مهم جداااا
المريض عندنا عشان مشاكل في القلب...
عنده هبوط في القلب و جسمه فيه سوايل زيادة... هيقعد عندنا في المستشفي يومين نديله مدرات و نظبط له أدوية القلب و مع السلامة...
بعد يومين كرات الدم البيضاء زادت شوية وفي أثناء المرور بنناقش الحالة...
الطبيب الشاب الي لسه في مرحلة التدريب بيقترح نبدأ مضاد حيوي اسمه سيفترياكسون و بيسألني إيه رأي؟
علي غير عادتي رديت ببرود...
قلت له رأيي في إيه؟
اديني تشخيص أديك رأي... مفيش تشخيص يبقي مفيش رأي...
و هنا الطبيبة المشرفة مقدرتش تمسك نفسها...
الطبيبة من أصول نيجيرية و متربية في الوسط الأمريكي ... الشكل و اللهجة الناتجة عن التركيبة دي يخليك حريص جدا إنك تتجنب مواجهة معاها...
خيبة أملها كان ظاهرة في لغة الجسد و التعبير...
كانت مصدومة...
إزاي الدكتور الصغير ده عاوز يدي مضاد من يغير ما يعرف بيديه ليه... طب هيختاره علي أي أساس...
طبعا الطبيبة دي مش عارفة المعلومة الي أغلب الأطباء و الصيادلة في دول العالم التالت عارفينها و هي إن السيفترياكسون بيطول العمر و يزود الرزق و فيه شفاء من كل داء...
الطبيبة الريسة هرت الطبيب الصغير أسئلة عن الفحوصات الي عملها ... الشاب عمل شغله صح و كل شيء سلبي... مفيش مصدر للعدوي...
لكن زيادة كرات الدم البيضة ممكن تكون علامة للعدوي...
و هنا الطبيبة السمراء زاد حماسها تاني و وجهت الكلام للكل أطباء و طلبة طب و بنظرة قوية قالت لي إنت متجاوبش خلي الناس الي بتتعلم تجاوب... السؤال إيه الأسباب الي ممكن تخلي كرات الدم البيضة تزيد...
و تباري الشباب المذاكر في الإجابة الصحيحة...
الطبيب الشاب فاهم و عارف لكن رغبته في عمل شيء كان أقوي من العلم الي عنده...
هو لسه بيتعلم و حاسس إنه لازم ياخد رد فعل لكل حاجة بيشوفها...
لكن الطبيبة المتمكنة وقفته و ادته درس في الأستعمال السليم للمضادات...
*****
في مجموعة باكتيريا مقاومة للمضادات اسمها cre البكتيريا دي مصدر قلق كبير في الغرب و بشوف حالة أو حالتين كل كام شهر... نوع خاص منها اسمه kpc شفت منه حالات قليلة جدا في شغلي في أمريكا...
مرة من المرات كنت في مستشفي كبير في القاهرة و جت السيرة فأحد الزميلات بتقلي قلبك أبيض إحنا عندنا 30 حالة ماتت بالبكتيريا دي الشهر الي فات بس...
*****
تقرير انجليزي بيتنبأ إن بحلول 2050 هيكون في حالة وفاة بسبب الميكروبات المقاومة للمضادت الحيوية كل 3 ثواني علي مستوي العالم...
في أفريقيا هيكون في 4 مليون حالة وفاة سنويا بسبب الميكروبات المقاومة للمضادات الحيوية مقابل حوالي 300 ألف في أوروبا أو أمريكا...
*****
بالعربي المضاد الي انت بتخده أو بتوصفه علي الفاضي و المليان له تكلفه عالية... تكلفة في الأرواح...
كل استعمال لمضاد بدون لازمة بيقرب البشرية من وضع كارثي حتي الأن ملوش مخرج واضح...
فرق الأرقام بين أوروبا و أمريكا و أفريقيا و أسيا مش نتيجة لعدد السكان بس... الفرق الأساسي هو حجم الاستعمال الخاطيء للمضادات الحيوي...
*****
الواقع إن المضاد الي انت بتاخده علي الفاضي و المليان ممكن يكون سبب وفاتك أو سبب وفاة حد قريب منك...
استعمال المضاد له تمن...
*****
علي المستوي الشخصي في ال 15 سنة الي فاتوا استعملت مضاد حيوي مرة واحدة بس و كان تشخيصي التهاب رئوي بالكشف و الأشعة و الأعراض... مكنش دور برد و لا كحة و لا نزلة شعبية...
ولادي الأربعة واحد منهم بس الي أخد مضاد حيوي مرة واحدة في حياته...
المضاد الحيوي لا يؤخذ إلا إذا كانت الفايدة أكبر من الضرر للفرد و المجتمع و البشرية...
*****
دور البرد مش محتاج مضاد ... التهاب الحلق في الغالب مش محتاج مضاد إلا في حالات معينة و الانتظار للشفاء التلقائي غالبا هو القرار السليم... الكحة مش محتاجة مضاد ... النزلة الشعبية مش محتاجة مضاد ... التهاب الجيوب الأنفية البسيط و المتوسط مش محتاج مضاد إلا لو استمر فترة طويلة و ده بعد استبعاد الحساسية أو أي أسباب غير ميكروبية...
مجرد وجود العيان في المستشفي أو الرعاية مش مبرر لوصف مضاد...
قلة النضافة مش منطق لوصف مضاد واسع المدي ... نضف غرفة عملياتك و امشي علي الأصول...
*****
الأخ أليكسندر فليمنج الي اكتشف البنسلين حذر من الي بيحصل ده في مرحلة مبكرة في مقال كتبه سنة 1945 و في المقال كاتب إن الانسان الي بدون تفكير الي بيلعب يالبنسيلين مسؤول أخلاقيا عن وفاة مريض بسبب بكتيريا مقاومة اتكونت بسبب استعمال خاطيء للمضادات الحيوية...
*****
السؤال في كام واحد هيموت عشان إنت مصر توصف أو تاخد مضاد من غير وجود داعي يبرره؟
|
رد مع اقتباس
المشاركة الأصلية كتبت بواسطة ahmed saleh
