مراجعة التصاميم المعمارية وابداء الملاحظات عليها (محدث)

[معماري قطري]

هذي واجهة دورة المياه الداخلية والملابس والمدخل .. هنا بيختلف عن تحت في المكتب بيكون له باب وممكن نركب باب ثاني لو فيه إزعاج من التكييف يحصر المدخل بين بابين ويعزل الصوت عن الغرفة أو بيكون الصوت مثل صوت تكييف الفنادق دوم التكييف فوق في الممر الموصل للغرفة



وباكمل الباقي بعدين ورجاء أي شخص حاب التصميم أو أجزاء منه يامر ويوصله وحتى باطبقه على أرضه لو يحب

[معماري قطري]

شرح عام لما استعرضته في الغرفة الأخيرة بفيديو أتمنى يكون واضح وكافي

[معماري قطري]

شغلي بطيء وكاره البطء اللي فيني .. أنهيت فكرة ومقترح توزيع التكييف للدور الأرضي والأول وإن شاء الله الشركة اللي بتنفذ تبني عليه هذا تصميم أكيد مبدئي بدون تفاصيل فقط موقع المكيف معلق في السقف ومسار الدكتات الهواء البارد أزرق متقطع والحار الراجع أحمر

عندنا منطقة الدرج بيكون فيها مكيف سبلت عادي بين الدريشتين في أول طلعة الدرج من الأرضي للأول .. ومنطقة المدخل دبل هايت ومفتوحة على الدورين بتبرد من المحيط حولها مثل بيتي ألحين المدخل بارد بدون تكييف .. المطبخ تكييف كاسيت السقفي المعلق



والدور الأول بيكون كله دكت سبلت ما عدا غرفة الملابس الرئيسية بيكون تكييفها بعد كاسيت معلق



والبنتهاوس مقارب للأول بيكون ناقص قسم الغرفة الرئيسية

راعيت نزول البايبات سيدة لسهولة استبدالها ووجود التكييف في ممر ما يسبب إزعاج داخل دورات المياه .. بالنسبة لتمديد تصريف مياه التكييف هذا باوضحه بناءً على التصميم المبدئي الموافق عليه والمتفق عليه من شركة التكييف ليكون ممدد للخارج جهة الزراعة وبايبات مناسبة في القطر والإنضغاط

[معماري قطري]

تم ارسال المخططات لشركة تكييف لتقييمها وترتيبها بشكل أفضل وإبداء أي ملاحظات مع التكلفة .. وكلفت ولدي بالمتابعة مع 3 شركات أُخريات بنفاضل بينهم ونقرر أي شركة نتفق معاها .. تمديد البايبات لبايبات النحاس من فوق بشكل عمودي سهل وعلى أساسه بطابق توزيع السقف ووين التكييف بالضبط .. هذا ما هم الإستشاري ولا نبهني عليه كله شغلهم نواقص حتى الواحد لو اتفق مع مقاول يدفعه فوق السعر المتفق عليه شغلات كثيرة ومعاه حق

هذا اللي وصلت له لتوزيع السقف وبحيث تكون المكيفات أماكنها قريبة من خروج البايب عمودي للسقف .. بيكونون عندي 17 وحدة تكييف رقمتهم فوق مع الصبية تحتهم 20 سم + عمود الكهربة وبايب الغاز هذا عشرين في عشرين والمفروض بإرتفاع مناسب 80 سم مثلاً .. بس معطيني ارتفاع لسور السقف الأخير 50 سم ولازم أغطي الوحدات وكذلك أحمي أي حد يركب السطح .. مفكر في إني أسوي ساتر خفيف بديل الخشب أو غيره شكله يكون زين وبارز بلون ثاني فوق خط سور السطح بحدود متر يكفيني يعني متر ونص إجمالي من أرضية السقف لأني بعد ناوي أثبت مظلات حديد في قاعدة المكيفات حتى تظللهم وباناقش مدير البلدية في هذي النقطة بإذن الله

[معماري قطري]

تكبير شوي لموقع المكيف الوحيد اللي بيكون ملاصق للمنور والمنور مرتفع فوق متر وقاعدة المكيف تحت حول 20 سم ارتفاعها بس .. هذا المكيف الوحيد لحسن الحظ اللي بيكون فوق سقف الدور الأول والبقية كلهم فوق سقف البنتهاوس




هنا توضيح حق خطوط ميل السقف لتصريف مياه المطر وفتحة التصريف اللي المفروض تنزل بعد عمودية سيدة بدون عائق من دريشة أو باب .. تنزل لتحت الأرض وبايب يوديها للزراعة الحوض الخلفي بيكون نازل وفيه سوك أوي لتصريف المياه في الأرض .. نفس الحال بايبات تصريف مياه التكييف ممكن نشبكها مع تصريف المطر اللي بيكون 4 إنش وتصريف التكييف بالكثير 2 تنزل المياه نقاط للزراعة بعد



