صفحة 191 من 296 الأولىالأولى ... 91141181189190191192193201241291 ... الأخيرةالأخيرة
النتائج 1,901 إلى 1,910 من 2954

الموضوع: مراجعة التصاميم المعمارية وابداء الملاحظات عليها (محدث)

  1. #1901
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    وهذي المواد الثانية من شركة المناعي















    وهذا شغل العازل الفيديو الثاني




  2. #1902
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    أحد الإخوان ارسل لي استفسار على الخاص وحبيت انقله هنا لفائدة الجميع

    السلام عليكم و رحمة الله

    في البداية أحب اشكرك كثيرا على المحتوى اللي تقدمه و التعليقات اللي تكتبها و اللي بعضها يعود لأكثر من عشر سنوات ، نستفيد منها في خبرتك في البناء و تساعدنا في اتخاذ القرارات المناسبة ، الله يجعلها في موازين حسناتك

    أنا ناوي أبتدي أعمال بناء قبو على ارض مساحتها 450 متر مربع في معيذر الجنوبي بمبلغ مالي بسيط متوفر عندي و بعدها راح اوقف البناء لين تتوفر عندي سيولة. عندي كم سؤال اذا ممكن تساعدني فيهم و ممكن ننقل بعدين زبدة الاجابات في المنتدى عشان يستفيد الجميع مثل ما استفدت انا من ردودك و اعذرني على الاطالة.

    - مشكلة المياه السطحية الضحلة كنت اشوف مواضيع عنها في المنتدى و الجرايد قبل سنوات ، في الاونة الاخيرة خفت هالمواضيع ، هل لهذا علاقة بمشروع البنية التحتية اللي نفذته أشغال مؤخرا؟ انا شفتهم حفرو قدام الارض لشبكة المجاري الله يعزك و شبكة تصريف الامطار.

    - بالنسبة لاختبار التربة. بعض الاشخاص قالولي تسويه بعد ما تعرف اماكن القواعد عشان الاختبار يتم على 3 اماكن في الارض ، و في العادة هذه الاماكن تكون اماكن القواعد. الطرف الثاني يقولي شلون تبدا تصميم و انت ما تعرف طبيعة الارض و ارتفاع المياه و ينصحني اسوي الاختبار اول ، و في النوع الثالث يقولي الارض في معيذر الجنوبي صخرية و ما فيها مفاجآت خصوصا ان كل الاراضي اللي حولك مبنية (كلها مبنية ارضي + 2 بدون قبو) ، توكل على الله بدون اختبار الا اذا انت موسوس حدك. أبي عرف رايك حسب خبرتك.

    - بالنسبة لحوائط القبو ، انا شفت الفيديو اللي حطيته عن الطريقة الاوروبية في زرع انابيب تصريف على الجهة الخارجية من الحائط و فوقها قماش ثم اقريقيت مع ميلان الى حفرة تصريف. بعض الاخوان قالولي انه هذا شي مبالغ فيه خصوصا ان عندكم شبكة مياه امطار حاليا. بالنسبة لي اشوفه حل غير مكلف و ان ما فادني ما يضرني.

    رديت عليك في كتابتي تحت وصحيح إن ما فادك ما ضرك هو احتياط

    - بالنسبه لحوائط القبو ، في حال كان الحائط ملاصق لأرض الجار ، ماهي طريقة عزل الجزء الخارجي من الجدار الاستنادي؟ صعب العامل يدخل في ذيك المنطقة للعزل.

    إستشاري ذكر لي عن مواد متطورة Rigid Boards وصراحة أول مرة أعرف عنها قال تعيش بعمر المبنى وعزلها مضمون ولازم تنحط المواد العازلة قبل لتنصب الحوائط هذي وأوقات يعملون جزء طابوق بعده الحايط الخرساني .. شغلة انشائية الاستشاري المختص المفروض يحط حلول لها لا تشغل بالك بها

    - بالنسبة للجدار الداخلي للقبو ، احد قالي ما يحتاج تعزلها و العزل الخارجي طبقتين 4 ملم يكفي خصوصا مع وجود شبكة تصريف مياه امطار حول ارضك ، واحد ثاني يقولي سولك عزل اسمنتي من داخل و يعطونك عليه ضمان لو صار اي شي تقدر ترقعه من داخل بسهولة بس مشكلته مكلف.

