السراميك الاسباني و الصيني ...سوال لو سمحتوا

[$الملياردير$]

الله يصبحكم بالخير ..يالربع بغيت استفسر الله يرضى عليكم عن الفرق الجوهري بين السراميك الاسباني و الصيني ...من ناحية الجودة و اللون ...علما ان المحلات اللي تبيع اسباني تقول لا تاخذ صيني ... و الصيني يقولو انا نخب اول ...يوجد في بعض المحلات تقارب في الاسعار ...الواحد احتار بعضهم يقولون انه يصنع في الصين و يكتبون عليه اسباني هل هذا صحيح ...ارجو النصيحة وجزاكم الله خير ...ولو تنصحوني بمحلات تكون ثقة مع الشكرالجزيل

[qtr432]

الله يصبحك بمثله،،
الاسباني افضل طبعا بدون مقارنه وغالباً اهل الصيني بقولون الصيني افضل وكلهم نفس الشي ولكن عند التركيب تلاحظ الفرق، ونصيحه لك ركب بورسلان افضل واقوى من السيراميك..
وعن المحلات هناك محلات بطريق سلوى ومنها على سبيل المثال الضحى وكنتوار وغيرهم واسعارهم معقوله وعندك الافضل والاغلى لدى المتحده وايضا نانبيا عنده الرخيص والغالي وكلهم جيدين.
وعن تجربه تم تركيب صيني وكان زيور جوينت واثناء التركيب قالي المبلط لا يحبذ التركيب بالزيرو لانه هناك فروقات بالاحجام ولا يستوي الخط بالخط وانا اثق بكلامه وعمله وقتله لا ركب غرفه وحده وعلى مسؤليتي واتضح بعد التركيب فعلاً كلامه كان صحيح ولكن مع وضع الروبه قلل من المشكله الظاهريه بالعين، واذا حبيت تبتعد عن هذي المشاكل عليك بالصليب (القطعة البلاستيكيه) اثنين ملي لانها تمتلي المساحه الفاصله بين البلاطتين بالروبه مما تخفي العيوب ان وجدت وان شاء الله لا توجد.
ولا تنسى موضوع التمدد عند تركيب بلاط الحوش وبلاط السطح ان وجد ويكون اثنين ملي كل اربعه أو سته متر، يضع فيه ماده مثل الفلين تسمح له بالتمدد والانكماش واصحاب الشركات المختصه أو منفذ المشروع ممكن يفيدك بالتفاصيل اكثر.

[$الملياردير$]

جزاك الله خير ... و تسلم يمينك ...اللي اعرفه ان السراميك في الحمامات و البورسلان في الأرضيات صح ... والا وش قصدك ياخوي

[معماري قطري]

اسمح لي بالرد إخوي المليونير

السيراميك والبورسلان تفرق بينهم من البسكوتة أو الحشوة التحتية .. السيراميك طريقة قديمة وعبارة عن حشوة طينية ( فخارية ) وفوق يصبون اللون اللي يخلط يدوياً أو ميكانيكياً ويجي من مواد زجاجية .. الطريقة معروفة والتصاميم معروفة وتنفذ في كثير من الدول من زمان .. وفي الغالب ما تجي المقاسات وحدة

عجينة البورسلان أسمك وتجي مضغوطة أكثر ويحتاج تكنولوجيا أعلى وضغط وحرارة عاليين حق يصنع وطبقة التزجيج تكون أوقات من مادة البورسلان ومضغوطة وناعمة ودرجة شرب الجسم للماء قريبة من الصفر ودرجة الصلابة كبيرة ودرجة الكحت .. اللي هي الخدوش أو مقاومة الخدوش تكون كبيرة وأعلى حتى من الغرانيت

ببساطة غالبية الصيني يجيك بورسلان رديء بنكهة السيراميك الرديء .. يعني ممكن تحصل سيراميك أسباني أو ايطالي أو حتى صيني جيد أعلى من البورسلان الصيني .. فيه نوعيات زينة بس عندنا تنافس في الحصول على الرخيص برخيص وبيعه بأضعاف سعره

البورسلان الصيني بعضه تحصل طلاء السيراميك عليه وسايل على الأطراف وتخدشه تواير الكراسي وتعلم فيه ويمسك الغبار ولا تجي قطعه متساوية تبي تشوف الفروقات اسأل عن سيراميك فالنتينو الايطالي عند شبيب وعلي العطية وبوختال الألماني نسيت عند من وفيه كم نوع ايطالي عند العمودي وشوف تدمر .. العبيدلي اظن ولا المسند ممكن عندهم بختال وممكن عند غيرهم .. وكثير من مصنعين السيراميك اتجهوا للبورسلان ولو تحصل ماركة تصنع في الصين خذ من منتجهم بس يكون مثل ما شرحت مب بورسلان بنكهة السيراميك

لو هالشلة كلهم عندهم صيني خذ سيراميك أفضل لك أو شوف من دول حولنا .. سيراميك الجوهرة مصري من أجود الأنواع وفيه اسم ثاني نسيته وفيه صناعة مغربية بنقوشات اسلامية ويجي غالي ومطلوب في اوروبا وأمريكا وما ادري اذا يوصلنا أو لا لكن في السعودية مؤكد موجود

[$الملياردير$]

جزاك الله خير ... اخوي الكبير معماري ... دائماً وافي في شرحك ... جعل والديك في الجنة

[معماري قطري]

جزاك الله خير ... اخوي الكبير معماري ... دائماً وافي في شرحك ... جعل والديك في الجنة

آمين ووالديك ووالدي من يقرأ

طريقة التركيب ومواد التركيب هي اللي تبرز نوع السيراميك أو تخربه

التركيب على صبية مستوية ولو بلاصق يحتاج تشميخ نسوي تشميخ وتخشين للصبية أو البلاستر ولو اللاصق ما يحتاج ما فيه داعي للتشميخ .. المونة اللي بين البلاط حسب لونه ومكانه وشكثر الفراغ .. زيرو جوينت عندك السائلة الشفافة أو الناعمة جداً حتى تدخل بين الفراغات البسيطة .. فيه نوعيات تحتاج تحط لون يختلف .. مثلاً البلاط عندك أسود وبتسوي فراغ 1 سم أو حتى عندك بعض الأنواع تقدر تخليه 2 سم بدون ما تتشقق المونة وتقدر تحط ألوان جريئة مثل الأحمر والأصفر وغيرهم حسب فكرة التصميم والمناسب عندك

تعودنا على البيج والقراوت المقارب للون البلاط ولا نغامر بلون عكس لون البلاط وحتى لون بلاط غير وشوي داكن

[@north_star@]

النوعيات الممتازة من البلاط الصيني صعب تحصلها بقطر أو شبه مستحيل لان الغالبية يجيبون اردأ نوعية ويقولك نخب أول وهي تكون نخب عاشر ... خلك على البلاط الايطالي أو الاسباني مثل ما تفضلوا الاخوان .... وبخاصة البورسلان ومن مساوئ البورسلان الصيني انه يمتص السوائل ويطبع بلون البورسلان طبعا بعض النوعيات ومرات تختلف الاحجام وحتى لو اختلف الحجم راح يأثر على التركيب ونصيحة لا تاخذ أسباني أو ايطالي الا ماركات معروفة أو على الاقل مجربة .

[$الملياردير$]

جزاك الله خير اخوي نورث ستار ...مثل ماتفضلت الخوف ان اللي يجيك السوق صيني نخب ردي ... على انهم ألوانهم بعضها حلو جدا

[بوخالد911]

الله يوفقكم.

[$الملياردير$]

الله يوفقكم.

ويوفقك اخوي بوخالد