مراجعة التصاميم المعمارية وابداء الملاحظات عليها (محدث)

[معماري قطري]

خلصت غالبية تفاصيل الدور الارضي وضبطت المساحات وتوزيع الأثاث ولا قللت في الغرف والمتطلبات الباقية .. فكرة فتح بابين للحوش للسيارات ممكن تكون صعبة ولا تحصل موافقة عليها وغرفة السايق أفضل في ذي الجهة لغسيل السيارات والعناية بالزراعة الجهة الخلفية فيها غرفة غسيل الملابس والزاوية جنب السيارات بيكون فيها تانكي الماي وزراعة شوي تغطيه

[معماري قطري]

هذي مكبرة للدور الأرضي وإن شاء الله أوضح

[معماري قطري]

إشتغلت على الدور الأول والبنتهاوس والأرضي شوي مع بعض الإضافات وهذا الأرضي



أبرز إضافة البرغولا تغطي وتحدد ممر الدخول من الباب الخارجي الصغير لباب المجالس والصالة .. وعندنا مكان لوقوف سيارتين للزوار أو الوقوف الإضافي المفتوح .. وبنفس الوقت هذي المساحة لرجوع السيارة ريوس وتعديلها لتطلع من البيت وهي تمشي للأمام .. السور البسيط العازل لباب غرفة السايق يحدد مساحة مفتوحة بدون سقف بس تعزل غرفته وبنفس الوقت تحدد الطبيلة اللي ممكن نعملها بدون أعمدة معلقة من جدار لجدار وممكن نسوي واجهتها جسر خرساني ما يبين الحديد مال المظلة

الزراعة جدام حوض السباحة ممكن تكون عشب ونباتات نازلة حتى يبين الحوض ونزول الماء الراجع من مقدمته

لو أمكن من الإستشاري يحرك البيت شوي جهة اليسار ويحصل موافقة ممكن متر أو نص متر .. ألحين زاوية البيت اليسرى العلوية بارتداد قانوني 2 متر والارتداد يزيد لبقية البيت وما عندنا دريشة قريبة مطلة على الجار وأتوقع بيوافقون على متر لتمرير الصرف الصحي كافي وزود وبتكون الطبيلة عرضها 8 متر مريحة جداً وهي ألحين مريحة

[معماري قطري]

الدور الأول انشائياً فوق الدور الأرضي والحمامات غالبها فوق بعض لسهولة التمديد وبما ان عندنا الجدار الخارجي 40 سم ممكن نسوي دكت خلال الجدار وممكن نحرك الجسر جهة الغلاف الخارجي للجدار المعزول ونعمل الدكت داخلية .. ممكن حتى نعزل الجسر لو حبينا للحمام لأن مشكلته وهو غير معزول يخلي أرضية الحمام أما باردة في الشتاء أو حارة في الصيف .. الدكت كفاية 15 سم بايبات الصرف الصحي 10 سم ويبقى فراغ 5 سم وممكن تكون بدون بروز على خط واحد مع سمك الجدار



عندنا مساحة في الصالة حق بانتري صغير للشاي والقهوة وثلاجة للفواكه والخفايف وحتى ممكن اضافة طاولة دائرية للطعام .. وبتكون منورة بسبب وجود مناور اثنين هرميين واحد موضح فوق التلفزيون تقريباً والثاني فوق الممر اللي بين الغرفتين الرئيسيتين .. هذا الممر مناسب حق نباتات ظل أو حتى نباتات عادية بسبب وجود المنور .. ممكن يسوي مثلي يزرع كرز والا أفوكادو حتى العنب ممكن لأن جو البيت مع التكييف بارد بس العنب يحتاج تعريشة بسيطة في هذا الممر وبيطلع حلو

دور البنتهاوس يعتبر تكرار تقريباً للدور الأول بدال المكتب صالة رياضية وكانت متطلب من التصميم الأساسي



حطيت حرف اكس بالأحمر متقطع هذا موقع امتداد دريشة الحمام الرئيسي لو حبينا نسويها بانوراما متصلة مع سكايلايت ينور منطقة فوق الجكوزي

المساحة اللي قدرت أوصل لها بحدود 1345 متر مربع أضفت لها مساحة مظلة الخزان

[معماري قطري]

بالتوفيق لمالك البيت وأتمنى أكون سهلت شوي التصميم وقللت المساحة اللي كانت 1477 متر مربع .. والأهم من وجهة نظري يبني بيت مريح له وكافي لإحتياجه حتى لو خسر عليه شوي المهم ما يتكلف بأشياء ما لها داعي مثل الحجر ومثل التوزيع السابق اللي بتكون فيه مشاكل مع ترتيب الأثاث

المساحة نزلت 9% وممكن تنزل أكثر بس قليل بحدود 3% لو صغرت أكثر لو يحب بس هشكل وازنت بين الحوش والمساحات وضمنت التصميم جميع شروط التخطيط

[معماري قطري]

بالنسبة للبرغولا وضحت مكان الأعمدة بإكسات صغيرة ما ادري تبين أو لا بس بتكون متباعدة حول 160 سم لسهولة المرور بينها والخشب فوق حول 80 سم

وضحت مكان محتمل للتلفزيون في الميلس وممكن حتى في الميلس الثاني وأكيد حسب الرغبة بس ضروري نخلي له تمديدات احتياط ونكون عارفين مكانه

[معماري قطري]

لو انا مكان المالك مب مهتم لوزنية الدرايش وايد وباركز على فتح واجهات زجاجية مودرن صوب حوض السباحة تعطي اطلالة أوسع على الحوض

[بن مفتاح]

بسم الله الرحمن الرحيم

الله يجزيك الجنة اخوي بو عبدالله على الجهد والنصائح الغالية والتعديلات، لا خلا ولا عدم، وما شاء الله هالمجال هذا ملعبك، وانت حريف الله يحفظك في هالمجال، والاكثر من ذلك انك متساعد وداعم للجميع بدون استثناء، وعسى مجهودك في ميزان حسناتك.

