مخالفات المرور هل حدت من الاستهتار ؟

[A-Alansari]

في حال كان الوضع مناسب لايقاف المخالف يتم منحه اخطار بالمخالفة
اما في حال عدم مناسبة الوضع لايقاف المخالف ،، يكتفي رجل الامن بتسجيل رقم المخالف وارسالة للجهات المختصة

وهاي اكبر مشكله قاعده تواجه بعض الشباب

بسبب عدوم وجود شي يثبت المخالفه غير كلمه الي سجل المخالفه وهالشي غلط

الي حاقد على حد والي مايداني فلان بيقعدون يسون سوالف ومخالفات يمكن ماصارات

وصارت معاي مره وقفني تحريات قالي موترك مطلوب

قلت له ليش شصاير؟ قالي سرعه

قلت له تشوفني انا مسرع الحين؟ يقولي لا مسجلين عليك من قبل انا بس شيكت الرقم ووقفتك لانه موترك مطلوب تعال حجز الصناعيه

قلت له انتو عندكم كيمرات في السيارة والي سجل المخالفه ليش ماوقفني وشلون عرف سرعتي اصلا

قالي ماعندنا كيمرات وقالي يمكن ماكان يقدر يوقفك وقتها

قلت له كم السرعه المسجله وفي وين؟ قالي خط بوسمره السرعه 170

قلت له ماشالله شلون عرف سرعتي بعد بدون رادار او كيمره في سيارته ؟ قالي يقدر يمشي وراك ويقدر السرعه

قلت له انزين دام لحقني لين 170 مايقدر يوقفني؟ ماعرف يرد علي

عقب قلت له انزين لو صادني رادار بسرعه 170 بدفع مخالفه رادار ليش تبون تحجزون سيارتي قالي اذا رادار تدفع مخالفه اذا مبلغ عليك تحريات حجز

قلت له شالفرق قالي مادري هاي القانون

ورحت الحجز وحجزو سيارتي وطلعتها عقب بواسطه ولا كان خاست سيارتي وانا ماسرعت ولا سويت شي ولاعندهم دليل ضدي غير الي مسجل المخالفه كاتب على مزاجه يمكن وهو يكرك

[وحيد-الشوق]

عمرها زيادة المخالفات واسعارها بشكل مبالغ ماتحد من الاستهتار والحوادث كمثال المانيا سواقتهم محترمه جداً والقوانين صارمه ومع ذلك مخالفتهم بسيطه تقطع اشارة ماتوصل 200 يورو والحزام 20 يورو بس عندنا كل شيء مدبل اضعاف

[بومحمد المطاوعه]

للحين انشوف ناس تسرع مو مهتمة بالرادارات والمخالفات

لأن في ناس من الموظفين فالمرور
تحول نوع المخالفه
ف عادي يخالف وعقب يكلم ويغير المبلغ ,.

وللحين انشوف ناس يوقفون قدام محلات الشاي في نص الخط مو مهتمة في مخالفات المرور

لأن لو شاف الدوريه مايقدر يوقف ويصف ,.. ويعرقل الخط

وللحين انشوف ناس توقف فوق الرصيف مو مهتمة بقيمة المخالفات

قلت لأن البعض يحول المخالفه والبعض يقدر يكنسلها ..

وللحين انشوف ناس ماتربط حزام الامان

الحزام البعض صار يلبسه شوو والبعض يلبسه تعود وألتزم عليه ولله الحمد

وللحين انشوف سيارات ضاربه مخفي ميه بالميه وهي خط امنياً ماانشوفهم مهتمين بالمخالفات

المخفي البعض عنده تصريح ومسجل يعني يمر على اي
دوريه يبلغ راعي الدوريه يشوف ان عنده تصريح مايوقفه بالأساس

اما اذا ماعنده على طول يوقفه ويخالف ويقدر يحجز الموتر ..

