خوسيه الوسيم بو الكرشة الدائرية خلص اختباراته يوم الخميس.. وياني وقال لي :
ماما اليوم بروح السينما مع ربعي.. واحد عازمنا وحاجز لنا تذاكر..
خوسيه: انتي موافقة يا ماما؟
يمامة: من ذيه رفيجك؟
خوسيه: خالد.
يمامة: خالد وشو؟
خوسيه: خالد ....
يمامة: قطري ذيه؟
خوسيه: ايه لا ما ادري اعتقد ايه( لأني ما انتبهت لاجابته اصلا).اعتقد قال لا.
يمامة: من وياكم؟
خوسيه: ابوه.
يمامة: موافقة.
خوسيه: عطيني 100 ريال..
يمامة: باعطيك 200 علشان ما تنقصك فلوس هناك..
الساعة 1 الظهر يتواصل مع ربعه ف جروب الوتس اب..
طلع وهو مجهز ملابس ما راقت لي
فأصر يلبسها.. فقلت له مافي طلعة الا لو تختار لك شي حلو ومرتب مب تلبس لي ملابس عادية ( مشكلة يومية معاه)..
راح واختفى وطلع لي بشي مرتب.. وكل هذا خذ وقت كبير
يمامة: متى بتروح؟
خوسيه: قريب الساعة 2 او 2 ونص.
يمامة: انزين .. بكلم اخوك( عمره 20 سنة الله يحفظه) وبخليه يوديك
خوسيه: وليش اخوي؟ بخلي الدريول يوديني..
يمامة: لا يا ماما لازم حد كبير يوصلك ويشوف من هم ربعك.
خوسيه: وتبينهم يضحكون علي ان اخوي موديني؟
يمامة: اللي يضحك عليك اضحك عليه لأن ما عنده اهل يسئلون عنه.
فأنت لو هلك ما يحبونك بيقطونك مع اي حد وفي اي مكان وفي اي وقت..
فافتخر ان اخوك بيوديك وخل راسك فوق وقول لهم هذا اخوي فلان وعرفهم عليه وانت فرحان في اخوك...
سكت خوسيه وكل علامات الرفض على ويهه لكن ما باليد حيلة.. واعتقد كان ينتظر رفض اخوه..
بعد خمس دقايق.. وبوجود خوسيه جرت هالمحادثة..
يمامة: الوو(.....) وينك؟
اخو خوسيه: في الميلس ادرس مع الشباب..
يمامة: زين ممكن تعطينا نص ساعة او اكثر بشوي من وقتك لو سمحت؟
اخو خوسيه: آمري؟
يمامة: خوسيه معزوم على سينما فيلاجيو مع ابو رفيجه بيكون معاهم او على قولته( هانق اوتس)
فممكن توديه وتنزل وتشوف ابو الصبي والصبيان اللي وياه.. واذا ابوهم محد واليهال كانوا معدودين
ترده البيت؟
اخو خوسيه: متى يبي يروح؟
يمامة: يقول قريب 2 او 2 ونص..
اخو خوسيه: ان شاء الله .. بس عطوني اشوية وقت..
تجهم ويه خوسيه.. وتم ساكت طلع ودخل ومسك جواله وقال:
خوسيه: خلاص مب رايح.
يمامة: وليش؟
خوسيه: ابوه مب ياي.
يمامة: اهااا.. احسن لك... غلط يهال يطلعون بروحهم وهم في عمرك.
خوسيه: بس السنة الياية يصير اروح بروحي لأني بصير في الاعدادية مثل اخواني.
يمامة: ولا في الاعدادية يا ماما.. اخوانك لما وصلوا الثانوية كانوا يادوب يطلعون..
وزمن اخوانك وان كانوا يطلعون مب مثل زمانك انت فكل شي تغير..
خوسيه قعد في حاله يعسس اهنيه وهناك وكل شي اخترب عليه
.. وقال لي نعسان وابي ارقد..
ولــــكن
كم طفل يدخل السينما من غير ما يخربون هله عليه الطلعة..؟
دايما وابدا لما امر فيرجن.. اشوف المراهقين والاطفال للاسف متجمهرين
صوب السينما.. اطفال في عمر خوسيه بو 12 سنة بنات و اولاد يتجهزون لدخول الافلام
من دون وجود شخص بالغ رشيد بينهم؟
ليش يوم الخميس فيلاجيو يصير مرتع للمراهقين من بنات وشباب وبروحهم من غير وجود
الوالدين او شخص كبير معاهم لين الساعة 11 او 12 الليل؟