ماهي افضل الشركات الهندسية لفحص الفلل الجديده وجودة بناءها ؟
السلام عليكم ورحمة الله وبركاته اخواني وخواتي
احنا في حالة بيع لبيتنا القديم وشفنا بيت جديد وعجبنا كثير وناسب ميزانيتنا لكن؟
خايفين من موضوع جودة البناء والتشطيب الصراحه خصوصا بعد ما شفت عدة مواضيع عن الغش في البناء من المقاولين و الكهرباء والماي ومن هالاشياء
هل في شركات هندسيه تتولى فحص فلل جديده قبل الشراء بحيث يقولنا اذا فيها عيب او شي قبل لا ندفع فلوسنا ونخسر ع الفاضي؟؟ وجزاكم الله خير مقدما
قال رسول الله صلى الله عليه وسلم : (أنا زعيم بيت في ربض الجنة لمن ترك المراء وإن كان محقاً ) ..
المراء = الجدال
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " لا يَكُونُ لِرَجُلٍ ثَلاثُ بَنَاتٍ أَوْ ثَلاثُ أَخَوَاتٍ أَوِ اثْنَتَانِ أَوْ أُخْتَانِ فَيَتَّقِي اللَّهَ فِيهِنَّ وَيُحْسِنُ إِلَيْهِنَّ إِلا دَخَلَ الْجَنَّةَ "
إختي فيه مختبرات هندسية لفحص التربة لكن فحص البنيان ما ادري
فيه تجهيزات حتى بالأشعة مثل اللي تبين عظام الانسان نفسها تبين الحديد .. بس عندنا مختبرات متخصصة الله أعلم .. تبغين ارشح لج مكتبين احتمال عندهم خبرات هندسية .. مثل اتحاد قطر للتخطيط عندهم خبرات في كل مجال مثل الكهربة ويفحصون سماكة الوايرات والقواطع.
فحص المياه والتسريب والمعاينة بالنظر ممكن من ناس كثيرين وكل واحد واجتهاده وخبرته .. وانا ان شاء الله مب مقصر مع الكل لكن الفحص التخصصي ضروري .. وفحص تسريب الماي من البيبات يقدر يسويه أي بايب فيتر شاطر بضغط البايبات بالماي .. فحص السلوبات حتى بتيلة ونشوف شلون تتدحرج ووين تتجه نقدر نسويه للسقف وللحمامات ولازم تتجه جهة الصرف.
المعاينة الشلوخ وغيرها واستواء البلاستر لازم نشوفه بنور في الليل ولا بجهاز الليزر.
الدرايش نفتحها ونسكرها كلها بالدور ونشوف ثباتها وقوتها وعدم تسريبها .. لو نبي نرش عليها ماي من برا ونلاحظ.
كسياسة عامة نطلع أخطاء قد ما نقدر حتى نحصل سعر مناسب.
المكتب الثاني نسيت اقول عنه هو مكتب ام زد اند بارتنرز والباقي أكيد فيهم متخصصين بس هالمكتبين متخصصين .. إم زد صوب مطعم الفول في بن محمود .. واتحاد قطر صوب السينمات ورا عمارة الجبر مكان ديوان المحاسبة قبل .. ورا الجبر للنظارات.
أما مكاتب العقارات واللي يسمونهم خبراء التثمين ما ادري شمؤهلاتهم وشخبرتهم
اعتقد اخوي معماري ... اذا الفلة جديده ممكن يرجعون لملف إتمام البناء في البلدية او المكتب الاستشاري و يطلبون نتائج الكيوب تست او يرجعون للمختبر .. ممكن يسون كور تست على الاعمد و السلاب لو مافيه مشكله .... مختبرات التيسير عندهم خبره في الكور تست يقدر يأخذ رندوم تست من الجراند بيم و الاعمده و الاسلابات ... ارجع و أقول اذا ما فيه كيوب تست موجود ... و الا اشرايك طال عمرك .... في مشكله بسيطه عندنا في الدوحة كل يتصيد و يحمل على ظهر المالك يعني اي مكتب يقوم بها الشي راح يبالغ بتكلفة مبالغ فيها بس لو عرفت انتي شتبي و ايش يقنعك تتواصل لوحدك مع المختبر و تحدد الاختبارات اللي تبيها و خلاص .
