آمين والجميعالمشاركة الأصلية كتبت بواسطة sara jsm
الحمد لله أتوقع البنيان حلو للمتقاعد وعياله حوله يقدرون يساعدون
|
آمين والجميع
الحمد لله أتوقع البنيان حلو للمتقاعد وعياله حوله يقدرون يساعدون
رسمياً بديت معمعة التصميم وأرسلت المخططات لإستشاريين إثنين إتحاد قطر للتخطيط اليوم ومن فترة للمانع للتصميم وبمر على المانع يوم السبت وإن أسعفني الوقت مريت على اتحاد قطر للتخطيط
اليوم إجتمعت مع إيطال كونسلت وهو إستشاري تنفيذ البنية التحتية في منطقتنا وقابلت مديرهم في الموقع وهو رجال كبير ومهندس قديم من 1988 ونعم الرجل ما قصر شرح لي اللي صاير وهم ما بدوا للحين وممكن التعديل حسب احتياجي للبوابات قال سهل وفي يدنا بعدين الصرف الصحي استوى التباس لأن محددين نقاط الصرف في أماكن بناء محتاجها وقال تنفذت وانا متأكد إنها ما تنفذت وطلع كلامي صحيح بعد مراجعة المهندسين عنده .. التعديل ممكن بس يبغون أستغل الوقت وأجيب مقترح الإستشاري لرخصة البناء الأولية وبعدين الخدمات حتى ينفذون على أساسها .. جدامنا حول 3 شهور والوقت ضيق
بالنسبة للمواقف طلبت تكون عادية بدال طولية جنب الشارع وقال بنخاطب أشغال بطلبك ولازم توقع تعهد إنك ما تحتاج الرصيف قلت زين وبتفيدني المواقف أكثر جدام المجلس قصدي للي متابعين التصميم .. تخيلوا لو موقع مع استشاري خارجي شلون بيسوي هذي المطالبات حتى هم نصحوني باتحاد قطر للتخطيط لتجربتهم معاهم وواحد معاهم مصري نصحني بشركة السمسرة اللي تعرفونها قلت لا ابعدني عنها إنحرج مسكين شافني عارف الطبخة
اليوم لقائين مثمرين والحمد لله واحد مع استشاري البنية التحتية وتم عمل مقترح لتعديل البوابة + المواقف واستوت 10 مواقف وطلبت إضافة 5 عند مجلس الوالد وعدلوا الكتاب .. المشكلة بوابة الأرض الثانية ما أضافوها وبوابة البيت الثاني .. نقدر نقول نص إنجاز
طلعت رحت للإستشاري اللي حق بيتي وقعدت معاهم مهندس مدني ومهندس معماري ومهندسة معمارية .. النقاش كان وايد زين ويسجلون الملاحظات وقاعة إجتماعات مرتبة وصور التصامم كل صوب للملاعب .. هم على الأقل مساهمين في الإشراف والتصميم الإنشائي وممكن المعماري لبعض الملاعب ما سئلتهم عنها بس خذت كم صورة لها
عطيتهم رقم مدير المشروع للبنية التحتية ينسقون معاه وصور الملكيات وفايلات الأوتوكاد والحمد لله توقعت يسوون سوالف على إن التصميم غريب خصوصاً البيسمنت الخدمي المكشوف بدون تشطيب وبلاستر طلعوا متفهمين ومتفقين .. نشوف باقي التطورات والله يوفق زاد الحماس شوي بعد الضغوط هذي الغير متوقعة
ماشاءالله عليك بوعبدالله اتوقع حاط خبرتك كلها في هالبيت ..
تبيه يكون على اكمل وجه وان شاءالله يكون احسن من اللي تبيه ..
تُنسى ، كأنَّكَ لم تَكُنْ ..
