موضوع تكييف فلتي الجديدة .. دكتات ؟ سنترال ؟

[asulaiti]

لقد بدأت الان في عملية الاستعداد لبناء فلتي ،، وبدأت معها بوادر التفكير والحيرة في موضوع اختيار المناسب من حيث التكييف والديكور وتجهيز المطابخ ... الخ

اعلم الموضوع قد طرح مسبقا في المنتدى .. ولكن تجديده في موضوع جديد اعتقد سيكون مفيداً للجميع ..

بالنسبة لمكيفات السبليت .. تم التأكد من أنواع محددة اثبتت سمعتها وجدارتها من خلال تجارب الأعضاء ..
جري - متسوبيشي - جنرال - فوجي .. وغيرهم من الماركات المشهورة .. وطبعاً الأغلبية يرى أن الكومبريسر يكون بستن أفضل ..

الآن نود التطرق بشكل أكبر لموضوع تكيف الدكت .. اللي الماكينة تركب الله يعزكم في الحمام .. وتوزع الدكتات في غرفة النوم وغرفة الملابس ..
في نوع اللي هو التكييف المركزي الكامل .. وهي ماكينة وحده وتوزع للبيت كله .. وهو الأغلى ..

من خلال تجاربكم ومعلوماتكم ؟
أفضل شركات تكييف المنازل بواسطة الدكتات .. ماهي ؟

في حد جرب Gree نوع الدكتات ؟
التجارب معظمها كانت في السبليت لهذه الماركة وهو ممتاز جداً .. لكن ما سمعت عن حد ركب تكييف دكتات من جري ..
ولهذا السبب طرحت السؤال .. واذا النصيحة بالابتعاد عن هذه الماركة لهذا النوع من التكييف ..
ما الشركة التي تنصح بها ؟؟

أيضاً .. هناك مكيفات يطلق عليها الكاسيت .. وهي التي يتم تركيبها في السقف وتدفع الهواء من أربع جهات ..
شركة جري سعرهم ممتاز .. لكن ما سمعت حد جربهم .. أنا أفكر أركبهم عندي في الصالات والمجلس ..
لسعرهم المعقول مقارنة بالدكتات .. ولكن لا أعرف ماهي مشاكلهم أو عيوبهم ..

أنا الان بدأت في زيارة هذه الشركات لأخد عروض الاسعار .. بالفعل زرت حتى الان شركتين لمتسوبيشي .. وشركة المناعي ... وشركة جري كذلك ..
اعطيتهم الخرائط وبانتظار عروض الاسعار ..

وحتى وقت وصول الاسعار أتمنى أن اسمع منكم اجابات حول الأسئلة أعلاه ..
والشكر موصول مقدماً للجميع ..

[معماري قطري]

الله يوفقك صج صعبة الإختيارات

انا باقول لك لو انا مكانك بكل أمانة .. لأني عارف تصميمك وعارف ( تقريباً ) مشاكل التكييف وباقي التشطيبات

بالنسبة للتكييف باختار دكت سبلت لغرف النوم وباطلب تكون المكينة في غرفة الملابس وباسوي غرف الملابس النوع المغلق بباب والمفتوح من داخل وحتى باركب أبواب قوية وبربلات حتى يكون الصوت ما ينسمع كلش .. للحمام باخلي فتحة تهوئة من فوق يدخل منها هواء الغرفة البارد ويطلع مع الشفط للخارج وباخلي الشفاط يشتغل تماتيك مع فتح الباب .. وحتى إنارة الحمام الرئيسية تماتيك مع سبوتات بتحكم منفصل ويدوي لوقت السباحة ومع اضاءَة تجميلية

باسوي عازل حراري قوي ومناسب أَما بسلابات السيبوريكس وتحتها الواح الفوم أو بالحجر الميكانيك وفي الفراغ فوم .. إختيار النوعية المناسبة للتكييف يعتمد على السمعة والمواصفات ودرجة الهدوء اللي ابيها .. يمكن انا مقتنع أَكثر بالسبلت العادي والمعلق في السقف وخايف من شغل الدكتات ولو انترست غبار وقصة تنظيفها حتى لو البيت معزول زين لكن لغرف النوم نحتاج الهدوء والدكت سبلت من أَكثر الأنواع هدوءاً

الله يوفقك وتخلص تصميمك وبنيانك بدون تعب وبتوفيق

[Azizuk]

