الواجهة الخلفية نلاحظ فيها نافذة الدرج طولية وكبيرة وتنفتح على بيت المصعد وسط الدرج .. شيصير لو سويناها أصغر وعلى الجنبين؟ بتنور الصالة الوسطية فوق وتحت وفي البنتهاوس
هذي الجهة الجنوبية وفيها الشمس شبه دائمة صيف وشتاء وخلف الباب يوجد الملحق اضطريت اعدل بين غرفه حتى يجي باب المطبخ مقابل باب الدرج الخلفي لسهولة التواصل والوصول للمطبخ الوحيد حيث لا يوجد مطبخ داخل البيت
يعطيك العافية اخوي ( ابا عبدالله )المشاركة الأصلية كتبت بواسطة معماري قطري
الواجهة تتعدل أكثر وصراحة الدرايش والأبواب مرتفعة ارتفاعات تزيد على 3 أمتار و 30 سم .. ضخمة للغاية والمقاول ما يشوف الجدول قد ما يشوف الواجهة ويترجمها لحقيقة .. بعدين ندخل في اشكالية معاه ونقول له صغر الدرايش يقول فيه فرق قيمة ووقت ويضطر يسوي الشغل مرتين
كذلك الأسقف ذكرتها بميلان بسيط وكأننا ركبنا القرميد حتى يبين من بعيد فقط ولا يعكس جمالية السقف من قريب والواجهة .. ما حبيت الأعمدة نوعين في المدخل
اشوف الدرايش تحتاج تغير في الديزاين مافيها تناسق
عليك بطريق الحق ولا تستوحش لقلة السالكين، وإياك وطريق الباطل ولا تغتر بكثرة الهالكين ..”
الواجهة الشرقية جهة جار وبعد ينطبق عليها ما ينطبق على البقية .. وفكرت لو نفتح دريشة علوية في السقف المايل بتطلع ميزة جمالية وكذلك بتكون مثل المنور العلوي للحمام الرئيسي في هذه المنطقة ويدخل علينا نور أول الصباح
الله يعافيك ويبقيك اخوي سعود
معاك حق مسويها عملاقة .. صراحة الدرايش والأبوب أي شيء فوق 2.4 متر يعتبر مبالغة مب في محلها الا لو نبي نسوي واجهة بالكامل زجاجية وعندنا أسباب ثانية لكن حق بيت ارتفاع 2.4 كافي وزيادة لأن مستوى نظر الشخص الطبيعي حول 1.6 متر وعندنا 60 سم فوق مستواه يقدر يشوف السماء بزاوية .. بعدين الأبواب ألواحها سعتها 2.44 طول في 1.22 عرض وأي شيء أكثر يعني قطع زيادة وتوصيل ووصلات وشغل زيادة وثقل وتكلفة طبيعي فوق المعتاد .. ممكن لو بتسوي باب 2.4 يكلف 2000 ريال ونفس الباب لو ارتفاعه 3 متر يكلف 4000 ريال والزيادة بس في الطول 25% لكن التكلفة زادت 100%
اتابع وقت ثاني ببقية الصور وهي كثيرة واحتاج أوضح بالرسم أكثر وأكثر
الواجهة الأخيرة اليمنى وهي الغربية وفيها الغرفة الرئيسية في الزاوية المثمنة .. نفس الملاحظات تقريباً لإرتفاع راس الهرم المثمن لو زدناه متر أو متر ونص بيبين أحلى وبينعكس على الداخل بترتيب باوضحه بالرسم وبرسم مقطعي بعدين
المجلس واجهته وتوزيعته ما اهتم المصمم لعمل باب أوسع وترتيب المداخل حتى تخدم توزيع الأثاث وبنشوف التغييرات البسيطة عليه
واجهة المجلس الخلفية مطلة على الملحق ونشوف شكثر الدريشة عالية حتى الكورنيش والجبس بيكون صعب .. قاعدة حدها الأعلى يكون 2.4 متر مناسب جداً
ما ادري ليش الاستشاري مصر على الارتفاعات القديمة .. ألحين المجالس مسموح لها 5 متر والملاحق 4 وبعضهم يزيدون بعد وياخذون استثناء