صباح الخير إختي سارة
والله يا اختي أنقل تجربتي والملاحظات الصغيرة والمعاناة والروحة والجية حتى الكل يستفيد .. حتى في زياراتي الإستشاري الأول مجموعهم عرب وطيبين وكنت أقول المتطلبات لو صار جزء منها بيكون انجاز وأعذركم في الباقي بس لاحظت إنهم متفهمين ووعدوا بعمل كل شيء بس الموافقة تجيهم من أشغال لازم
الثاني كلهم لغتهم الإنجليزية وعاد شوفيني مشوار في الشمس سريع وتحويل لبرمجة المخ .. شوي أنسى بعض الكلمات بس مشت السالفة زين وأنجزنا بسرعة كمقابلة أولية وغالبية الموجودين حديثين لكن كبيرهم معروف وقتها كان يشرف بروحه على بيتي ألحين راس كبير في الإدارة وهذا شيء زين ونظام حلو عندهم
دعواتكم والله يوفق جميع من يبني ومن يسعى لتخليص تصميمه
إضطريت لهذا التعديل قبل الاتفاق مع الإستشاري اللي سعره كان صدمة لي ولا سعر بيت ولدي للحين والمشكلة بخيل علي في الخدمات ومحددها بأشياء بسيطة .. خايف أتورط مع استشاري ثاني علة يكون وبنفس الوقت خايف تكلفة التصميم واشراف سنة توصل مبلغ فلكي بالنسبة لتطبيق تصميم جاهز بس تخليص باقي التخصصات .. سعر تصميمي مع شوية خدمات بدون انترير وبدون اضاءة ديكورية وهذا شيء أبيه وبدون مناقصة وبدون اشراف 210000 ولا ذكروا أو تناسوا البيت الثاني اللي المفروض في نفس العقد .. لو هذا المبلغ للفلتين وشامل المناقصة والإضاءة ونظام البيت الذكي ونقول الاشراف عقد ثاني بس بعد معقول ما يزيد عن 5000 شهرياً بيكون زين .. غير باقول لهم باي باي وباشوف غيرهم
هذا البنتهاوس ممكن يعارضون التخطيط إنه واصل لمقدمة البيت قلت أعدله هشكل وأكسب غرفة ثالثة
المنور الأول تحت بيكون في بداية المكتب وسويت اكستنشن للمكتب بيكون مثل الغرفة الزجاجية قريب من اللي عندي حالياً بس شوي أكبر والمنور الوسطي بيكون ارتفاع مزدوج تحته يخدم البنتهاوس ويخدم الدور الأول والمنور الأخير معروف للحديقة الداخلية مثل ما كان في السابق
أضفت امتداد للحمام الفوقي يمين
هذا الدور الأول بعد بعض التعديلات البسيطة .. الطاولة اللي جنب المنور الصغير المزروع هذي ممكن تلف 90 درجة يكون الجالس مجابل التلفزيون وسويت غرفة التلفزيون بابها مقابل الدرج واللفت حتى أسوي مكان ارتب للكراسي
أخيراً التوزيع الأرضي مع المحيط الخارجي
التغييرات أهمها ألغيت النافورة في الدوار وسويت شلال يكون نازل من سقف المظلة من تحت ويكون ينزل على شكل خطوط رفيعة من بايب مخفي فوق في الجبس .. الشيء الثاني سويت حيز يخفي المكيفات جنب المجلس حق المجلس وغرفة الطعام .. المجلس الثاني مع مجلس حوض السباحة بيكون مكان وحدات التكييف فوق
الجلسة الغاطسة تحت بدال الدائرية غيرتها لمستطيلة مع مكان التلفزيون جدام على الجدار
بالنسبة للباب الزجاج فوق الجلسة الغاطسة التحتية بيكون ينفتح على أربع قطع وتتجمع كلها في الزاوية اليمين ونفس الوضع مع باب المطبخ المطل على الحديقة الداخلية وبيكون ممكن تنفتح هذي المناطق كلها على بعض .. مع إمكانية فتح البلكونات فوق أو إغلاقها ويبقى فوق مفصول عن تحت أو مفتوح على تحت وقت الحاجة وكتغيير
هالخريطة بيتك بروحك ولا مشبوك مع ولدك !؟
حاول تاخذ عرض سعر من شركات ثانيه ..
تُنسى ، كأنَّكَ لم تَكُنْ ..
لا هذا بروحي بس الارض مشبوكة مع ولدي الصغير لكن الكبير مفصولة ارضه بيننا وبينه شارع بس مسوي له ترتيب وابي يطبقون التصميمين .. ما عندي خيار ثاني ذيلا مجربين وأعرفهم وحتى لين 300000 للبيتين مع الاشراف والإنارة والنظام الذكي باوقع معاهم لازم مفاوضة وبشوف آخرتها
ولدي الصغير بيكون له البنتهاوس توه متخرج وبيدخل تدريب عسكري 9 شهور ومهددني زوجوني والا بانحرف .. أقدر أرتب له البنتهاوس في بيتي ذيه بس بيكون مؤقت لحدود سنتين لازم أبني للجميع
ضوابط المشاركة
رد مع اقتباس
