وكالة التويوتا صبغت سيارتي دون علمي واخذ موافقة مني

[هينا]

السلام عليكم
الموضوع وما فيه شرينا سيارة كامري جديدة اصفار 2014 كاملة الزيادات واستخدمناها حدود 7 الاف كيلو وقدر الله سوينا فيها حادث بسيط جداً تضرر الزاوية اليمنى للصدام وطرف صغير من الرفرف الأيمن غير هذا لاشي يذكر وباقي الأجزاء ما شاء الله تلج .. ولا في أي ضرر.. طبعاً السيارة تامين شامل ورحت الوكالة بعد تحويلي شركة التامين لهم .. دخلت السيارة وتم تسجيل الاضرار وتدوينها كتب الموظف في الورقة تغير الصدام وتغير الليت الامامي الأيمن والكشاف أشياء أخرى .. المهم ماهمني تغير القطع .. انا ركزت على الصبغ وطلبت من الموظف انه لا يصبغ الرفرف كامل لأنه طرف الرفرف تغشر الصبغ وما فيه أي ضربه قال لي بحاول واذا ما قدرنا لازم نصبغه كامل .. قلت له ان شاء الله وحطيت في بالي ان الرفرف ينصبغ واكيد الصدام الامامي لأنه بيتغير ..
مرت 14 يوم واتصلوا عشان استلم السيارة .. وتم استلامها ولا حد قال لي شيء .. وبعد مرور4 شهور تقريباً نوينا نغير السيارة وكانت ماشية 9 الاف .. وتم الاتفاق على بيعها مع شخص عبر مزاد قطر بسعر 73 الف ووضحت له الضرر وقلت له الصدام وجزء من الرفرف او رفرف يمين كامل مصبوغ .. قال بينا الفحص ... ولما تم فحص السيارة تبين ان الرفرف الأيمن وغطاء المحرك والرفرف الايسر والصدام مصبوغين .. بصراحة انصدمت .. وحاولت اقنع الرجال اني ما عرف السالفة والسيارة توها جديدة مش ماشية شيء و في خطاء في الموضوع .. قال لي تتحمل قيمة الفحص .. ودفعت ورحنا فحص ثاني وطلعت نفس النتيجة .. الرجال اعتذر وغير راية وقال لي الظاهر داش تحت تريلا حد يصبغ مقدمة كامل عشان حادث بسيط .. وثاني يوم رحت الوكالة الورشة اللي بالصناعية اتأكد منهم وفعلا لما دخلتها لهم للفحص طلع في صبغ في الأماكن المذكورة .. وحاول الموظف يبرر لي بأن هذا اجراء عادي وقانوني عشان الألوان تتطابق .. قلت له تبي تقنعني عشان الألوان تتطابق تقوم تصبغ لي السيارة وما فيها شيء .. المشكلة فيكم اذا ما عرفتوا توصلون الى نفس درجة اللون .. مش مشكلتي .. عموماً توجهت الى برج عبد الغني اقدم شكوى ونشوف حل لان سعر السيارة طاح وصبغوا السيارة دون علمي واخذ موافقة مني .. شرحت لهم الموضوع وحاول مدير الشكاوي بنفس الطريقة ان لازم تنصبغ أجزاء عشان تتطابق الألوان .. والله اني اعرف كراجات عادية يصبغ لي أي صبغ بنفس صبغ الوكالة ومعاة ضمان .. اذا مش نفس الشي او تغير اللون ارجعها لهم .. بس ثقتنا كبيرة في الوكالة .. المهم ارجع للموضوع .. قلت لمدير قسم الشكاوي انا ابي احل الموضوع ودياً .. ويكفي ان في شهر رمضان كنتوا مغلقين من حماية المستهلك .. وكان ذهابي لهم في أواخر رمضان مع بداية ممارستهم للعمل بعد العقوبة الاغلاق .. المهم اقترح علي يشترون مني السيارة بأعلى سعر ويعطوني سيارة جديدة بسعر مخفض جداً ومميز .. طبعاً كل هل كلام والذهاب والإياب وموعد للمقابلات كانت تأخذ أسابيع .. تم تحويلي الى قسم السيارات المستعملة عشان يقيمون سيارتي .. اخذوها وفحصوها كانت ماشية 9 الف كيلو وبعد أسبوع اتصلوا وقالوا سيارتك تسوى 50 الف ريال لأنها مصبوغة مقدمة كامل .. قلت له انتم السبب مش انا .. المهم رجعت لمدير الشكاوي .. وقال لي تعال نحسب لك السيارة الجديدة وبنعطيع العرض الخاص وخصم التجار .. قيمة الكامرى نفس الي عندي موديل 2015 تقريباً 94 الف وحسب لي خصم رمضان وخصم سنه 2015 لان 2016 موجود وهذا الخصم أي واحد بيحصل عليه عادي وخصم التجار على قولته الفين ريال المهم طلعت 87500 ريال وقال لي ادفع 37500 الف ريال الفارق .. بصراحة شي ينرفز وقهر .. طلعت فوق عشان اقابل احد من المسؤولين وكان موجود المدير التنفيذي ينادونه بدكتور بس ما اذكر اسمة بس هو من عيال عبدالغني اعتقد .. لاكن للأسف رفض مقابلتي وقال لسكرتيرة خلية يروح قسم الشكاوي ... شرحت للسكرتير وطلب مدير الشكاوي ومافي فايدة ... ثم رجعت مرة ثانية واتصلت على واحد اسمة فيصل العُمري .. واخذ بيناتي وبعد أسبوع اتصلوا علي الصناعية عشان يشوفون السيارة مرة ثانية ويفحصونها .. رحت لهم وفحصوها وطلعوا لي بسالفه جديدة قالوا هذا مش صبغ هذا طبقة شفافة ... والله ياجماعه بالعين المجردة يبان في فرق بالصبغ بين الرفرف وغطاء المحرك .. وقالوا لي خلاص راح نرفع تقريرنا للوكالة وانتظر اتصال منهم .. والى هذا اليوم ولا واحد اتصل .. وبصراحة بشتكي عليهم بحماية المستهلك لان صبري نفذ منهم ..
واذا حد عندة نصية يرشدني .. وشاكر لكم

