نشر تطور المشاريع من مرحلة الفكرة والتصميم والتنفيذ

[معماري قطري]

هيئات تطوير المشاريع بكافة أنواعها كثيرة .. منها المكتب الهندسي الخاص .. كهرماء .. أَشغال .. الديار .. بروة وغيرها من المطورين العقاريين.

قطر الحمد لله ورشة عمل كبيرة وكثير من الأَقلام المأَجورة تدعي توقف المشروع الفلاني للطعن والتشكيك في قدرة قطر .. ولإبتزاز قطر كذلك للموافقة على مشاريع خيالية وباهضة التكاليف أطلقها البعض كفكرة ( عظيمة ) وهو يخطط لفائدته الخاصة من شركات ومكاتب عالمية، فمؤخراً سمعنا عن معبر شرق وتكلفته المليارية ( تم ذكر 75 مليار ريال ) وسمعنا ادعاءات كثيرة حول هذا الموضوع .. وأَتمنى دراسة بدائل أُخرى كتوسعة الكورنيش أو عمل معبر فوق دفان في البحر وجزء بسيط معلق أَو جسر عادي .. الحلول كثيرة وبأسعار أرخص بإذن الله.

في ادارة المشاريع الكبرى ليس كل مشروع يوافق عليه وهناك بدائل تدرس تكون أرخص وأكثر نفعاً .. ولازم تتخذ دراسات وموافقات حتى يتم اقرار تنفيذ المشروع والموافقة النهائية على ميزانيته.

أنا كمواطن عادي أَتمنى نشرات دورية لهذه المشاريع وموقع الكتروني موحد يحدد المشروع وطبيعته والجهة المسؤولة عن متابعة تنفيذه ومعلومات أُخرى كثيرة أهمها العد التنازلي لنهايته.

كذلك لو عملت لوحة كبيرة تغطي واجهة برج أو تكون معلقة في مكان مكشوف كالكورنيش ومكتوب فيها المشاريع الرئيسية ومتى تنتهي باللغة العالمية ليعرف الكل مؤكد بيكون أَفضل دعاية لقطر وانجازات قطر المستقبلية.

[الجـــوديّ]

مرحباً معماري قطري

يعطيك العافية ..

اتفق معك ..
تعيش الدولة في مراحل نهضة عمرانية شاملة غير مسبوقة ... نقرا عن المشاريع في الجرايد ونسمع نشوف في نشرة الأخبار المحلية .. وبس
مافيه احاطة جارية باخر التطورات متاحة للمواطن والمقيم في أي وقت ممكن يرجع لها..
وحتى لو توفرت مواقع المشاريع الكبيرة عل الانترنت.. مافيها تحديث دوري باخر التطورات وشاللي باقي.


أيضاً في نقطة مهمة جداً وهي .. أخذ رأي الناس في المشروع .. أو "بعض الناس" في المشاريع حتى قبل لا تبتدي
بعمل لقاء مفتوح بين القائمين على المشروع وبين الناس كعنصر مستفيد،
أكيد راح يفيدونهم بأفكار صغيرة وكلن على قده لكن بإمكانها انها اما تقلل مصاريف او تختصر وقت ..
او تعطى افكار بديلة اريح للناس وهم يرغبون فيها ومرتاحين عليها
ويتكرر هذا اللقاء على مراحل متباعدة من فترة انجاز المشروع كنوع من التقييم والتقويم.
وهذا للأسف مفقود .. لدينا.

[معماري قطري]

أشكرج اختي الجودي على مرورج وعلى تعليقج الطيب وما شاء الله انتي الوحيدة اللي تفاعلتي

النقاش والانتقاد وأخذ الرأي هذا شيء مهم ويطبق عند العالم المتحضر وياخذون به ناس فاهمين .. عندنا بدينا نمشي في هذا الاتجاه لكن دون المستوى المطلوب .. بالنسبة للمشروع قبل التصميم تعرض له أفكار وتصاميم مبدئية على لجنة خاصة من استشاريين كبار من البلد .. واللي اشتغلوا في حي شيلسي من شركة الديار القطرية يعرفون المعاناة مع الانجليز فترة طويلة وصلت لفوق 5 سنين ولا ادري شصار معاهم .. كل مقترح يعدلون عليه ويرفضونه.

