معانا وحده بالدوام كانت وااايد تعبانه من الديسك
و جربت كل انواع العلاج بالمستشفيات و لا استفادت
المهم قبل فتره سمعت عن عشبه يقولون عنها القبار او الكبار او الشفلح
و يابوولها العشبه و تقول انها طحنته و خلطته بالماي و حطته ع موضع العمود الفقري بالكامل
و بعدها بخمس ايام كررت العملية
و بعدها بخمس ايام بعد كررت العمليه
يعني 3 جلسات ب 10 اياام
و تحلف يميين ان باول يلسه قلت الالام بنسبة 60 بالميه
الجلسه الثانيه اختفت الالام نهائيا
الجلسه الثالثه كانت من باب الاحتياط و اتمام عملية العلاج
و الحمدلله انتهت المعاناة و تقول ان الضغط الفظيع ع العصب انتهى بليا رجعه
و القبار عشبه تتواجد بتركيا و سوريا و دول المغرب العربي
تقول ربيعتي انها اشترت من عطار مغربي فبوظبي ياب لها العشبه من المغرب الكيلو بعشرين درهم
و الكيلو يكفي لاكثر من عشرين جلسه و مع الشحن كلفها 270 درهم
و تقول انها تعاملت قبل مع عطار من الاردن لكن باع لهم الكيلو ب 800 درهم و طلع مغشوش
القبار عباره عن حبوب يابسه لونها بني مايل للغامج الافضل تاخذونها حبوب و تطحنونها
و القبار بعد يعالج العصبه اللي تقبض الجتف و الرقبه و لها مفعول سحري لعلاج الام العظام و المفاصل حسب ما قريت
انا نزلت الموضوع بالحوار العام لان قريت بين الردود رد لعضو يقول ان ربيعه متلعوز من الديسك
وما اذكر اسم العضو و الا كنت براسله فعلشان جذا نزلت الموضوع بالعام علشان يستفيدون منه اللي يعانون من الديسك
انا ربيعتي كانت وايد تغمضني ما تروم تيلس وايد و لو وقفت وايد تتعب و حاليا ربي يحفظها تتحرك و تيلس و مرتاااحه بعد ما رب العالمين من عليها بالشفاااء
و اظن معانا اخ من المغرب بالمنتدى بيقدر يوفر الكميات لان حسب ما قالت لي ان القبار الاصلي و اللي مب مغشوش متوفر بمحلات العطاره بالمغرب و شي نوعين نوع لونه اخضر هذا للاكل و نوع يابس لونه بني هذا اللي ينطحن و يستخدمونه لعلاج الديسك
و اسمحوا لي وايد اهذرب بس قصدي احط كل التفاصيل علشان الكل يستفييد
ودااعة الله