[هينا]

والحمد لله عندي صور للسيارة قبل ماتدخل الوكالة

[النهار]

احتمال الرفرف الخلفي والبانه مصبوغه من قبل ما تطلعها من الوكاله

[هينا]

لا فحصتها كامل بس المقدمة مصبوغ

[A-Alansari]

النهار يقصد انه مقدمه السيارة ممكن كانت مصبوغه من قبل ماتشتري السيارة اصلا

لانه صارت وايد ووايد وكالات يسونها لانه بعض السيارات وهي جايه الدوحه تتضرر في الشحن ويعدلونها في الدوحه ويبيعونها على انها جديدة

الي عليك تسويه خذ تقرير الشرطة عن الحادث لانه بيكوون مكتوب فيه اماكن الضرر في السيارة وبعدها اتصل حماية المستهلك وقدم شكوى

واذا طلع الموتر مصبوغ غير اماكن الضرر بيرجعون لك حقك لكن بعد مايرجعون للمرور ويتأكدون انه السيارة ماجاها حادث غير الي قلت عليه صدام ورفرف

[بعيد النظر]

^

سو نفس ما قالك الرجال ..


وانا صارلي موقف مشابه مع وكالة الجمس ..
الدعمة كانت وجه كامل .. صبغو البانة والرفارف لانهم تضررو ..


يوم البيع .. اكتشفت البيبان مصبوغة ..
مع الاعمدة اللي وراها (الغمارة) .. يعني ما تم الا السقف والبدي طبعا" !


والله ما همني قيمة الموتر .. كثر ما انصدمت وحسيت اني كذاب في اول فحص !!
وانا من طبعي افحص قبل لاعرض للبيع .. عشان اقيم الموتر .. واصدق فـ البيعة ..
بس للاسف استعيلت !!!


واتمنى انك تسعى ورى موضوعك ..
ولك الحق ! في كل شي .. شوية تقارير من الشرطة ..
وان شاء الله امورك طيبة ..

[رآعي موآجيب]

وقفها قدام باب الشركه الرئيسي ( المدخل الكبير ) واكتب قصة السياره مختصر على جلاد بالزجاج الامامي والخلفي وخلها .. ذيك الساعه الدكتور اللي مسوي نفسه حاكم ولاية التويوتا بيترجاك يقابلك ويحل الموضوع ودي

هالاشكال ما يعرف لهم الا اخوانا الكويتيين والسعوديين , تشهير قدام باب الشركه علني

وترى ملاحظة اخونا النهار محتمله جدا ، لأن هذا طبعهم الخايس من سنين

[aloosh]

السلام عليكم

من تجربتي الشخصيه والله العظيم ثاني يوم متصلين لي يبون يتوددون لي يوم قدمت شكوى عليهم في تويوتا في اليابان
قال لي بالحرف الواحد اي شي تبيه احنا حاضرين لو تبي سياره نجلس معا بعض عشان سعر

هذا رقم شركة تويوتا في اليابان ياربع والله انه يتصل فيك من شركه تويوتا ياخذ بخاطرك اهم شي لا تشتكي عليهم

ap-overseas@mail.toyota.co.jp


وجربوا واذا ما ردو عليكم خلال 48 ساعه او اقل

اهم شي حط رقمك بتصل لك مصري يطلب السموحه منك عاد انت في الموقف الاقوى

جربتهم مرتين وسوو لي العجب