أرحل وأقيم
مثل مافي جوف الصحرا ماء في قاع البحر رمل
ومثل مافي الصحراء واحات في البحر جزر
ومثل مافي الصحراء سراب في البحر تراب
ومثل ما للبحر زبد للصحرا ساف
ومثل ما الجمل سفينة الصحراء الشجر سفينة الماء
ومثل مافي الصحرا وديان في البحر هير (شبيه الوادي في قاع البحر يتكاثر فيه الؤلؤ يسمى هير)
مثل مافي البحر موج في الصحرا اسوام (الشكل الموجي لرمال الصحرا يسمى اسوام)
امواج تشبه امواج
وما بين مد وجزر في بر أو بحر
ابقى اسير الجمال البديع والحيويه
شعاع ضي الشمس في النهار يتكسر وسنا نور القمر في الليل
وما بين مد وجزر في بر أو بحر
ابقى اسير الجمال البديع والحيويه
لأن السكون نذير دمار
ولا بعده إلا إعصار
ما بين مد وجزر او سقي وثبر في بر أو بحر
على تراثي القديم
وهدي النجوم وعلوم الرجال
ارحل واقيم
وأربط القلب وأهيم
وعقب ما أنسى أتذكر
اني ابن التويم
صاحب هذا القعود المنوخ أو صاحب ذاك السنبوق المبندر
أتذكر .. اشوف ركابي واشوف مركبي وتقر العين واتذكر اني على سفر وأني اذا اصليت اقصر
وانتظر ساعة الصفر يالله الصبر
ما احتاج اتذكر كثير لازم انسى كل اللي طاف
ما احتاج غير تذكرة وحدة بس ..
.. تذكرة وحدة بس وجواز سفر
زهدت في موصلات الاول مع ان لها قدر
وبركب طايرة المها السرعة لمحة بصر
الدرجة بزنز ومضيفة تقهويك وبدون سبب تقول سوري كل شوي وتعتذر
بكره بعبر gate b2 على الخرطوم للطايره ما اركب باص ولا انتظر
الوعد بكره في مطار حمد ثاني العيد يوم السبت الساعه خمس العصر