-
إستفسار بخصوص القبب ..
السلام عليكم ورحمة الله ...
بإذن الله في تصميم المجلس راح يكون فيه قبة ..
فأتمنى من أصحاب الخبرة إبداء الرأي والمشورة ...
هل هناك قبب جاهزه ؟؟؟ يعني ما عليك الا التركيب .
هل الافضل خرسانه ام زجاج ؟؟
وهل الزجاج يدخل المطر والغبار ؟؟؟
ووين ممكن نحصل القبب الجاهزة سواء كان خرسانه او جبس او زجاج ؟؟
وجزاكم الله خير ..
-
تميم المجد
عليكم السلام ورحمة الله وبركاته
قبل فتحت شركة الزامل فترة وسكرت في قطر وكانت للتسويق ويجيبون من السعودية .. وكيلهم المناعي وهم يصنعون قبب كاملة من مادة بلاستيكية .. وعندنا سبكترآم يسون قبب من الزجاج المعشق .. ولو دخلت مجلس سمو الأمير الوالد فيه قبة كبيرة جداً هم مسوينها وكذلك قبب سوق الديرة وتقدر تشوفها على الطبيعة وما ادري السوق للحين موجود ولا أُزيل.
عمل القبة من الخرسانة سهل ويحتاج تصميم انشائي وتدعيم لمكان القبة بعوارض ممكن تكون معكوسة لفوق السطح وممكن تكون نازلة لو بتسوي جبس .. النازلة بتخلي القبة تبين غايرة في السقف والمعكوسة مناسبة للقبة القوسية واللي ما تجي نص دائرة تجي شكل قوس وهذي أحلى يشوفها الجالس في المجلس وتقدر تسوي فيها خليط من الفتحات شبه شفافة أو شفافة أو قزاز معشق أو قزاز ملون .. ممكن الفتحات تكون دائرية بمقاسات مختلفة .. وممكن تكون مقصوصة باستقامة نص قطر الدائرة المكونة لهذه القبة .. يعني خط يجي من قاعدة القبة لقمتها وتقدر تسوي عدد مناسب.
تحتاج تصميم معماري للقبة يتبعه تصميم انشائي .. ولازم تتم دراسة خاصة انا ما اعرفها اللي هي دراسة صدى الصوت .. بعض التشكيلات حسب المكان عندك تسوي صدى مزعج.
القبة الخرسانية تتحكم فيها أكثر من حيث تشكيلات النوافذ وعزلها .. وحطيت تفاصيل حتى بالرسم لها وصور بس ما اذكر في أي موضوع .. اللي تجي كاملة بعد حسب تصنيعها .. إخوي مركب في بيته باحاول اسئله عنها وميزتها تقدر تسويها صغيرة وتدخل نور مضاعف.
باحاول احط رسومات مقطعية لما اقصد بنصف دائرة وقوسية وفيه عندنا المرتفعة اللي تجي مثل سلندر مرتفع بس هذي ما اتوقع تنفع للمجلس.
-
انا اشوف الخرسانة احلى عقب تركب حجر عليها او جي ار سي تطلع حلوة
-
مشكورين على التجاوب وفعلا استفدت من مشاركتكم .
-
تميم المجد
أجهز رسومات اوتوكاد لتوضيح نوعية القبب لأَحد الأشخاص تواصل معاي شخصي وللكل إن شاء الله .. وبافتح موضوع جديد باسميه تفاصيل معمارية باضمنه بعض التفاصيل المهمة بالرسم والشرح المكتوب وبيكون فيه تفصيل القبب.
البعض يحب القبة تكون مبينة من الخارج كتشكيل معماري جمالي .. والقبة في الغالب رمز للمساجد ومناسبة للإرتفاع العالي للمسجد انها تكون مرتفعة وتكون نوافذها جانبية .. فهي تدخل النور وتبين نوافذها الجانبية للجالس لو كانت مشكلة أو مزخرفة أو معشقة.
