بيت بدون منهولات !!

[وحيد-الشوق]

السلام عليكم

يا اخوان شفت في بيت رفيج اخوي مافي ولا منهول عنده في الحوش ماشاء الله او بالاحرى ماشفت اغطية !! بس لقيت كم بيب طالع في الحوش وقالي هذا نظام كويتي غير متدوال في الدوحة هو ينصحني نشتغل نفس الشغل وقالي اقضل لك واجمل وانظف ومابتعاني من الحشرات لأنه عندنا منهولات كثيره ورا البيت ملاحظة البيت الي شفته دورين وبنيان تجاري اعتقد هل هذا النظام عملي وممتاز ام لا ملاحظة البايب طالع من تحت البلاط وفي بروز تقريباً 3 اماكن

يليت اصحاب الخبره يفيدونا

[معماري قطري]

شفت هالنظام في كتاب ووضحه واحد لي وطريقته مصمتة أكثر وسهلة أكثر واقتصادية بعد .. بس تحتاج تصميم مختص وحماية بخرسانة لمكان دوس السيارات وهذا مهم حتى للعادي .. وممكن تمريره قريب من حايط البيت ومن الأساسات وحتى بشكل قطري داخل البيت وفتحات الفحص والتنظيف ممكن تكون بمستوى الأرضية تقريباً .. سو بحث عنها في اليوتيوب .. الطريقة الأمريكية وباشوف انا وباحط في موضوع يوتيوبيات البناء لو حصلت شيء

[الرايــق]

طيب وكيف بتم الصيانه لو حصل خلل..

اللي اعرفه ان بيب الصرف موصل.من المنهول الخارجي للمنهول داخل حدود البيت
والمنهل موجود لعمل الصيانه من قبل اشغال

[معماري قطري]

طيب وكيف بتم الصيانه لو حصل خلل..

اللي اعرفه ان بيب الصرف موصل.من المنهول الخارجي للمنهول داخل حدود البيت
والمنهل موجود لعمل الصيانه من قبل اشغال

بايب الصرف الرئيسي كبير يكون في حدود 20 سم والبايبات الفرعية 10 سم تصب فيه وفيه تكون بايبات مركبه بوصلات شكل حرف y ومنها طالع بايب عمودي للفحص والتسليك لو دعت الحاجة .. انا شفت الطريقة وتابعت الشرح سريع وعارف انها فيها تفاصيل كثيرة صعبة على الغالبية يستوعبونها لذلك قلت لازم يكون فيه تصميم واشراف

فايدتها كبيرة خصوصاً تفتك من المنهولات وتكاثر الحشرات فيهم والبايب ممكن يمر قريب الجدار ويوفر مساحة كبيرة للزراعة .. انا ان شاء الله معتمدها لأي بنيان مستقبلي وانصح بها

[الرايــق]

اخوي يعطيك العافية انا مهندس مدني

حسب علمي المنهولات للصرف داخل الفيلا تكون مسؤولية اشغال عند الصيانه او حدوث خلل
طبعا ال sewer house connection
فشلون عمليا ممكن تطبق هالفكرة
الا اذا كان المنهول من خارج ال boundary wall

وهل مسموح او لا

[معماري قطري]

والله يا اخوي ما ادري عن مسؤولية أشغال بس توقعي هم مسؤولين عن المنهول الأخير اللي عند الباب ( باب الحوش ) مثل ما المياه مسؤولين عن البايب الخارجي اللي يوصل للعداد ومثل ما كهرماء مسؤولين عن خط الكهرباء الخارجي .. داخل حدود ملكيتك مسؤوليتك وتجيب شركات خاصة .. والله يعينهم أشغال وايد عليهم الشغل الخارجي.

عن شلون الصيانة واللي بتكون يا ازالة واستبدال أو تسليك فهذي بالنسبة للتسليك أو التنظيف مثل ما ذكرت قبل فيه فتحات حول 20 سم دائرية من نفس البايب تنفتح وتتسلك.

اتشرف بمداخلتك وحتى انا بالنسبة لي هذا الموضوع جديد علي وان شاء الله اعرف عنه أكثر.

[Azizuk]

اليوم تشرفت بحضور ولقاء العضو وحيد الشوق والعضو السليطي ونعم الرجال

جدا محترمين وراقين في التعامل

و سعدت بلقاء أعضاء المنتدى

وذلك لاكتساب الخبرات ومناقشة بعض الامور المتعلقة بالبناء

كما تشرفت بالسابق بلقاء عملاق وامبراطور قسم البناء والديكور

الأخ المهندس معماري قطري ونعم الرجل

وبخصوص المنهولات انا غامرت وسويت المنهولات مخفيه او بالاصح

المنهولات موجوده بس غير مكشوفه صراحه مب عارف كيف اشرح لكم الموضوع بالضبط

عندي صور راح انزلها لتعم الفايدة للجميع وطبعا الصور راح تنزل مقلوبة لاني بنزلها من الآي فون

ناسف لعدم الاستطاعة تنزيل الصور

راح ارسل الصور لصاحب الموضوع اذا قدر ينزل الصور

[معماري قطري]

انا كسول يا بو سعود وعدتك بمرور سريع وللحين ما أوفيت

بالنسبة لأَنظمة الصرف الصحي فيه كم نوع .. حتى فيه منهولات تجي جاهزة وصغيرة شوي بس النظام الأمريكي انا اشوفه أفضلهم لأَنه محكم الإغلاق وحتى رجوع الروائح والمياه مرة ثانية مستحيل .. One way flow to the sewer main line .. والزهيوي مستحيل يدخل من منهول الحكومة الا يسبح ضد التيار

هذي الواي كونكشن ومنها نربط خط ثاني بالرئيسي أو نعمل فتحة تسليك عمودية

[الرايــق]

يعطيك العافية اخوي معماري علي الافادة

اخوي بخصوص المنهول اللي داخل البيت اللي جاي من خط الصرف الخارجي
هو مسؤولية اشغال بدليل اي تطوير للصرف الصحي بالمنطقة بيشمل houseconnection للفلل ومجبور المقاول يدخل لداخل الفيلا يقوم بتغيير البايب اللي جاي من المنهول الخارجي لمنهول البيت كاملا

غالبا لا يكون هناك منهول خارج الفيلا للصرف لان ال corridor محجوز لخطةط اوريدو و كهرماء والغاز و و الخ..
الا في حالات نادرة يحكمها اتجاه ال flow اللي جاي من المنهول الخارجي يكون مسوي زاوية اكبر من المسموح بها ولا يصلح وقتها التوصيل لمنهول داخل المنزل صعب فيتم انشاء منهول خارجي لتغيير الاتجاه كما المطلوب والمسموح به..

[معماري قطري]

الله يعافيك إخوي الرايق ومشكور على التوضيح .. وهذا يعني إن النظام ممكن استعماله وربطه بالمنهول الأخير وقبل المنهول الأخير لازم نسوي منهول واحد للنظام للفحص ولإزالة أي عائق كبير