بين المقاهي أنتظر ,, يمكن يمر
قبل العصر ,,, عندي إحتمال إنّه يمر
هذا المكان اللي يحب ,,, أذكر إذا صار الوعد
نلفي عليه ,,, إيدي بيديه
كنّا مثل روح وجسد
ونجلس بذيك الطاوله
اللي على الشرفه تطل ,,, ومقابله مرسى السفن
الله يامرسى السفن ,,, فيك إلتقينا من زمن
نجلس على جال البحر ,,, نصف الشّهر
ناخذ من القمره فنر ,,, ومن نظرته كل الشّعر
ومن وجنته نفح العطر ,,, كنها زهر
حل العصر وأنا أنتظر ,,, يمكن يمر
قبل الشفق
عندي إحتمال ,,, إنّه يمر
أذكر على ذاك الطريق ,,, كنت أسأله
ليه الوله ,,, منّي يزيد ,,, ومنك أجهله
فجأه نظرلي وإبتسم ,, وفي بسمته شفت العجب
ثلج وجمر ,,, ما يلتقون ,,, بس إلتقو في بسمته
قال إترك النظره تقول ,, اللي بقلبي أحمله
حل الشفق وأنا أنتظر ,,, يمكن يمر
قبل السحر
عندي إحتمال ,,, إنّه يمر
بكل الزوايا ألمحه ,,, وأتخيّله
صورته تملا جميع الأمكنه
في كل موضع له أثر يوحي إليه ,,, وأتصوّره
وأذكر تحت ذاك الشجر
اللي جمعنا في ضحا يوم الفراق
كنّا نثير الأسأله ,,, وعنّا تتوه الأجوبه
كنّا نحاول نتفق ,, بس الظروف القاسيه
تفرض علينا نفترق ,, قلت إبتعد ,, وخلني بشوقي أبتعد
كانت خجوله خطوتي ,,, ويمّه عيوني تلتفت
وكانت عيونه تلتفت ,,, يمّي بدمعه حارقه
كانت عيونه غارقه ,,, وكانت عيوني شارقه
طاف السحر وأنا أنتظر ,,, يمكن يمر
حل الفجر ,,, قلت أنسحب ,,, قبل الضحى
وأرجع على نفس المكان ,,, بين المقاهي وأنتظر
قبل العصر ,,, يمكن يمر ؟
سالم مساعد الدواي
|
رد مع اقتباس