التغييرات في الخرائط ما شاء الله كثيرة وتصب في مصلحة البناء، بس احنا في هالمجال عليمية نحتاج وقت للتفكير وفهم الاشياء اللي تقولها، واكيد عندنا الكثير من الاسئلة على ملاحظاتك وافكارك، لأن مثل ما قلت بعض الامور يصعب ادراكها او معرفتها من شخص عادي يبني بيت لأول مرة.

مثل ما قلت لي في رسائلك الصوتية الخرائط الجديدة تحتاج لمناقشة من قبل اللي بيسكنون بالبيت حتى نصل لأفضل مقترح يشمل جميع أفكارك وبطريقة ترضي الجميع وتفي بمتطلباتنا، وهالمتطلبات المفروض انا كنت اقولها لك في بداية عرض خرائطي عليك، لكني للاسف ما كنت باني فكرة واضحة عن المتطلبات، وجدير بالذكر ان خرائطي اعتمدت لكن للاسف كان حجم البناء مثل ما قلت لك مبالغ فيه، وهذا الكلام جاني من اكثر من طرف، اخوي، صاحب شركة بناء، ورشة حضرتها online مع جمعية المهندسين القطريين، والكل أجمع أن الكثير من العوائل القطرية تبني أكثر من احتياجها، وتكلف نفسها مبالغ مُبالغ فيها على شيء لا تستفيد من جزء كبير منه، فقد تصل المساحات المهدورة الى 40 % من حجم البناء، وهذا يزيد من التكلفة بدون داع.

اغلب بيوتنا الطابق الارضي يكون هو الفيصل حيث يُبنى عليه الطابق الأول ومن ثم البنتا هاوس، ففي البداية أنا أتمنى ان احصر تفكيري في الطابق الأرضي، ومن ثم يكون الخطوة الثانية الطابق الاول والبنتا هاوس، واعتقد أن البنتا هاوس بيكون كحل احتياطي لعمل جناح خاص لولدي عندما يكبر باذن الله ويرغب بالزواج، واعتقد ان في الوقت الحالي سوف يكون الطابقين الارضي والاول يفون بالغرض، أما الملحق وغرفة السائق بالذات فنريدها مفصولة عن البيت في الجزء الغربي، واعتقد اذا لم تخنني الذاكرة ان الاستشاري قال لي ان هناك موقع للتصريف الصحي اعزكم الله، امام غرفة السائق خلف البيت فلذلك وضع مثل حوش صغير امام الغرفة لأن على حد قوله أنه يمنع البناء في هذا المكان.

بو عبدالله ،،،
الحقيقة مهما قلت من كلمات الشكر فلن أوفيك حقك، فجزاك الله عنا كل خير.


اتابع من هنا وعلى اتصال معك اخوي بو عبدالله
والله لا يحرمنا من نصايحك ونصايح اخواني في المنتدى، فجزاكم الله عنا كل خير، وجعل عملكم خالصاً لوجهة، ورزقكم جنة الفردوس، أنتم ومن تحبون .....


أخوكم أحمد

[معماري قطري]

حياك الله إخوي أحمد واللي صار اعتبره نقاش مرسوم ومبذول فيه جهد قليل ممكن يتعدل مئات المرات

كلامك صحيح بخصوص المساحات المهدورة .. إنت عندك صالتين تحت وصالتين فوق وحتى صالتين في البنتهاوس .. الغرف كثيرة وحاولت احافظ على الموجود في التصميم الأساسي .. بكرة بتحصل غالب جلساتكم تحت أو فوق .. ممكن المجلس تلغي اليسار مثلاً وتكتفي بمجلس واحد ولو قدرت تصغر شوي .. الصالات فيه مجال تتصغر والغرف كذلك وتكون مكفية للغرض وبراحة حسب توزيع الأثاث .. عندك مجال تحدد مكان حوض السباحة لمجلس خارجي وحوض السباحة بتحصل له مساحة وراء المجلس

قليلين اللي يتشجعون بالتعليق على مخططهم ويفضلون يكون التعليق خاص وبإذن الله بتحصل تفاعل وآراء إن ما نفعتك ما بتضرك

[معماري قطري]

انا باسوي لك مقترح إن شاء الله بفكرة عمل المجلس خارجي وعمل حوض السباحة مكان المجلس وفتح الصالة عليه ومدخل البيت الرئيسي .. في يدك تلغي الغرفة اللي فوقه أو تخليها لو محتاجها .. مجلس الرجال الخارجي في الغالب يكون أريح ومب شرط يكون مبالغ فيه وكبير بدون داعي وفي يدك تحدد احتياجك لكم شخص تبغي