مراجعة التصاميم المعمارية وابداء الملاحظات عليها (محدث)

[معماري قطري]

أقترح ان غرف الملابس ما يكون لها باب أصلا
نفس نظام الفنادق والكبتات تكون بباب جرار
من خشب او زجاج كامل نفس نظام الخزائن الأوروبية
بيكون فيه نوع من الانشراح والوسع

هذا نظام وذاك نظام يا اخوي .. الميزة تكون عندك غرفة تخزين وفيها رف يغطي تعليق الملابس المفتوح وتقدر تحط كراتين أو صناديق أو شناط فوق .. تقدر تسوي واجهة أَرفف مربعات اللي يسمونها بيوت الحمام ( pegion holes ) وهذي تتوزع فيها الأَغراض بسهولة وتوصلها بسهولة وتشوفها بسهولة لأَنها مفتوحة ومنارة جيداً يفترض .. خصوصيتها أكثر ومحمية بباب خاص ينقفل وتبقى الغرفة فاضية للخدم ينظفونها براحتهم وراحتك .. التخزين يكون على الجهتين .. وأَي نجار بسيط ممكن يسوي لك القواطع وفي بعض الغرف تستخدم سلال معدنية ولا يستخدم الخشب .. ممكن تسويها برخيص وجزء من سعر خزائن الحائط .. اللي عنده مساحة مثل الغرفة الرئيسية في النتهاوس في وسطها طاولة كبيرة بأدراج ممكن ينحط فوقها أَي شيء ويكون جزء بسيط للجلوس ولبس الأحذية مثلاً للي ركبهم تعبانة مثلي.

[معماري قطري]

استشارة أخوي المعماري وباقي الأعضاء :
أغلب الفلل عندنا تقريبا نفس هالنظام صالة وسطية
وحولها الغرف إيش رايكم في مقترح
ان الدور الاول يكون بنظام سويتات ( أجنحة ) جناحين او ثلاث وبينهم ممر او موزع
مثلا جناح لصاحب الفلة والثاني للبنات والثالث للأولاد
وفي المستقبل ممكن حد من العيال اللي بيتزوج ياخذ له جناح ويكون فيه نوع من الخصوصية نوعا ما
الجناح عبارة عن غرفتين بحماماتهم وبار صغير

(يزيد او ينقص حسب المساحات )

فيه فلل تختلف مثلاً بيت بو جمال اذا تذكره صالته في زاوية وقرب المدخل وشكله مستطيل يناسب كل الأراضي .. وراجعته معاه في بداية التصميم وكانت التعديلات بسيطة جداً وهو ما شاء الله عليه فاهم شيسوي والله يوفقه له فترة ما يبين.

فيه تصاميم كثيرة تختلف وأوقات تحصل الدارج اللي يناسب مساحات معينة وشروط تخطيطية معينة .. اتجهوا غصب مكاتبنا الاستشارية للنسخ وعدم الابتكار .. وصدقني مكاتب كثيرة ما فيها الا مهندس واحد والباقي رسامين ويسمون الرسام مهندس .. لا والطامة الكبرى تحصل المهندس دكتور أوقات بس عمره ما مارس التصميم المعماري .. تحصله دكتور مهندس كهرباء أو مدني وما مارس الانشاءات وتحصل المصمم الانشائي رسام يبالغ في الخرسانات وكلما زاد كلما كان أحسن حسب وجهة نظره ونظر من يدير شغله .. وهو يسوي تصميم ثقيل وايد ومكلف وايد .. ثقيل لدرجة ما يقدر يشيل نفسه وتبين عليه آثار الشيخوخة سريعاً.

واللي يتكلمون عن تنمية مستدامة يعرفون عدل ان غالبية مبانينا حدها 10 سنين وتحتاج صيانة مكلفة وتكون مشاكلها كثيرة .. مباني اوروبا تعيش مئات السنين وبعضها وصل 500 سنة ويفتخرون به .. والكثيرون يقولون جوهم يختلف .. اللي يقول هالكلام يبني مبنى من مبانينا وحسب مواصفات بلادنا هناك ويشوف شكثر يبقى .. حتى مستحيل يتوافق عليه .. كثير يعرفون قصة حي شيلسي في لندن وكيف تعبت الديار وهي تحاول تصمم حسب معاييرهم ولا ادري شصار كأَنهم ييئسوا من المشروع.

