* دورة كيف تبني بيتك *

[الجـــوديّ]

السلام عليكم ورحمة الله وبركاته ،،،


يطرح بنك التنمية دورة تعريفية / تدريبية في بنك قطر للتنمية

** كيف تبني بيتك **

تتضمّن الارشادات والتوجيهات في اختيار المقاولين والاستشاريين وجميع مايخص عملية البناء

فيه موعدين..

3/11/2015 من 6:00م - 8:00 م

1/12/2015 من 6:00م - 8:00 م


لا بد من التسجيل على هذا الرابط

http://www.qdb.qa/arabic/Products/Lo...OrientReg.aspx

موفقين

[سعود.]

شي طيب والله ويشكرون علية .

حلو ان الواحد قبل لا يبداء في البناء يكون عندة معلومات عن خطوات البناء . ويعرف يفرق بين الصح والغلط .

[الجـــوديّ]

الدورة مجرد تعريفية مثل ماهو واضح .. في ساعتين

في ساعتينفي تقديري ان هالمبلغ الكبير اللي ينحط في بيت العمر يستحق دورات كثيرة من بداية التعريف لين التأثيث ومابعد التأثيث

فيه أمور كثيرة نجهلها .. لو عرفناها من البداية بنتلافى مشاكل كثيرة ووجع راس احنا في غنى عنه


أنصح بمثل هالدورات ... منها فايدة كبيرة للمبتدئين

[مواقف النجادة]

السلام عليكم ..

اشكر بنك التنمية على خدماتهم للمجتمع و حرصهم على القرب من الناس .. و ان شاء الله يوفقهم و يفكهم من الجزء الربوي في انشطتهم ..

انا اكثر من مرة حاولت اشترك في هذي الدورة بس ضروف عملي ما تسمح ..

و مادامت الدورة يوم واحد .. حبذا لو الاخوان في بنك التنمية ينزلون تسجيل للدورة على اليوتيوب حتى تعم الفائدة لاكبر عدد ممكن من الناس بايسر السبل ..

وسلامتكم ..

[معماري قطري]

إن شاء الله يعطون لستات بالأسماء وبالمشاكل اللي يواجهونها .. وان شاء الله يضغطون على نفسهم ويدققون العقود ويحفظون عقد عندهم للمتابعة بشكل عام.

إن شاء الله يفسرون للملاك بنود كود الخليج اللي قالوا بيطلع شهر 9 وشهر 9 راح وبيروح شهر 10 وللحين ما فيه أخبار .. وبنفس الوقت يضمنون العقد هذي البنود المهمة واللي نتمنى تكون واضحة للكل مب تنقرأ ولا ينفهم منها شيء وكلها اشارات لقوانين في دول غير وعدة طبعات .. يعني اللي يبغي يلم بالكود الخليجي لازم يجيب كل الطبعات وكل الأكواد الفرنسي والبريطاني والأمريكي وغيره .. واليوروكود طالع من حول 20 سنة وغطى كل نوعيات المباني.

إن شاء الله يطلبون من الاستشاريين المؤهلين لهذه الأعمال والمختارين بعناية تصوير لمراحل المشروع وتقارير ترسل لهم وترسل للمالك بوسائل الاتصال الحديثة .. حتى الاجتماعات المرئية والتوجيهات المرئية ممكنة وسهلة.

الحمد لله في هذا المنتدى وضحنا الكثير والكثير ووضعنا النقاط على الحروف لكثير من المشاكل وواجب هذه الجهات نحو عملية البناء واضح ولازم يسعون لتطوير البناء وتطوير آلية التقاضي .. تطوير المواصفات والقضاء على الخزعبلات المنتشرة في هذا السوق .. مثل البودرة ومثل الحديد المصدي ومثل نسوي العزل بس جهة الشمس .. ومثل كل ما رفعت بيتك أكثر أحسن .. ويحاولون يمنعون كل القطع المقلدة والمضرة في السوق سواءً للكهرباء بصناعات رديئة وأسلاك بخليط نحاس غير متجانس وضعيف في بعض الأماكن ينقطع من حرارة التيار ويحترق أحياناً.

هنالك مواصفات مادة وتوصيف للتركيب بطرق مثالية واحتياطات تضمن تركيب مناسب .. ولهذا لازم ندخل في ترخيص المهنيين لشغلات محددة حسب خبراتهم وحسب تأهيلهم مهنياً وحسب اختبارهم اختبار عملي يعطون شهادات على أساسه ويسمح لهم بالممارسة .. مواصفات المادة على الجهة الأُخرى نطالب مختبراتنا الوطنية بفحصها وتأكيد مواصفاتها المكتوبة لأن الغش في هذا المجال كبير من المورد ومن المُصنع.

نطالب بتدقيق العقود وتوثيقها وتضمينها ما هو ضروري لحماية حقوق كل الأطراف ولمتابعة أداء الاستشاري المشرف والمقاول وعدم وجود تجاوزات كبيرة من المالك .. هذه المتابعة قد تكون شهرية وقد تكون بتقارير مصورة يرسلها الاستشاري ثم مرور مهندس ممثل للبنك ومتابع للتنفيذ في حال الشك في شيء معين .. وهذي الإجراءات تعمل في كثير من الدول والمالك يوصله حقه بدون ما يدري.

