اليمين بعد الدخول من الممر الموضح والممر بيكون ضيق بعرض 1.2 متر بس مناسب للحركة الداخلية يوصل لبابين يمين ويسار واحد لحمام احتياط صغير بس ثلاث قطع يمين وواحد أكبر يسار بيكون ست قطع وستيم معاه يعتبر 7



البيت بشكل مقطعي شبه مكتمل باقي تفاصيل لازم تضاف



فوق وتحت حمامات بتكون متصلة والدكتات داخلية وطالعة فوق السطح للتهوئة واللي تهمنا هذي المنطقة الموضحة تحت .. البايب الأصفر بيكون دكت للتهوئة للهواء المسحوب وبيكون ممرر في عمود طابوق وفيه مثبتة مروحة الشفط ومخفية



بالنسبة للجزء النازل من الدريشة بيكون مغطى بلوفر ألمنيوم قابل للتسكير وقت الليل وينفتح وقت النهار والزجاج عاكس وجزء دورة المياه الرطب هو اليسار فيه الجكوزي موضح والسقف المستعار خليته على ارتفاع 3.3 متر والرجال الواقف في الممر 1.8 متر طوله وداخل 1.7 متر بيكون في السقف فجوات جانبية مخفية فيها دكت سحب الهواء وانارة مخفية فوق منطقة الكرسي ومنطقة المغاسل أما في منطقة الشور بتكون الإنارة سبوتات فقط والإنارة أكيد بتكون كم مستوى وباحددها بإذن الله

هذا هو التوزيع الداخلي بس بعد خرب فيه الرسام عدلت اللي أقدر عليه ولازم يبي له قعدات مطولة ( الشغل مع هالناس يحتاج الواحد يداوم عندهم ) والله يعين



مثلاً كبر الدريشة على كيفه وهنا بتمر بايبات الصرف والتغذية لا وحاطها صوب الشور ومسويها شكبر ولا فكر تحت بتنزل وين

[معماري قطري]

من قلة ذوقه انا مسوي الزجاج خط عريض وأزرق هو مسويه أحمر طالع لي فيها

[معماري قطري]

هذي دورة المياه السفلية كلش في الدور الأرضي تحتها بيسمنت الخدمات والتمديدات يعني البايبات مثل ما وضحتها قبل رجعت أوضحها ألحين بتكون ضمن الجدار للشور وضمن الجدار الثاني .. في البداية سويتها جانبية بس تذكرت إن ما فيه جسور وممكن تتخلل الأرضيات مواقعها بتتحدد من الأساس وبتنعمل البايبات قبل الطابوق ومكانها بيتغطى بإسمنت بورد وتبليط أو صبغ في ممر الغرفة يسار

هذي المنطقة عندي فيها تقريباً 4 دورات مياه وحدة في الأرضي وثنتين متقابلين في الأول ووحدة رابعة في البنتهاوس .. الأرضية سهل التمديد لها مباشرة من بيسمنت الخدمات الأرضي سواء للصرف أو التغذية بس لازم نعمل لها فتحات ببايبات شوي أكبر .. حمام البنتهاوس واللي أصغر منه الثانوي للغرفة الرئيسية بيكونون على نفس الخط ومن خلال الخط اليسار .. وكلها تصان وتسلك من تحت في البيسمنت الخدمي الا لو الخلل داخلي



هنا تعقد الوضع شوي لأني ركبت صورة الدور الأول على الأرضي .. وبعض الجدران تختلف مواقعها لأن نظام التصميم الإنشائي يسمح .. البايبات في اليمن بتنتقل من الإتجاه الأفقي لين الإتجاه المعاكس كما يبين في الصورة والوضع سهل وممكن بأكواع 45 درجة وتكون ضمن الجدار .. اللي على اليسار بتكون فوق الجدار بالضبط وعلى استقامة وحدة



