مراجعة التصاميم المعمارية وابداء الملاحظات عليها (محدث)

[معماري قطري]

عليكم السلام ورحمة الله وبركاته

وحياج الله اختي سويت شرفتي الموضوع مرة ثانية وثالثة

بالنسبة للواجهات الداخلية هذي ممكن يرفع السور اليسار والتجويف ينفتح على حديقة داخلية وتكون بانارة ليلية متناسبة مع الداخل بحيث تبين ليل ونهار وتكون بدون ستاير ( ستاير لس بالعربي الفصيح )

غرفة السايق مقابلة درج البيسمنت وردج البيسمنت صراحة مبالغ في عرضه بحيث عرضه 2.4 متر وهو يقدر يكتفي حتى ب 1.4 .. وغرفة السايق يقدر يخليها يسار ويشيل المخزن ويفرها بالعرض تكون تنفتح على مظلة السيارات اللي يقدر يزيدها مظلة سيارة ثالثة

غرفة الخادمة مسويها فوق مخطط الدور الأرضي وبيخالف بها ناوي يخليها في الارتداد الثلاثة متر خلف البيت .. نصحته يسوي لها درج من الحوش ويخليها تحت في البيسمنت .. بيصغر شوي بس عنده مساحة .. ويخليها تكون معزولة بالكامل عن البيت يعني تطلع على الحوش والمطبخ .. يفترض يسويها كافية لثلاث خدامات ومعاها غرفة الغسيل

مشكلتي ما يشتغل عندي الاوتوكاد وان شاء الله باحاول اركبه ونتابع

[معماري قطري]

وصلتني المساحات وهي كالتالي

البيسمنت 386 متر مربع

الارضي 371 متر مربع

الاول 404 متر مربع

البنتهاوس 181 متر مربع

المجلس 68 متر مربع

وغرفة السائق 22 متر مربع

مساحة الارض 994 متر مربع

اجمالي البناء = 1432 .. مب بسيطة ولو قدر يخلص المتر مشطب بحدود 2500 يكون محظوظ والتكلفة بتكون 3.5 مليون كتقدير أولي بناءً على المساحة فقط وبتشطيب جيد

[معماري قطري]

اللي بالأحمر مساحات زجاجية بالكامل وانا اشوفها كثيرة فيها مبالغة .. بتكون مكلفة وبتحتاج ستائر سميكة وكبيرة بعد مكلفة والاستفادة منها في غرف النوم بسيطة .. لكن من جانب آخر هي متماشية مع مبدأ التصميم الحديث

دور البيسمنت ممكن النزول له بدرج من جانب البيت بعد المرور أمام غرفة السايق وكذلك ممكن النزول له بالمصعد أو بالدرج المفتوح على الصالة .. وتم رفع أرضية الدور الأرضي لتسعين سنتيمتر لعمل البيسمنت وهذا خطأ لأن عندنا مناور ساقطة ونقدر نكتفي بارتفاع 45 سم ثلاث عتبات أو نوزعها على 4 عتبات مريحة



وهذا دور البنتهاوس ونشوف آرائكم



واضح التصميم مبدئي لكن صاحبه يقول قضى فيه سنة مع الاستشاري

كنت افكر في مساحة البيسمنت ليش أكبر من الأرضي .. ومعناها أما إنه حسب المساحة المحفورة بدون بناء أو عنده مساحة زايدة وطلعت عنده مساحة زايدة في المجلس العربي .. هذا يقدر يخليه مع حدود الدور الأرضي ويكون بطول 6 أو أقل بشوي بدال 8 متر وكافي وملموم لجلسة عربية ومع حدود البنيان .. لأن كذا بيكون حافر تحت الحوش ومسوي سقف عليه دفان .. أوقات المهندس أو الرسام في هذي الحالة ينفذ كلام المالك بدون مناقشة بس يبي يخلص وأوقات المالك ما يحسب حساب كل شيء صح ويتورط بعدين .. كل شيء ممكن بس باصول وبتكلفة وبتجانس .. أعني بتجانس هنا إن المهندس مقترحه يسوي بيسمنت بحوش مفتوح ونازل ( مناور ساقطة ) وبنفس الوقت رافع البيت كأن له درايش جانبية للبيسمنت وهو ما سواها .. ولو كان كذا معناها الجزء اللي طالع في الحوش أما يكون مرتفع عن الأرض وهو ممر قدام غرفة السايق أو يكون مستوى نازل .. يعني سقف المجلس العربي يكون طرفه نازل وسقفه مدفون .. فقط علشان اضافة هذي ال 2 متر اللي ما لها داعي

