مراجعة التصاميم المعمارية وابداء الملاحظات عليها (محدث)

[معماري قطري]

مع التصميم الأخير الخيارات عديدة وناقشت المالك فيها وأرسلت له جميع المخططات بي دي اف وأوتوكاد ويبقى الخيار له بس اللي أشوفه أفضل بابدأ بالحوش وتوزيعه



أضفت هنا سلوبات السقف لتصريف المطر ومقترح بايبات تنشبك مع البايبات النازلة وتندفن جنب بايبات الصرف الصحي وتصب في الحديقة النازلة .. وهذي نفسها يقدر يشبك معاها صرف مياه التكييف ويسوي فتحات تسليك مخفية في البلاط يفتحها وقت الحاجة .. ممكن لو ما مشوا موافقة غرفة السايق وعلى الأقل يحاول فيها حاجتها ضرورية مع الوقت .. ممكن يسوي خزان الصرف الصحي لو مطلوب مكان الإكس في غرفة السايق وبيب السحب برا الحائط وعليه غطاء

بالنسبة لفتحات التهوئة والإنارة للبيسمنت أتوقع يوافقون عليها وفي حالة ما وافقوا فيه حلول شرحتها للمالك

دور البيسمنت كما هو تم شرحه في السابق



الدور الارضي مع مسارات الحركة ونسيت أحول اللي صوب مغاسل المجلس لنفس الخط المتقطع العريض



ممكن هنا يركب باب سلايدنغ فاصل بين منطقة الدرج والصالة والمجلس وممكن يخلي المجلس مكان الصالة على شكل يو الجلسة مقابل التلفزيون والكبت الفاصل وجهة اليسار تكون طاولة طعام كبيرة للعائلة وللضيوف بنفس الوقت وجلسة العائلة وقت الزيارات تكون في القسم الخلفي قرب المطبخ والبانتري .. أشوف هذا التوزيع ممكن وبيكون أفضل

الدور الأول سويت نموذج توزيع للغرفة اليسار بيكون أفضل من اليمين العلوية في الرسم .. ممكن نسوي اليمين مثلها مع سحب الباب لحدود متساوية مع كتف الدرج ونعمل كسرة بين كتف الدرج وكتف الباب تكون حق كبت في الممر .. ولو الفكرة مب واضحة بطبقها على الرسم



بالنسبة للبنتهاوس الغرفة اليسار هي النموذج المفضل عندي وغرفة الخادمات ممكن نحافظ على دورة المياه ونسوي الغرفة محاذية لغرفة تانكي المياه ولا أظن بنوصل ل 70% من السطح للبنتهاوس بس يحاول فيها الإستشاري وبتمشي ويكون مكان الأسرة جلسة صغيرة للتلفزيون



النسبة الحالية للبنتهاوس للسقف 61.93% والمسموح 70 وممكن توصل ل 75 باستثناء

[معماري قطري]

هذي فكرتي لغرفة الخادمات وممكن نفصل اللفت بباب ويكون لهم الدرج للنزول والركوب وتبقى الغرفتين والصالة فوق شقة متكاملة وخاصة لأحد الأبناء في المستقبل ولا تعدينا ال 70% للبنتهاوس ولا خالفنا وكبرت غرفة التانكي 40 سم فوق

[معماري قطري]

رحت لإستشاري مقيم بأنه درجة أولى لإستكمال تصميم بيتي مع الإنشائي والخدمات واغتشيت فيه من سمعة سابقة سمعتها عنه وشفت صور بهرجة زايدة بدون مضمون حقيقي .. المهم مدير المشاريع عندهم شيبة وماخذ ورقة وقلم ويسجل الطلبات والملاحظات وسافرت وقتها وكلمت ولدي يوقع معاهم بس بعد ما وقع واستلموا 30% من مبلغ التصميم طلعت ريحته الوصخة .. قال لي لازم نسوي الأعمدة عريضة وسواها غش ومن أول مقابلة معاه قال احنا سعرنا لك رخيص حسبنا المخططات جاهزة نسوي كوبي ونوديها للتخطيط وتمشي وانا مناقشه في بعض اللي تعتبر مشاكل تحتاج مراجعات للتخطيط والمهم عندي الانشائي

في هذي الأثناء قلت خلاص بانسحب من عندكم وباشوف استشاري ثاني تم يحاول اني ابقى بس خلاص قررت خصوصاً بعد ما شفت مقترح الأعمدة حتى الغبي الدور الأرضي ما حطه وقام يغير في التوزيع على كيفه

شكله مستأجر مهندس انشائي من بنجري





شوفوا الأعمدة شكبر عمارات فيها أصغر

المهم مريت على استشاري ثاني شاف تصميمي قال ما فيه أي شيء ومدح انه متكامل وبسهولة بيسوون الانشائي اللي ابيه وباطلع من ذيه عطاني الدفعة أو جزء منها أو نهبها جمر في بطنه إن شاء الله مب محلله شغل غش وهذا له أسباب لازم يحمونا منها التخطيط والمشرفين على هذي المكاتب

