مراجعة التصاميم المعمارية وابداء الملاحظات عليها (محدث)

[معماري قطري]

مبدأ رئيسي في تصميم دورات المياه هو توزيع القطع .. مثل ما شفنا في كثير من التصميمات السابقة بعض الحمامات نضطر لعمل مثال بقطع عدة ويكون مدروس للاستفادة من كامل الحيز والتركيز على فعاليته وجماله وحسن ترتيبه .. بغض النظر عن الناحية الاقتصادية وهي التمديدات واللي لها طرق عدة ناقشت معظمها

طبعاً لحيز بسيط مثل هذا 170 في 280 سم وبمساحة 4.76 هذي التوزيعات اللي ذكرها المهندس هي المناسبة وممكن نزيد عليها بعض الكسرات التجميلية والتخزينية وهو شيء مهم

لحيز 2 في 2 وبمساحة 4 متر مربع لازم نظطر لإستخدام جدارين أقل شيء والعملية سهلة والتكلفة كلها كوع زاوية ويمكن كم سم طول زيادة للبايبات ووفرنا قريب من المتر المربع .. نقدر نسوي أصغر كذلك 1.8 في 1.6 لو حبينا بس لازم نختار قطع أصغر وبتكون عندنا المساحة 2.88 وبنكون وفرنا كثير في المجمل كمساحة بناء وخرسانات وتبليط وعزل وبايبات وحتى القطع الصغيرة تجي أرخص

[معماري قطري]

انا ضد دورة المياه المقسمة لكن البعض يحبها .. كذلك ضد الغرفة المفتوحة بدون فاصل كامل عن دورة المياه مثل بعض المعروضين هنا .. ومع النوافذ في دورات المياه خصوصاً الكبيرة والكافية للنور الطبيعي .. البعض للخصوصية ممكن يسويها فوق مستوى المراية 1.8 متر ولقرب السقف أو متصلة مع السقف المستعار .. أو مثل ما عرضت في السابق متصلة جزئياً وبزاوية مع السقف لدخول النور الطبيعي غالب الوقت وكذلك تعطي منظر خارجي جميل نهاراً وليلاً



توزيع الغرف عبارة عن مثال وممكن نطور عليه

[معماري قطري]

هذا تعديل كذلك على تصميم وتغييره بالكامل

[معماري قطري]

ملاحظات مهمة لازم نحتاط لها أثناء التصميم وهي تحافظ على مبنانا سهل الصيانة المستقبلية وكذلك جميل

كثير يعملون قناة ( دكت ) خارجية لتمديدات الصرف وبايبات التغذية وتكون بارزة ولا لها علاقة بواجهة المنزل .. وأوقات يغطونها بجي ار سي غالي يكون مكان تعشيش للطيور وحتى فتحه مستحيل بدون كسر للصيانة

فيه بدائل أجمل وأرخص وأسهل للصيانة كعمل الدكت داخلية في زاوية الحمام وبمساحة محدودة للبايبات .. البايبات معروف قطرها 10 سم وعددها اثنين يعني لو بنسويها من طابوق 10 سم نحتاج لحيز داخل الحمام قرب الزاوية ببروز داخلي 20 ولنعمله 25 في عرض طابوقة واحدة 40 سم وبيكون كافي حتى لتمرير 3 بايبات كبيرة لو ضفنا لها بايب لتصريف مياه المطر وبتبقى لنا 10 سم لتمرير بايبات التغذية الصغيرة .. وبالعكس التغذية بدال ما تنزل من خارج البيت بتكون ممددة قرب سور السقف ونازلة في الفتحة القريبة .. ويمكن ترك فتحة الدكت العلوية مفتوحة للفحص ومغطاة بغطاء فايبر أو روتومولد ممكن فتحه بسهولة .. كذلك ممكن تغطيتها برغوة ومن فوقها عازل رول ملصوق بقار عن تسرب مياه المطر مع عمل حواف طابوقية أو خرسانية مانعة لدخول الماء

