مراجعة التصاميم المعمارية وابداء الملاحظات عليها (محدث)

[معماري قطري]

جاني موضوع تصميم صعب شوي والصعوبة في المساحة المحدودة والوقت وفي قطعة الأرض الغريبة

الأرض لبناية سكنية قديمة عليها قرار هدم خلال شهر وطلبنا تأجيل حتى نقدر نصمم ونبدأ نهدم .. عطيتها استشاري واتابع معاه لكن قلت اجرب انزل المخطط على الكمبيوتر وأول مرة انقل صورة من الوتس أب للاوتوكاد وبسبب أضلاع الأرض غير المنتظمة احتديت اسوي خط بطول يوازي أحد الأضلاع واطابق الصورة مع هذا الخط لسهولة رسم الخطوط الباقية

وهذي الصورة منقولة من فايل الاوتوكاد



هذا مبدئياَ الدور الارضي للمدخل والمواقف ممكن توصل لعشر مواقف وبنحاول نصمم ثلاث شقق للدور مع شقة بنتهاوس أصغر بمجموع 10 شقق .. أكيد بيكون فيه ارتداد واتمنى يكون بسيط وممكن نصفى على شقتين للدور وبتكون سبع شقق

طبعاً نحتاج غرفة لتانكي الماي والمضخات مضخة لكل شقة بيكونون جنب غرفة الدرج والكهرباء تحت الدرج وخلف المصعد بعدين غرفة كهرباء لكل دور

[معماري قطري]

أحد المقاولين أرسل لي فيديو عن مشكلة المياه في منطقة عين خالد بعد ما حفروا للبيسمنت وطلع الماي بوضوح في الأرض .. ما كنت ادري عن الحل اللي بدأ يسويه وقلت له عن الفرنش درينيج .. طلع عارف السالفة وراواني كيف مسوينه

هذا مهندس توه مخلص دبلوم هندسة يعني يعتبر مساعد مهندس وفورمان لكن ما شاء الله عليه تربى على المهنة من وهو صغير وابوه فورمان سابق وكبر وارتاح خلاص يتابع الشركة فقط .. أتمنى يطلع الفيديو أول مرة انزله عن طريق هذا الموقع للأرض محفورة وتجمع المياه

https://imgur.com/50KBpCY

[معماري قطري]

هذا كان ردي وتساؤلي له

This is where ? What will you do to get the water off? I suggest to do French drainage. Check the YouTube for details it is necessary to prevent future water accumulation + it’ll be good to make lower open ventilation pit or what is called English garden

وهذي إجابته على الوتس أب

Its in Ain khalid We store the water in tanks which comes from the excavation site and take the water through Water Tankers We have already done French Drainage system as you can see the pictures We have done it many times in different projects These Aggregates are working as a porous for water

كلامه واضح بأنه فاهم نظام عمل الفرنش درينيج وهذا ضروري لكل أرض فيها رطوبة وحتى ضروري نعمل تمديدات بايب تنزل الماي من السطح وتمر تحت الارض وتطلع خارج الجدار للشارع والعملية ما تكلف كم 100 ريال

وهذا فيديو للنظام بعد ما خلص .. ما ادري هل بيحافظون عليه أو لا ممكن عاملينه مؤقت يبين لي من الحفرة اللي جدارها خشبي وفيها المضخة الغاطسة .. المفروض الحفرة هذي توجه لها البايبات اللي تصرف الماء عبر الفتحات الصغيرة وتصب فيها وتكون خزان معزول ومبني تحت الارض .. وممكن نسوي له فتحة على مستوى أرضية البيسمنت أو خارج البيسمنت لو عندنا حديقة نازلة حتى نقدر نفتح ونصين المضخة أو ننظف البايبات أو الخزان من الطمي لو دخل شيء منه .. والمفروض البايبات ملفوفة بقماش يمنع دخول الطمي

https://imgur.com/WkLg5Dd

[معماري قطري]

الفيديو الأخير بعد ما اكتملت صبية النظافة

https://imgur.com/UCDCJdM

وهذي صورة لتمديد البايبات المخرمة تحت صبية النظافة حتى تصيد الماي وتحوله للمنهول قبل لبوصل قاعدة الصبية .. هنا مثل ما ذكرت بيدخل طمي للبايبات وبيسدها مع مرور الوقت والحل لفها بقماش يمنع دخول الطمي



وهذي صورة بعد ما ندفن البايبات بالكنكري وواضح شكثر رمل وحبيبات تراب صغيرة بتنسحب مع الماي وتدخل البايبات .. الماي متجدد ويرتفع من وقت لوقت ولو انسد النظام وكأنك يا بو زيد ( رفيجنا ) ما غزيت