[معماري قطري]

وصلني فيديو من أحد الأشخاص ساكن قرب البحر وبيته طالع داخله ملح أسفل الجدران وهو يشيل كمية كبيرة من الملح إستغربت منها وأول مرة أشوفها في قطر .. يسأل عن الحلول والحلول صعبة صراحة بعد السكن وبيته شبه جديد .. ما فيه بيسمنت بس واصل للدور الأرضي ومخرب الجدران ومخرب السور وكانت الحلول قبل البناء ومن الحفر والعوازل واحتياطات تصريف أي مياه جوفية لأن المياه الجوفية ما لها أمان ترتفع بالخاصية الشعرية وفي أوقات محد يتوقعها

الفيديو مسحته بالغلط بس بقت عندي صور بسيطة ما توضح حجم المشكلة وكمية الملح





أرسلت له يمدني بصور توضح اللي شفته أو فيديو ثاني

السور استوت فيه كراكات ومتأكد بسبب صدأ الحديد وهذا يعني إن الرطوبة واصلة للأساسات ولأعمدة البيت والدليل تأثيرها الواضح

شالحل في رأيكم؟

أشوف ضروري عمل حفر حول أساسات البيت وعزلها بس العملية بتكون مزعجة ومكلفة ومتعبة .. كذلك عمل تصريف للمياه الجوفية أما عن طريق البلدية أو أشغال وهم مختصين وممكن يساعدون وصارت حالات مشابهة لناس غير لأن التصريف يشمل عمل حفر امتصاصية في الحوش وربطها مع شبكة لو كانت موجودة أو عمل شبكة خاصة أو السماح بربط صرف المياه الجوفية مع شبكة الصرف الصحي .. وأكيد سكان المنطقة عند بعضهم نفس المشكلة

[معماري قطري]

تذكرت سالفة بيوت بناهم اخوي الله يغفر له للاستثمار في صبخة الخور وكانوا أول بيوت ينبنون يوم شفتهم لمته عن شراءه للأرض وبنيانها بدون احتياطات مع إنه محصل أرض أحسن منها وبعيدة شوي عن البحر .. اللي صار خلال سنة بدت تطلع المشاكل وترتفع مياه البحر وغرقت المنهولات وخزانات الصرف الصحي وبصعوبة قدر يبيعها بخسارة بسيطة

[sara jsm]

الافضل يجمع الملح ويبيعهم ملح اصلي وطبيعي

[معماري قطري]

الافضل يجمع الملح ويبيعهم ملح اصلي وطبيعي

بتشترين؟ فكرة حلوة حصلنا وحدة بتشتري وبتتاجر بالملح .. إنتي ما خليتي شيء ما طلعتي منه فلوس

[معماري قطري]

في دراسة لتصميم أحد الأصدقاء خذت فيها حول الشهر ونص الى الشهرين .. باعرض آخر ما توصلت له مع الشرح بدون ما اعرض شغل الاستشاري من البداية وكانت لي ملاحظات عديدة عليه

البنيان مودرن والفكرة ممتازة والمالك ما شاء الله واعي .. بس انا في البداية كان انطباعي اني استغربت وجود بيت الدرج في الوسط .. لكن الآن مقتنع انه حل مناسب وأفضل شيء لهذا النوع من التصميم .. الأسباب بيت الدرج هيكله حامل البيت كله + انفتاح الدرج على بقية البيت في مناطق عديدة + سهولة الوصول له وقربه لكل المساحات المسكونة والمستغلة

بابدأ بالبيسمنت وإقترحت يرتب توزيعه كان مفتوح بالكامل ويغلق جهة الدرج مع إضافة الحديقة النازلة وتعديل المستويات .. أول مرة أجرب نقل الصورة هشكل وأتمنى تكون واضحة والا بغيرها لبي دي اف

[معماري قطري]

مثل ما توقعت كلش ما طلعت واضحة باحطها منطقة منطقة أفضل

نبدأ بمنطقة البيسمنت للمجلس .. هذي تتكون من غرفتين ودورة مياه مشتركة ومطبخ صغير يخدم المجلس والغرفتين لو فيه ضيوف مع انفتاح على حوش البيسمنت النازل وسويت مقترح بحوض سباحة ومقترح بزراعة جانبية .. أرضية البيسمنت -2.9 متر وأرضية الحوش النازل سالب 3 متر أنزل بعشرة سم .. وبيكون فيه تصريف وفيه تصريف مياه جوفية تحت وحول البيسمنت .. فلانش درينيج

[معماري قطري]

مقترح ثاني كبرت فيه المطبخ وسويت دريشته جانبية مطلة على الحوش النازل



وبتابع بالباقي وقت ثاني ان شاء الله