لو حصل تسريب داخل الدكت شلون نعرفه؟ ونسوي صيانة

لمعرفة التسريب بسهولة أسفل الدكت وقبل لنوصل مستوى أرضية الحوش نركب بايب صغير ونسد داخل الدكت باسمنت حول بايبات الصرف وبايبات التغذية بتكون فوق والتسريب من بايبات الصرف شبه مستحيل لو تم وصلها صح .. ممكن كذلك نعزل فوق الاسمنت ببتومين فلو سرب أي بايب نشوف الماء ينزل من البايب اللي حطيناه ونعرف وجود خلل في الوصلة اللي داخل القناة

زين شالحل لو صار لا قدر الله تسريب من بايبات الصرف تحت بلاط الحمام أو تسريب من مياه الغسيل خلال بلاط الحمام واحنا ما نعرف شالحل في هذي الحالة؟

ناقشت الحل في السابق من فترة طويلة مع مسؤولي وهو مهندس ميكانيكي وأفكاره نظيفة .. الأخ فهد بن حمد النعيمي وأوجه له تحية من هنا .. وصلنا لنتيجة بأن الرمل تحت البلاط بيتشبع ماء وبيبدأ يرشح على الحوائط وممكن يسرب لو العازل فيه خلل على السقف تحته ولا ندري به الا متأخر .. فلو ركبنا بايب كذلك صغير وأخفيناه في الحائط ونزلناه تحت ممكن يتصرف الماء لو احتبس بين العازل والبلاط في الرمل وينزل عبر البايب هذا ونشوفه ويعتبر انذار مبكر لو فيه تسريب ونعرف بسهولة التسريب من وين

نرجع للدكت اللي في زاوية الحمام ونازل للأرض من السقف هذا نخلي الجزء اللي صوب الخارج مفتوح .. طبعاً بيتقاطع معاه افقياً مكان الجسور والطابوق من الجوانب بس مكان الدكت نخليه مفتوح ونغلقه بسمنت بورد يسهل تكسيره للصيانة أو بشبك ونعمل عليه بلاستر ويكون متواصل ومتجانس مع الحايط حوله وكذلك يسهل التكسير مكانه لو دعت الحاجة واعادة بناء هذا الجزء وصبغه بعد الانتهاء من الصيانة

وباكمل بإذن الله عن حلول لداخل التمديدات للحمامات والمطابخ وتمديدات صرف مياه التكييف

[حمــد]

جزاك الله خير اخوي معماري
موضوع رائع ومفيد للجميع
بالتوفيق ان شاء الله

[معماري قطري]

جزاك الله خير اخوي معماري
موضوع رائع ومفيد للجميع
بالتوفيق ان شاء الله

الله يجزيك بما دعيت ويوفقك يا سميي

ومشكور على المرور

[معماري قطري]

الحلول الممكنة لداخل دورات المياه والمطابخ هي عمل التمديدات على الطابوق حال الانتهاء منه بدون تكسير .. طبعاً نقدر نسوي جزء بسيط قابل للفتح في الدكت اللي في الزاوية ونسوي فيه محابس مخفية ومغلق عليها ببورد خشب مغطى بسيراميك ومثبت بشوية سيليكون بسكين ممكن فتحه بسهولة

والتمديدات نسوي حولها جبس أو سمنت بورد ونبعدها عن الحائط بحدود 5 سم بقواطع خشبية ممكن نسوي فيها كسرات للصابون والشامبو تتناسب مع تصميم دورة المياه الداخلي .. ويبقى لنا تجويف محصور خاص للتمدادات كذلك يغطى ببورد خشب عليه بلاط يتثبت بسيليكون لسهولة الفتح والصيانة

هذي الطريقة أكيد بتكون أسهل لا نحتاج بلاستر ولا تكسير داخل الحائط .. سهولة عمل فجوات ديكورية حتى باضاءة خاصة مخفية .. التمديدات الكهربية تكون في الجزء العلوي من الحائط ومحمية تحت بورد الخشب أو الجبس وأي صيانة تكون سهلة وسريعة .. بنحتاج أكيد عمل عزل للجزء السفلي وخط سيليكون في التقاء الحائط مع الأرضية حتى ما يتسرب الماء للبورد الجبسي أو الخشبي .. وحتى ممكن نستخدم بورد جبس مقاوم للرطوبة ومارين بلايوود مقاوم للمياه لو حبينا