انا واحد من اللي جرب وركب مكيفات الدكت

بس لأحد الان ماخلص البيت بعدني في التشطيب

بس بصراحه تلعوزت مع أهل الجبس وأهل التكيف

كل واحد يماطل مع الثاني

الشي اللي ابي أقول له بالنسبة للوحدة الداخلية معظم الشركات تأخذ صيني

بس الأهم شي الوحدة الخارجية هو الكمبرسر قلب المكيف

يعتمد حجم قياس بايب المكيف من شركة الى شركة

معظم الشركات حجم المكيف 3 طن يتركب بايب 3/4 والبايب الثاني مقاس غير

الا مكيفات الامريكية وخاصة مكيف ترين مقاساته غير وبايباته تجي مستقيمة صعب ثنيها ولازم تتلحم لان كل بايب يجي خمسه متر طول ويتلحم بوصلات حتى توصل الى موقع المكيف

المهم مابي أعور رأسك هناك أمور كثيرة تتعلق بمشاكل توصيل البيبات في الحوائط والتوصيل الكهربائي

ولازم مراعات وصلة الكهرباء اذا التكيف من اربع طن وطالع لازم يكون 3 فيز للوحدة الخارجية

في أمور كثيرة تتعلق باختيار نوع التكيف

عندك جسور ساقطه عندك فتحات وحجم تهوية الوحدة الداخلية

انا انصحك قبل ماتبتدي في البنيان لازم تراعي جميع الأمور وإلا راح تتعب

اذا تبي نصيحتي ارجع للمهندس يعمل حساب ارتفاع البيت ويعمل لك حساب فتحات وممرات الدكتات مع التنسيق مع راعي الديكور

اهم شي الجسور الساقطة تقلبها تكون مخفيه عشان ماتكون عائق في طريق الدكتات

والشي الثاني مهم مهم جداً ارتفاع البيت انا انصحك تخلي ارتفاع البيت 4 ونص وإذا تقدر خله 5 متر ارتفاع من الارض لين السقف

لان مع الديكور راح تنزل 90 سنتيميتر يعني متر راح يروح عليك

انا ارتفاع بيتي 4.10 وبعد الديكور والتبليط بينزل وايد عندي السقف

على العموم الكلام يطول في موضوع الدكت والمركزي

بس نصيحه خل الدكتات من ماده الصاج مهب الفوم المغلف

وإذا حاب تجي تشوف شغل البيت عندي حياك في اي وقت لتفادي مشاكل التكيف

عني انا مركب مكيفات صيني من شركة الدرويش ميديا ( ام دي في ) هفي ديوتي

وشركة جري عندهم مكيفات الوحدة الداخلية والخارجية نفس اللي عند الدرويش

تقدر تزور معرضهم اللي في بدايت طريق سلوى وتشوف مكيف الدكت راكب وتشوف تبريدة

صدعتك بامور التكيف ومشاكلها

[معماري قطري]

ما قصرت يا بو سعود بالعكس إنت خبرتك في التكييف كبيرة وتنورنا بكل المشاكل لأَنك تمر فيها في الوقت الحالي .. إخونا السليطي من الشباب اللي عرفتهم من بدايات التصميم ومتابع معاه للآن وما شاء الله عليه مهتم ويتابع صح .. شرس مع الاستشاريين شكل استشاريه بيتعب وايد وتعجبني هذي النوعية من الملاك اللي يحبون يعرفون كل صغيرة وكبيرة.

اللي يحب يستفيد من الإستشاريين المفروض ياخذ الملاحظات بصدر رحب ويناقشها صح ويحلها أَول بأَول مب بس يصمم وخلاص المشكلة الكبيرة تكون في تنسيق هذي الأُمور .. وبعضهم فاهم يقول لك انا حدود دراستي هذي بس مثل هؤلاء من الاستشاريين المفروض يسجلون كل هذا مبدئياً في العقد حتى ما يظلمون نفسهم ولا يظلمون العميل

[Azizuk]

اخوي معماري المكاتب الاستشارية خلاص هم يشوفون راعي الفيلا وإلا شي بالنسبة للمشاريع الكبيرة

انت في نظره تعور راْسه بس يبي منك قيمة الزيارة حتى لو مايطلع للموقع

هو ينظر حق الإشراف على القصور والأبراج والمشاريع الكبيرة

اما صاحب الفيلا تعتبر له أتعاب المكتب ومصاريفهم المالية لا اكثر وإلا اقل

بس بعد التشديد عليهم بيتسنعون والقوانين الجديدة مالت قانون العمل بتضبط المحلات والتجار شوي والتلاعب عندهم

[معماري قطري]

الله يوفق إن شاء الله نشوف مهنية أكثر .. شغلة كبيرة أو صغيرة المفروض لها قوانين ومحددات وتتبعها مراقبة وعقوبات

[asulaiti]

الأخوة الكرام .. بوسعود ومعماري قطري .. الله يجزيكم كل خير على المداخلات القيمة جداً والتي سيستفيد منها أي شخص داخل في مشروع بناء ..

