خوسيه واصدقاءه في سينما فيلاجيو..!!

[يمامـة]

انا بعد مستغرب من اليهال اللي يروحون السينما

تصدقين خالتي انا مادخلت السينما في حياتي الا مرتين فقط

الله يحفظ لج خوسيه واخوانه

ويحفظ لك الشيخ غانم واخوانه الكبار..

وانا دخلت مرة وحدة وحضرت فيلم آشا في الهند وللحين اتذكرها لم تغني
شيشا هي يا دلهي ( دلهي قلبها مب دلهي المدينة)

[يمامـة]

السلام عليكم ورحمة الله وبركاته،

أهلي ربوني على هالقانون ونفسه أطبقه الحين، وهو عدم خروج الأبناء بدون رفقة أحد الوالدين، نقطة آخر السطر.

القانون ماله استثناءات ويتم تطبيقه على الجميع، البنات والأولاد، والولد لين كبر هو مسؤول عن نفسه، والبنت تبقى مسؤولية أهلها إلى أن تتزوج.

وما في طلعات للسينما او الحفلات الغنائية، وطلعات في الليل بشكل عام ما في الا للضرورة.

نموذج نتمنى ان يكون نصيب لابناءنا فيه عند تربية عيالهم بعدما فاتنا القطار وعيالنا كبروا..
فاللي يتبع مثل هذا الاسلوب راح يجني الكثير من المشاكل و التوترات في التربية..

فتحية كبيرة لهذا الاسلوب ولج ولاسرتج يا لبيبة..

[يمامـة]

مشكلة المراهقين هي حرصهم على الذهاب لأصدقائهم أو مع أصدقائهم بأنفسهم...

أختي الفاضلة اليمامة هناك أشياء مرفوضة للمراهقين الكبار وبالتالي مرفوضة قطعا للمراهقين

الصغار ودائما مايحاجج الصغار ويدافع عن المراهقين الكبار ليس رأفة بهم وإنما حرصا على

أنفسهم عند وصولهم لسنهم ....

مثل الذهاب للمجمعات و السينما و غيرها من الأمور ...

شـــكرا لكِ يَ اليمامة على الموضوع الذي يحتاج لجهاد وحكمة ....

العفو يا حنين.. هذي مشكلة بالفعل .. وخاصة لما الطفل من الاساس من ينرد له طلب
او يقدر يفرض رايه وطلبه.. والنتيجة وجود كل هالمراهقين بتجمعات متفرقة في المولات..

[يمامـة]

يمامة سلفيني خوسيه واروح معاه السينما هالي اسمع عنها ولا عمري دشيتها مدري شنو فيها وزهبي لنا الله لا يهينج ناتشوز و نفيش و بفك قطر

من الحوار تحليلي ذي اول مره لصديقي خوسيه يطلب من امه ابلة نظيره يروح سينما من جذي اشتغلتي على هالفقيروه تحقيق ولمبه صفرا رايحه جايه فوق راسه المسيكين

وواضح ان الولد فاهم امه عدل (طالع ذكي عليها) فاختلق سالفه ان الابو معاهم عشان ترضين <الولد دارسج عدل هاهاها

لما شاف حكرتي له قام قال لا الابو هون وهو هون وفضل يحوس في البيت منيه مناك واعليه

ليش شريره هاه
هو صح غلط الولد يروح لحاله مع عيال قده بس ماتخافين من انعكاس منعج له ع شخصيته ؟؟ ترا حلو الولد يكون له ربع يجتمع معاهم يطلع معاهم هالشي يبني شخصيته الاجتماعيه والاستقلاليه
لكن مافكرتي بحل اخر لتعويضه؟

