مراجعة التصاميم المعمارية وابداء الملاحظات عليها (محدث)

[sweet qatar]

متابع للموضوع

95% من ملاحظات sweet qatar مؤيد لها وبقوة .

بخصوص العمدان الي بالمنتصف اذا نقدر نستغني عنها بعمل سقف هوردي او فلات سلاب !!!!

اما فاصل من كل طرف ضدة لان ميزة هذا التصميم الامتداد البصري لدور الاول مفتوح .

في الغالب ماحب اتدخل في التصاميم لانة كل تصميم له وجهة نظر مختلفه .

وشكرآ

شكرآ علي التأييد أستاذ

مثل ما ذكرت قبل المساحات المفتوحة تكون اصعب عند التأثيث وما تكون عملية اذا البيت يستقبل ضيوف بشكل مستمر

من جهة ثانية فكرة الفواصل تخيلتها مع الاضاءات مثل اجواء السبا
هي ما تحجب الرؤية بقدر ما تزيد المكان فخامة و تعزز الستايل
و على الموضة مثل ما شفنا في معرض ميزون اوبجيه


اختلاف الاذواق شي طبيعي ، لو بفكر في اذواق الناس ما بقول رايي

ما قصرتي بنقاشج وملاحظاتج القيمة وغالبيتها فكرت فيها

حاولت قد ما اقدر تعديل الممكن بقواطع بسيطة

لاحظت حسب الرسم اللي يوضح خطوط الجسور الساقطة ان العمود الدائري في المدخل مب حامل للجسر ويمكن يحتاج تحريك قليل

طبعا ما حركت اي عمود عدلت اقل ما يمكن الا الملحق غيرت مكان الأعمدة الوسطية

ناقشت فلسفة التعديل ولو فيه مصمم انترير لازم يقرا الموضوع بتركيز ويقرر على اساسه مع المالك

شكرا استاذ علي تشجيعك الدايم

بس ترى العامود حلو لو تمت تكسيته بالشكل المناسب يزيد المدخل فخامة

[معماري قطري]

ما شاء الله ما انتبهت للمشاركات

رد على اختي سويت قطر بخصوص غرفة التبديل والشاور انا حطيتهم في التغيير الأخير للدور الأرضي .. سكرت الفتحة اللي تودي على المغاسل وسويت كرسي للجللوس للتبديل وفوقه بارتفاع مناسب تكون الصناديق أو ببساطة تعليق للملابس

إستوى حمام المجلس قرب غرفة الضيوف هو الخاص بالمجلس وقريب من غرفة الطعام والصالة اللي بتكون مفتوحة للبوفيه وحمام اللوكرز يعتبر بعد ثانوي



هذي يمكن أوضح ومركزة على المنطقة



يمكن مراجعة الرسومات من التلفون أو اللابتوب مب واضحة تاخذها على فلاش ميموري وتروح مكتبة تطبعها على حجم كبير أفضل وتدرسها صح .. مع إن شرحي واضح إن شاء الله

[معماري قطري]

بالنسبة للسقف وارتفاعه متوقع التصميم الإنشائي يكون مزعج ويسوون جسور ساقطة والا بيطلع حلو لو كلها تتسكر بطبقة جبس وينعمل تصميم مبتكر للجبس يحط في اعتباره الجلسات ويخفي الأبيام بطريقة حلوة

الإرتفاع محدودين بحدود الدرج وما نقدر نزيد وايد نحسب العتبات ونضربها في ارتفاع كل عتبة .. وأكثر من 15 سم المفروض ما نسوي 14 أو 13 ارتفاع حلو لكل عتبة

درج الخدمات ما اتوقع البلدية يرفضون يكون واصل لتحت لو المالك كلمهم ووضح وجهة نظره .. والخطر الكبير على الأطفال هو حوض السباحة حتى عقولهم تصور لهم إن ممكن القفز من الفتحة لين الحوض

خطر الحريق لا قدر الله لازم تكون فيه انذارات في كل الغرف ومشبوكة مع بعض لتحذير النايمين .. والا مهما كثرت المخارج أغلب الوفيات تصير والناس نايمين وغافلين .. المشكلة الثانية الحمايات على النوافذ تمنع الخروج مثل ما تمنع الدخول

المخارج ما فيها شيء وحلوة وتؤدي غرض مهم .. بالنسبة لمجلس الحريم بما إنه عائلي أكثر ووراه الحوش بمسافة 3 متر والزراعة طبيعي تكون قرب السور مثل ما وضحت نقدر نسوي تظليل خشبي وباب قزاز كبير لفتح المجلس أكثر ناحية الخارج مثل البلكونة

[معماري قطري]

بالنسبة لدكتات تغطية البايبات ذكرتها وهذا تفصيل للكل سواء بايبات مطر أو صرف صحي ما تحتاج تعقيد زايد .. أما نسويها في تجويف الحائط لو عندنا الحائط عريض ومعزول في الجهة الخارجية أو نسوي دكت بالطابوق ما تزيد عن 20 سم ومغطاة بمارين بلايوود عليه شبك وبلاستر ويبين نفس الحائط مع ترك فتحات التسليك تبين وهي صغيرة بقطر 10 سم تنفتح وينعمل التسليك لو احتدينا عليه .. بايبات التغذية تكون 2 لكل حمام أو 3 لو عندنا تدوير للماء الحار أو 4 لو التدوير للحار والبارد وعرض 60 سم كافي لكل هذي البايبات مثل التوضيح اليسار