بالنسبة للتكييف باختار دكت سبلت لغرف النوم وباطلب تكون المكينة في غرفة الملابس

ليش في غرفة الملابس ؟؟
العادة يركبونها في الحمام .. ويقولون أفضل تكون هناك !

للحمام باخلي فتحة تهوئة من فوق يدخل منها هواء الغرفة البارد ويطلع مع الشفط للخارج وباخلي الشفاط يشتغل تماتيك مع فتح الباب

بالنسبة لعملية دخول الهواء البارد للحمام .. شرايك في فكرة فتحات شتر في الباب نفسه .. تكون موجودة في الأسفل؟ شفتها وايد في كذا مكان .. واحس انها عملية ..
وفكرة الشفاط يشتغل آلياً مع فتحة الباب فكرة رائعة .. لكن أنا فكرت .. بل قررت أن تشغيل وإطفاء مروحة الشفط يكون من داخل الحمام .. إما بمفتاح سويتش عادي بدل مايكون خارج الحمام يكون داخله .. أو عن طريق مفتاح حبل معلق بالسقف .. تسحبه مرة تشتغل المروحة .. تسحبه مرة ثانية تطفي المروحة .. يمكن أأمن من سوتيش معلق بالحائط يصيده ماي بالخطأ ولا شيء .. بينما الكهرباء فوق في السقف أأمن .. أنا شفتها في شقة سكنتها مرة في شمال بريطانيا .. الحبل نازل من السقف أول ما تدخل الحمام .. تسحبه تشتغل المروحة .. واحيانا تحتاج لأن تطفي المروحة وانت داخل الحمام .. فمافي داعي تفتح الباب وتمد يدك وتبند المروحة ... الخ ... لكن ما أدري عن توفر هذه المفاتيح في الدوحة ..

وخايف من شغل الدكتات ولو انترست غبار وقصة تنظيفها حتى لو البيت معزول زين

هذه النقطة ماجات على بالي .. فعلاً .. شلون تنظف الدكتات هذه ؟ أو ليش تنترس غبار ؟ مالها فلاتر مثلاً ؟؟

[asulaiti]

الشي اللي ابي أقول له بالنسبة للوحدة الداخلية معظم الشركات تأخذ صيني

بس الأهم شي الوحدة الخارجية هو الكمبرسر قلب المكيف

والله ياخوي بوسعود هذا الواقع للأسف .. المنتجات الصينية غزت أسواق العالم بشكل غير طبيعي .. مع أن توجد منتجات ذات جودة ممتازة .. لكن نادراً ما تجدها في السوق ..
تجدها بكثرة في الاسواق الاوروبية .. لكن في اسواقنا العربية صعب وجودها ولا اعرف ليش ..
اللي صار أن البداية تم استيراد النوعيات الرديئة بسبب سعرها المتدني .. وفي الاخير عمره الافتراضي قصير جداً .. وشوي شوي بدأنا نفقد الثقة في منتجات
هذا البلد ... لدرجة كل ماتسمع اسمها يطرى على بالك على طول ردائة المنتج ..
لكن الله المستعان .. تضطر احيانا القبول بها ..

ولازم مراعات وصلة الكهرباء اذا التكيف من اربع طن وطالع لازم يكون 3 فيز للوحدة الخارجية

أنا حالياً الخرائط مصممة على أنه التكييف يكون سبيلت حائط .. وحسب كلام المهندس أن لو حبيت اركب دكتات سبيلت ماعندي مشكلة ..
فهل اطلب منه مراعاة ذلك في خرائط الكهرباء ؟؟ أم الشركة التي سأتعاقد معها ستقوم هي بالمهمة ؟

في أمور كثيرة تتعلق باختيار نوع التكيف

عندك جسور ساقطه عندك فتحات وحجم تهوية الوحدة الداخلية

انا انصحك قبل ماتبتدي في البنيان لازم تراعي جميع الأمور وإلا راح تتعب

اذا تبي نصيحتي ارجع للمهندس يعمل حساب ارتفاع البيت ويعمل لك حساب فتحات وممرات الدكتات مع التنسيق مع راعي الديكور

اهم شي الجسور الساقطة تقلبها تكون مخفيه عشان ماتكون عائق في طريق الدكتات

هل تقصد أن أقول بتصميم الجسور بشكل عرضي حتى لا تتعارض مع الدكتات ؟
أنا ارتفاع بيتي الطابق الاول 4.20 م .. لو افترضنا وجود جسور كم بتكون نازلة من السقف ؟
وفي حالة تم وضع الدكتات .. ألا يمكن تمريرها أسفل الجسور ؟ وإذا صعبة .. كم يصفى لي من الارضية للسقف بعد وضع الدكتات أسفل الجسور؟

شاكر لك اخوي بوسعود مرة ثانية على مداخلتك القيمة ..