مثلا اقترحتي عليه يعزمهم بالبيت وتختارين لهم فيلم ومنها تعرفين منو ربعه؟
احنا الحين بعصر دجتال وكل هالاولاد الي نشوفهم صغار تلقين من ورانا عندهم شبكة تواصل بهالبرامج سوالف والخ
نمنعهم من خوفنا عليهم لكن هل بعد نراقب وراهم شيسوون في النت ولا من يكلمون ويرافجون بالعالم الافتراضي الي يصعب التحكم فيه؟؟

الا خوسيه ما اقدر اسلفه.. بعدين هو ما يحب يطلع مع بنات

اقول لج شي وتصدقيني؟

ما عمري خفت على انعكاس اي قرار منع او شدة اتبعتها مع عيالي على شخصيتهم..
مؤمنة ان الطفل اللي يتربى على قوانين معينة غصب عنه بيحترم القوانين هذي..
والطفل اللي نربيه على استسهال كسر القوانين في البيت. هذا هو اللي بيأثر على شخصيتج ويشكلها..

للأمانة ما فكرت بفكرة اني اعوضه.. لأن خوسيه اصلا بشكل عام طفل علاقاته باقرانه في المدرسة محدوودة جدا
يعني اليوم ولييتي وسألتيه من هم ربعك في الصف؟ ما عنده طالب بذاته يقول هذا صديقي..

فمن جذيه فكرة انه يطلع السينما معاهم ما كانت الا مجاراة للضجة اللي مسوينها مع نهاية الاختبارات في الصف..

وصدقتي في نقطة عصر الدجتيل.. فخوسيه ممنوع يشبك اون لاين ويكلم ناس اغراب من السوني
واذا بيشبك الشبك يكون من غرفة المعيشة او القعدة ..

وحسابه في ستيم مربوط بايميلي واذا بيدخل يلعب اون لاين يدخل من دسك توب مثبت جدامنا كلنا..
ومع هذا فهو يلعب من كمبيوتري لأن العابي اكثر من العابه .. والقاه غالبا ما يناديني العب معاه او اعلمه
طرق اللعب.. او يطلب مني العب وياه.. وينبسط لو لقى له واحد مربوش يعلمه الغش وخاصة في لعبة portal.

فكلامي عن خوسيه يفيد اهمية تواجد الاهل بالقرب من ابناءهم عند الاتصال بالنت..
من شهر تقريبا اخوه بو 20 سنة مسك جواله ولقى مسج من جروب المجلس O.O
قال اي مجلس ذيه يا ماما؟ قلت له والله ما عندي علم في جواله لأنه هو بشكل عام مب من النوع اللي يكتب
في الجوال..
طلب باسوورده من اخته.. من دخل تم يضحك.. ان جروب المجلس ذيه كلهم بزارين وفيه عتب على خوسيه
ان ما يشاركهم.. وصف كل محادثاته وقراها.. وقال يا حليله خوسيه..

لكن هل هذا معناته نترك له الحبل على الغارب؟ ونترك كل شي مفتوح له؟

اهنيه يظهر يا ارسطو اهمية دور الاسرة والبيت في حياة هالاطفال..

[يمامـة]

الله يحفظ لك خوسيه ويبارك فيه وفي كل عيالك ..
أسلوبك جميل في الطرح أيتها الأم الفاضلة ..
بس فعلا غريبة اول مرة أدري ان كل خميس المراهقين والمراهقات يتجمعون في السينما لين الساعة 12 !!!
وبعد بدون مايكون حد كبير معهم من الأهل ! لأنها فعلا مصيبة ! وتحتاج لوقفة جادة من الأهل ! معقولة وصل الاستهتار لهالدرجة ؟!!

لكن المشكلة الأكبر وين يروحون؟ وين البديل؟ المراهقين طاقة نحتاج للاستفادة منها بشكل إيجابي فعال وإلا إن تركت على الغارب تحولت طاقتهم لاتجاه سلبي ..
الفراغ أكبر مصيبة يبتلي بها المجتمع ..
وكثيرا ما نتساءل عن دور المدارس على الأقل في الصيف؟ كل مدرسة يفترض أن تكون لها أنشطة خاصة طوال فترة الصيف ومو شرط المشرفين عليها
يكونون من المدرسة أنفسهم
لازم تفتح أبوابها في الفترة المسائية بأنشطة متنوعة تحتوي طلابها فكل مدرسة أدرى بحاجات المرحلة العمرية لطلابها ..

