تفصيل آخر هو ما يسمى بقنوات الدمع في الجدار وهذا لخروج الرطوبة المندفعة داخل التجويف للجدار الخارجي .. فيكون لنا الفراغ مهوى وخالي من الرطوبة .. بنفس الطريقة نعمل فتحات علوية للمناطق الحارة يخرج منها الهواء المتكدس والمرتفع لأعلى بسبب قلة كثافته .. وهي فتحات بالدريل بقطر 1 سم كفاية ويمكن حتى أقل .. السفلية لخروج الماء ولدخول هواء بارد نسبياً والعلوية لخروج الهواء الحار
نطلع شوي من موضوع الكتاب للعملي ولرفيجنا خان اللي يشتغل في البيسمنت وتأسيسه
هذي صور بعد ما خلص صبة النظافة
وهذا المنهول مغطى وينسحب منه أي ماي يطلع تحت الصبية قبل ليوصلها
شغل بو أسد شكل ما يقول رفيجنا اليمني
وهذا فيديو لكمية المياه اللي ما تزال تسحب من تحت البيسمنت
https://imgur.com/AnsDIXB
وهذا فيديو لبعد الانتهاء من تركيب الحديد والشريط الواقف لتسريب المياه
https://imgur.com/mNHeWUd
تمنيت لو الحديد أخضر مغلف ولو انا مكان المالك ما اركب الا أخضر
الطابوق واضح تركيبه والمونة اللي فيه كفاية ومعبأ فرق عن شغل المصريين اللي يقللون المونة لآخر درجة
حبيت الشغل ذيه يبين لي المكتب المصمم فاهم باللي سواه من تصريف للمياه الجوفية ولو فيه شوية نواقص مثل الجيوتكستايل فابريك ومثل تجهيز المنهول اللي للصرف تجهيز كامل ودائم
شغل الحديد يبدو لي مدروس واقتصادي .. شفت شغل مشابه قبل كانت فيه أبيام ضخمة وكميات حديد مهولة ومن النواقص عدم استخدام الحديد المعزول
في المقاطع عملية الصب وتشغيل الهزاز تبين أوضح
https://imgur.com/hf4FZnr
https://imgur.com/YB1I1Ca
الرجاء دخول الروابط للمقاطع وهي قصيرة جداً
لو كنت مكان المالك كان سويت حوش نازل ينفتح عليه البيسمنت حتى لو يكون صغير عبارة عن منور .. نتابع ونشوف شيصير في الأخير
نتابع مع شغل خان رفيجنا وأكيد مظاهر التصميم بتبدأ تتضح مثل هنا يبين لي البيسمنت تقليدي حفرة غزيرة مدفونة وفيها فتحات تهوئة واضاءة من فوق .. كنت متمني لو سووا حوش نازل ينفتح عليه جزء من البيسمنت
هذي الإستعدادات للحائط الاستنادي الخرساني
سؤال اخوي معماري بما انك ذو خبرة..المشاركة الأصلية كتبت بواسطة معماري قطري
الحين ينفع اخلي مساحة البيسمنت على مساحة الارض؟
عندي في بيتي حاليا فكرة اني اسوي بيسمنت لكنه يكون بمساحة الارض مب محصور بمساحة مبنى الفيلا فهل هذا ممكن مع قوانين البلدية؟
سألت احد الرسامين و قال ما يصير مع اني اشوفه عادي و ما يتعارض مع الارتدادات المطلوبة.
