بابتعد عن الكلام النظري وباعطيكم مثال وانتوا احكموا
----------
امس صار لي حادث غريب وكنت انا الطرف الاول في الحادث والطرف الثاني كان من بطولة واخراج سيده شاميه وهي غير مؤهله حتى لدفع عربة في جمعية الميره التعاونيه
----------
كنت ماشي في طريقي ابامان الله وجات وحده سيارتها جنها سيارة مستر بن وتبي تتجاوز سيارتي
يمكن هي كانت فاكره عمرها في رالي باريس داكار ومادري من قص عليها وقال لها انها لو تجازتني انها بتفوز بالمركز الاول وبتعتلي المنصه الرئيسيه وبتحصد الالقاب مثل ناصر العطيه
--------
جان زين لو تبي تتجاوزني والسير ماشي ’
المشكله ان السير واقف والا وغصب تبي تدخل جدامي
--------
اول ماشفت حركتها قلت هذا يمكن واحد من الشباب الطايش المراهق ولما امعنت النظر في المركبه طلعت وحده مقيمه في قطر
صحيح ان القطري اوقات يحس انه غريب في بلاده
-------
انا عاد ماعطيتها الطريق لكنها كانت لي بالمرصاد
هرنت ابسيارتها مدده طوووويله وقامت اتاشر ابيدها واتلوح وانا اشوفها من المرايه الخلفيه لكني سكت عنها
وفي الاخير حبت ترجع ورى سيارتي وادعمتني
-------
المشكله ان عقب ادورها كنت ابيها توقف لكنها ماوقفت واشردت عني
ورجعت ادورها وماحصلتها
-------
عقب رحت مركز مدينة خليفه علشان اقدم بلاغ ضد مجهول
لكني فجاه لقيت سيارتها وحصلتها اهي وزوجها معاها وكانت سيارتها ماشاء الله امدعمه من ثلاث جهات هههههههه قلت هذي اكيد خبيره بالحركات الاستعراضيه والبهلوانيه
-------
وجانا المحقق وكان واحد اصلع ماعنده شعر وانا من شفته قلت بس هذا النابغه الي عندهم
وقلت له اشلون صار الحادث وعقب هي قالت اشلون صار الحادث,
المشكله ان القصه الي قالتها هي كلها مفبركه ومالها أي اساس من الصحه
بس الظاهر ان وقت ماهربت مني وقت الحادث في شخص معين هو الي كان يلقنها الفلم الي لازم اتقوله حق المحقق ههههههههه
-------
الغريب ان المحقق ماقالي ولا كلمه الا بعدين لما سالته قالي طبعا انت الغلطان
اهاا انا الغلطان صرت الحين ؟ أي وهو ماقال الا الصح انا غلطان ونص
وعلشان جذي مره ثانيه انا كان لازم اجيب لي وحده من هالبنات ( الشقراوات والحسناوات) واخليها تقعد محلي علشان اصير مهب غلطان
ومره ثانيه لازم احلف كذب وااايد على المحقق علشان يحس اني صادق ويطلعني مب غلطان
-------
بعض محققين الحوادث عندنا يذكروني ابهذاك الطويل ابو البنيه الي في المحقق كونان الي امسوي عمره فاهم وعارف شالسالفه وفي الاخير وين مايطقها عويه وهو ولا يدري شاللومي
-------
المشكله ان المحققين الي شفتهم كلهم مش قطريين
تدرون ايش الفرق بين المحقق القطري وغير القطري؟
القطري هذا خريج العديد وسيلين والربع الخالي والخراره يعني فاهم الدروله والسواقه عدل ومستحيل احد يألف عليه او يخترع عنده حادث والي بيألف قصه ترى بيصيده وبيحكر له ومابتعدي عليه
-------
واعذروني على الاطاله وشكرا لكم
|
رد مع اقتباس
