الى متى .... وكل في حاله لاهي

[بانغ بانغ]

مرحبا اخوي بانغ ونورت المنتدى ..

ياما حذرنا في مناقشات سابقه ،، الموضوع للأسف في ازدياد مستمر ،، مع ظهور برامج ووسائل تقاطع اجتماعيه جديده وفي تجدد مستمر .. نهايتها " توحد ألكتروني ".. و"عزلة أجتماعيه" .


المطلوب : توعية أولياء الأمور بخطورة أضرار التساهل في تعاطي الأبناء مع التكنولوجيا بكل أشكالها .. الرسالة توجه لرب الأسرة في المقام الأول وهو المسؤول عن تطبيقها .


شكرا على الطرح المهم.

الله يحييك الشيخ والمنتدى امنور بوجودك طال عمرك

اتصدق في ناس واقسم بالله ايسوون قروبات وايطرشون مسجات كل 5 دقايق طول اليوم ..... لا وموظفين في الحكومة

اعنبوا ما عندكم شغل او اهل او بيوت

طول اليوم مسجات ... هاي طبعا اللي عاشوا طول عمرهم مع التكنولوجيا البسيطة واحين هالبرامج اللي تفضح حياة الناس العبت فيهم لعب

اصبحت هي المتنفس اليومي واسهل طريقة للي يبغي ايعرف ايش قاعد ايصير حواليه

اول الواحد اذا ما كلم رفيجه يومين .... كان يتعنى وايروح له اما الحين ايشوفه اونلاين على الخط ولا يتواصل معه لانه مب فاضي يقطع البرامج اللي هو لاهي فيها.

تحياتي

[بانغ بانغ]

,

,


مرحبا


شكرا على الموضوع وحمدالله على السلامه

هذا دور البيت ودور الاهل خاصه الوالدين

اسمح لي اخذكم في رحله

ونعمل مقارنه بين الماضي والحاضر



في اعتقادي الشخصي احنا نبالغ برده فعلنا على الامور الي ما كنا نسويها وحنا صغار
ونفكر ان الامور الان غلط وهي في الحقيقه امور عاديه جدا

نرجع للذاكره يوم كان جيلنا صغار
هل كنا ( مثاليين ) وطول الوقت مع اهلنا !!!

كنا نجي من المدرسه ونطلع الى المغرب
نلعب على البحر او نلعب في البر
المهم في المحصله النهائيه ما كنا ( مع اهلنا ) قضينا النهار في لعب بعيد عن البيت

والبنات كانوا اما بغرفهم مع ( المجلات ) او مع التلفزيون او مع التلفون الارضي للبيت مع صديقاتهم
وما كانوا مع اهلهم
وهذي الامور المتاحه للتسليه بذيك الفتره

وكانوا الاهل يقولون عنا ان احنا ( جيل ) ما يتحمل المسئوليه وجيل فاسد وجيل زمن الرفاهيه
كانوا يسمونا جيل
( البرتقال والتفاح ) وجيل التلفزيون والمجلات والفيديو

لان ما كنا نساعدهم او نجلس معاهم
احنا جيل مختلف عنهم
الله يعطيهم الصحه والعافيه ورحمه الله على الاموات منهم

وطلع منا الوزراء وطلع منا المدراء وطلع منا رجال بمعنى الكلمه وسيدات فاضلات بالمجتمع

نفس الحكايه تتكرر اليوم
الاولاد زمنهم هذا زمن الانترنت وزمن برامج التواصل زمن مختلف جدا جدا وزمن فيه الرفاهيه مافيه ولله الحمد
لهم حياتهم ولهم اصدقائهم ولهم هواياتهم ولهم عالمهم

وبيطلع منهم الوزراء وبيطلع منهم المدراء وبيطلع منهم رجال بمعنى الكلمه وسيدات فاضلات بالمجتمع

لا نبالغ كثير ترى احنا ما كنا في ( المدينه الفاضله )
الوضع الان في تصوري افضل من السابق
والصغار الان في منتهى الذكاء وعقلهم يسبق سنهم

دائما كل جيل يفكر انه الجيل الجديد جيل تعبان والجيل السابق افضل


وهذا غير صحيح

كل الحكايه انه زمن مختلف وله رجاله

كل المطلوب منا ان احنا ( نراقب الوضع عن قرب ) ومانترك الامور سايبه
نخصص وقت لكل شي
وقت الاكل له وقته
واللعب له وقته
والدراسه لها وقتها
والجلسه مع الاهل في صاله البيت لها وقتها

انا اعتقد اليوم ( ان الاهل ) مقصرين مع الابناء
ترى الاهل هم مبتعدين ( كل وقتهم في العمل )

الصغار اليوم هم ضحيه ابتعادنا عنهم
تركناهم مع العابهم
المفروض احنا نقرب منهم ونطلع معاهم
حياه البيت ما عادت تجذبهم
والصغار يحبون الطلعات
واحنا مشغولين عنهم في اعمالنا


ان شاء الله البركه فيهم وهم مستقبل هذه البلد

,

,

الله يحييك ويسلمك ان شاء الله

كلامك عين الصواب ... التقصير من عندنا والابناء اكيد يبغون ايسدون الفراغ العاطفي اللي ايعيشونه حواليهم

نعم تتغير الأزمنة والاحتياجات تتغير ولكن تبقى النفوس اللي يجب ان لا تتأثر بهالمتغيرات

من فترة صارت مشاجرة في احد مطارات دول خليجية وضرب ومعارك لان واحد كان ايصور سنابشات ( والله مادري شيسمونه ما عرفته الا من اليهال ) والظاهر صور اهل مسافرين وقاموا عليه .

هذي برامج مفيدة للي يبغي يستفيد منها بس للأسف الناس قاعدة تسئ استخدامها .

اسمح لي لاني خرجت عن الموضوع اشوي واشكر مداخلتك الطيبة

تحياتي