[معماري قطري]

أقترح ان غرف الملابس ما يكون لها باب أصلا
نفس نظام الفنادق والكبتات تكون بباب جرار
من خشب او زجاج كامل نفس نظام الخزائن الأوروبية
بيكون فيه نوع من الانشراح والوسع

فهمت وجهة نظرك .. ممكن مثل الرسمة الأَخيرة نلغي الباب ونخلي فتحة ونسوي كبتات كاملة نظام الخزائن الاوروبية أو الأمريكية بباب جرار 2.2 متر كافية لهذا النوع و1.8 متر هي عرض مناسب للنظام المفتوح .. بس الكبتات هذي حلاتها في نظام مفتوح وممكن ندمجها مع تصميم الغرفة الداخلي .. غرفة الملابس المفتوحة مثل ما ذكرت أَرخص وايد واستخدامها سهل وخصوصية .. وتتفرغ لترتيب حيز سرير النوم ترتيب خاص بك وتصغر الغرفة شوي تكون أَبرد ومريحة وهادية للنوم .. وبخصوص الهدوء .. بنشوف ان شاء الله نماذج نسوي فيها غرفة الملابس في مدخل الغرفة .. أو هو نموذج موجود تقدر تشوفه فوق وتقدر تسوي باب ثاني للغرفة ولو سكرت البابين تضمن هدوء أَكثر

[معماري قطري]

تواصل معاي صاحب التصميم بخصوص ما هي النقاط المهمة .. ومثل ما شرحت قبل كلها اقتراحات ووجهات نظر .. انا تركيزي على الممكن والأَفضل لو حبينا التصميم .. بالنسبة للتكلفة مستحيل حد يحددها الا بعد مناقصة مفصلة صح وبنحصل فرق في الأَسعار كبير جداً .. حتى أَحياناً نحصل مقاول مختص وقوي يسعر تسعير جيد ومناسب ونص أو ربع مقاول يسعر ضعف السعر المتوقع .. وهذا من واقع تجارب كثيرة مريت بها آخرها من أَيام بسيطة لمساحة في حدود 1800 متر مربع وبسعر 5.1 مليون الى 2.7 أو 2.3 نسيت الصراحة والسعرين تسليم مفتاح وسعر ثالث حول 4 مليون .. وأَقل سعر لشركة قوية والسعر 4 مليون لقوية ومجربة كذلك .. وال 5.1 لشركة حديثة.

بالنسبة للتسعير ممكن نشوف حتى 10 شركات أَو أَكثر والمناقصة هي أَهم شيء وتكون عن طريق استشاري وبشروط واضحة للكل حتى نقدر نحلل ونفرق بينهم.

بالنسبة لموضوعنا لو حاول المالك يسوي حوض سباحة صغير ويستغلة فيما بعد ليكون بين التوسعة الحديثة والبنيان القديم ممكن وهذا مقترح لذلك.



وهذي المنطقة بعد إِزالة الجلسة الخارجية والبناء .. ممكن حتى الحوض يكون كمجرى مائي ومنظر وممكن يبقى كما هو ويتغطى من فوق كلش بسقف زجاجي .. والمسافة بين البيت والملحق زدتها ل 3.2 متر .. وحتى ممكن نسوي ممر مغلق من فوق من الدور الأَرضي للدور الأَرضي في الملحق.



ومبارك عليكم الشهر الكريم

[معماري قطري]

نسيت اذكر لأن مب واضح مقاس الحوض .. مقاسه 2 في 8 وعمقه 1.4 ويكون صافي في حدود 1.25

[معماري قطري]

شيصير لو ما تمت الموافقة على الحديقة النازلة في الخلف وعلى الملحق المستقبلي من التخطيط .. ممكن يقولون المساحة أَكثر من المسموحة وممكن يحطون أسباب لعدم الموافقة على الحديقة النازلة .. مع العلم إِن البعض سووها وتقريباً نفس الطريقة بس تعب مع التخطيط صاحب المخطط .. وما شاء الله عليه وهو طيار لكن ملم بأَساسيات التفاوض .. بعد راجعت معاه بس بيته وايد مبالغ في مساحاته وتصميمه ويعتبر قصر الله يهنيه ويوفقه في بنيانه .. هو من الكثيرين اللي ما يحبون يعرضون مخططاتهم وله أَسبابه واحترمها بس حبيت اذكر ان المخطط ممكن وموجود قريب منه .. هو يمكن ميزة أرضه منحدرة فرق في ارتفاعها حول 3 متر .. دور كامل يعني.

بالنسبة للمجلس مؤكد بيسوون تعقيدات واحتمال ارتداد واحتمال يسمحون بليوان من جدام .. ولو حصل التخطيط الموافقات المبدئية بدون تعقيدات بيكون توفيق من الله ما بعده توفيق.