صحيح اخوي الملياردير ذكرتني بمختبرات التيسير .. شوف بالنسبة لي الهيكل الانشائي في الغالب ما عليه خوف ومبالغ فيه وتحسنت الخرسانات كثير ألحين .. ممكن بالمعاينة نشوف بسهولة والحديد والخرسانة لو فيهم خلل تصميمي أو ضعف يعطون إنذار واضح وبوقت كافي .. اللي هو الشلوخ وأنواعها.
الاستشاري الشاطر والأمين أكيد يفترض يعاين قبل بعدين يقرر لو يحتاج اختبار .. انا يهمني أكثر عزل المياه والكهرب وجودة المواسير وجودة التشطيبات .. وهذي صعب نحصلها في البيوت التجارية الا قلة .. الخشب نفحصه عدل ممكن تكون فيه أرضة .. الأبواب نجربها نفتحها ونسكرها بعضها تحك .. البانيوهات نصب فيها ماي ونشوف شلون يتصرف .. المغاسل كذلك نجربها .. المعاينة تغطي كل شيء تقريباً.
انا جبت معاي جهاز اللي يكشف الرطوبة بس كتلوجه بالألماني ويبي لي وقت اتعلم عليه .. بكرة بإذن الله في الليل بارجع قطر وهذا جهاز جيد لفحص التسريب حطيت عنه مقطع يوتيوب في يوتيوبيات البناء .. وجبت اللي يكشف مكان المعادن في الحائط للكهرب وللحديد .. ومتوقع هذي التجهيزات موجودة في قطر للمهتمين.
خدعة كبيرة يسونها اللي بيبيعون يكذبون في مساحة البنيان وفي مساحة الأرض .. وهذي حتى بعض الاستشاريين يكتبونها على الخرائط غير عن الواقع حق بس الرخصة .. العقاريون يزيدون المساحة لسهولة البيع والبيع بسعر عالي .. والاستشاريون يقللون المساحة لأن التخطيط يسمح بمساحة معينة وهذا عند البعض منهم .. والمالك يواجه مشكلة الكهرباء الضعيفة في المساحة المسجلة أقل .. أو صغر بعض المساحات بنص متر أو متر والمكتوب في الخرائط غير.
اخوي .. الواحد اشلون يعرف المساحة الحقيقية للمبنى و الارض؟؟المشاركة الأصلية كتبت بواسطة معماري قطري
هل هناك جهة ممكن الواحد يرجع لها؟؟؟
أما هو يقيس على الطبيعة وهذي عملية سهلة بجهاز الليزر .. أو يشوف حد مختص أو شركة مساحة حتى تحدد المستويات ومستوى الحوش والميلان ولو فيه هبوط أو جزء ينقع فيه الماي
,
,
مرحبا
ما شاء الله الاخوان ما قصروا في الشرح انا بتكلم في الجوانب الاخرى
الطريقه البسيطه والسهله للشخص قليل الخبره للشراء
نتبع نفس اسلوب اذا تقدم شخص ( للخطبه )
بس نسئل عن الشخص مالك العقار
لان الي يبيعون الفلل والعقارات اشخاص معروفين في السوق
فيهم المعروف بحسن السيره والاخلاق والالتزام والخوف من الله
وفيهم الي يبيع بدون ذمه وضمير
هذا معروف وهذا معروف في السوق وكل وله سمعته بسوق العقار
في اسماء معينه ما نشتري منهم ولو كان بنص السعر
من المهم جدا جدا اخذ هذه المستندات
1- رخصه البناء
2- اتمام البناء
3- كرت الكهرباء
4-نسخه من خرائط البيت كامله ورق
5- سي دي للخرائط اوتوكاد
6- صوره من ملكيه الارض
7- ضمان العازل المائي والحراري
اسم الكهربائي ورقم تلفونه
اسم الفيتري ورقم تلفونه
ضمان وتعهد 400 يوم مكتوب وموقع ومختوم على الفيلا للصيانه ( ضروري جدا )
تتم هذه الامور قبل دفع قيمه الفيلا
هذه من اساسيات شراء العقار
,
,
لو البيت جديد أكيد ضمان الصيانة ضروري ويقدر المشتري يضمن العقد شرط حجز دفعة من المبلغ لفترة الضمان المتبقية أو بفترة جديدة 400 يوم أو حولها أو حسب الإتفاق .. حتى لو البيت له فترة وبيضمنه صاحبه أو الشركة اللي بانيته يحجز مبلغ .. 5% مبلغ معقول ويغطي أغلب مشاكل الضمان.
