مراجعة التصاميم المعمارية وابداء الملاحظات عليها (محدث)

[معماري قطري]

يمين يبين المنور المحفور وبياخذ 60 سم من الحوش ونقدر نسويه بالعمق اللي نحب هنا خليته شوي تحت عتبة الدريشة السفلية والدريشة كبرتها 1.8 في 2.0 ارتفاع .. والمنور المحفور النازل مقابل الدريشة عرضه بعرض الدريشة وداخل 40 سم تكفي للنور والهواء وممكن نحط فيها اصيصات زهور أو نباتات متسلقة والفتحة مغطاة من فوق بشبك حديدي لمنع السقوط أو دخول الحيوانات .. جدام شوي جهة الرؤية بيكون باب المطبخ الخلفي المطل على الحديقة وزجاج يدخل نور جيد وهذي جهة الشرق .. نفس الجهة الشرقية عندنا 3 مناور ساقطة تنور مكان الصالة الرياضية وصالة الطعام ومنطقة الترفيه بالإضافة للمنور الوحيد الشمالي اللي مقابلنا موضح في الصورة

[معماري قطري]

مبدأ الفرنش درينيج بسيط بعد ما نحفر ونوصل مستوى تأسيس البيسمنت ويكون يابس وصلب نسوي شقوق طولية بعرض 30 سم نمدد فيها بايبات مخرمة من فوق ومن الجوانب وتكون ملفوفة بقماش خاص اسمه جيوتكستايل فابريك يسمح بدخول الماء ويمنع التراب والطين .. تلتقي هذي البايبات ببايب ثاني جاي من الجهة العرضية ونازل جنب الجدار حتى ينزل له أي ماي متسرب وملامس للجدار وحتى الماي ما يبقى ملامس للجدار نحط مكان الخط البنفسجي كنكري ملفوف بنفس القماش حتى ما يسد الفراغات اللي بينه التراب ويمسك الماء ويكون نزول الماء لتحت بفعل الجاذبية أسرع .. ينزل تحت ويدخل في فتحات البايبات الممددة وتنقل الماي لمنهول فيه مضخة غطاسة ترفعه لأعلى وتشتغل تماتيك وهذي مكانها في الليوان النازل اللي وضحته قبل .. وممكن هذا السيستم ما يشتغل كلش لعدم وجود ماي بس إحتياط مثل طفاية الحريق نشتريها ونتمنى ما نستعملها



أنصح كل واحد بيسوي بيسمنت يسوي هالنظام

[معماري قطري]

الحفر اللي بتكون تحت الأساسات هذي بعد ما نمدد البايبات فيها نحط حولها كنكري بعد حتى لو طلعت مياه جوفية ما توصل أسفل أرضية البيسمنت .. ممكن نسوي كل متر ونص بايب أو حسب خوفنا من المخاطرة لو زدنا أفضل

[معماري قطري]

صورة مقربة وجزئية لنعلة باب دورات المياه .. هنا بارتفاع 3 سم يسكر معاها الباب وفيه ربلة تخلي الباب معزول تماماً وممكن نخليها في كامل الفريم .. لمعرفة المقياس يبين فريم الزجاج الفاصل للشور وهو 7 سم وممكن ناخذ أصغر وممكن بدون فريم الخيارات كثيرة وسهلة ومتوفرة



كذلك ممكن الباب يو بي في سي بنعلته الالمنيوم والإطار اللي كله ربلات

[معماري قطري]

السكشن كامل ناقص بس سور سقف البنتهاوس .. درايش غرفة البنتهاوس اليسرى بتكون غربية مطلة على السكة يسار أفضل مما تكون مطلة على الجار وشمال نفس الشيء دريشة الغرفة اليمنى ممكن نلغيها أو نسويها باشتراطات البلدية بلوفر .. وعدلت على التوزيع الأرضي حطيت دريشة جنب السرير باوضحها في صورة بعد هذي

[معماري قطري]

هذا توزيع الغرفتين فوق اليسرى مقترح ممكن تكون مخزن في البداية وتحويلها سهل لأي استخدام .. عندنا ست غرف نوم لو اعتبرناها غرفة مب ستور وبتكون جيدة لبيت متوسط كبير لأن الحاجة للغرف مع كبر العيال بتكون ضرورية في المستقبل وست غرف نوم ولا شيء لعائلة متوسطة