فتحة الصعود لسقف البنتهاوس من خلال درج حديد يمر من غرفة الخزان وهذي باشوف لها باب مناسب يغلقها حتى غرفة الخزان ما تنملي غبار

[معماري قطري]

وصلني أول عرض بحدود 260000 للتكييف بس بدون سكتشات مبدئية أو تأكيد للسكتشات اللي أرسلتها وبعد الإتفاق بيسوون التفاصيل .. بنشوف شيصير مع الباقين ونعرف وين نتجه انا هذي أكثر شركة مرتاح لها والسعر معقول ومقبول بس تهمني التفاصيل وأكيد لازم مفاوضة وممكن تعديل بسيط .. باقي تكييف الملحق وعرفة السايق والمجلس هذا بيكون سبلت عادي وممكن يكون من شركة ثانية

إن شاء الله أقدر وأتابع معاكم تفاصيل كل شيء في هذا المشروع لفائدة الجميع ولنفسي بعد أعتبره مثل التفكير بصوت عالي

حصلت مهندس سمارت هوم واضاءة محترم وباشوف اقتراحاته بعد برسل له المخططات

[معماري قطري]

إستكمال للتصميم تم تعديل غرفة البنتهاوس الطرفية اللي بتكون تكرار للغرفة اللي فوق المكتب وبنفس المساحة حائط فوق الحائط بالضبط وخدمات فوق بعض

التعديل هذا ممكن أمشي عليه للغرفة تحت بعد .. ليش؟ لأني أشوفه وايد أنسب بسبب نقل الكبت قرب دورة المياه وعمل المدخل شوي متصل بدون قوس فوق وبدون أكتاف .. الأكتاف تعطينا فصل بسيط بين الحيزين والفتح يعطينا اتصال واستمرارية لخط السقف وللارضية وممكن سعة أكثر .. حل ثاني أسوي التغيير بس فوق حتى أعطي كل غرفة نوع من التغيير والتميز



شطف الزاوية بعد في المدخل يعطي سعة وجمال

وهذي الغرفة اللي تحت بدون دريشة جنوبية لأن فيه صالة ملاصقة فوق في البنتهاوس الدريشة السفلية هذي جنوبية ومطلة على السقف



باحافظ على التصميم بس اقتنعت بتحريك باب الحمام شوي تحت وعمل فتحته مثل فتحة الباب في الغرفة العلوية

[معماري قطري]

ميزة فصل المدخل بأكتاف وجسر فوق هنا بيكون التكييف في المدخل ويصد الصوت شوي وممكن لو الصوت قوي نركب باب ونفس الشيء ممكن نعمله لغرفة البنتهاوس مع اني أتوقع ما بنحتاجها في البداية الغرف كافية ممكن تكون احتياط للمستقبل ولفكرة زواج أحد الأبناء وتكون شقة كاملة له 3 غرف وصالة وبانتري مستقل مغلق مطبخ صغير وحتى طاولة طعام

هذا مخطط الدور كامل دور البنتهاوس بس ملخبطه الإستشاري انا ما طلبت باب للسطح صفاقتين ولا خشب يو بي في سي متصل مع الدريشة هشكل لو تم العقد عليه بندخل في تعديل وتكاليف اضافية .. باحط مقترحي للعقد إن شاء الله



تقريباً أبغي الصالة هشكل



فاصل بسيط بين مدخل المصعد والجلسة وحامل بنفس الوقت للتلفزيون حتى الدرايش اليمنى الشرقية بتكون جهة الخارج والستارة داخل التجويف

[معماري قطري]

ما بيطلع حلو الحائط البارز يمين البانتري نخليه مفتوح أحلى مع زاوية مشطوفة .. وعندنا مساحة مناسبة لمخزن صغير لمواد التنظيف وممكن ارفف فوق للشناط الكبار



الغرفة اليسرى دورة المياه فيها بتكون نفس اليمنى أفضل غرفة الملابس تكون مستقلة ما تكون ممر للحمام حتى تتسكر وتنقفل لحفظ أغراضنا الشخصية

[معماري قطري]

من ضمن التعديلات الأخيرة تعديل وضعية الدرايش هنا لدورة المياه وللغرفة حتى تدخل ضمن التعديل الداخلي



طبعاً كانت ارتب من هذا الشكل لكن الإستشاري فكر يطورها ما ادري ليش وبطريقته

هذا مخطط الإستشاري



ممكن التطوير أكثر على دورة المياه بهذي الطريقة كاونتر يكون للمغسلة متصل مع كاونتر فوق الكرسي والكرسي بيكون معلق في كل الأحوال وبخزان مخفي أو بدون خزان بضغط الماء مثل النظام الجديد .. المساحات زينة ومناسبة لدورة مياه 3 في 1.8 متر



فتح الباب عكسته حتى أول ما يدخل الواحد يشوف الدريشة الطولية والنور الطبيعي والدريشة متطرفة جهة الخارج