[بوخالد911]

الله يسهل عليك.

[Azizuk]

نعم اخوي السليطي

بالنسبة للكهرباء لازم تراعي حجم الواير ونوع الفيز للمكيف اللي راح تركبه

مثل ماقلت لك مكيفات سعة 4 طن وطالع لازم تكون الكهرباء الوحدة الخارجية 3 فيز

والوحدة الداخلية عادي

وبنسبة للارتفاعات عندك ممتازة بس لو تقدر ترفع انصحك انك ترفع على حسب موديل الجبس والديكورات اللي عندك وحجم الشبابيك اذا كانت بطول ارتفاع حائط الصالة

في أمور كثيرة لازم تراعيها قبل ما تبدأ البنيان او تتفاداها اثناء البنيان زي ماحصل معاي

عندك الجسور الساقطة تتراوح على حسب عرض وطول المكان

انا عندي عامود في الصالة غيرت مكانه مترين كبر حجم الجسر الساقط من 70 سنتيمتر الى 80 والعرض من 30 سنتيمتر الى 40

لان لازم بين كل 8 متر عامود وجسر ساقط

او اذا اذا تقدر تغير نظام خرسانة الأسقف البيت كله انصحك تغيرها الى فلات سلاب

تفتك من جميع الجسور الساقطة وتشكل على كيفك حجم الغرف وتوفر في كمية الحديد وسمك الخرسانة

نظام الفلات سلاب يستخدم للقصور والأبراج والعمارات

وتجيك سمك الخرسانة تقريباً ماتزيد عن 25 سنتيمتر وتفتك من شي اسمه جسر ساقط وإلا انك تقلب الجسر على فوق او انك تخفي الجسر

في أمور احنا مانعرفها والمهندس الإنشائي والاستشاري يعرفونها بس مايقول لك عليها

تخيل لو تخلي سمك الخرسانة من 36 سنتيمتر الى 20 سنتيمتر كم بتوفر من كمية حديد مستخدم وكمية خرسانة

في فرق كبير في السعر

شوف العمارات تجيك مفتوحة بس اعمده من غير جسور ساقطة وتقدر تتحكم في حجم الغرفة وتمرر الدكتات من غير عائق في طريقك

انا عندي في البيت عَصّب بين درج البيت ومكان ألفت نازل في نص مستوى الدرج بين الاستراحة الاولى لدرج والاستراحة الثانية نازل متر غير الجسر الساقط من اعلى سقف الغرفة اللي خلف الدرج وألفت

مثل ماقلت وراح أردد وأقول في أمور كثيرة تطلع لك اثناء البنيان بالإمكان انك تتفادها قبل

نصيحتي لك انك اذا ناوي تركب مكيفات نظام الدكت سوى كان سمي مركزي او مركزي

ارجع للمهندس إللى خطط لك البيت حتى لو تدفع زيادة احسن لك عشان تتفادى المشاكل من تكسر فتحات الدكتات ونظام الكهرباء وغير وغير من مشاكل

هذا غير ان الارتفاع عليك راح ينزل مع حجم الدكت وشكل الجبس والديكور اللي راح تختاره

انا مريت في أمور كثيرة ومشاكل مع التعديل صحيح سويت اللي انا ابي والحمدالله الأمور طيبه

بس بعد أحب انصح غيري عشان مايطيح نفس المشاكل اللي انا صارت عندي

كان مهندس اللي يخطط لي البيت يقولي معليش في أمور انت تقدر تتفاهم مع المقاول ويسوي لك اللي تبيه

بس في المقابل المقاول بيسوي شي وبيساعدك بس بعد بتطلع لك أشياء مب بالحسبان

عندك ممر بيبات الغاز النحاس للمكيف وين بتمر لو تغير اثناء التركيب تتفاجاء الكهربائي حاط بين البلاستيك قبل الصب في مكان تروح تبي تشبكه في الدور الثاني يطّلع لك ان في شباك وإلا عامود وإلا اي شي يعيق مرور البايب

من جذي انصحك صارت معاي في كذا مكان والحمدالله أوجدنا حل للمشكلة

وان شاالله الله يسهل لك امورك

صحيح أني أطول بالشرح وانا أسف على الايطالة

ولأكن لتعم الفايدة للمقبلين على البنيان

هذا غير الأخطاء الإملائية وكيفية التعبير في الموضوع