ودورة المياه الأخيرة في البنتهاوس بتكون مكان الإكس الأخضر ولها نفس البايبات اللي يسار الصورة تحت

[معماري قطري]

عارف شوي الصور ما توضح المقصد بس دوم أسويها للخدمات والإنشائي أطابق المخططات فوق بعض وأشوف لخبطة الإستشاريين .. المشكلة يكتشفها المالك وحتى المقاول بعدين وتستوي خلافات وحلول ترقيعية

[معماري قطري]

نصيحة تصميمية

من ملاحظة وتتكرر للأسف .. بعض الإستشاريين أو كثير منهم يصممون موقف ويصغرون السيارة وفي الواقع هذا الموقف ما يشيل سيارة معتبرة .. مثل من أيام واحد يشتكي إنه اشترى بيت وطلع الحوش جدام 5 متر وهو في الواقع 5 لين حافة الجدار الخارجية يعني ناقصة منه 20 سم يطلع 4.8 متر .. فوق هذا مسوي الإستشاري درج كبير وايد حق مدخل البيت وأعمدة مخربة المساحة جدام .. حاولت مجتهد أشوف حل الحلول صعبة لدرجة جبت سيارة فولكس واغن الخنفسانة وسويتها بمقاسها الحقيقي 4.3 في 1.8 متر عرض .. هذي تدخل بس ما فيه سعة حولها ويمكن الكامري تطلع أكبر

المعلومة المهمة اللي ابغيها توصل هذ اللكزس مثلاً فوق 5.6 بشوي بكم ملم ما اذكر الرقم بالضبط .. هذي شلون تدخل في مكان 4.8 متر

مالك البيت كان بحركة بسيطة يقدر يوفر 1 متر وممكن حتى 1.2 كلها استثناء من البلدية ويخلون الارتداد بين البيت والملحق 1.5 متر هذي نص متر وفرها .. بعد ممكن يوفر من الملحق هو عامله 4.4 ممكن ينزل لين 3.5 متر ويوفر 0.9 + ال 0.5 السابقة

السيارات مهم اننا نحميها داخل بيوتنا هالوقت

[SouthK]

نصيحة تصميمية

من ملاحظة وتتكرر للأسف .. بعض الإستشاريين أو كثير منهم يصممون موقف ويصغرون السيارة وفي الواقع هذا الموقف ما يشيل سيارة معتبرة .. مثل من أيام واحد يشتكي إنه اشترى بيت وطلع الحوش جدام 5 متر وهو في الواقع 5 لين حافة الجدار الخارجية يعني ناقصة منه 20 سم يطلع 4.8 متر .. فوق هذا مسوي الإستشاري درج كبير وايد حق مدخل البيت وأعمدة مخربة المساحة جدام .. حاولت مجتهد أشوف حل الحلول صعبة لدرجة جبت سيارة فولكس واغن الخنفسانة وسويتها بمقاسها الحقيقي 4.3 في 1.8 متر عرض .. هذي تدخل بس ما فيه سعة حولها ويمكن الكامري تطلع أكبر

المعلومة المهمة اللي ابغيها توصل هذ اللكزس مثلاً فوق 5.6 بشوي بكم ملم ما اذكر الرقم بالضبط .. هذي شلون تدخل في مكان 4.8 متر

مالك البيت كان بحركة بسيطة يقدر يوفر 1 متر وممكن حتى 1.2 كلها استثناء من البلدية ويخلون الارتداد بين البيت والملحق 1.5 متر هذي نص متر وفرها .. بعد ممكن يوفر من الملحق هو عامله 4.4 ممكن ينزل لين 3.5 متر ويوفر 0.9 + ال 0.5 السابقة

السيارات مهم اننا نحميها داخل بيوتنا هالوقت

صارت معاي نفس هالمشكلة في البيت الحالي .. بدون مبالغة السيارة الوحيدة اللي ممكن تصف و ينزل وراها الباب هي الميني كوبر ... غير هالسيارة بيكون نصها ظاهر من الباب!

