السلام عليكم و رحمة الله و بركاته
احنا المواطنين صرنا أقلية .. في وسط هالزخم من المقيمين و الأجانب .. مادري كم وصلت نسبتنا لهم كتعداد سكاني
أعطيكم بعض الأمثلة :
- نروح المرافق الحكومية : بالغصب لما تلاقي لك موقف عشان توقف سيارتك .. تدخل تلقى قدامك طوابير و أفواج من الناس .. كم واحد أو وحدة منهم من المواطنين ؟؟
صحيح بعض الجهات خصصت أماكن للقطريين .. لكن هالجهات معدودة و محدودة
- الأماكن السياحية أو الترفيهية : مضطرين تدشون و تتزاحمون انتو و أهلكم .. هذا لو حصلتوا مجال .. زين هم متعودين على الدز و المدازز و التلزق .. احنا لا .. فاللي يصير إن الكثيرين يبتعدون و يتجنبون الذهاب لها
- مستشفى حمد و النساء و الولادة و الجلدية و الأسنان و التجميل : القطري بالعافية لما يحصل له موعد قريب ( هذا لو حصل ) .. و حتى اللي يبي يدش حق عملية يروح المستشفى و ينرد مرة و مرتين و ثلاث .. و السبب مافي سرير ( ماقول غرفة خاصة .. لا مافي سرير ولا حتى بغرفة مشتركة )
- المجمعات التجارية و المعارض : ما يحتاج اقول .. الكل شايف و عارف
- حتى مراكز تحفيظ القرآن : عيالنا بالعافية لما يحصلون مكان .. كل المراكز فل .. طبعاً التحفيظ فيه أجر و حق للجميع و بالعكس شي طيب و ما عندنا اعتراض على إتاحته للجميع
لكن نعاني في الحصول على المركز المناسب حق عيالنا .. و آخر شي حتى المكافآت المالية التشجيعية حجبت عنهم
هاذي بعض الأمثلة .. و هناك الكثير غيرها
طبعاً ندري البلد محتاج لغير المواطنين ما ننكر .. لكن ما طلبنا إلا تخصيص أماكن لأهل قطر اللي بالفعل قاعدين يعانون في بلادهم
و لا يجيني حد و يقول هاذي عنصرية .. احنا ما نبي نمنع عنهم الخدمات أو نمنع عنهم الماي و الهوا .. و الحكومة مب مقصرة فيهم ولا بتقصر
بس نبي لما نروح نقضي لنا شغلة أو حاجة .. نقدر نسويها من غير محد يزاحمنا و يضايقنا و يأخرنا
تحياتي للجميــــــع
|
رد مع اقتباس
المشاركة الأصلية كتبت بواسطة R 7 A L