    من داخل صحيح ما فيه داعي للعزل الا في الأكاكن الرطبة منهول مثلاً إضطريت تسويه داخلي أو حمام أو مطبخ

    - النية اسوي المسبح مفتوح (open to sky) خارج القبو ، لكن قالولي انه ممكن تحتاج تنزل/تحفر حول 5-7متر (-2 متر من مستوى الارض لأرضية القبو و -2 متر عمق المسبح و - 1 الى 1.5 تقريبا متر تاسيس للمسبح). و عند الوصول لهالمستوى احتمال كبير جدا يكون فيه مياه جوفية. أبي شورك. المسبح محتاجه لأنه العجوز ما تقدر تمشي و نصحونا بالسباحه لها.

    الله يشفي عجوزك ووالدتي نفس الحال مع اني مسوي مسبح وقلت لها كم مرة بس ما تبغي

    يا اخوي من وين جايبين هالارقام حد سوى تصميم لحوض السباحة؟

    لتزيد العمق عن 1.3 متر بالكثير 1.2 صافي كافي وسواء سويته تحت الارض حتى يكون في مستوى الارضية النازلة للبيسمنت أو سويته مرتفع شوي جزء تحت وجزء فوق أو سويته بالكامل فوق تركب له كم عتبة .. بس في حالة عندك كبير سن وصعب يمشي تسوي الدرجات في جهة وبكامل العرض أحسن وتسويه تحت الارض يتحتاج تحفر متر ونص بالكثير من مستوى - 3 متر لو بتنزل بالبيسمنت 3 متر .. ولو تحب تسوي بيسمنت اقتصادي خل أرضية الدور الارضي مرتفعة 60 سم بالكثير حتى تكون مريحة للدخول والخروج اليومي ولو تحب 45 سم ممكن يبقى عندك صافي تحت ارضية الدور الارضي خل نقول 25 - 20 سم حسب سمك الارضية وتحت بتنزل 2.6 متر بتحتاج تحفر بحدود 3 متر ويستوي عندك ارتفاع البيسمنت صافي قريب 2.8 الى 3 متر .. حفرة المسبح بتستوي حول 4.5 متر ولا تهتم وقت التصميم بيترتب هالشيء




    و الله يجزاك خير على المادة اللي تقدمها سواء في البناء او الاسهم و ينفع بك البلاد و العباد

    بس بالنسبة للأسهم ، بلدنا مقلبنا صراحه ههههههه كنا مستكثرين فيه ريال و ووصل 1.7

    معاك من المتقلبين مع إني طويل الصبر بس هالمرة رضيت بقليل الربح ونشوف آخرتها مع استثمار انا خلاص يبست راسي ولا للبيع الا بربح مجزي 50% وفوق بإذن الله

    قواك الله
    عليكم السلام ورحمة الله وبركاته

    صحيح أسئلتك مهمة ولو حاطها في أي موضوع من المواضيع العامة كانت بتفيد الجميع وأكيد باتفاعل أكثر معاها وصدقني تفاعلي اجتهاد مبني على دراسة وخبرة والحمد لله وإن أصبت فتوفيق من الله

    ولد خالي بنى في معيذر 4 أو 6 بيوت تجارية بالضبط على الشارع قبل نادي معيذر بشوي واستشارني يعمل بيسمنت ونصحته يسوي لأن أرضه صخرية وعلى حزم ولا تخيلت فيه داعي لإحتياطات للمياه الجوفية وبنى حتى بدون اختبار وبعد ما انسكنت صار تسريب مياه من تحت قوي خرب البيسمنت واضطر يحفر وسوى معالجة ما ادري شسوى بس يقول اموره انضبطت

    البيسمنت أفضل شيء تسوي له تصريف مياه جوفية حتى لو احتياط حتى لو ما شفت مياه والا الاختبارات ما تبين وجود مياه لأن منسوب المياه الجوفية يتغير بين موسم وموسم ومن وقت لوقت

    كم بيكلفك عمل منهول طابوقي مهزول تحت الأرض وخله بحدود اللي تسمح لك المساحة لو عندك ارتداد جانبي مترين مثلاً سوه حوش نازل مع أرضية البيسمنت وسو المنهول فيه بعرض مترين وطول مناسب مترين يكفي وعمق أكثر من عمق البيسمنت اللي تقدر عليه لو 3 أو 2.5 بيكون زين ويجمع مياه كفاية .. هذا فيه مضخة غاطسة ممكن تحصلها بحدود 2000 الى 3000 حسب النوع والقوة .. والبايبات المخرمة اللي تجمع المياه من تحت البيسمنت ومن الجوانب ولا تكلف شيء وشارح كثير عن الطريقة وموضح بصور وفيديوهات في مواضيع كثيرة

