المشاركة الأصلية كتبت بواسطة Zarr
آميــن يارب .. وشكراً على دعوة الدياية الحافية ههههههه حبيتها
أولاً اختي اليمامة ما اختلف معاج أن البيت ممكن يصقل شخصية الولـد
وذكرت هذا الشي في ردي السابق ، لكن مثل ما قلت في
اشياء ما تقدرين تعلمينه اياها في البيت
انتي ذكرتي عيالج الله يخليهم ويحفظهم كمثال ممتاز ، وصراحة ما استغرب هالشي دام انتي امهم
يمكن حتى بدون قصد منج قدرتي توازنين بين الحرمان والإقناع في نفس الوقت ..
لكن صراحة الغالب * من أمثلة اشوفها حولي * الأهل بس يركزون على الحرمان بدون اقناع
لذلك لما يكبر الولد ويآخذ شي من الإستقلال تبدا المشاكل تظهر
وحقيقة تذكرت سالفة واحد لو اقول اسمه وقصته الكل بيعرفه ،
هالولد نهايته كانت مأساوية ، مع إن تربيته " ظاهرياً " تعتبر تبية ممتازة !
صلاة وعبادة وحفظ قرآن ، والله الولد كان من يسمع الآذان ينسى كل شي وكل همه متى يوصل المسجد ..
لكن لين صار يطلع شوي وتحرر من القيود اللي كانت مفروضه عليه ،، انحرف بشكل كبير
لان التزامه الأولي انفرض عليه ولم يكن نتيجة اقتناع منه .
النقطة الثانية ، انا بعد ما اقول خلو الشارع يربي عيالكم
بالعكس لازم التربية تكون من البيت ، والشارع يساعد فقط في الأشيا اللي صعب يتعلمها ف البيت ..
الحين الطفل الصغير أهله في البيت يعلمونه الصلاة والصيام ، لكن ممكن انهم يجدون حرج يعلمونه الأغتسال
ويشرحونه له ، أو التكاثر مثلاً ،، لذلك نشوف هالاشياء تعتبر أساسية في المناهج الدراسية ..
يعني الام تربي ولدها في البيت وتعلمه الصح والغلط ، والمدرسة تكون مساعدة وتعلمه الأشياء اللي ممكن
تسبب إحراج للأم ، أو ما تقدر توصلها بطريقة صحيحة ،
كذلك الأمر بالنسبة للشارع ، ممكن الولد يتعلم في البيت شلون ما يسكت عن حقه
لكن بيكون تعليم نظري بدون تجربه ، أو يمكن بعد ما يكون تعليم فعال
دور الشارع يتمثل في أنه تجربة واقعية بتصقل شخصيته أكثر وأكثر
اكيد لاحظتي انه فيه اطفال إذا كان ابوه موجود يركض ويلعب على راحته وشخصيته قوية وما يسكت عن حقه
لكن إذا كان بروحه يكون خجول ويتم قاعد ف مكانه وتحسين شخصيته ضعيفه نوعاً ما !
يعني هذا شخصيته تكون قوية بس في محيط البيت ، وخارج البيت يكون العكس ..
هني دور الشارع يعطيه
تعليم عملي على الأشياء اللي تعلمها في البيت ..
أدري اني هذرت وايد بس بذكر نقطه أخيره :
اللي تعتبرينه انت كـ أم ويكون في نظرج شخصية مثالية ..
في الشارع يمكن يعتبر العكس ،، بالذات في وسط الشباب !!
يعني مثلا أم عندها ولد تشوفه مؤدب وشخصية مسالمة ومب مال مشاكل ,,
لكن في المدرسة يعتبرونه " مصخرة "
ما انكر يمكن تكون نظرة الأم هي الصح ، لكن الولد اكيد بيعاني لأن معاير الشخصية القوية في الشارع تختلف عن البيت
الولد لين يشوف هذا يتمصخر عليه وهذا يستقوي عليه ،
بيحس ان كل الكلام اللي سمعه في البيت مثل لا تسكت عن حقك ... الخ ، ما استفاد منه
لانه ما طلع الشارع واخذ تجربة عمليه انه شلون يطبق هالكلام ..[/COLOR][/CENTER]
والنماذج اللي تشوفينها تعاني / في وجهة نظري المعانة لم تتكون بسبب الشارع في حد ذاته
لكن يمكن عيالهم ما كانو جاهزين كفاية اصلا عشان يطلعون الشارع
لذلك انا قلت يجب أن يكون الولد جاهز بدرجة كافية قبل لا نسمح له بالخروج إلى الشارع
خلاصة كلامي ، لأ تحرمون الأبناء من الشارع ، ولا تخلوهم 24 ساعة في الشارع
ربوهم فـ البيت ، والشارع يكون مكمل ومساعد فقط !
يعطيج العافية يمامــة ،، وأعذريني ع الإطالة والتأخير في الرد
استمعت بالنقاش صراحة
شكــراً ,’
رد مع اقتباس
ويعينج علي 
