كل الدرايش بتكون داخلة بين 15 و 10 سم من الخارج وبتكون فيه انارة محيطية تجميلية وأعتقد هذا كفاية مع انارة خطية في الكسرات المحددة في الحائط في قليل منها أو أماكن معينة
كل الدرايش بتكون داخلة بين 15 و 10 سم من الخارج وبتكون فيه انارة محيطية تجميلية وأعتقد هذا كفاية مع انارة خطية في الكسرات المحددة في الحائط في قليل منها أو أماكن معينة
مساكم الله بالخير وطيب جميع أوقاتكم
نرجع كتذكير لمخطط التوزيع للدور الأول وهذي الواجهة الغربية اللي تعتبر يسار البيت
نشوف مكان النوافذ منها طوب زجاجي لغرف الملابس بيكون مرتفع فوق مستوى الكبتات فوق 1.9 متر لحدود 2.5 متر محصور بين هالخطين يعطي نور منتشر وحلو للداخل وعندي درايش ثنتين تلاحظونهم جنب بعض طوال هذيلا مرتفعين من الأرض 50 سم وكنت قايل للرسام سوهم 20 سم بس .. ممكن أخلي الجزء التحتي الثابت طوب زجاجي بعد أو قزاز مرمل وعليه ستارة .. اليمنى لغرفة الملابس أو بالأدق للممر الموصل للحمام الرئيسي واليسرى جنب الكرسي في الحمام
توضيح مبسط لإرتفاع وعرض الحمام الطرفي يسار والخط الأخضر يمثل الفراغ الداخلي الحوائط وخط السقف
فقط للتوضيح طبيعي ما يبين مكان البانيو من خلف الجدار ولا تقسيمات وخطوط الحوائط الداخلية
بيكون توزيع دورة المياه هشكل كل التمديدات على جهة وحدة من الجدار وفي أقصى اليسار في الغلاف الخارجي دكت من السقف لبايبات الصرف الصحي وبايب المطر وكذلك بايبات التغذية معزولة ومسارها محدد وحتى الدكت بتكون معزولة بفوم وبلاستر والدريشة بتكون مركبة جهة الخارج تعطي سعة أكثر للداخل هنا حطها الرسام هشكل ولا عدلتها بس في البال وما انساها بإذن الله
الرواشن أو كسرات التخزين التجميلية اللي بتكون فيها إنارة مخفية هادية موضحة بعمق 10 سم لتجويف المراية + وحدة طولية بين الشور والبانيو وضيقة شوي بسبب تمديدات الشور وتكون تخدم الشور والبانيو والواحد واقف تحت رشاش المياه .. ووحدة خلف جلسة البانيو كرسي مبني بمقاس 80 سم
وفي الاتجاه الثاني 40 سم ووراء ظهر البانيو هذي بتكون بارتفاع 60 سم ومرتفعة من الأرض بعد 60 سم فوق الكرسي حول 20 سم لسهولة تناول أي شيء نحتاجه
طبعاً بيكون عندنا سقف مغطى يفصل الدور الارضي عن الأول بزجاج أو بولي كاربونيت للممر بين الملحق والبيت وموضح الرامب تحت بدايته بيكون مغطي المنطقة من خلف الرامب لزاوية البيت يسار وبباب فاصل للخارج عن الممر وباب في آخر البيت جهة اليسار
آخر واحهة هي الشمالية وأشوفها مهمة ولازم بتتعدل مع الخطوط المعتمدة للواجهة الأمامية .. فيها أخطاء غرافيك مثلاً عندي بمبن المفروض الرامب أو أرضية الممر بين المحلق والبيت ممتدة لسور البيت وهناك مغسلة خارجية كبيرة للجدور الكبيرة والصواني وممكن للذباح فيها .. يسار كلش بتجي منطقة حوض السباحة حاط درابزين غريب وبيكون غير عن هشكل أو حتى ما بيكون درابزين شبك عازل وما بيكون هذا مكانه
أول دريشة تلاقينا من اليمين هذي سواها مرفوعة وهي لازم بمستوى ارضية البيت وتطل على الزراعة ومقابلة مدخل المطبخ .. بعدين دريشة الستور مناسبة بشكلها هذا فوق دريشة المطبخ درايش شبيهة وشوي أصغر للغرفة الوسطى اللي لها هذي الدريشة الوحيدة والباقي للدرج وللحمامات أقصى اليسار بيكونون من تحت طوب زجاجي ومن فوق شفافه وممكن أسويهم من تحت بدأً من الأرضية
من المخططات المهمة هو مخطط السقف وتفاصيل وأماكن التكييف وهذي لازم تنسق مع مصمم التكييف وكثير من الإستشاريين يغفلونها ويتركونها للمقاول وممكن تذكر في العقد كملاحظة وكذلك الحال مع تخطيط سلوبات السكريد وفتحات صرف ماي المطر وتفاصيلها ووين تكون خارجية أو في الجدار
هذا مخطط السقف مبدئياً وأكيد عليه شوية إضافات خصوصاً للتكييف