الدرايش أكيد اللي جنب السرير حلاتها مستمرة للأرضية وتكون طولية وبدون أثاث جدامها

[معماري قطري]

فيه ملاحظة مهمة حاب أوضحها واللي هي مب مهمة كثير المساحة المتاحة لنا كثر ما هو مهم ترتيبها .. هنا ممكن نزيد عرض دورات المياه بسهولة لمترين أو متر و80 سم بس حبيت أوضح كفاية ال 1.6 متر كعرض لو رتبنا الحمام صح .. وهذا خذته من تصميم بيت ولدي وهناك مضطر لهذا المقاس ومكفي لأن عرض الغرف 3.4 وهي غرف ثانوية ولا بشرط إن كل الغرف تكون مبحبحة .. بيت ولدي من دورين وبنتهاوس بدون بيسمنت ومساحته شوي فوق الألف حول 1050 متر مربع بكامل البنيان من ملحق ومجلس وغرفة سايق .. كثرنا الغرف وصلوا 10 بعدين الغينا غرفة ضميناها لغرفة الملابس الرئيسية استوت الغرفة كبيرة .. وألغيت غرفة تحت تحولت لمكتب وقللت غرف البنتهاوس من 4 لثلاث استوى المجموع 7 غرف ومكتب قابل للتحول لغرفة .. بس بعد التصميم راعيت فيه امكانية عمل توسعة مستقلة لبيت كامل في الحوش كبنيان مستقبلي لو دعت الحاجة .. القصد لازم نفكر في التوسعة وباعرض التصميم بإذن الله هنا وهو تصميم مطور من تصميم سابق اشتغلت عليه مقارب لتصميم بيت اخوي وبيوت كثيرة مثله

[معماري قطري]

صورة مقربة للحمامين الصغار في البنتهاوس وعدلت لباس البنت الجالسة الجوتي أحمر والقبعة خضراء .. ما حصلت آيكون مناسب غير المهم توضح الجلسة والكرسي هذا

[معماري قطري]

شغال على تعديلات أخيرة لبيتي للموافقات .. نزلت المجلس شوي بس المنور الزجاجي بيكون مخالف للإرتفاع المحدود ب 6.5 متر بيطلع 7.3 وإن شاء الله يتوافق عليه .. الزوايا المرتفعة هذي حدها 6.5 بالضبط .. البيت المنور الهرمي البارز فوق حده 16 متر ممكن بعد يعارضون عنه بس عندنا في المنطقة مجلس 16 متر ارتفاعه .. هذا المنور الهرمي بيكون فوق الصالة اللي للدور الأول وبنفس الوقت فيه درايش مفتوحة عليه من البنتهاوس يعني بيكون من داخل البيت من أرضية الدور الأول مرتفع بزود إرتفاع يزيد عن 10 متر .. هذا غير عن المنور الثاني الجانبي اللي فوق الحديقة الداخلية ذاك بيكون بارتفاع حول 6 أمتار من أرضية الدور الأول ممكن أكثر أذكر من الدور الأرضي 14 متر

[معماري قطري]

قللت الزوايا القمريات خليتها بس في بعض الأماكن مثل المداخل وهنا البروز لمكان منور ودريشة دورة المياه سويتها .. الدريشة بتكون داخل ومايلة ملتقية مع طرف جسر السقف يعني هذي الزاوية بتكون تبين من داخل ومن برا والبروز حول الدريشة بيكون حماية وشكل



البرواز حول تجويف الدريشة بيكون 5 سم قطع داخل خالي بلون أبيض فاتح أكثر من لون البيت والقطع الزوايا والقطعة الوسطى يسمونها كي ستون وبالعربية أكيد لها مصطلح يختلف هذي بتكون كلها مع القمريات جي آر سي بلون معين مخلوط في خلطة الجي آر سي .. ومفكر في إن تكون الدريشة فريمها 10 سم داخل وجدامه بشوي أما أسوي سترب لايت أو النور اللي يسطع على الحواف بدون ما يبين مصدره

ملغي فكرة الشتر بسبب خرابه من الغبار