    شوف استشاري ما يبالغ في الخرسانات ويكون فاهم شتبي قول له ابي تصريف للمياه الجوفية وابيه كذا وكذا لو ما فهم شوف غيره

    بالنسبة لمشروع أشغال الله أعلم به وتقدر تمرهم قسم الصرف الصحي وتسأل بس نصيحة الفرنش درينيج سوه حتى لو تشبكه بنظام صرفهم لو يسمحون أو تضطر تمدد بايب تحت أرضية الحوش يودي الماي برا وهم يتصرفون فيه بعدين بدناكر والا يغرق الشارع المهم تبعده عن بيتك .. نظام الفرنش درينيج أي مياه ملاصقة للجدار السفلي أو للبيسمنت يخليها تنزل بدون ما تلتصق لعدم وجود التربة وما تبقى جنب الحائط تنزل تحت ويصيدها البايب يصرفها بسلوب جهة المنهول

    بالنسبة لإختبار التربة حق بيت ما اشوفه ضروري لكن لمعرفة مستوى المياه الجوفية نحفر حفر تسمى حفر اختبارية .. عمال عاديين يحفرون حفرتين بشكل قطري من زاوية لزاوية شوي جهة الداخل وتكون بعمق أكبر من عمق البيسمنت .. مثلاً لو بنحفر 3 متر للبيسمنت نحفر شوي أغزر بنص متر أو متر لو ممكن .. حتى لو وصلنا لتربة صخرية قوية نعرف ونقدر قوة تحملها لضغط الاساسات .. ودوم الاستشاريين اذا التربة تتحمل 10 كيلونيوتن في المتر المربع يعتبرونها 5 ويقللون كثير من قوة تحملها وبنفس الوقت يبالغون في حسابات الوزن المفترض للمبنى لذلك نحصل الاساسات ضخمة ولو سوينا ربعها ما صار شيء وفي دول كثيرة يسوون اقل .. الجاذبية نفس الجاذبية هنا وهناك والوزن نفس الوزن

    هذي الحفر الإختبارية Trial Pits تعطينا تقدير لطبيعة الأرض وعدم وجود مياه جوفية .. وإحتمال كبير لو تركناها شهر نلقى تجمع مياه تنبع من الأرض وممكن نعيد حساباتنا عن عمل بيسمنت أو تكون المياه قليلة قابلة للسحب بسهولة ونقدر نواصل ونحفر بقية الأرض .. ولو الاستشاري شاطر يطلع عليها ويقدر قوة انضغاط الارض ويسوي حسابات الأساسات عليها .. كذلك تفيدنا مقاول الحفر يطلع على طبقات التربة ويسعر تسعير مناسب للحفر

    وهذا أول اجراء انا باسويه حق أرض بيتي قبل لا ابدأ في اجراءات التصميم للأساسات






  3. #1903
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    جدران البيسمنت في دول كثيرة كثيرة الأمطار وبعضها أرضها طينية وضعيفة تنعمل من طابوق معبأ خرسانة مع قطعة حديد في بعض التجويفات بحدود كل 80 سم قطعة .. من الخارج العزل مهم وكذلك تصريف المياه وكذلك حماية العازل .. إحنا نبالغ بخرسانة وحديد بكميات خيالية فطبيعي تزيد تكلفة بناء البيسمنت عن ضعفين اي دور عادي .. حتى ارضية البيسمنت لو عملنا تصريف تحتها وحطينا حشوة كنكري حول التصريف الماي مستحيل يوصل قاع الارضية وممكن نسوي الارضية خفيفة وبخرسانات أقل .. ينضمن كذلك عدم وجود ضغط للمياه تحت أرضية البيسمنت بسبب أي مياه تحاول ترتفع تسحبها البايبات المخرمة وتصبها في المنهول اللي ينقل الماي بمضخة للخارج

  4. #1904
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    إحدى الأخوات تشتغل على تصميم بيتها وصراحة محرج اطلبها احط التصميم كامل وتابعت من البداية مع الاستشاري .. وكان مقترحي من البداية واضح لتوزيع دورات المياه .. هي طلبت درايش طوال يوصلون للأرض من الاستشاري وبنفس الوقت خصوصية وقلت رأيي هذا مستحيل .. والمشكلة الاستشاري ما يتعب شوي في التوضيح ويسوي اللي يقوله المالك .. أمس تواصلت معاي بأن توزيع الحمام مب عاجبها .. طبعاً الاستشاري مسوي الدرايش طوال ومتفاديهم موزع القطع بطريقة مب حلوة وكله حيز مفتوح