[معماري قطري]

طلعت لنا فكرة .. نقل الخدمات اللي هي غرفة الخدم والمطبخ الخارجي والستور للبيسمنت وترك المساحة الخارجية لتوسعة مستقبلية لملحق سكني ومقترحها صاحب التصميم.

الفكرة ممكنة والمساحات متقاربة .. مساحة الملحق حول 100 متر مربع ومساحة البيسمنت 120 شاملة بيت الدرج وتحتاج تعديل شوي لتوزيع 3 مساحات رئيسية هي المطبخ ( اللي بيكون صعب الحصول على موافقة عليه من الدفاع المدني ) وغرفة الخادمات والستور .. وفي هذي الحالة رايي نرجع للتصميم التقليدي في البيسمنت مع تنزيل الحديقة شوي .. يعني ما تكون واجهة البيسمنت مفتوحة على الحديقة بالكامل مثل السابق .. وبيتم الغاء حوض السباحة وتصميم مكانه ملحق سكن مستقبلي يغطي مساحته ومساحة ملحق المطبخ الخارجي .. وتوقعي بتكون فيه تحديدات معينة للمساحة المبنية على الأَرض من التخطيط.

للحين ما ادري شوضع المجلس الخارجي .. مع إِني لو مكان المالك كنت صممته مثل ما هو في مكانه وخذت عليه الرخصة وجهزت لبنائه في المستقبل لو اني مب في حاجته حالياً.

إِن شاء الله احصل وقت للتركيز في هذا المقترح الجديد .. مستغرب ليش الدفاع المدني يمنع المطبخ في البيسمنت وكأَن قطر الدولة الوحيدة اللي تسوي مطبخ في البيسمنت في العالم.

[معماري قطري]

تمت مناقشة تطوير توزيع دورة مياه في السابق في موضوع آخر على صفحتين لمن يرغب في القراءَة وفي متابعة فلسفة التصميم وحتى مناقشة الحيثيات.

http://www.qatarshares.com/vb/showth...ميماتها/page55

[سعود.]

طلعت لنا فكرة .. نقل الخدمات اللي هي غرفة الخدم والمطبخ الخارجي والستور للبيسمنت وترك المساحة الخارجية لتوسعة مستقبلية لملحق سكني ومقترحها صاحب التصميم.

الفكرة ممكنة والمساحات متقاربة .. مساحة الملحق حول 100 متر مربع ومساحة البيسمنت 120 شاملة بيت الدرج وتحتاج تعديل شوي لتوزيع 3 مساحات رئيسية هي المطبخ ( اللي بيكون صعب الحصول على موافقة عليه من الدفاع المدني ) وغرفة الخادمات والستور .. وفي هذي الحالة رايي نرجع للتصميم التقليدي في البيسمنت مع تنزيل الحديقة شوي .. يعني ما تكون واجهة البيسمنت مفتوحة على الحديقة بالكامل مثل السابق .. وبيتم الغاء حوض السباحة وتصميم مكانه ملحق سكن مستقبلي يغطي مساحته ومساحة ملحق المطبخ الخارجي .. وتوقعي بتكون فيه تحديدات معينة للمساحة المبنية على الأَرض من التخطيط.

للحين ما ادري شوضع المجلس الخارجي .. مع إِني لو مكان المالك كنت صممته مثل ما هو في مكانه وخذت عليه الرخصة وجهزت لبنائه في المستقبل لو اني مب في حاجته حالياً.

إِن شاء الله احصل وقت للتركيز في هذا المقترح الجديد .. مستغرب ليش الدفاع المدني يمنع المطبخ في البيسمنت وكأَن قطر الدولة الوحيدة اللي تسوي مطبخ في البيسمنت في العالم.

اخوي معماري

انا حاط في البيسمنت ( جميع الملاحق ) ونفس الشي المطبخ بلغوني انه ممنوع . في السكتش الي تحت يبين لك الملاحق ولكن في الخرايط الرسمية يبين لك انه صاله وغرفة الخادمات بين انها صاله رياضية واتفقت مع المقاول بعد اتمام البناء اسوي تشطيبات الي ابيها وانا ماسويت كذا الا لستفيد من مساحة الارض . وعندي جميع شروط السلامة في البيسمنت ...
ملف مرفق 93579

[سعود.]

ناقشت موضوع المطبخ مع بعض الشباب الي سبقوني في البنيان وكلهم حذروني من سالفة رائحه الطبخ ....

وانا مسوي مدخنه خارجيه وبركب المروحة الي تجي فوق الباب الي كنها مكيف سبيلت نفس الي في المجمعات التجاريه تجنبآ لرائحه الطبخ . في الكويت يعرفون صح كيف يستفيدون من مساحة الارض وحنا ( الله يعين بس )

وسلامتكم