[معماري قطري]

هنالك أُمنية كبيرة على المستويات الموجودة من استشاريين ومقاولين وهي التسعير بحساب كميات مفصل والدفعات كذلك على حساب الكميات هذا والتي تكون منجزة فعلياً في الموقع .. مع خصم 10% من كل دفعة لدفعة الضمان اللي المفروض يستلمها المقاول حسب قوانين قطر بعد 400 يوم من استلام المبنى .. واستلام المبنى لازم يتم بواسطة الجهة الممولة لو حبوا ييتابعون صح وبوجود المالك والمقاول .. وخصم 10% على أساس انها تكون مستلمة مقدماً مع الدفعة المقدمة.

لنفترض مبنى عقده مليون ريال وطلب المقاول دفعة 110000 بعد نهاية التأسيس والدفان .. وحسب حساب الكميات هذي الكمية المنجزة وهذي تكلفتها فهو يستحق 110000 مخصومة منها 10% من الدفعة المقدمة والمتفق عليها ولنفترض كانت 120000 فيتم خصم 12000 ريال على أنها دُفعت مسبقاً .. ويتم خصم كذلك 10% من ال 110000 وهي 11000 تحفظ لدى المالك كدفعة ضمان للصيانة .. فيكون صافي الدفعة للمقاول 110000 - 23000 = 87000 .. الدفعة المقدمة تتناقص بمقدار 10% مع كل دفعة والدفعة المحتجزة للصيانة تتزايد بمقدار 10% وذلك على فرضية أن المراحل 10 مراحل مقسمة على 10 دفعات .. قد تكون مرحلة ما تكلف 40000 مثلاً فتكون الدفعة بسيطة جداً وبهذا يضمن المقاول دفعات مساوية للأعمال المنجزة فعلياً ويضمن المالك حصوله على مبلغ محجوز كضمان للصيانة والمقاول يجتهد لعمل اللازم بجودة لا تستدعي الصيانة وخسارة جزء كبير من الربح.

هذا التقسيم المالي يعطي المالك رؤية مسبقة لتوزيع الموازنة على المشروع .. ويعطيه فرصة لترتيب ما اتفق على ترتيبه كالاتفاق مع مقاول تركيب ابواب خشبية أو نوافذ المنيوم أو يو بي في سي مع تحديد دور المقاول الرئيسي في مساعدة المقاول الفرعي .. أو لشراء بعض المواد التي اتفق على تركيبها بواسطة المقاول وعلى طريقة التركيب وعلى نقل المواد وفحصها .. وكل هذا شرحته في موضوع العقود الهندسية وان شاء الله أُجدد هذا الموضوع بوضع المثال من حساب الكميات والصور المفقودة منه حسب طلب أحد الأعضاء الكرام وأتمنى الكل يستفيد من هذا الموضوع.

[sweet qatar]

شكرآ الجودي علي الإعلان

معماري الدورة كلش مب جذي

مجرد ذكر خطوات و خطوط رئيسية

و توجيهات عامة

مثل ضرورة تلف علي 6 أو 9 مكاتب تصميم و شلون تحط احتياجاتك


أنا مثلك اتمني الي قلته لكن هذا مب دور بنك التنمية بس

دور البلدية و هيئة المواصفات و التجارة

[معماري قطري]

الله يعين ما يقدرون يعني يرشحون أو يؤهلون مكاتب معينة ناجحة يخلون المالك ضحية للمكاتب الرديئة .. ولا يقدرون يسون شيء من اللي ذكرته لحماية استثمار هم يدفعون قيمته .. خاطري احضر هذي الورش .. بس الظاهر ورشة من طرف واحد اسمع وبس

[الجـــوديّ]

اقتراحك وجيه أخوي مواقف النجادة .. ان شاءالله يوصل للمسؤولين عن طريق المنتدى ..

وياليت يكون لهم قناة توعوية في اليوتيوب يستفيد منها كل المستفيدين من القروض ..

فيه نقص شديد في هذا الجانب

:

أخوي معماري قطر ... دائماً توضح لنا الكثير الغايب عنا الله يجزاك خير وفي ميزان حسناتك ..

مثل ما قالت سويت قطر .. قد تكون أمور فنية من اختصاصات جهات معنية أخرى

لكن نتمنى انهم يتحدون ويتم التنسيق فيما بينهم لصالح المواطن المستفيد من القرض ..

فيه حد يقدر .. وحد ما يقدر.


.. للحين يرن في أذني صوت الأرامل والمطلقات المغلوبين على أمرهم

وهم يصيحون في برنامج وطني الحبيب صباح الخير

من مماطلة المقاولين والدفعات اللي راحت عليهم ومب قادرين يمشون في بنيان البيت

ليش مخليين العالم ضايعة ... ومخليين المقاولين والعمال يستغلون المواطن وهم يتفرجون !!

ويوم انهم تحركوا شوي .. خصصوا هالساعتين ..

مشكورين .. ونتمنى يكملون احسانهم.

[sweet qatar]

الله يعين ما يقدرون يعني يرشحون أو يؤهلون مكاتب معينة ناجحة يخلون المالك ضحية للمكاتب الرديئة .. ولا يقدرون يسون شيء من اللي ذكرته لحماية استثمار هم يدفعون قيمته .. خاطري احضر هذي الورش .. بس الظاهر ورشة من طرف واحد اسمع وبس

لأ طبعاً .. مايصير يرشحون أو يحددون مكتب مقاول او استشاري

تخيل يسوونها ويجيك هامور ياخذ الامتياز

و ينفتح له منجم ذهب وتستمر معاناة الناس !!!


شوف أخوي الدورة تعريفية .. باوربوينت بخطوات واضحة ومتسلسة

حق الي أول مرة بيدخل المجال

مستحيل واحد ما يعرف شي اقط عليه معلومات لها أول مالها تالي !!