بالنسبة لبايبات ماي المطر كلها بتكون في الغلاف الخارجي للجدار اللي بسمك 40 سم وبتكون مع بايبات الصرف الصحي اليمين بس بينزل صوب حوض السباحة وبيتمدد له تحت الأرض لين الزراعة .. وعلشان نرضي البلدية بنشيل الزراعة وبنحط سوك أوي لو يبون وبعدين بنسوي زراعة حولها .. نفس هذي البايبات بتنشبك معاها بايبات التكييف الصغيرة
بالنسبة لتصميم بيت ولدي البلدية رجعوا للتعقيدات السابقة التافهة .. مع إنهم وافقوا في البداية صراحة شغل يهال كل يوم كلمة
ولتصميم بيتي وحتى بيت ولدي بنكمله حسب ما يبون بس باراجع أحد المدراء وبإذن الله تتسهل أُموري للبيتين .. مشكلتي باسلم الاستشاري يطبق التعديلات وباسافر وأتمنى تكون جاهزة لين رجعت حتى أراجع بخصوصها
رسيت على هذي الواجهة وعدلت ارتفاع المجلس لتحت ال 6.5 متر اللي طالبينها بس عندي المنور بيكون حول 7.5 متر أبغيه بارز ويبين وبعضهم يقولون ممكن المنور زجاج وما يدخل في الإرتفاع والله أعلم .. البيت وراء حدود الارض 22 متر من جهة الشارع ولا يعتبر مواجه الشارع لأن فيه بعد كبير الواجهة بتكون للمجلس وهذي النقطة ما يفهمونها ولو حركت البيت ليواجه الشارع قصة بيتغير التصميم تغيير جذري .. جهة الجار 18 متر وجبت لهم موافقة الجار .. وفوق ال 18 متر فيه سكة 4 أمتار وجاري بيخلي بيته مقابل جنوب يعني بيعطي بيتي ظهره ولو خلاه مقابل شمال أو شرق هو حر ولا يأثر تفكير مهندسي البلدية رجعي وشباب قليلي خبرة
عندي ارتفاع البوابة 5.9 متر هذي بعد ممكن يعتبرونها كارثة تصميمية
زدت عرض الخدمات وراء حوض السباحة بمقدار 40 سم ونزل عرض الممر ل 1.6 متر قبل كان مترين كثيرة حتى 1.6 فوق الحاجة بس أشوف داخلياً 2.4 عمق يكفي
وأضفت دورة مياه في ليوان المجلس إضافية وقريبة من المجلس الصغير
في المطبخ الداخلي غيرت التوزيع قليل وأشوف هذا أنسب مع عمل الكاونترات للمغسلة وللفرن بعمق 90 سم لفريم الدريشة يعطي إنفتاح أكبر والدريشة تكون ثابتة على رخام الكاونتر بدون طابوق .. يعني ممكن يكون فيه جزء من الكاونتر غير مستخدم .. والجزيرة الوسطية ممكن تكون فيها بس مغسلة مفردة وسطح عمل للتحضير
الأبواب الداخلية الزجاجية بتكون منزلقة اوكورديون تنفتح بالكامل وخليت الحديقة مفتوحة أكثر خالية من أي أثاث الجلسة سويتها بس في الزاوية قرب الشلال وقرب الدريشة وشلت اللنك بين المطبخ الخارجي والداخلي حتى يكون عندي انفتاح رؤية أكثر .. ممكن أسوي سقف خشبي وبولي كاربونيت فوق لحماية الخشب ولتخفيف النور على المنطقة الوسطى وبتكون مزروعة باصيصات
هذا تقريب لمنطقة المطبخ الداخلي والخارجي
أتمنى الصور واضحة والفكرة كذلك .. أضفت درج حلزوني لخدمة السقف .. بتكون فيه زراعة سقفية مقابل جلسة البنتهاوس وممكن تكون فيه مكيفات للبنتهاوس فوق سقف البنتهاوس
في الصورة الأُولى أضفت غطاء قرميد على السور في بعض الأجزاء كتشكيل ديكوري للواجهة ولموازنة القرميد الموجود على سقف غرفة المكتب وبتكون فيه انارة مخفية تحت امتداد القرميد .. ما ابي انارات قوية ممكن بتكون انارة في سقف البوابة تنور داخلها وانارة خاصة بليوان المجلس انارة جدارية موزونة وعندنا انارة الشوارع بتكون جاهزة ومشروع البنية التحتية ينتهون منه في شهر 4 سنة 2024 مع المواقف ما قصروا أشغال ولا قصر إستشاريهم إيطال كونسالت ومديره الطيب عبدالله الصادق ( أبو غازي ) اللي وقف مع طلبات أصحاب المنطقة كلهم ووضحها لأشغال
في الصورة الأولى يبين برج الدرج الخارجي بشكله المربع بارز فيه فتحتين جنب بعض وتحتهم بعد نفس الفتحات بعرض 40 سم وارتفاع متر و 20 وبيكون فيهم حديد مشغول أو درابزين الدرج الداخلي بيكفي كحماية والباب تحت حديد ينقفل ويفتح من الداخل حتى يكون هذا الدرج كمهرب للطواريء بعد
هنا أوضح يمين الصورة .. فيه تكييف بيكون خاص بالحديقة الداخلية ممكن صحراوي قرب الدرج بيكون وبعيد عن جلسة السقف لو بنسويها وناوي اركب جهاز للرذاذ أو اللي يسمونه ضباب لهذي الحديقة بعد بيكون فوق وسهلة صيانته من خلال الركوب بالدرج هذا