Garmeet ما اعتقد كلمة صحيح قرميد بالعربي وبالانجليزي روف تايلز وفيه أكيد أنواع لكل نوع اسمه الخاص .. أكيد الرسام اللي اشتغل المشروع أول مرة هندي
ما علينا نروح للملحق وهو مهم لأنه فيه المطبخ الوحيد بدون مطبخ داخلي ومخلي بابه بعيد عن باب البيت الخلفي اللي المفروض يوصل له
غرفة الغسيل عبارة عن حمام جدامه ليوان مغطى .. ما فهمت شالمغزى منه واقترحت تكون مغلقة بواجهة زجاجية
وارتفاع الملحق مسويه 3.5 وممكن يزيده ل4 ويوازن أرضيته مع أرضية البيت ولباب الملحق وباب البيت يحط عتبة رخام 2 سم تسكر فتحة الباب السفلية عن الحشرات والماء .. بعدين ممكن يطلب من ألحين تسكير السقف أو يسكره بعدين بزجاج أو بولي كاربونيت
هذا أول تعديل للحوش مع توزيع المباني والمداخل للتوضيح .. يعيبه صعوبة الموافقة من التخطيط لفتح ثلاث مواقف على الخارج ولا فيه مقترح لغرفة سايق
بس ترتب المجلس بتوزيع الكراسي وتحريك الباب للداخل مع تصغير مساحة المغاسل والاكتفاء بثنتين حتى نسوي كتف للباب وللكراسي بحيث الدخول يكون شبه وسطي ونقدر نسوي باب كبير للمدخل من الخارج
الفكرة للمقلط والمغاسل تعدلت بفتح المغاسل عليه لأني عارف جونا والغبار بيترس منطقة المغاسل وهي مفتوحة كما كانت في التخطيط السابق .. بس المالك حابها بذيك الطريقة ورجعت عدلتها بناءً على رغبته
الملحق ترتب جاء المطبخ مكان الستور واستووا البابين متقابلين .. بيت المصعد تحرك جدام 15 سم واستوى الدرج وراء بعرض 1.55 مشابه للجوانب وقبل كان 1.3
الأعمدة الدائرية تصغرت شوي 20 بدال 40 في السابق وأبعدتها عن الحائط وفتحت جلسة الطعام العائلية أكثر وكل هذا كان مبدئي وتغير بعد شوي حسب المقترح الأخير
المقترح هذا ارتب وأفضل .. فيه ستور خارجي وغرفة السايق خارجية داخلية ولو التخطيط رفض نقدر نقلل المواقف لموقف واحد مع الغرفة بس حسيت إن الاستشاري ما يبي يتعب والمالك مستعجل ولا يبي يوجع راسه
مغاسل العائلة تم تقليلها لمغسلة وتصغير الحمام واستغلال باقي المساحة لستور للبيت ولمواد التنظيف
وهذا المقترح الأخير مع الغاء المواقف اللي تنفتح على الخارج وقابلية فتح باب لغرفة السايق خارجي وعزله عن البيت لو حبينا
وهذا المقترح اللي توافقنا عليه استوى عندنا مدخل زوار برستيج ومواقف سيارات اضافية للزوار داخلية ومثل ما ذكرت غرفة السايق ممكن تنعزل وينفتح لها باب خارجي .. المطبخ نقدر نفتح له دريشة جهة المجلس الخارجي والمنطقة بين المجلس والملحق تصلح لحوض سباحة أو زراعة وملعب للأطفال أو توسعة اضافية للملحق لو حبينا
خزان الصرف الصحي لو مطلوب ممكن يكون بين المجلس ومظلة السيارات .. والخطوط السميكة هي للكهرباء وتوزيعها على المباني .. فيه ملاحظات كثيرة بنتابعها بعدين منها عزل البيت حرارياً ومنها ازالة البروزات حول الدرايش .. ممكن يكون عندنا الجدار الخارجي 30 سم أو 35 سم حسب نظام العزل ويكون التجويف كافي وأجمل للدرايش
ضوابط المشاركة
رد مع اقتباس