لبيوتنا العادية لو لصالة بارتفاع مزدوج تنفع تكون نص دائرية .. لو قطرها 3 متر ارتفاعها 1.5 متر وممكن تجي فيها النوافذ منحنية مثل ما شرحت قبل بالرسم والصور وبارجع اضيف رسم بإذن الله.
للصالات العادية بإرتفاع 4 متر أو 3 متر واللي فيها جلسة وفي وسطها قبه المناسب أكثر هو القبة القوسية واللي يجي ارتفاعها 1 متر مثلاً وقطرها 4 متر بحيث يكون انحنائها يبين للي جالس .. والنوافذ فيها ممكن تكون زجاج معشق كطبقة متصلة مع سطح القبة الداخلي .. أو زجاج ملون بالكمبيوتر ومتصل بقواطع بسيطة .. ممكن نحاسية غير سميكة أو ستانلس ستيل أو حتى خشب .. بس من فوق تجي تغطية محكمة ومنفذة للنور .. زجاج شفاف 100% مع فريم ألمنيوم ومعزول من الجهتين بالكسرة اللي شرحتها سابقاً والمعمولة في الخرسانة.
للتوضيح هذا قطاع في الخرسانة ويجب عمله قبل صب الخرسانة في تشكيل الخشب بالفوم وثم ازالة الفوم بعد جفاف الخرسانة ويكون جاهز لتركيب الفريم عليه بثبات.
الرصاصي هو لون الخرسانة وقطعة الخرسانة ككرسي يثبت عليه الألمنيوم الأصفر اعتقد واضحة .. ولازم نركب عازل الماء قبل الفريم ونركب الفريم عليه .. فهو يثبت عدل بالبراغي الخاصة وبمواد العزل الضرورية وثم نركب قطعة ألمنيوم تسد الفتحة المعزولة بين الفريم والخرسانة .. والزجاج هنا بلاستيك 6 ملم ( بولي كاربونيت ) أو ممكن يكون زجاج بس الزجاج بيكون كم قطعة والبلاستيك فيه مرونة وقابل للانحناء وممكن يكون من قطعة واحدة وممكن يكون محبب ينشر النور بدون رؤية الشمس مباشرة أو سطوعها المباشر.
هنا مقاس القبة 3.5 للقطر وللارتفاع 1.6 بسبب الجبس النازل 60 سم للدكتات .. ممكن لو الجبس أقل نزوله تبين غير وباحط مثال للنوعية الثانية.
وهذا المخطط يوضح لنا القبة قليلة العمق .. واللي ممكن تكون نوافذها تبين لنا بسهولة واحنا جالسين في صالة عادية.
العوارض الماسكة للقبة هنا موضحة جزء مرتفع وجزء نازل.
الكمبيوتر عندي علق ولا كنت باوضح الجلسة تحت واتجاه النظر للحالتين .. 4 متر و 3 متر
-
تميم المجد
القبتين مع الإرتفاع 3 و 4 حطيتهم جنب بعض وحطيت صورة بنت جالسة وتشوف القبة وزاوية الرؤية كيف .. القبة النازلة زاوية الرؤية مريحة والثنتين مناسبين وممكن نطور التصميم أكثر حتى بتشكيلات داخلية وثريا وسطية أو حتى ليتات صغار مثبتين داخل البلاستر وصبغ القبة داخل يكون أزرق حتى لو داكن يعكس سماء قاتمة ليلية.
الخط الأحمر عبارة عن طبقة الزجاج الداخلية اللي ذكرت ممكن تكون زجاج معشق بفريم خفيف حتى من حديد مشغول .. وممكن بما إننا عندنا 8 قطع نوافذ نخلي جزء شفاف وجزء ملون للنور الطبيعي وللنور الملون .. حتى النور الملون ممكن نركب إضاءَة داخل التجويف بين البلاستيك وبين جزء الزجاج المعشق للإنارة الليلة الملونة.
وميزة الانحناء البسيط سهل تشكيل الزجاج المعشق حسب القوس البسيط هذا.
باواصل إن شاء الله بعرض المزيد مع تفاصيل ثانية.
