** مشاهدات يومية **

[بصمة قطرية]

تدرين ضوى ..
( شبابنا فيهم الخير )
دوم نسمع هالجملة و صرنا نكررها وايد
لما نشوف موقف يصير قدامنا
و لا نسمع عن موقف ..
وفعلاً شبابنا فيهم الخير
صحيح في سلبيات و مواقف سلبية
لكنها بسيطة الحمدلله
لكن مبدأ ( الخير يخص و الشر يعم )
هو اللي معطي هالسلبيات أكثر من حجمها ..
المهم
بذكر موقف ذكره لي ولدي من يومين ..
و فعلاً هالموقف حلو ..
يقول لي :
رفيجي كان مار في شارع شاف سيارة متعطلة
وقف لها ..
طلعت وحدة مع بناتها ..
يقول الوقت ظهر و المكان شارع عام و ما كان في حد واقف لهم
هو أول من وصل ..
حاول يعرف شالمشكلة .. !!
آخر شي كلم الأم و طلب منها تاخذ سيارته
و تاخذ بناتها و تروح البيت ..
و هو راح يتواصل مع زوجها أو أخوها ..
بيتها طلع قريب ..
قال لي يمه شرايج في تصرفه يوم إنه عطاها سيارته ..!
قلت له كفووو عليه والله إنه رجال ..

[بوخالد911]

المواقف المشرفة كثيرة ومنها :
اداء الصلاة من قبل رجال لخويا أثناء الدوام
فريق فزعة المواتر : يتكون من شباب تخصصوا بمساعدة الناس اللي غرزت مواترهم في سيليين
يكفي الاتصال فيهم ويجون ويطلعون الموتر. هالخدمة مجاناً.
الله يبيض وجيهم.

[طلعة الروح]

انا بكتب موقف سلبي صراحة ضايقني اليوم صج صج ..

بوصف لكم انا جاي من دوار المطافي متوجه على اشارات حمد وابي اخذ يمين اروح صوب الاهلي .

واقف على اللفه وفتحت الاشارة الي من جهة اليسار والسيارات تمشي

المهم قاعد اشوف وانتظر الفرصة لاجل ادخل موتري يوم جاتني الفرصة واطلع الموتر بسرعة اشوي الا اشوف موتر وراي طلع بسرعة ..

انا طلعت على الخط اليمين وهو طلع على الخط الوسط اشوي ويلف علي نفس الي يخرعني ولز علي ..

انا قلت اشفيه صاحي الصراحة دست ريس وجيت جمبه

أشوي آلا وحده طالعتها قامت تزاعق وترفع يدها

شفتها بنظرة وسويت الحمد لله والشكر ..

اش خلو بعض البنات للشباب في حركاتهم ..

راح الحيا خلاص لفي عليه ورفعي يدك ونزلي الجامه اشوي ونزلي وتدابغي معاه ..


صراحة موقف ازعجني
وتبون الصج الشيطان خلاني اتمنى لو انها كملت بس اشوي سيدة ..

ما اوصف لكم المتعة الي كنت راح اخليها تستمع فيها وارويها اشلون السواقه وجنونها ..

استغفر الله العظيم

صج لا يعامل الشيء بمثله
لكن بعض الاشكال يبي لك تعامله بنفس عقليتها ..

من فينا من لا يتروع بشكل شبه يومي بسبب سواقة البعض
الحمقاء والتي تنم عن الجهل او الاستهتار بالاخرين.

مثال: يكع بريك قوى بشكل مفاجئ وأحيانا بدون سبب
أو يلف فجأة بدون ضرب اشاره أو لا يترك مسافه كافية بينه
وبين مركبات الآخرين أو يجي مسرع ويديم للي قدامه ويسوي بلبله كي يفتحون له الطريق واخر شي الاشارة قدامه حمراء.

اللي ابي اوصله معاك أن احنا كبشر يجب علينا أن نلتمس العذر للبعض في بعض المواقف البسيطه ونحاول نصبر قدر المستطاع وتوقع اخطاء الاخرين المرورية وغير المرورية ومحاولة تجنبها.

[الحياة الخالدة]

موضوع جميل .. يستحق الرفع بموقف إيجابي جديد

كان عندي موعد اليوم في مستشفى الأمل .. الموقف المتوفر صغير حده على كبر السيارة
السيكيوريتي قاعد يأشر لي روحي جذي و روحي جذي و انا طبعاً متوهقة و مستعيلة لا يطوفني الموعد و الشمس حامية
و الا أحد المقيمين مار جنبنا وقف و قال لو تدخلين السيارة بالريوس وايد أحسن و عشان بعد ما تتوهقين في الطلعة .. قلت له أنا ماعرف قال انا بوقفها لج
نزلت و وقفها ما شاء الله عليه بكل سهولة .. و فكني من العبالة و المعاناة في هالشمس

جزاه الله خير و رحم الله والديه
و ما يحتاج طبعاً التأكيد على أن الخير موجود في الكل .. ولا بيكون أول .. ولا آخر موقف طيب نواجهه من إخواننا

و شكراً لج أختي ضوى

[ضوى]

مواقفكم تجنن من روعتها ياعسانا ما نخلا من هالمواقف الحلوة اللي تبعث فينا الامل والسعادة والتفاؤول

عندي مواقف وايد بس احب مشاركاتكم تسعدني اكثر

[ya3coub]

تدرين ضوى ..
( شبابنا فيهم الخير )
دوم نسمع هالجملة و صرنا نكررها وايد
لما نشوف موقف يصير قدامنا
و لا نسمع عن موقف ..
وفعلاً شبابنا فيهم الخير
صحيح في سلبيات و مواقف سلبية
لكنها بسيطة الحمدلله
لكن مبدأ ( الخير يخص و الشر يعم )
هو اللي معطي هالسلبيات أكثر من حجمها ..
المهم
بذكر موقف ذكره لي ولدي من يومين ..
و فعلاً هالموقف حلو ..
يقول لي :
رفيجي كان مار في شارع شاف سيارة متعطلة
وقف لها ..
طلعت وحدة مع بناتها ..
يقول الوقت ظهر و المكان شارع عام و ما كان في حد واقف لهم
هو أول من وصل ..
حاول يعرف شالمشكلة .. !!
آخر شي كلم الأم و طلب منها تاخذ سيارته
و تاخذ بناتها و تروح البيت ..
و هو راح يتواصل مع زوجها أو أخوها ..
بيتها طلع قريب ..
قال لي يمه شرايج في تصرفه يوم إنه عطاها سيارته ..!
قلت له كفووو عليه والله إنه رجال ..

الله يباركلج بولدج و برفيجه ايضا هاي الرفجة الصالحة بنفس الوقت خل يحاسبون ما يعطون سيارتهم لأي شخص

انا كنت اسويها قبل

بس حاليا للأسف نادر ما اوقف لوحدة بروحها إلا اذا كبيرة بالسن بالعكس ادورهم دوارة الشياب و العيايز دعاويهم يقشعر لها البدن من الطيبة و مواصلة الدعاء سوائا بالخفاء او العلم تطيب النفس و تهون الحرارة.


مرة وحدة مبنجرة عند الـــqncc و معطلة الشارع محد وقف صفيت و رجعت و قلت لها تقعد بسيارتي بالمكيف علبال ما اي احد يشوفني و يجي يساعدني سيارتها صغيرة كانت تبديل التاير ما يبيله شي جيك عالسريع و 4 بلوط و الأمور طيبة السبير يركب و تكمل دربها الي فاجأني و رفع ضغطي، بعد فترة يجي واحد بسيارته يصف جدام سيارتي و ست الحسن و الدلال تنزل و تروح تركب معاه و يحركون بدون اي شكر ولا اي كلمة تذكر. اتذكر قلت بياخذون لفه و بيرجعون.
حطيت التاير الي مبنجر بالشنطة و ركبت سيارتي و كملت دربي بدون ما انزل السيارة من الجيك ولا اسكر البلوط من القهر.