صيغة العقد لبند الضمان لازم تحدد طريقة التصليح كمثلاً يكون باتصال من المالك الحالي للمالك القديم وتوضيح للمشكلة .. والمالك القديم عليه يحل المشكلة في خلال شهر .. تحديد طبيعة الصيانة أو الضمان يكون شامل وبدون شروط .. وشيصير لو المالك القديم أهمل الموضوع ولا أصلح الخلل؟ وتحديد الخطوات واللي يفترض المالك الجديد يصلح الخلل ويخصم المبلغ من دفعة الضمان بتقديم فواتير للمالك القديم.
شيصير لو الخلل إنشائي وكبير وصعب اصلاحه .. وهذا شبه مستبعد عندنا .. لو البيت وضعه جيد وقت الشراء يبقى كذلك لفترة طويلة وغالبية البيوت تطلع مشاكلها الإنشائية بعد السنة العاشرة.
كل الشكر للأخ شموخ دائم اللي أضاف نقطة الضمان وهي نقطة مهمة وتوفر للمالك الجديد مبلغ يقدر يدفعه على راحته بعد انتهاء الفترة .. انا تأخرت على المقاول حول سنتين .. يعني أكثر من 700 يوم وما اذكر كم كانت نسبة مبلغ الضمان أعتقد 10%.
بصراحه والله كفيتو و وفيتو اخواني وفيكم الخير وبيض الله وجيهكم صج صج جزاكم الله خير والله وفيكم الخير ماقصرتوا ابددددددددد جعله بميزان حسناتكم امين يارب
بس اخواني بغيت اسالكم ..
بصراحه استغربنا يوم طلبنا من المالك هالاوراق قبل شراء المنزل ما رضى يعطينا اي شي وقال اللي يشتغل عنده ان الرجل سمعته طيبه ورجال معروف جدا بالسوق ولما رحت ادور اسم الشركه اللي بنت البيت مالقيت اسمهم باللسته اللي مكتوب فيها اسامي شركات المقاوله وتصنيفها .. وبنفس الوقت رافضين يعطونا اي ورقة عن البيت ويقولون كل شي ينعطى عقب الدفع انزين شلون جي بعد الواحد شلون يضمن نفسه ويتاكد كل شي اوك وهو مايقدر ياخذ الاوراق ولا يتاكد من شي ؟؟ واحنا والله عاجبنا البيت جدا ومناسب لاحتياجاتنا للغايه لكن الاوراق اللي قلتو المفروض نطلبها رفض المالك اعطائنا اياها ف شالدبره !! خاطري اسال عن هالشركة بس مو عارفه اسال من عنها ياليت بليز حد يساعدني بهالموضوع وله دعوة بظهر الغيب والله
قال رسول الله صلى الله عليه وسلم : (أنا زعيم بيت في ربض الجنة لمن ترك المراء وإن كان محقاً ) ..
المراء = الجدال
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " لا يَكُونُ لِرَجُلٍ ثَلاثُ بَنَاتٍ أَوْ ثَلاثُ أَخَوَاتٍ أَوِ اثْنَتَانِ أَوْ أُخْتَانِ فَيَتَّقِي اللَّهَ فِيهِنَّ وَيُحْسِنُ إِلَيْهِنَّ إِلا دَخَلَ الْجَنَّةَ "
ضوابط المشاركة
رد مع اقتباس