مرحبا للكل
وايد اشوف الناس هابه هالفتره بتركيا
بلد جميله وجوها رائع والاحلى انها قريبه
بس الاغلب يروح اسطنبول والي حلوها مع ان وايد مدن غيرها احلى ومافيها زحمة
بتكلم عن مدينة رحتها من فترة
كابادوكيا cappadocia
كنت متررده في البدايه اروح لها خفت اتملل
بس الحمدلله استانست فيها وايد
خذت طيران داخلي من مطار اتاتورك لين مطار كابادوكيا
تقريبا ساعه بالطيارة
بالنسبه للتذكره بغيت اخذها من السفريات بقطر طلعت تقريبا 2000 وشي للشخص
حجزت من تركيا طلعت ب 900 ريال تقريبا فرق كبير
فيها كذا فندق انا سكنت في فندق اسمه: ابواب كابادوكيا - cappadocia doors
في منطقة غورميه حجزته من booking خذت غرفه وصاله ب 700 ريال
وايد حلو والفندق مثله الكهوف الصخيريه الي مشتهره فيها المدينه
والمنظر فليل خيال
والقائمين على الفندق ولا اروع حسيت كأني في بيتي..
** من الانشطه المتوفره في كبدوكيا **
رحلة المنطاط (عجيبه عجيبه)
خليت الفندق يحجزون لي قبل لا اروح كلمتهم واتفقت معاهم
الساعه 5:20 صباحاً ركبنا الباص ودونا مكان فيه مثل بوفيه فطور ودفعنا للمنطاط
السعر تقريبا كان 150 يورو للشخص وممكن تحجزون منطاط برايفت لكم
عقب ودونا بالباص لمكان المناطيط
شي شي المنظر روعه واحنا فوق اشرقت الشمس ..
الرحلة تقريبا ساعه او ساعه ونص
بس الركبه في سلة المنطاط تعيسه
يعني كبار السن كلش ماتصلح لهم مع ان الاجانب الي معانا كانوا ماشاءالله في السبعين
المتاحف المدن الحجرية تحت الارض وفوقها
في لها رحلتين انا رحت رحله وحده .. ما في وقت معين بس لازم في النهار
رحلات للبحر مراكب وبراشوتات
حلقات المولوية (الدراويش) Whirling Dervishes
ليلة الدارويش حلو للي يحبون الهدوء تقريبا كانت ساعه عقبها شرحوا لنا عن طريق فليم قصير
اشلون تكونت هالمدينه وتاريخها
وفي ليلة تركية مثل مطعم واغاني
ركوب الخيل
المدينه فيها محلات تركية يعني تبيع نفس الاغراض تقريباً الي في البازار في اسطنبول بس السعر وايد ارخص
مانصح بالمدينه في الصيف لانها مدينه صخيره ومشمسه يعني من نص شهر 10 لين نص شهر 4 يكون الجو مناسب
وسط المدينه فيها اسواق بعد
الفندق حجز لنا كل شي ودفعنا لهم مع ( الجك آوت) عدا رحلة المنطاط
حلوه حق يومين او 3 بالكثير
وبس والله
تحياتي للجميع