    اقترحت هذا التوزيع والدرايش نسوي الجزء السفلي شكل وجدامه حائط خصوصاً عندها حائط خارجي معزول 35 سم وهذا شيء سهل وممكن



  5. #1905
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    الجزء اليمين مقابل شرق أو غرب نسيت وتطل عليه الشمس وضروري نسوي دريشة هناك أو طوب زجاجي .. السكشن الجزئي اليمين يوضح كيف نقدر نسوي دريشة طولية تبين في الواجهة وخلف الجزء التحتي الثابت منها عازل حراري وبعدين جدار الطابوق 20 سم وفيه حتى نقدر نسوي تجويف للصابون والشامبو

    بعدين اشكالية الدرايش الطوال بتبين وقت تمديد بايبات المياه نحتاج جدار نمدد فيه

  6. #1906
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    القصد من كلامي الأخير هو دوم فيه بدائل معقولة ونقدر نمسك العصا من النص وأوقات ضروري نتنازل شوي عن شيء حابينه وحبيت انقل الصورة للجميع وباشوف فرصة لو أقدر انقل التصميم كامل

  7. #1907
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    صديق كان مسوي تصميم معقد .. خيالي شوي عليه والله يهنيه .. تصميمه كلف وايد ومن كم استشاري مع انترير وانقطع عني فترة حول 4 سنين

    تصميمه على سفح تل ومتدرج البيسمنت مفتوح على حوش نازل وبداية البيسمنت نزول للسيارات تدخل تحت البيت نص البيسمنت للسيارات والنص الباقي مسكون .. دخل في مشاكل مع الكهربة ومع التكييف ومع الحمل اللي معطينه وأكيد للاستشاري دخل كبير وبعد لقوانين الدولة .. للحين ما خلص وأمس كلمته وطلع مسوي مشروع جديد تجاري هالمرة أرسل لي بعض الصور والفيديوهات باستئذنه للنشر .. مشروعه مميز والله يوفقه مخسر عليه وايد وبيجي وقت ذكره يكفي إنه قطري ويستاهل الدعم والدعاية

  8. #1908
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    مقصر في هذا الموضوع ويمكن مقل من الشغل على التصميم وأشياء قليلة عندي ما اكتملت أو متبلورة بس تحتاج تنفيذ رسم

    آمر على تصميم بيتي تقريباً ما فيه شيء جديد من الأعضاء ودوم عندي تعديلات بسيطة وأحاول اخلي التصميم متكامل حتى ما يلخبط الاستشاري ويفهم شيء خطأ

    رجعت اشتغل على الواجهة الداخلية بما يتناسب مع التعديلات البسيطة اللي سويتها



    وهذي صورة جزئية للمدخل .. الباب مثل ما هو موضح بيكون في كسرة وفاتني اوضح باب غرفة الكهربة بدال القوس أو الدريشة المقوسة وبعدها باب المخزن الصغير والسقف هنا .. تركيزي مشتت شوي

    حوض السباحة أشوفه وايد مرتفع باسويه نص تحت الأرض يعني محفور له شوي ونص فوق .. والخط الأحمر المتقطع المفروض حدود الجدار اللي يستر المكان وفيه أبواب تنفتح وقت محد داخل بس أفكر في نوع بارتشن قابل للازالة كامل والتركيب وقت الحاجة للخصوصية


  9. #1909
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    الواجهة سويت فيها الدرايش اللي على جانبي السرير طوالية واصلة للأرضية حتى تعطي اطلالة كاملة على جهة الجنوب للشمس ولرؤية الحديقة .. بعدين مطلة على سكة خدمات وبعدها بيت اخوي

    الطبيلة اليسرى بتكون كافية لعشر سيارات خمس وخمس وراهم بس ممكن الغي مكان سيارة وأحوله لمخزن لعدة السيارات




  10. #1910
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    هذا توضيح مقرب لدرايش الغرف اللي في الواجهة ومكان السرير وجنبه الكوميدينات وفوق واجهته كسرة بسيطة ديكورية ( روشنة )




صفحة 191 من 296 الأولىالأولى ... 91141181189190191192193201241291 ... الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •