مراجعة التصاميم المعمارية وابداء الملاحظات عليها (محدث)

[معماري قطري]

معليش نطلع شوي من موضوع الكتاب وباتابعه بعدين .. كتبت عنه وحطيت صور لتفاصيل بس انقطع عني النت وضاع كل شيء

هذا فيديو لتصريف البيسمنت اللي ناقشته قبل والنظام شغال مع عمل صبية النظافة فوق البايبات اللي مغطاة بالكنكري حتى الماي ينزل ويتصرف في البايب ولا يرتفع لين قاعدة الخرسانة ويخربها

[معماري قطري]

https://imgur.com/enJ8gPX

لازم احطه في لنك مستقل أو انزله على اليوتيوب وبيكون أفضل وبانزله لاحقاً بس اللي يتبع اللنك بيشوف الفلم واضح

طلع الرجال فاهم ومسوي المنهول على جنب والمضخة شغالة والماي يتجمع في المنهول مثل ما احنا شايفين واتوقع بيسوي المنهول خرساني وبيحافظ عليه لأي مياه تطلع في المستقبل وصراحة أول مرة اشوف هذا السيستم في قطر وينعمل لبيت والله يوفق راعيه

https://imgur.com/Pocowwy

[معماري قطري]

نرجع لكتابنا وارجع لكتابة ما ضاع من اللي كتبته

هذا جزء مصور من الكتاب مع الشرح ويوضح لنا في أول صورة سور السقف .. عندنا لازم الارتفاع يكون آمن وهنا يبين لي ثلاث طابوقات ومب محدد بمقاس لأن الشرح عام .. لكن لو بنسوي تفصيل نحتاج نحط تفاصيل أكثر لتركيب الجدارين والفراغ بينهم .. والروابط اللي تربطهم مع بعض .. العوازل وطبقاتها مب موضحة .. التركيز على جزئية تصريف المياه بعمل سلوب فوق سطح الجدار الأُفقي حتى ما يلطخ الماي الواجهة وممكن يحرك غبار متراكم فوق .. ضروري نعملها حتى لو طابوق وبلاستر وبسلوب بسيط 1سم في عرض 20 سم كفاية حتى نص سم تكفي

الجزء المثلث تحت المسمى Cant هذا الكاتب مخطيء فيه وفي فايدته وهو أصلاً حتى ما نحني الرول العازل 90 درجة وينكسر ويتسرب الماي للسطح

السلوب للسقف المايل هو مقترحه 33% لكل 3 متر طول 1 متر ارتفاع .. هذا معقول للمشي عليه بحماية وجواتي خاصة للصيانة .. حتى السلوب 45% ممكن وبالعادة ما حد بيمشي عليه وشكله أفضل معمارياً يبين للقريب وللبعيد



بالنسبة لتركيب الواجهات سواء كانت حجر أو رخام أو بلاط ضروري نخلي لها فواصل تمدد حتى لو ركبناها ميكانيكل والسبب إنها لو تمددت وكانت محصورة من جهتين تنفك .. يمكن غالبيتنا شاف المباني حول المركز والمسمى السنتر قرب رمادا واقصد المبلطة ببلاط راقي .. بوختال الألماني .. بعضه تفكك والشكل استوى قبيح والسبب عدم وجود فواصل تمدد .. الجدران الخارجية تعامل كالأرضيات الخارجية فواصل التمدد ضرورية

هنا موضح فاصل في واجهة حجر وكيفية معالجته

[معماري قطري]

كبرت الرسمة الأهم لنا حتى اشرح السلوب اللي على السطح الافقي للحجر أو البلاستر وموضح بدائرة القطع البسيط اللي يخلي الماي ما يسيل على وجه الجدار الداخلي ويتعلق ويقطر من يوصل هذا القطع

[معماري قطري]

ننتقل لجزئية تهمنا كلنا وهي العازل المائي للسقف .. الرسمة توضح المكان المناسب حق نسوي فتحة تصريف مياه المطر في السقف ونستغل الميلان الطبيعي لوزن الخرسانة بعد الانحناء شوي والتقعر للأسفل بحيث تستوي عندنا نقطة تصريف هي أنزل نقطة في أعلى السقف

هذا الكلام مب مستعمل عندنا وكله نسوي التصريف في الأطراف لأسباب أهمها إننا نسوي خرساناتنا قوية كفاية والانحناء فيها قريب من الصفر .. وبعدين ننتظر فترة ونسوي سلوب بالسكريد يبدأ من فتحات الصرف بسمك 4 سم وينتهي مرتفع حسب مخطط تصريف مياه المطر .. فترة الانتظار يكون فيها الانحناء ( إن وجد لضعف في التصميم أو التنفيذ ) وصل تقريباً حده والسلوب لو عمل صح يكون مضمون ما يقل عن 1% أو 0.75% طبعاً ال 1% أضمن ولو 1.25% بيكون أكثر ضمان للتصريف السريع .. وأكيد زين لو تابع الاستشاري الميزانية هذي بجهاز قياس مستويات مساحي حتى يضمن إن السكريد تم عمله صح

عندنا تفصيلين للسكريد واحد يسمى دبل سكريد وهذا الأفضل .. يكون فيه السكريد الأولي طبقة ناعمة بميلان حسب الرغبة وحسب المخطط وفي الغالب للمساحات الكبيرة حتى ما يكون السكريد ثقيل ومع الميلان يستوي سمك السكريد كبير وممكن يوصل ل 15 سم .. على سبيل المثال لو الميلان اعتبرناه 1% هذا يعني 1 سم لكل متر أو لكل 100 سم طول ولو عندنا قاعة طولها 20 متر وسوينا السلوب من جهتين أو فرضاً مجلس 10 متر وسوينا السلوب على جهة وحدة لازم نبدأ عند فتحة الصرف ب 4 سم سمك للسكريد ثم يتزايد 1 سم لكل متر 1 ضرب 10 متر تعطينا 10 سم + الأربعة اللي بدينا بها تستوي نهاية المستوى بسمك 14 سم

الانحناء ممكن حسابه من قبل المهندس الانشائي حساب تقديري لو التصميم اقتصادي وممكن يستوي عندنا انحناء ويقدر هو كيفية توزيع السكريد وعمل المجاري اللي يمشي عليها المطر ويتجه للصرف بطريقة اقتصادية ولا تثقل على السقف .. مهم نطلب مخطط التصريف من الاستشاري .. كذلك ممكن نسوي تفصيل آخر لبايبات التصريف تكون نازلة من السقف مخفية في الجدار وتنزل لتحت سطح التربة تكون مدفونة وبسلوب مناسب تتجه لخارج سور البيت أو لحفرة مناسبة امتصاصية نخصصها في الحوش وتكون مغطاة .. بس لازم نحسب حساب لو امتلت الحفرة شلون نصرف المياه للخارج



حلول الكتاب أكيد مناسبة لمواقف السيارات بس تنعمل صح وكذلك للمباني الكبيرة واعتقد الباقي مفهوم للي يحب يقرأ ويستفيد

[معماري قطري]

حل ثاني للسكريد هو في المواصفات نقدر نوصف سكريد يسمى بالخفيف أو الاسفنجي وهذا يجي مخلوط بفقاعات عن طريق مواد خاصة ويجي خفيف

وهذي أمثلة لحالات أُخرى ومثال عليها دورات المياه عندنا ومغاسل السيارات .. السلوب يكون 2% أفضل لأن المياه قد تكون كثيرة في حالة تسريب قوي أو في حالة مغاسل السيارات كميات كبيرة وهذي تحتاج لميلان مناسب و2% تعني 2 سم لكل متر وسهل انجازها في أماكن صغيرة ومحصورة



ما يسمى بال Gutter أو القناة بالعربي نستخدمها للمواقف وعندي لها سنين طويلة في مظلة سيارات كبيرة ومعمولة من الحديد بعد تحتاج لسلوب مناسب 1% كفاية بس لضمان التصريف في حالة وجود غبار يتجمع على شكل أتربة نزيد السلوب ل 2 أو 3 % مب خسارة .. من مشاهداتي لمخازن كبيرة تتجمع الأتربة في هذي القناة ومع الرطوبة اللي تتكثف فوق الحديد صيفاً والمطر شتاءً ينزل الماي على الأتربة ونبتت أعشاب سدت المجرى بالكامل واستوت منظر غريب

[معماري قطري]

موقف السيارة حلو نخلي له سلوب بسيط جداً .. يمكن ما يزيد عن 1% أو حتى 0.75 والكاتب محدد 2% والسبب إن لو غسلنا السيارة أو جات مياه حولها تتصرف مع ال 0.75% وفوق هذا يكون وقوف السيارة مريح وهذا ضرورة أكبر وما تكون كأنك واقف على منحدر .. ممكن لو حبيت تخلي السلوب 0 وتسوي قناة تصريف مفتوحة جانبية بسلوب كبير أو حتى تحط حديد يغلقها بس يمرر المياه وتنشيف الأرضية حولها وقت الغسيل يتم بمكنسة

[معماري قطري]

هنا نشوف الطرق بحيث يكون وسطها مرتفع والسلوب 0.5% في كل اتجاه والمواقف عدل كلامه عن الموقف داخل البيت وخلاه 1% وما يزيد عن 5% وأكيد الأخير مزعج .. لرامب المدخل 15% معقول كحد أقصى بس بعضهم يسويه أكثر بحيث تحك بعض السيارات