بالنسبة للقبب البلاستيكية المصنعة والتي تركب جاهزة .. هذه تختلف ويستحسن تكون صغيرة ونصف كروية .. بحدود متر ونص للقطر اتوقع كفاية وممكن نكرر منها .. بس ضروري نسوي لها جدار جانبي خرساني يرفعها شوي للتثبيت ولسهولة تصريف الماء بعيد عن حافتها.
-
تميم المجد
هذي تشكيلة القبة المرتفعة .. ممكن نركب النوافذ جانبية .. وهذي نوافذها بارتفاع متر وارتفاعها 4 أمتار وارتفاع الجبس من الأرضية 3.4 .. تشطيب القبة من داخل ما يبين الا للواقف تحتهاويرفع راسه يشوف .. الميزة القبة تبين من الخارج وحطيت خط وارش السطح حتى يبين الجزء الظاهر للعين من بعيد.
التشطيب الخارجي مهم .. ممكن يكون بصفائح معدنية بلون عاكس .. وممكن يكون بصبغ جيد وعازل للماء ويستحسن اللون الأبيض .. ممكن تلبيس السطح بقطع فسيفساء أو ببساطة بقطع سيراميك رخيص بلون مناسب ويبين من بعيد وما تبين تفاصيله.
-
تميم المجد
الخطوط الحمر لو بنسوي العوارض نازلة ونقدر نسويها معكوسة لفوق السطح .. في حالة نازلة ممكن تعرقل دكتات التكييف وفي حالة مرتفعة لازم ندرس العزل المائي وتصريف مياه المطر عدل.
الحلول الثانية عمل الفتحات المستطيلة أو المربعة والمتناسبة مع شكل الصالة أو المجلس .. ولهذا الحل الأسطح مستقيمة ومستوية وممكن عمل الفريم من الألمنيوم والزجاج طبقتين لكن يستحسن يكون شفاف ويتثبت الفريم بعد تركيب العازل وتوصيله لجدران الفتحة وأعلاها ويتم تركيب الفريم فوقه بحيث يمسك الأطراف ما تنفتح ويثبت الفريم على قطعة مرنة وينضغط عليها ويكون العزل مثالي.
-
تميم المجد
بما إن تصميم وبناء القبب مكلف وصعب تشطيبها والأسهل هو المناور المربعة والمستطيلة .. وأَثبت للزجاج وبناؤها أسهل بكثير سويت نموذج لمنور زجاجي من هذا النوع بأبيام ( عوارض - جسور ) خرسانية صغيرة تمسك فريم الرزجاج وتخفيه .. بس نشوف من دخل تشكيلة الزجاج مع تشطيب الخرسانة .. والزجاج يتثبت على الوجه الخارجي لإنسياب مياه المطر وبطريقة التثبيب على كرسي من الخرسانة فيكون الفريم مخفي من الداخل.
الارتفاعات اقتصادية ومع فراغ 60 سم لدكت التكييف والجبس مستويين .. وتصميمه حسب الرغبة ممكن يكون فيه كورنيشات وتشكيلات.
وهذا مقطع يوضح فريم الخرسانة بالرصاصي ومركب عليه فريم الألمنيوم بالأصفر والتشكيل هذا بسيط وعملي .. حتى الزجاج يجي قطع جاهزة وكل جزء قطعة كاملة بدون فريم وسطي غير فريم الخرسانة .. ممكن نسويه بأبعاد مفتوحة لواجهات الزجاج بمقاس 2.44 في 1.22 كلوح كامل ويستحسن يكون شفاف حتى تبين السماء والنجوم في الليل والقمر .. وتنور الصالة أو المجلس أو المطبخ أو حتى الحمام بنور الشمس وبخصوصية.
-
تميم المجد
ضوابط المشاركة
- لا تستطيع إضافة مواضيع جديدة
- لا تستطيع الرد على المواضيع
- لا تستطيع إرفاق ملفات
- لا تستطيع تعديل مشاركاتك
-
قوانين المنتدى
رد مع اقتباس
