مرحبا الأخ رحال وشكرا على نقل خبر موضوع نظام الأجور للشركات
للاسف أن هذا الموضوع ماكان له حملة أعلامية لتوضيح الغرض من نظام الاجور للشركات والية عمل
هذا النظام وكيف الشركة توفق اوضاعها . الآن بس بدت توصل الرسائل وتطلب قيام الشركات بتسوية اوضاع موظفيها وعمالها
وهذا الموضوع سبب عبء كبير على البنوك لدرجة ان اجراء فتح الحساب للشركات صار ياخذ وقت كبير جدا .
علاوة على ما سبق معظم الشركات في السوق مملوكة وتدار بواسطة الجالية الاسيوية والهندية بالتحديد وما شفنا اي اعلان باللغة الانجليزية
او الهندية انا اليوم متصلين فيني اكثر من واحد يسألون شنو سالفة نظام الاجور شنسوي ووين نروح .
كان من المفترض يكون بالتدريج وعلى مراحل مثلا الشركة اللي ينتهي لها قيد المنشأة يطلب منها التسجيل والدخول في نظام الاجور وهكذا خلال سنة
بتكون كل الشركات سوت الموضوع بهدوء وبالتدريج .
الحين بتصير زحمة على البنوك و وزارة العمل خوفا من فوات المهلة وتطبيق العقوبات .
بعدين من ناحية عملية مطلوب من الشركات ايداع رواتب موظفيها وعمالها خلال الاسبوع الأول من كل شهر ما اختلفنا لكن الوقع الفعلي يقول
ان الشركات ماراح تقدر تنفذ هذا الامر بسبب ان كل شركة غالبا ما تبتدي تسدد الرواتب بعد استلام دفعات المشاريع من العملاء وكلنا نعرف في قطر
ان الدفعات تحصل كل ثلاثة او اربعة اشهر وغالبا التأخير يكون من طرف الدولة للمقاول الرئيسي في المشروع واللي بدوره لما يستلم دفعته هو يسدد لمقاولي الباطن .
اعتقد ان الموضوع بيسبب ربكة في السوق خصوصا للشركات الصغيرة والمتوسطة واللي فيها التدفق النقدي ضعيف جدا او معدوم وبالذات اللي يتعاملون بالاجل من زبائنهم .