شكرا لك عزيزتي على لفت الانتباه ..

ويبارك في كل عيال المسلمين واللهم آمين يا بشاير..

فراغ الابناء مسؤولية اولياء الامور.. الولة موفرة الكثير من الاماكان المجانية وهناك مراكز برسوم..
لكن عيالنا ما يبون الا الراحة واللعب والتسلية فقط..

يعني ما يبون يستغلون الصيف في تطوير نفوسهم في تعلم لغة يديدة.. او خبرة يديدة
او عمل تطوعي.. لذلك طبيعي جدا تلقين الاطفال في المجمعات من غير هدف..

فعني اقول: اشغلوا العيال في دورات برضاهم او من غيره وراح تقتلون الفراغ من حياتهم
وراح يعتزون بنفوسهم وقدراتهم..

[يمامـة]

والله لو يسوون مسابقات بلي ستيشن وتنقل على التلفزيون والانترنت وتعليقات من الشباب نفسهم سوف تلقى رواجا منقطع النظير, ابني بدى كذا فكرة وأدارة مدرسته قررت يسووها السنة القادمة.

أما بالنسبة للسينما, وما أدراك ما السينما, ليس كل فلم فلم, ولاحظتها في قطر ودول الخليج انه ليس هناك منع للأطفال من مشاهدة أي فلم.

يا جماعة الخير, كل فلم من يطلع له تصنيف يحدد الأعمار المناسبة لمشاهدته, حسب المشاهد والعنف والتعابير والأيحاءات, والأفلام الموجودة كلها لها تقييم بعضها او أكثرها يستوجب عدم بيع التذاكر او السماح للأطفال بالدخول,
هذا هو المعنى لكل شفرة تقييم


G للكل
PG يحتاج واحد كبير مع الأطفال
PG-13 ضرورة وجود وحد كبير مع الأطفال
R مقيد للكبار فقط
NC-17 أفلام ذات مشاهد أباحية

أتمنى ان ارى صناديق بيع تذاكر السينمات يسألون عن البطاقة الشخصية لتأكيد عمر الشباب, وكذلك عند الدخول الى قاعة العرض

اتمنى مثلك.. فالطفل ممكن يدخل اي فيلم بصحبة الكبار دون منع..
فمن هو المسؤول في المنع في الدولة دام ان السينما ما عندها ما يمنع دخوله يا اخوي شيخ الديرة؟

[راجي الْعفو]

ام خوسيه

لعبة portal هذي شكلها خطيره !

[راجي الْعفو]

في حالات كثيرة يا اخوي راجي المنع يصعب عليك.. وتحتاج لقوة جبارة لفرضها..

لذلك دايما اتذكر كلامك التساهل من البداية يجر خلفه تساهلات اكثر واكثر واكثر..

فعلا يا ام خوسيه ..

الموضوع لازم يكون متاسس من البدايه ..

وانا طرا ع بالي هالكلام دون ان اقصدج او اقصد احد بعينه ..

فقط تذكرت حال حاكم البلاد و كيف انه لو اعتمد على مجرد النصح و الارشاد و لم يستخدم قوة المنع

لعاث الفساد في ارضه

فكذلك أرباب البيوت ..

والجامع بين الحاكم و رب البيت :

ان كل منهما يطلق عليه ولي

مع اختلاف الدرجة ..

بالتوفيج !