من هذي الصورة واضح إن المنهول عملوه عند بير اللفت وما كان ضروري حتى لو عملوه خرسانة ومعزول زين مع فتحة ممكن الدخول لها من أرضية البيسمنت أفضل مع عمل الاحتياطات لعدم تسرب الطمي للبايبات وأي شيء قليل يتسرب من داخل المنهول اللي المفروض يكون واسع ممكن نسلك البايبات لأنها تصب مباشر في المنهول وممكن نصين المضخة الغاطسة .. الله يعين صاحب البيت سووا له نص نظام أو نظام مؤقت وباكلم اللي أرسل لي باوضح له نقاط القصور وأتمنى يستوعب

[معماري قطري]

آسف الصورة اللي اقصدها في الفقرة الأخيرة ذي

[معماري قطري]

عاد لو الله قدر إن ما يطلع ماي مرة ثانية صاحب البيت بيكون محظوظ ولو طلع وكانوا ملغين النظام أكيد بيعاني من تسرب المياه لو ضعف العزل وأتمنى الصورة وضحت لجميع المتابعين

[معماري قطري]

فرصة الحل للحين موجودة وسهلة .. شوي بتكلف بس ضروري تنعمل

يعمل منهول خرساني معزول عن الأتربة والمياه تدخله عبر البايبات .. وبما إن ذيه بيت أكيد فيه امكانية لعمل المنهول جهة الحوش .. سواء بنسوي الحوش ساقط أو نازل لمستوى البيسمنت أو عادي نقدر نسوي فتحة المنهول شوي أرفع من أرضية الحوش حوله وحسب عمقه وارتفاعه لو فرضنا البيسمنت أعمق نقطة فيه عند ناقص 4 متر نسوي المنهول تحت هذي النقطة ونمدد بايبات الصرف اللي المفروض تكون مغلفة بقماش يمنع دخول الطمي ويسمح بدخول الماي للمنهول .. وهشكل بيكون عندنا ضمان إن أي ماي يطلع يتصرف جهة المنهول وتبقى الارض ناشفة .. كذلك ضروري نسوي جوانب جدران البيسمنت بايبات تصريف تكون مرتفعة شوي وموجهة جهة المنهول حتى نضمن أي مياه تلتصق بجدران البيسمنت تنزل لأن حولها كنكري يسرب المياه لتحت وتحصل البايب اللي يوجها للمنهول ومن المنهول تطلع بمضخة للخارج

[معماري قطري]

أحد الأهل سألني في جزئية توزيع دورة مياه وكان مشتغل له فيها ما يسمى بمصمم داخلي وشغله كله ثري دي على برنامج تصميم موضوعه فيه المقاسات للقطع بشكل مسبق ومحدد وهو يبغي شاور شوي أوسع ومساحات تخزين جانبية ويبي يعرف وين يركب الاكسسوارات وشغل الواجهات الداخلية هو أهم شيء وأهم منه هو التوزيع العام

هذا أفضل ما وصلت له



استوى عندنا توزيع مناسب لعدة قطع وعندنا خزانة حائط جانبية وحدة جنب المغسلة بعرض 80 سم وعمق 25 سم والارتفاع يتحدد حسب الرغبة في الواجهة .. بتكون فوق قاعدة المغسلة بحدود 10 سم .. العمق ظاهر منه 15 سم و10 سم محفور لها في الحائط .. نفس الشيء عندنا ثانية جنب الكرسي وهذي تستخدم لمواد التنظيف

غير عندنا تجويفات جدارية وحدة جنب كرسي الشاور بعمق 10 سم وبتكون كافية للصابون والشامبو والليفة وبعدد مناسب .. وثانية جنب الجكوزي .. الجدار اللي جنب الباب يمين ويسار بيكون لتعليق الفوط وممكن نخلي حديد تعليق على باب الشاور .. لو خذنا جكوزي صغير بطول متر و60 سم بنوفر مساحة مرور مناسبة جدام الكرسي والبدية بحدود 70 الى 75 سم

ممكن نركب طوب زجاجي حوالين المراية اللي أصلاً تخفي بوكس للتخزين بعمق 20 سم والطوب الزجاجي بيعطينا نور طبيعي مناسب ونقدر نحط بدون لون ونمزج معاه شوية ألوان معينة كالأزرق والوردي وفيه درجات ألوان ثانية تعطي بهجة وتغيير لجو الحمام

[معماري قطري]

الدائرة بين البدية والمغسلة بتكون لسلة المهملات

هذا كم مقترح ثاني ميزة الثاني والثالث إن عندنا مكان لكبت كامل ممكن نختاره جاهز فيه عند ايكيا وغيره قزاز وبيكفي لتخزين فوط وحتى بعض الملابس



وهذي تصاميم ثانية .. المشترك فيها إني حاولت اخلي الشاور والجكوزي في منطقة محصورة بفريم وقزاز عن ترشش الماي حتى يكون الحمام عملي وسهل الاستخدام أي وقت ولا حتى فيه داعي نمسح وننظف الماي بعد الاستحمام نسكره ونستخدم باقي القطع ويجف بنفسه