بالنسبة للتصريف المكيفات أشوف لو عملنا التصريف خارجي ويتصرف على إصيصات زراعية نكون استغلينا المياه استغلال جيد وافتكينا من التمديد تحت البلاط

[معماري قطري]

تواصل معي أحد الأعضاء بخصوص تصميم مبدئي لبيت يكون في أرض بمساحة 15 في 40 تساوي 600 متر مربع .. وبواجهة واحدة على الشارع 15 متر

وهذا سكتش بسيط أرسله لي يوضح احتياجاته والبيت من دور واحد وانا اشوفه اختيار غير موفق لأن الأرض صغيرة .. ثاني شيء بيشغل جزء كبير من الأرض قد يزيد عن ال 60% المسموح بشغلها من التخطيط في الغالب .. وعلى أرضه 60% = 360 متر مربع

من المخطط استنتج أن طول البيت 30.5 وعرضه 12 .. وهذا على فرض إننا بنخلي سمك الجدران ياخذ من المساحة الداخلية مما يعني أنه قد تكون بعض المساحات غير صالحة للاستخدام وتحتاج ترتيب .. المساحة تطلع لنا 366 .. لكن الإرتدادات عندنا 9.5 في جهة الطول نقدر نوزعها ل 3 خلف المنزل و 6.5 أمام المنزل أو نكتفي ب 6 ونخلي 3.5 في الخلف .. الجوانب 1.5 لكل جانب وبنكون ملينا مساحة الأرض تقريباً بنيان

من جهة أُخرى لو اعتمدنا البناء الراسي أكثر بنوفر في سعر البناء وكذلك بنوفر في مساحات الحوش ونقدر نسوي التصميم على دور ارضي + أول + بنتهاوس بالحدود الجديدة المسموحة اللي هي 70% ونحاول نصغر المساحات ولنفترض مساحة أرضية 25 وحولها طول في 10 عرض .. بحدود 250 متر مربع ونقدر نسويها أصغر لو ناوين نوزع ال 366 على ثلاث أدوار أو نكبر شوي نخليها كمثال 200 + 200 + 140 لكل دور .. و 200 نكون شغلنا جزء بسيط من الحوش يساوي ثلث المساحة 33% ونقدر نضيف ملحق وممكن مجلس خارجي لو حبينا أو غرفة سايق

البيت ممكن يجي على جنب بارتداد 1.5 لو يسمحون ونترك ارتداد من جنب آخر = 3.5 تنفتح عليه درايش على حديقة جانبية .. وورا الملحق بعرض 3 متر وجدامه نحتاج 2 متر يعني الارتداد الخلفي 5 متر أو 6 متر لو بنسوي الملحق بعرض 4 متر .. 6 متر + 25 = 31 ويتبقى لنا 9 أمتار ارتداد أمامي للسيارات وممكن لمجلس وغرفة سائق صغار .. ولو صغرنا ل 200 متر بيكون الطول 20 وبيبقى ارتداد = 14 متر بيكون مناسب أكثر

وهذا المخطط أكيد بيتعدل أكثر ليشمل مناطق نوم مريحة في الدور الأول والبنتهاوس ومنطقة ضيافة وجلوس في الارضي



وأتمنى كل التوفيق للمستفسر

[معماري قطري]

هو حاط مكان حق مصعد بس مرسل يقول بيسوي دور واحد وانا مثل ما ذكرت فوق التوزيع على 3 أدوار كثير أفضل وأوفر .. لأننا نستخدم نفس الأساسات ونبني فوق بعض دوم يطلع أرخص

[معماري قطري]

هذا الموضوع استوى مرجع لي ومريت على تصميمي شفته من صفحة 71 أعتقد لين 80 وأكيد فكرت في تغييرات بسيطة

أهمها موضوع البيسمنت الخاص بالخدمات بديت أفكر كيف اطبقه فيه وإن شاء الله إن ما انشغلت في الدراسة باتجه لتنفيذ التصاميم والبناء

وسامحوني عن عدم المتابعة الدائمة مثل قبل