[معماري قطري]

صارت معاي نفس هالمشكلة في البيت الحالي .. بدون مبالغة السيارة الوحيدة اللي ممكن تصف و ينزل وراها الباب هي الميني كوبر ... غير هالسيارة بيكون نصها ظاهر من الباب!

شيء محبط اخوي ساوث كي

انا في تصميمي لأي بيت أحط أولوية لدخول السيارات وبعدد كافي حسب مساحة البيت وعدد غرفه .. حق بيتي الحالي وفرت مواقف كثيرة وحتى للضيوف وأي حد بيجيني استحي يوقف برا أخليه يدخل ويوقف وراء سيارتي قريب ويكون فيه مجال حق خروج سيارات كثيرة وهو واقف يعتبر في الطريق .. الباب سويت عرضه 3.8 متر مريح وواسع ريوس والا سيدة وسهولة المناورة داخل خليتها سهلة وخروج السيارات سهل سيدة بدون ريوس لو حب الواحد

والله حاضر للي يحب اراجع مخططاته قبل لتطيح الفاس في الراس والحلول أسهل على الورق

[معماري قطري]

رحت حق استشاري مختص انترير وحق صديق لي وعرفنا ببعض قلت له انا ما ابغي تصميم ابغي اكمال الخدمات على أساس التصميم المعماري ذيه والتوزيع ذيه .. تم يحاول يفتي في شيء انا دارسه ولي فترة طويلة قال لي ليش ما تلغي دخول السيارات للبيت وتسوي طبيلات أبوابهم من برا تدخل وتوقف بس توفر مساحة ويكون عندك مجال تسوي حديقة أكبر .. تصدقون بروحي أحاتي مسئلة ان الزراعة وايد على الوضع الحالي والأخ يبي يلغي الطريق ويسوي بس ممرات داخل الحديقة وفيه بعد للدخول .. زين وين برستيج السيارات تدخل وتوقف في مواقف مرتبة وينزل الواحد عارف اتجاهه وقريب للخدمات وللمداخل وحتى للسايق



إستغربت كمية الغباء الهندسي فيه وخليته لا وكل شوي يقول لي اللي مصمم لك مب مقتنع ولا مصدق اني انا اللي مصمم وانا ابغي هذا الشيء .. مستغرب من 13 سيارة + 4 احتياط في موقف مفتوح داخل .. هذا احتياجي وعارفه وممكن يكونون أقل بس الطبيلة الكبيرة فيها 4 سيارات جدام و 4 وراء يعني مخزنين ممكن اللي جدام وكنت في الأساس مصغر الطبيلة حق 5 بس بعدين شفت عندي مساحة كفاية وعمق قلت أزيد .. وهذي ارضي وأرض ولدي يعني بينبني الجزء اليسار

[SouthK]

شيء محبط اخوي ساوث كي

انا في تصميمي لأي بيت أحط أولوية لدخول السيارات وبعدد كافي حسب مساحة البيت وعدد غرفه .. حق بيتي الحالي وفرت مواقف كثيرة وحتى للضيوف وأي حد بيجيني استحي يوقف برا أخليه يدخل ويوقف وراء سيارتي قريب ويكون فيه مجال حق خروج سيارات كثيرة وهو واقف يعتبر في الطريق .. الباب سويت عرضه 3.8 متر مريح وواسع ريوس والا سيدة وسهولة المناورة داخل خليتها سهلة وخروج السيارات سهل سيدة بدون ريوس لو حب الواحد

والله حاضر للي يحب اراجع مخططاته قبل لتطيح الفاس في الراس والحلول أسهل على الورق

ما شاء الله الارض عندك كبيرة على ذاكرتي و عندك مساحة .. احنا من سكان القراقير!

جعلك ذخر و أكيد ما لنا غنى عن خبرتك و رايك الطيب.