الصورة الثانية ضروري نسوي سلوب يبعد المياه عن المباني ونسوي حماية لأسفل المباني .. هذي الفرزة السفلية اللي تشوفونها في حالات يحطون فيها قطعة بلاستيكية تحمي أسفل جدار البيت وفي حالات قطعة رخام أو قرانيت وفي حالات يكتفون بصبغ مقاوم للرطوبة .. معمارياً تضيف جمال للجدار ولو سوينا فيها انارة مخفية تجميلية تطلع أكيد مميزة

[معماري قطري]

تفصيل عزل ثاني هو ما يسمى بالتغطية Overlap وهو نعتمده في تغطية الرول العازل عندنا كل قطعة لازم تكون مغطية جزء مناسب من القطعة اللي جنبها

في مثال رقم 1 يوضح إن القرميد أو ما يسمى بالشنغلز وهي قطع خشبية صلبة وأوقات يستخدمون لحاء الشجر بعد نزعه وأوقات يحرقون القطع من فوق حتى تقاوم العوامل الجوية .. والقرميد معروفة أنواعه ويستعملون هذي الطريقة حتى كل قطعة تغطي الوصلة في القطعة اللي وراها ولا يتسرب الماي للسقف



في الرسمة الثانية عندنا طريقتين الأُولى للحائط الخشبي وتركيب قطع خشب طولية عليه تغطي الخارج وتمنع الماي من الوصول للداخل بنفس طريقة التغطية والثانية توضيح لقطعة المعدن الطويلة المسماة Flashing هذي أي رطوبة تدخل تنزل تحت توصل لها وتطلع عن طريقها وكذلك تمسك آخر قطعة وتبعد الماي عن الفتحات كالأبواب والنوافذ

الأخيرة وهي الأهم .. هنا مسوي تفصيل لحائط طبقتين ومعزول المفروض حرارياً في الوسط بصوف صخري والا فوم .. بعضهم حذرين من الجسور الحرارية ويستخدمون حتى لعارضة الدريشة أو الباب ( العتبة ) Lintel قطعة حديد حتى تقلل أي انتقال حراري بسبب المساحة .. انا افضل تفصيل ثاني يناسب بيوتنا وهو نسويها خرسانة بكامل عرض الفتحة ونخلي حدود 5 سم أقل تغطى بعازل حراري وعليه بلاستر

[معماري قطري]

هذا تفصيل مهم لنا ولازم نستعمله حق بيوتنا وهو كيفية حماية طرف العازل المرتفع على أطراف سور السطح .. بعضهم يعمل قطع بزاوية 90 درجة ويخفي فيها الطرف ويحط مادة لاصقة سيليكون أو غيرها .. هذا يتسبب في انقشاع الطرف وانفتاحه ودخول الماء من جهته لتحت العازل ويتسرب بعدين للداخل .. أبسط مشاكله يحتاج صيانة من وقت لوقت وشفايدة الصيانة بعد ما يستوي تسريب وتلاحظون تسرب المياه وتخرب الصبغ والجبس وممكن تسوي مشاكل أكبر

بعضهم يلصق العازل على البلاستر حتى بدون شق التثبيت وهذا انفتاحه أسهل لأي سبب .. بعضهم ما يسوي شق بس يركب قطع ألمنيوم تثبت الطرف ببراغي وفي أعلاها يحط سيليكون وهذا حل مناسب وأقل تكلفة من الحلول المعروضة هنا



شيصير لو نبغي الشكل يطلع حلو معمارياً ونبغي نركب بلاط للسطح ونبغي نحط نعلة؟

تفاصيل كثيرة ممكن نقوم بها .. منها البلاط والسكريد تحته بيغطي المثلث وحتى ممكن يغطي طرف العازل المرتفع بس لو حبينا نسويه أفضل نرفع العازل أكثر حتى يبقى مكشوف بعد التبليط واقصد اللي على سور السطح وبعدين نركب النعلة عليه بحيث تغطيه وتزيد عنه .. يعني لو العازل مرتفع 10 سم نركب نعلة بارتفاع 20 سم حجر أو بلاط أو رخام متناسب مع أرضية السطح .. النعلة لو نخليها هي والعازل الممتد للسور غايرة شوي داخل البلاستر يعني يغطيها من فوق بحدود 1 سم بتكون أثبت وثبتت العازل خلفها وعطتنا شكل حلو بتكلفة أقل .. البلاط لو سوينا لها فواصل 2 ملم لكل بلاطة وعبينا الفراغات قار أو سيليكون خاص قوي للعوامل الخارجية بنضمن طبقة عزل مائي اضافية وكذلك عزل حراري اضافي