-------------------------------------

أختي ضوى موضوع شيق و جميل جدا جدا تعودنا نذكر السلبيات وما ننتبه للأعمال الطيبة و حسن الأخلاق.


اليوم ما صار شي يذكر بس كل يوم اشوف الاثنين الشين يطغى على الطيب للأسف مع زحمتنا



اكثر شي احبه و احترمه الي يوسعونلي لما اكون عالدراجة امشي بين السيارات من بعيد اشوف كم سيارة توسعلي حتى قبل ما اوصل و كل شخص يوسعلي اسلم عليه او عليها بيدي كشكر و اذا دورية اعطيهم تحية عسكرية.

و نفس ما قالت أختي بصمة شبابنا فيهم الخير و واعين و لله الحمد و مرات لما الواحد ما يوقف بعدا للمشاكل الي قد تحصل.

[ya3coub]

مشاهدات اليوم عند دوار التلفزيون انا عالدراجة وقفت اول واحد و اشوف اسعاف جاي من بعيد جدمت شوي شوي لين ما سكرت الدوار و يميني كان شاب بسيارة لأحد الوزارات نزل و أشر للسيارات انهم يمشون علشان الأسعاف يطوف


شي ايجابي و مفرح بس استغربت من الناس الي متررددين يطوفون او لا معنه اسعاف وراهم يسمعون صوته و يشوفون الرماق و الدوار مفتوح علشانهم!!

[ضوى]

يعقوب مواقفك حلوة ، وتحسسني بالتفاؤول والخير الموجود عند الناس

شكرا لك وننتظر المزيد

[ضوى]

مشهد جميل شفته اليوم عند مدرسة بنتي ، بنوتة صغيرة مسوية عنكوزين ماسكة ثلاث وردات ، بعد مادخلت بنتي صفها هي داشة لميتها وقلت لها الورد هذا لي ابتسمت وقالت لي ايه حيااااتي بريئة لميتها مرة ثانية وبستها ورحت عنها بس شنو رفعت معنوياتي صج ابتساماتها وعفويتها حلوة ، الله يحفظها ويحميها

[ya3coub]

لا جديد
امس بعزاء يوسف البدر الله يرحمة و يغفرله الشباب متفاهمين مع بعضهم و كلن يسلم و يسوي مجال لغيره.


موقف ما عجبني من يومين
الصبح سيارتين من حماية الشخصيات و كدلك اسود طويل اتوقع للسفارة الامريكية كلشي تمام واقفين اول ناس عند الأشارة سيارة ورى الكدلك و سيارة يمينها و على اليسار في رصيف.


السايئق يضحك بالتلفون و يتابع و ينزل وولا منتبه للأشارة حتى شخص بمهمة ما المفروض يستخدم الجوال و يضحك فيه

-----------------------

اليوم شاب لطيف كاشخ و راكب مرسدس سمع صوت الدراجة و انا بين السيارات راح سكر علي عطيته شوية صوت ما حبيت ازعج الناس كلها بسبه تصرف تافه من هالشخص خصوصا انه وراه بسيارتين كان في وحدة وسعتلي ما كانت منتبهه و ولعت الأشارة و مصر الأخ انه ما يخليني اطوف من جنبه كان بيدعم عقب انا طفت بس حركته نرفزتني طليت بالمنظرة و شفت طابور السيارات الي تعديتهم و قلت مردي بطوف ما يستاهل الواحد يتضايق عشانه.


و قريبا نوافيكم يوميا اشوف اشياء وايد بالشارع لو لا اني مرات اطل بالسيارات و بعضهم فيهم حريم ولا جان حطيت الكيمرة عالخوذة و اسويلكم جدول شبه يومي من الـــNear Miss
كل يوم اشوف حادث على وشك انه يصير و ربي يسلم او مناحس او اشياء ايضا حلوة و تبرد الخاطر