كذلك نشوف غرفة السايق لو فصلنا عنها المخزن وضمناه في مساحة في البيسمنت أو عملناه بروحه مفصول في الزاوية ونقلنا الغرفة بحمامها للجهة الثانية بيكون السايق بعيد عن مدخل المجلس وقريب من باب مظلة السيارات .. ونقدر بعد اتمام البناء نغلق جهته حتى يكون الحوش الداخلي مغلق بالكامل لنا

نقطة أخيرة البيسمنت لازم بتكون فيه حوائط وسطية استنادية للبنيان فوقها .. وهذا بيبين بعدين في التصميم الانشائي والمفروض الاستشاري ينسق من الحين مع المهندس الانشائي بهذا الخصوص ويوضح للمالك .. المهم الخيارات الأولية كلها تنحط مثل ما ذكرت في السابق عن غرفة الخادمة أفضل تكون مكان المغاسل والحمام في البيسمنت ولها درج بسيط من الحوش

[معماري قطري]

تقدم أحد الاخوان بتصميم مبدئي وطلب عرضه للآراء وللتطوير

البيت من بيسمنت وأرضي وأول وبنتهاوس ومساحته مب معروفة لي للحين خلونا نشوف الدور الأرضي مع توزيع الأرض



وهذا الدور الأول



وان شاء الله يكونون واضحين ونقدر نعلق عليهم وعلى بعض التحسينات

تركيز شوي في الدور الأرضي نلاحظ ما فيه داعي للدرج النازل للبيسمنت يكون بهذا العرض الكبير 2.4 .. ممكن نقلله للنص 1.2 ويكون كافي حتى للتهوئة والنور الطبيعي للنوافذ المطلة ولازم نصغرها شوي ونقللها .. في التصميم الحديث أو المودرن ما نتقيد بوزن النوافذ فوق بعض وممكن نسوي البيسمنت غير عن الارضي والأرضي غير عن الأول حسب الحاجة

لو انا مكان المالك باصغر نوافذ الغرف لحدود مترين أو مترين و 40 سم وباعملها بأضلاع مستقيمة وباخلي عليها شتر خارجي .. الدور الأرضي المنطقة المطلة على الحديقة نخليها مفتوحة وبدرايش مثل ما هي وحتى ممكن بدون ستاير وبدون شترات لصعوبة تركيبها كبيرة

المجلس الخارجي في الارضي هو عبارة عن صالة مطلة على الحديقة .. ومساحته 68 متر مربع .. بعد من رايي نقدر نتخلص منه أو نعتبره ملحق خارجي ومطبخ ونصغره شوي وحتى ممكن لو حبينا ندمج غرفة الخادمة معاه .. السبب عندنا صالة داخلية المسماة استقبال هذي نقدر نخلي جهة السيارات حائط ونخلي الجلسة على شكل اليو والتلفزيون أما الزجاج المطل على الحديقة .. يمكن نحتاج دريشة طوالية وضيقة جنب باب الصالة وقريب الزاوية تطل على الحوش والسيارات

طبعاً لو عدلنا درج المدخل والرامب حولناه الجهة الثانية بتكون عندنا مساحة كافية لثلاث سيارات ولو حركنا البيت كله جهة اليمين متر واحد بدال ارتداد 4 متر نسوي 3 متر للدرج 1.2 وتبقى عندنا صافي 1.6 كافية لشوية زراعة ولتمرير الخدمات وكافي ممر صغير للمدخل الخلفي والمدخل الخلفي نصغره وحتى رامب كفاية بدون درج ونقدر نستغل المساحة أما لمخزن أو لغرفة غسيل ملابس