[يمامـة]

الــسـلام عليـكم ,’

مرحبآ اختي يمـامــة ،
الله يحفظ لج خوسيه واخوانه اليخاندرو و رودريغز والعائلة الكريمة كلها

انتي من الاعضاء اللي أحب ردودهم ، أحس ورا ردودج في قدر كبير من الثقافة والنضج الفكري وحسن التعبير
لذلك حاب اتناقش معاج في نقطة خروج الأبناء بمفردهم ..

وبتكلم عن الأبناء الذكور بشكل خاص ، اللي قدرت افهمه من موضوعج
انج ضد خروج الأبناء بروحهم لين الثانوية يعني تقريباً لين الولد يصير عمره 17 سنة !

صراحة بما اني شاب واشوف أصناف كثيرة من الشباب ،
لاحظت أن في فرق بين اللي كان يروح ويرد وهو صغير وبين اللي ماطلع إلا لين كبر

اللي تعود يطلع من سن صغير أحس فيه نضج أكثر ، ويقدر يتحمل المسؤولية بشكل أكبر
وشخصيته تكون أقوى

بينما النوع الثاني صراحة الولد يكون وايد " مسكين " ، وخجول حتى ف المطالبة بحقه
وعادي ينظلم ويتم ساكت ، وطبعاً النوع الأول يتمصخرون عليه ويستغلونه !
عاد خبرج الحين ماشين ع نظام إن لم تكن ذئباً أكلتك الذئاب ههههههه

واهتماماته أيضاً تكون طفولية نوعاً ما ، تخيلي شباب فوق 18 سنة مشتطين ويسولفون
اخر شي طلع موضوعهم عن الـ Anime !

تقدرين تقولين الشخصية القوية والصفات المشابهة لها ممكن تنزرع عند الولد من خلال البيت فقط
بتفق معاج جزئياً .. لكن صدقيني في أشياء كثير الولد بالذات لازم يتعلمها من الشارع ,,



* طبعاً ما أعمم ولكن هذا اللي تبين لي من اللي اشوفه

شكــرا ,’

وعليكم السلام ورحمة الله وبركاته
ويحفظ لك كل من يعز عليك اللهم آمين.. حبتك العافية والدياية الحافية وحبتك الملائكة يارب من بعد محبة رب العالمين لك اللهم امين..

ما اقدر اقول ان كلامك غلط بخصوص كل حرف كتبته عن شخصية الطفل لما يخرج للشارع بشكل عام
وما بين طفل ما طلع الا لما كبر.. نعم اللي يطلع بشكل عام شخصيته اقوى ويميل للقيادة بشكل كبير و يستحمل مثل البطل الصامت لما ينزف
او يحصل هواش..

ولكن خلنا نتفق على ان احنا عند التربية لا نبحث عن مثل هذه الشخصية في عيالنا يا اخوي الزار.. بمعنى من الخطأ ان اترك ابني في الشارع بحجة ان الشارع يربي.. فممكن احنا نربيه من غير ما نتركه يخرج للشارع ..

وعلشان نقدر نربيه ونزرع فيه الشخصية القوية ونننشط جينات القيادة ان كانت موجود ونحفزها ان كانت خاملة لابد ان نعترف ان شخصية كل طفل تختلف عن اخوه وان كانوا كلهم نتاج تربية وحدة.. ويكون للبيئة تأثير على صقل هالشخصية.. كما ان يكون لشخصية كل من الام والاب دور كبير على تكوين شخصية الابناء اذا كانوا قراب منهم..

فاليوم مع اني أكدت على صحة كلامك المذكور في مشاركتك لكني مستحيل انصحك تسمح لولدك انه يطلع الشارع من هو صغير.. لكني في المقابل راح انصحك ببدائل تصقل شخصيته وتعوضه عن الخروج للشوارع.. تسجل الطفل في دورات مختلفة رياضية او ثقافية او تعليمية السماح له بالمشاركة في الانشطة وتشجيعه على المشاركة وابداء الرأي .. تسجيله في دورات تنمية القدرات بمشاركة اطفال في عمره و مشرفين كبار.. تشجعه على المشاركة في انشطة المدرسة وحضور كل الفعاليات المدرسية المفتوحة او المغلقة.. تشجعه على الالقاء والخطابة و القراءة بصوت عالي في البيت والمدرسة..