عندنا كثير من كبار المهندسين الخبراء في تخصصاتهم .. بعضهم يشغل وظيفة حكومية في تخصصه أو تخصص مقارب وبعضهم متقاعد وبعضهم للحين يتابع أعمال حره في مجال تخصصه .. وهناك غيرهم من أَصحاب الفكر الصائب ومن العارفين لطبيعة البلاد ولعادات أهل قطر .. وهناك غيرهم كثيرين ممكن لهم علاقة كبيرة بالتخطيط والبناء وتعديل الأسعار ودراسة المناقصات وابداء حلول منطقية لمشاكل البناء عندنا.

هؤلاء نجمع لجنة منهم تجتمع حسب الحاجة وبتكليف مباشر وبمقابل وحافز مادي .. ويكون رأي اللجنة ملزم ولو طلبت تعديلات وتطوير تتم الاستجابة .. هذه اللجنة ستحسن كثيراً من اجراءات البناء وقوانين البناء ومن نوعية المشاريع وتطوير المشاريع.

الحقيقة في كل بلدة وكل مدينة مقسمة لأَجزاء تتابعها لجنة خاصة من قدامى المهندسين .. الدراسة والمتابعة ممكن يسونها غير لكن ذيلا هم اللي يعطون الموافقة النهائية طبعاً قبل القرار السياسي من صاحب القرار النهائي.

[بانغ بانغ]

اخوي معماري ... موضوعك حيوي ومهم

انا طرحت موضوع اليوم ... وكنت اقصد الاشارة لنفس النقاط اللي ذاكرها من حيث الاستقرارعلى آلية معينة في تنفيذ المشاريع لوضع قطر على الخريطة المناسبة وبالمستوى الأمثل في ظل المقومات الموجودة...

بالفعل الناس واعية وشبه كل شخص عنده اطلاع على البزنس وملامحه

فكان زين في آلية يطلع عليهاا المواطن المختص كل في مجاله ويبدي رأيه بخصوص المشاريع

صحيح فكره عامة وسطحية بس لو يتم تأطيرها وفق نظم وقواعد معينة .

[حسن]

هلا هلا

حيالله بوعبدالله موضوعك مهم فعلا وسبقت اني ذكرت قبل في ردود لي او موضوع مااذكر
وطالبت وقلت وينك ياالجهاز الاعلامي عن تلك المشاريع واشوف منذو فتره
واعلامنا بدا يركز على المشاريع وينقل الاحداث من المواقع الانشائيه
واعتقد قناه الريان

بسبب اني قبل فتره كنت مرافق لشخصيه ما من الخارج ومن ضمن الجدول رؤيته
بعض المشاريع

الصراحه انا صدمت من اللي شفته وحتى اني انقهرت ورديت ردود هجوميه على اعلامنا المغيب
على هذه المشاريع
انا ابن الوطن ماعرف ايش اللي يقاعد يصير
!!!
مشاريع ضخمه بشكل كبير جدا وانجز بعضها بمراحل كثيره
حتى المطار دخلناه من اوله الى اخره واستغربت من كان ينتقد المطار
شي فضيع ومشرف وكان محل دهشه واستعجاب واستغراب من الضيف اللي معاي
وحنا ياغافلين لكم الله

وعقبها بديت اشوف التركيز الاعلامي بدا في الظهور
تصدق قلت يمكن الجماعه شافو كلامي والهجوم عليهم وتقصيرهم

والله يامعماري سنوات بسيطه وبتشوف قطر شي ثاني ثاني

ماتشوفني اشوف شي ماتشوفونه

هاهاهاها

شكرالك اخبار الجو هناك عندك طلع سهيل ولا لا

[شيخ الديرة]

تحتاج فريق من المهتمين والمتطوعين, وليس جهة رسمية

هذا مثال

http://www.skyscrapercity.com/forumdisplay.php?f=559

وممكن تفتح قسم ضمن هذا المنتدى