والأهم في حالة تحريك البيت متر جهة اليمين بتستوي عندنا حول 11 متر صافية للسيارات .. هذي نقدر نخلي لها مدخل واحد في الوسط 4 متر وباب سلايدنغ وتدخل سيارتين يصفون بزاوية وفي مساحة مبحبة يمين ويسارتين يصفون بزاوية يسار .. ونكون وفرنا طبيلة حق 4 سيارات بدال سيارتين وباب واحد حسب متطلبات التخطيط

نقاط ما حبيتها في الدور الأول عدم وجود صالة جلوس واضحة والفتحة مخربة ولو سكرناها وخلينا الجلسة فيها مقابلة المصعد أفضل والبانتري على الحائط اليسار أفضل .. مستغرب كيف حاط بانتري ولوحة توزيع الكهرباء مع بعض وهو ممنوع

الغرف الحمامات كلها يبغي لها اعادة توزيع وغرف الملابس لو نقدر نخليها مغلقة أفضل ومفصولة

[ita(10)lia]

السلام عليكم والله ودي اخذ رايك في التصميم اللي عندي

[معماري قطري]

السلام عليكم والله ودي اخذ رايك في التصميم اللي عندي

عليكم السلام ورحمة الله وبركاته

انا حاضر للكل والله يقدرني على عمل المطلوب

حاول تنزل المخططات صورة هنا وبنشوف شالأفضل لك بس بعد اعرض كل المعلومات حتى اتجاهات الأرض

[معماري قطري]

اللي يحزنني في التصميم الأخير إن صاحبه قضى سنة مع الاستشاري لين وصل للي وصل له وانا لو مكانه اخلصه في اسبوع ويمكن بدرجة أفضل من ذي

[sweet qatar]

صباح الخير


الله يجزاك خير و يرفع قدرك بوعبدالله


التصميم على ما اعتقد عبارة عن تعديلات على قالب جاهز مثل ما صار معاي .. معاناة وخساير ما اتمناها لأحد

واضح ان المصمم عدل على رغبات المالك بدون ما يكون في كونسبت خاص للمكان او فكرة لترتيب احتياجات المالك

نصيحتي يشوف شركة ثانية للتصميم .. مساحة الأرض مب صغيرة عشان الاحتياجات الأساسية تنحشر حشر و يبي يخالف

معليه حتى لو مرت سنة كاملة وهو يعدل فالتعديلات كلها على ورق

[sweet qatar]

في حالة اقتراحي ما لقى قبول من المالك

اقترح تغيير مكان الدرج مع اللفت ويكون في أقصى اليمين فوق درج البيسمنت


و مكانه بيكون الجلسة العائلية بدل الجلسة الي برا .. او الاستقبال بدل الجلسة مقابل باب الكراج

و ممكن نصها يكون مفتوح من الدور الاول .. بمعنى الجلسة في الدور الاول تطل على الصالة في الدور الارضي والحديقة

بحيث الزجاج يكون بانورامي بارتفاع طابقين


شي غريب في الدور الارضي في مطبخ و ستور يخدمه ، ايش حاجة البانتري ؟

[معماري قطري]

في حالة اقتراحي ما لقى قبول من المالك

اقترح تغيير مكان الدرج مع اللفت ويكون في أقصى اليمين فوق درج البيسمنت


و مكانه بيكون الجلسة العائلية بدل الجلسة الي برا .. او الاستقبال بدل الجلسة مقابل باب الكراج

و ممكن نصها يكون مفتوح من الدور الاول .. بمعنى الجلسة في الدور الاول تطل على الصالة في الدور الارضي والحديقة

بحيث الزجاج يكون بانورامي بارتفاع طابقين


شي غريب في الدور الارضي في مطبخ و ستور يخدمه ، ايش حاجة البانتري ؟

ناقشته فيه وأقنعته بعدم الحاجة له خصوصاً المطبخ قريب .. ولو محتاج يقدر يخليه كاونتر مفتوح لأن المطبخ ممكن يكون مغلق للطبخ الداخلي والقوي والبانتري يكون طبخ مفتوح وجلسة طعام أكثر منها طبخ .. ممكن يسويه جزيرة بكراسي وكاونتر بسيط فيه ثلاجة كبيرة ورا