الشاور عرضه 90 سم بس مفتوح من جهة البانيو يعني المستخدم بيكون أكبر بكثير من 90 سم لحركة اليد وكذلك نقدر نركب بانيو أطول لو حبينا ونسوي كرسي جنب البانيو للجلوس والتفوط .. نقدر نسوي القزاز الفاصل بكامل الارتفاع ونخلي منطقة الشاور والبانيو مغلقة ونحط جهاز بخار ويستوي عندنا جكوزي وشاور وبخار ونمرر بيب البخار تحت الجكوزي بتستوي عندنا بلاطة صاخنة مثل الحمامات المغربية وبيكون فل تدليعيشن



هو بس يختار اللي يبي وبعدين سهل نسوي واجهات داخلية ونعدل حسب الحاجة

[معماري قطري]

موضوع التوصيف والتفاصيل صعب ويتعب أي مهندس أو مكتب استشاري .. لأنه يعتمد على الدراسات والالمام بالكود للدولة وقوانين البناء وفوق هذا الخبرة الشخصية بمشاكل البناء ومحاولة تفاديها عبر تفصيل مناسب

ما حبيت ادخل فيه قبل لصعوبته وكذلك ممكن اغفل شيء فيه .. في الوقت الحالي حصلت كتاب مفيد وبديت اقراه عن التفاصيل أو ما يسمونه عندنا الاستشاريين Shop Drawings والغالبية يركنونها للمقاول يسويها ويشرحونها بالكلمات .. الكتاب شجعني أنشر محتوياته لأن كثير منها يوضح تفاصيل احنا نستعملها والمفروض نضمنها لتصميمنا عن طريق الاستشاري حتى المقاول يسويها صح

هذي نبذة من الكتاب



الكتاب اسمه Architectural Detailing الطبعة الثالثة سنة 2016

الكتاب 400 صفحة بس باختصره وباركز على السكتشات المهمة

أول فصل فيه التحكم في المياه وخصوصاً الأمطار واعتقد الغالبية يعاني منها

نبدأ بهذا الرسم مع الشرح التابع له



القصد هنا نسوي سلوب بسيط لقاعدة الدريشة حتى نصرف مياه المطر مع عمل طرف بارز وفاصل حتى الماي ما يعلق تحت قاعدة الدريشة ويلطخ الواجهة

كثير يسوون حجر والدرايش عندنا تفصيلها يختلف في الغالب ألحين ألمنيوم أو يو بي في سي والحصول على تفصيل مقطع مقارب سهل أو حتى مقطع معروف بالضبط وبالإسم لو حبينا مثلاً نذكر يو بي في سي قطاع 70 ملم أو 76ملم أو 60 ملم .. والمهم نوضح السلوب وأي طبقة حماية لسطح الطابوق .. بعضهم يركب إطار حجر وهذا يحتاج تفصيل صح حتى ما يجمع الغبار عندنا وينزله مع المطر على الواجهة ويلطخها .. الطيور من جانب ثاني كيف نتفاداها وفيه حلول مثل المسامير المعدنية ومنها ستانلس ستيل ما تصدي وتلطخ الواجهة بعدين

هذي تفاصيل مهمة ندخلها في تصميمنا ونرتبها صح حتى نفتك من أي مشاكل مستقبلية

بالنسبة للديمومة موضوعها مهم ومهم نستخدم مواد وتفصيل دايم .. جزء من الحل بيكون لقاعدة الدريشة نسوي تفصيل مثل الكرسي يثبت عليه الفريم ومعروف الفريم يثبت ببراغي وتسد الفجوات برغوة وسيليكون خاص فوقها وهذا السيليكون مع مرور السنوات يهتري ويحتاج تبديل .. هل نغطيه بقطعة برواز يو بي في سي أو ألمنيوم .. أو نفصل القاعدة سواء كانت بالبلاستر أو الحجر أو قطعة ألمنيوم تغطي القاعدة الباقية من الطابوق أو نركب الدريشة على الحافة فتكون على مستوى واحد مع وجه الجدار الخارجي .. هذي بتفكنا من تركيب أسلاك منع الطيور وبتفكنا من تجمع الغبار على السطح الأُفقي المتبقي في الخارج خلف الدريشة حتى وإن ثبتت على حجر أو رخام أو خشب بيكون يبين من داخل ونظيف وممكن في الحافة نحتاج برواز بسيط ألمنيوم أو يو بي في سي يغطي الفاصل بين زاوية فتحة الدريشة ووجه الجدار العمودي .. الدرايش ألحين ما تحتاج تجويف وتظليل لأنها معزولة وبقية العزل يجي من طبقات الستارة داخل والتجويف بين الدريشة والستارة .. ولو عندنا جدار معزول هذا التجويف بيكون بحدود 30 سم وشوي أكثر حسب سمك الفريم وبإذن الله بحاول اسوي تفصيل مرسوم بما قلت