اليمين اختيار الاستشاري والتغطية بالجي ار سي المشكلة ما تكون متجانسة ومنظرها مب أحلى من سطح متجانس من نفس المادة وبروزه قليل وبعدين لو فيه خراب أو شيء بنكسر الجي ار سي

طبعاً في الحالتين تنعمل الدكت بالطابوق وتكون مشبوكة مع الحائط أثناء بنيانه

[معماري قطري]

ما ننسى اليمين شوي عميقة وفتحة الوسط مضيقة بالطابوق واليسار تفصيل أفضل بكثير للصيانة .. كل ما على عامل الصيانة يكسر شوي البلاستر ويزيل البلايوود ويشتغل ويرجع يسوي جديد برخيص وبسهولة

[سعود.]

اخوي بوعبدالله

اسمع دوم عن بيب الماء الثالث ( الراجع ) لسخان الماء المركزي تشوفة ضروي ؟؟

[معماري قطري]

اخوي بوعبدالله

اسمع دوم عن بيب الماء الثالث ( الراجع ) لسخان الماء المركزي تشوفة ضروي ؟؟

هو حتى ما تنتظر الماي يجيك بس المشكلة مكاين التدوير تحترق بسرعة ولا تنتبه لها ولازم العزل للبايبات حتى يبقى الماء حار

على طريقة الدكت اللي شرحتها لو نضيف فتحات صغيرة تحت وفتحات فوق لدخول الهواء البارد من تحت وخروج الهواء المحتكر والحار من فوق بنكون خففنا الضغط الحراري على البايبات .. واحتمال نحتاج سيركيوليشن حق البارد والحار

ضروري تشوف مضختين نوعية جيدة أو أربع مضخات لو للبارد والحار تشتغل كل وحدة فترة بالتناوب لكل خط .. لو تنضبط ساعتين أفضل أتوقع

[سعود.]

هو حتى ما تنتظر الماي يجيك بس المشكلة مكاين التدوير تحترق بسرعة ولا تنتبه لها ولازم العزل للبايبات حتى يبقى الماء حار

على طريقة الدكت اللي شرحتها لو نضيف فتحات صغيرة تحت وفتحات فوق لدخول الهواء البارد من تحت وخروج الهواء المحتكر والحار من فوق بنكون خففنا الضغط الحراري على البايبات .. واحتمال نحتاج سيركيوليشن حق البارد والحار

ضروري تشوف مضختين نوعية جيدة أو أربع مضخات لو للبارد والحار تشتغل كل وحدة فترة بالتناوب لكل خط .. لو تنضبط ساعتين أفضل أتوقع

اشكرك مع اني شطحت عن موضوعك .

انا ناوي اخذ سيستم تدمر بدون المبرد حقهم ( اكوتشيل ) عندي من سنين مركبة خرباته كثيرة .

من 3 شهور تقريبآ ركبت عازل لبيبات الماي الممدودة على السطح عازل نفس الي يتركب على بيبات الغاز حق المكيفات الاسبلت وماكان فيه فرق واضح . عقبها ركبت المروحة الي تركب مكان غطاء الخزان العلوي وصار الماى مضبوط يعني اساعه 2 اظهر تسبح وانت مستمتع . والبزران مايشتكون من شي
وناوي في البيت الجديد اركب عازل نفس الي بصورة ادناه .

الاسود هو الي مركبه حاليا والفضي هو الي ناوي عليه مستقبلا

[معماري قطري]

الله يوفقك إخوي سعود بالعكس الموضوع للمراجعة ولترتيب التصميم وكل ما يتعلق به

العازل الفضي أكيد أحسن وداخل الدكت بينفع أكثر وحلك جيد بالمروحة

كم يكلف العازل ؟ دوم اللي عنده معلومات محدثة ليبخل علينا وفي ميزان حسناتكم إن شاء الله

[معماري قطري]

بالنسبة لعدد العتبات للدرجين 27 عتبة ولو سويناها بإرتفاع 13 سم بنحصل صافي ارتفاع 3.51 متر ولو خليناها 14 سم بنحصل 3.78 متر وهو مناسب جداً ومريح ال 15 سم بيطلع متعب

تكلمت عن الجسور الداخلية والجبس وعن العمود الدائري اليسار وكيف متحرك عن الجسر فوقه وهذا رسم توضيحي للجسور بالأحمر المتقطع ونقدر نحرك العمود الدائري ليكون تحت الجسر مباشرة مثل اليمين ونحركة شوي جهة حوض السباحة حتى يكون في زاوية الجسر

الجسر لو بقى مكشوف ونازل شوي شكله بيكون محدد المساحة اللي تحته بدون ما يعيق الفضاء المفتوح وممكن تجي زوايا جبس زينة في التقاء العمود بالجسر .. الفتحة لغرفة غسيل اليد يستحسن تكون مقابلة المغسلة الوسطى والعمود قربها يتحرك شوي يجي حامل للجسر

المدخل ما دام مركزين على الفضاء المفتوح والاتجاه البصري لو نسويه سيدة وزجاج بيطلع وايد أحلى ومرتب ونقدر نضيف رامب بسلوب حول 20% شوي مزعج بس ينفع وما يتعارض مع الحوش