بالنسبة لي عندي ثلاث صبيان الله يحفظهم اكبر من خوسيه بمراحل الله يحفظهم جميعا.. ولا واحد منهم قعد في البيت في اي اجازة صيفية مرت عليه..
مروا على مركز شباب الدوحة و على مركز ساس للرياضة وهم صغار في الابتدائية راحوا نادي الواحة تعلموا السباحة شاركوا في دورات وتسجلوا في تعلم لغة انجليزية و كمبيوتر .. راحوا معسكرات و بطولات من هم اعمارهم 7 سنين لين الثانوية فكانت تمر علي ايام الكل مختفي في البيت واكش ذبان .. لأنهم موزعين ما بين بطولات و معسكرات واكون انا و ابوهم بروحنا في البيت..
ابوي الله يحفظه جمعنا في بيته.. وعيال جيران بيت ابوي يلعبون الكورة مع عيالي في حوش بيت ابوي.. ما عرفوا لعب كورة في الشارع ابدا.. وممنوع يطلعون برع البيت الا باستئذان وان كانوا بيروحون الدكان. يروح المسجد بالوقت ويرد من نفسه بالوقت( تقول مبرمج يطلع من البيت للمسجد ومن المسجد للبيت)
ما عمري اتذكر اني عصبت على الاثنين الكبار ليش تأخرتوا هالكثر؟ فالحمدلله رب العالمين .. كانت كلمتنا تمشي في الوقت اللي ما اقدر انكر ان كنا نعاني من بعض المشاكل حالهم حال كل الشباب في اعمارهم لكن مب ذيك المشاكل اللي الواحد حس انه ما عرف يربي وانه يحتاج الى دعم خارجي لمساعدتهم و انتشالهم.. او وجودهم في الشارع عانى منه البيت و المدرسة و الجيران ولا اتذكر ان وصلتنا مشاكل من الجيران او من الناس حولنا.. فالحمدلله رب العالمين. ولا اشوف ان شخصيتهم ضعيفة والناس يسيرونهم حسب اهواءهم او تعرضوا للضرب وما قدروا ياخذون حقوقهم..
شاركوا في هوشات انضربوا واضربوا.. لكن هوشاتهم كانت مقننة جدا بسبب قلة خروجهم للشارع..

فاليوم لو بنصحك بقول لك اتبع نفس الاسلوب مع عيالك.. لا اتخلي الشارع يربي ولدك انت اللي ربه.. فاليوم كثيرين من خريجي تربية الشارع شخصيتهم قوية .. لكن يفتقدون لكلمة هذا شاب مهذب. شنهي فايدة تربية الشارع والطفل او الشاب يفقد الكثير من الادب والاخلاق؟

بينما الطفل اللي يكون بصحبة هله غالبا ما يتخوف من الاقتداء بمن هم قليلي الادب من حوله لأنه ما يقدر يطلع بروحه وينفس عن الخبرات اللي اكتسبها منهم.. وحسب ما تنمي انت شخصية ولدك راح تجني ثمار تربيتك.. فالطفل اللي بتوفر له كل ما ذكرته فوق و تمنعه من انه يعبر عن رايه او انك ما تاخذ برايه و تسوي له كل شي .. اكيد هالطفل راح يكون انهزامي و اتكالي وان كان تربية شوارع ( عذرا على كلمة تربية شوارع.. فالمقصد هنا ان الشارع صقله وخلاه ذات شخصية قوية)..