انهم قوم لا يفقهون و إذا فقهوا لا يعملون و إذا عملوا لا يتقنون و إن اتقنوا فإنهم ميتون
لقد كانوا سابقا يسجنون الناس لأنهم يسرقون أما الآن فهم يسجنونهم لأنهم يقولون الحقيقة
فيها مزاجية من مهندسي التخطيط وكل واحد له فتوى
من فترة مر علي أحد الإخوان مسوي بيسمنت في ثلاث جهات محفور من الحوش بالكامل .. جهة وحدة بس فيها حديقة بمستوى الشارع والباقي تحت الشارع بدور .. ومحصل الموافقة المبدئية بس المكتب الاستشاري ملخبط في أشياء كثيرة وضحتها للمالك .. كان جنب للبيت فيه دورين ملحق دور في مستوى البيسمنت ومغطى حتى حوشه بينه وبين البيت بسقف خرساني .. يعني يستوي البيت من فوق يبين جنبين بس حوشهم محفور لكن في الأساس 3 جوانب واحد مغطى بسقف متصل مع البيت .. أغلب المشاكل في البيت كانت ميكانيكية ومشاكل صرف مياه صحية ومياه مطر + التكلفة اللي غاشينه فيها المكتب الاستشاري بأن تكلفة البناء بتكون بسيطة .. إختلف معاهم وغير التصميم بالكامل
انا ما انصحك تسوي بيسمنت محفور بالكامل لأسباب منها التدرج بيطلع أحلى بحيث عندك زاوية مثلاً وشوي حولها نازلة تطلع أحلى وتعطي خصوصية أما الحوش كله شلون بترتب دخول السيارات؟ بعدين التكلفة بتكون كبيرة حتى للسور لأنه بيكون بعمق البيسمنت وحائط خرساني معزول
كذلك تقدر تتحايل على الوضع بعمل حفر مفتوحة للدرايش للبيسمنت وما تحتد تحفر كامل الحوش .. وإنت أكيد لو البيسمنت عندك 20 في 15 بتحفر مترين زيادة في كل اتجاه وبعدين بتدفن وبتقدر تسوي بوكسات طابوق معبأ بخرسانة للحفر ذي وتتحكم في حجم نوافذ كبيرة في البيسمنت حتى تقدر تخليها بكامل الارتفاع تقريباً وتفتح الحفرة مثل بلكونة نازلة .. تقدر تسوي في جدار الحفرة فجوات تجميلية لو حبيت تزرعها بنباتات متسلقة .. كذلك تستغل قاع الحفرة بعمل منهول تجميع المياه الجوفية ومنهول تجميع مياه الصرف الصحي لرفعهم للصرف وبتكون عملت حلول للمياه خارج ما يسمى بالصندوق وممكن النزول للحفرة من الحوش للصيانة
يعني الحفرة تقدر تسويها في الارتداد بعرض 1 متر ويبقى عندك 2 من كامل الارتداد .. ال 2 الباقية ينزرع فيها زراعة كبيرة كالأشجار الدائمة .. طول الحفرة تقدر تتحكم فيه حسب حاجتك .. ال 2 الباقية بتكون كذلك جزئياً ممر للمشي حول البيت وسقاية الزراعة وترتيبها وتحت الممر خط الصرف الصحي وخط مياه المطر لو قررت تسويها تصرف على حفرة والا تخرج لخارج البيت للشارع
جيب تصميمك وبنراجعه هنا وأكيد بتستفيد وغيرك بيستفيد
والله اتمنى من التخطيط أي حد بيسوي بيسمنت يوجهونه لمثل هذي الأُموروأقصد انارة وتهوئة البيسمنت .. وعزله والتخلص من المياه الزائدة صح .. ويا ليت التخطيط يعين مهندسين فيهم خير لأهل قطر ولمهنة العمارة ككل .. ويكون المهندس مأمور بمقابلة المالك وتوجيهه في بدايات التصميم حتى ما ياخذ الرخصة المبدئية الا شغله مناسب .. ثم شيء أخير يكون من واجبات التخطيط متابعة الاستشاريين المصممين والمشرفين على أرض الواقع وتصيد تجاوزاتهم وسرقاتهم الهندسية واحالة المخطيء للتحقيق والقضاء
عندنا عجز كبير في هذا المجال مع إن عندنا فائض من المهندسين ذوي الخبرة من متقاعدين ومن متفوقين في جامعاتهم للحين ما اشتغلوا والا اشتغلوا في مجالات ثانية .. يذكروني بمرض السكر يسمونه جوع في عز الشبعة الجسم فيه سكريات ما يقدر يستفيد منها .. والبلاد فيها مهندسين وهيئة التخطيط فيها عدد بسيط ما يقدر يراجع كل مشروع صح
ضوابط المشاركة
رد مع اقتباس
