من الشركات الجيدة اللي تعاملت معاها سنة 1997 في بناء عمارة صغيرة شركة جي ال سي وهي تابعة لشركة هندسة البناء القطرية اللي كانت المقاول الرئيسي في بناء الستي سنتر .. ألحين الشركة دخل معاها شريك أمريكي وغيروا الإسم ل Yale and Andrews ودخلوا بعدد عمال كبير وبتكنولوجيا بناء حديثة .. وبالصدفة عرفت بعد ما تواصلت مع مديرهم في مشروع قال لي عدد موظفيهم زاد ل 1600

بس اللي يحب يتعامل مع هذي الشركة أو غيرها يسئل عن البدائل ويفاوض وأحسن له ياخذ شغل كامل ولو يخلي عليه شيء بسيط مثل شراء بعض المواد اللي فيها اختيار مثل البلاط وأطقم الحمامات والتكييف والدرايش والأعمال الخشبية يحدد مسؤولية المقاول الرئيسي عنها .. مثلاً للأبواب على المقاول عمل الفتحات حسب المقاسات وملء الطابوق بالخرسانة وتركيب بورد خشب sub frame منه يحدد البلاستر ومنه يركب عليه الفريم بعدين ويتثبت في طابوق مقوى بخرسانة داخله .. مالك غير ممكن يحدد هذي الطريقة والمواصفات ويخلي المقاول يورد ويركب ولا يوجع راسه .. وممكن يقول الأقفال انا باوردها

بالنسبة للبلاط وأطقم الحمامات نصيحتي يخليها عليه شراؤها واختيارها وعلى المقاول معاينتها واستلامها ونقلها والمحافظة عليها وتخزينها وتركيبها حسب طريقة التركيب المتفق عليها .. حتى المقاول ما يلف ويدور ويكسر المواد ويقول هم وصلوا مكسورين.