واليوم خوسيه حاله من حال اخوانه مع انه ما يحب يبرز قدراته وانسان منسحب واحاول وياه انه يبرز نفسه ويثبتها لكن طبيعة شخصيتة لاعبة دور كبير جدا في النقطة هذي للعلم انه هذار وكثير الاسئلة.. فهل ممكن اسمح له يطلع في الشارع.. اقول لك مستحيل اسمح له يتحرك عند الباب قبل ما ايي ياخذ الاذن مني اوفق له او ما اوافق له.. ومن دورة لدورة والانطباع العام عنه في نهاية اي دورة تختلف عن الانطباع العام عنه في بداية الدورة.. فسكوته يوحي لهم انه ما يفهم شي.. لكن لما يشتغل او يحاول يبدي رايه الصورة تتغير عنه نهائيا فالله الحمد..

و وااايد اتعرض للنقد في بيت ابوي.. وخاصة من احد اخواني اللي يقول لي خليه يطلع تراه كبر.. قلت له حاله من حال اخوانه.. ما بيخسر شي لو ياني قال لي: ماما لو سمحتي بروح بيت خالي. ... مب يطلع من الباب من غير ما يعطيني خبر.... للعلم بيت خاله لازق في بيت يده .... سياستي تختلف عن سياسة اخواني و خواتي كلهم يا اخوي الزار.. اخوان خوسيه اللي في عمره من عيال اخواني.. يقولون له تعال بنروح الدكان يقول لهم بروح اقول حق امي وبرجع.. واييني ماما لو سمحتي بروح الدكان مع فلان او فلان.. اقول له روح .. مرات من نفسي اطرشه روح الدكان وييب لي هالشي.. لكن مستحيل اخليه يروح الدكان مع مجموعة ادري ان لهم تصرفات الكل يشتكي منهم....
ارافقه في اي مشوار يبي يروح له.. سمحت له مرة يروح سبيد مارين مع الدريول رجع لي يتكلم عن شباب شافهم هناك وتناقش معاهم عن سيارته ال (ريد كات) و... و...... في المرة الثانية لما احتاج يروح قلت حق ابوه يا اتروح وياه او اروح وياه واقعد في السيارة واشوفه بعيوني .. لأن غلط يروح بروحه ويكلم اي حد واحتمال يتواصلون معاه بطرق متعددة.. وبالفعل في كل مرة احتاج فيها يروح هالمحل.. كنت اروح معاه واتم قاعدة في السيارة لأني من نفسي ما ابي انزل هالمكان لأنه خاص في الشباب..

قد يعتبر البعض ان حرصي على خوسيه فيها مبالغة وهو نفس الحرص اللي كان مع اخوانه.. الا و بكل بساطة احب اقول اني ما خسرت شي من منعي لهم من خروجهم بداع ومن غير داع من البيت.. بينما اشوف نماذج تعاني اليوم والسبب هو السماح للعيالهم
للخروج للشارع بكثرة ولو كان بداع.. ويرفعون رايات الاستسلام مع عيالهم ..واعذرني على الاطالة يا اخوي الزار..

[يمامـة]

فعلا يا ام خوسيه ..

الموضوع لازم يكون متاسس من البدايه ..

وانا طرا ع بالي هالكلام دون ان اقصدج او اقصد احد بعينه ..

فقط تذكرت حال حاكم البلاد و كيف انه لو اعتمد على مجرد النصح و الارشاد و لم يستخدم قوة المنع

لعاث الفساد في ارضه

فكذلك أرباب البيوت ..

والجامع بين الحاكم و رب البيت :

ان كل منهما يطلق عليه ولي

مع اختلاف الدرجة ..

بالتوفيج !

للامانة ما حسيتك انك تقصدني او تقصد حد بعينه.. ولكني لقيت ان المشاركة نقطة اعاني منها اليوم
فما اقدر امنع اليوم رغم قوة كلمتي عليهم.. وابي المنع يكون نابع منهم هم.. فشنهي الفايدة المنع يتنفذ جدامي
لكن لو ما كنت موجودة كل شي يرد مثل ما كان..

والله يوفج الجميع.