هل قوانين المرور محتاجه الي تبديل اول تعديل ؟
هل العقوبات الموجودة حالياً تحتاج الى تبديل من نقدية الى معنويه مثل السجن والمحاكم كونها تعتبر جنائية وشروع في القتل مثل قطع الاشارات وهي حمراء ؟

يحتاج ناس اصحاب ذمه
من الموظفين والسائقين ,,

[معماري قطري]

انا اعطيكم الحل المناسب

استحداث وظائف للقطريين من المتقاعدين والمحالين للبند المركزي ومن يرغب في عمل اضافي لعمله بالقيام بدور رجل الامن بعد اجتيازة لعدة دورات تؤهله لذلك وعلى ان يكون حسن السيرة والسلوك وبعمر لايقل عن 40 سنة
وبشرط ان يكون العمل غير محدد الوقت ( بمعنى متى ماكان الشخص متواجد في اي مكان وفي اي زمان له الصلاحية بظبط المخالفين ) وكذلك يفضل ان يكون العمل بالزي الشخصي وبسيارة شخصية

وبخصوص الحوافز : الحصول على نسبة من كل مخالفة يقوم بظبطها

صدقني ان كل واحد فالشارع بيفكر الف مره قبل لايخالف وبيتوقع ان اي شخص حوله ممكن يكون رجل امن

وكان الله غفوراً رحيما

هذا الحل مطبق في أمريكا بس بطريقة شوي مختلفة .. فيه شرطة مخفيين وسياراتهم مدنية وكل شرطي وضابط أمن حتى الاطفائي جزء من واجباته المخالفات وهو في سيارته الخاصة .. عنده دفتر مخالفات وعنده رماق يحطه على الطبلون ويوقف المخالف بطريقة صحيحة وحضارية وممكن ينذره بس لو مخالفته بسيطة وممكن يخالفه .. ولو فيه داعي يطلب دورية والدوريات منتشرة في كل شارع تقريباً.

[معماري قطري]

كلمت مره مساعد مدير المرور وقال لك الحق تخالف وتبلغ حتى بالتلفون أو الايميل وممكن تنطلب في المحكمة .. شفت أوضاع تستاهل التبليغ وسجلت رقم السيارة المخالفة والوقت وطبيعة المخالفة ورحت المركز ابلغ .. مرة الليل قالوا لي تعال الصبح .. ومرة قالوا لي شتبي مخالفته تكون؟ وحسيت انها مجاملة لي بس وهم اللي المفروض يحددون مخالفته .. حسيت ما فيه اهتمام وما فيه اجراء واضح لكل نوع مخالفة.

[حقيقه]

الصراحه انا من اللي يوقفون مخالف لانه مافيه كلش كلش كلش حتى يوم يكلمني العسكري اقوله وين اوقف والمسافه اللي متوجهه لها مش بسيطه
لو اوقف بعيد والجو مايساعد وحتى شارع مشاة سنع مافيه وين اوقف والدريوليه محتلين كل المواقف اللي مفروض مايوقفون فيها ,,
ياخي نزل المعزبه المفروض يخلونه يحرك ,,
مش يعاقبونا اذا وقفنا مخالف

نبي مواقف للنساء انقذونا

[ابوالعبد]

خل يسوون مواقف باركنات عقب يخالفون ياجماعه مو كل شي مخالفه يا اخوان قله المواقف مشكله مشكله مشكله اتمنى اي مشروع يتم بناءه يكون في باركنات بشكل كبير نبي مواقف

مش معقوله ان رحنا فلاجيو مافيه مواقف الا بالحسره وان رحنا الستي نفس الكلام وان رحنا سوق نفس الكلام ابي اعرف وين نصف وين نبركن !!!! مع العلم المرور ساعات يتستاهل في

المجمعات التجاريه لانه يدري مافيه باركناااااااااااااااااااااااااااااااااااااااات

[حرف]

لان القوانين غير صارمه

ايش تبي من واحد يخالف القانون وعند حجز سيارته تلفون ويطلعونها وتسقط المخالفه

اذا لم يحترم الكبير قبل الصغير القانون اذن فلا يوجد قانون صارم

كلامك صحيح

[راعي الكورفت]

هذه طبيعه عند المراهقين تحت ال20 فبنظرهم مفهوم الرجوله هي بكسر القانون وتحديه !


قوانين المرور لن تستطيع ردعهم بسبب سلوكياتهم التي تربوا عليها.

[بعيد النظر]

ابشرك امس انطلب موتري بسبة العازل ..
المشكلة مش في الطلب .. المشكلة ان العازل هو هو من سنة 2013 !!!!!!!!!!!!!!!!!!!!!!!!!!!!!!


يعني لو تحسب كمية العساكر والدوريات اللي مريت عليهم ..
من ذاك اليوم .. لي اليوم تعدى الـ 2000 شخص ..


ولا حد من هـ الـ 2000 كلمني !
ويجيك هـ الحبيب ويطلب موتري بكل برود ! شي يقهههههههههههههههههههههر